امریکہ میں 10 دن قبل کورونا ویکسین کی سپلائی اور ٹیکہ کاری کا عمل شروع ہونے کے بعد سے اب تک 10 لاکھ سے زیادہ لوگوں کو پہلی خوراک دی جاچکی ہے۔

واشنگٹن: امریکہ میں 10 لاکھ سے زیادہ لوگ کورونا وائرس کو روکنے والی ویکسین کی پہلی خوراک لے چکے ہیں۔

بیماری پر کنٹرول اور روک تھام کے مرکز (سی ڈی سی) کے ڈائریکٹر رابرٹ ریڈ فیلڈ نے ایک بیان میں یہ اطلاع دی۔ انہوں نے کہا کہ امریکہ میں 10 دن قبل کورونا ویکسین کی سپلائی اور ٹیکہ کاری کا عمل شروع ہونے کے بعد سے اب تک 10 لاکھ سے زیادہ لوگوں کو پہلی خوراک دی جا چکی ہے۔

مسٹر ریڈ فیلڈ نے ملک کے شہریوں سے اپیل کی ہے کہ جب تک کووڈ ویکسین دستیاب نہ ہو جائے تب تک ماسک پہننے اور دیگر احتیاط برتنے میں کوتاہی نہ برتیں۔

دوا ساز کمپنی فائزر ۔ بایواینٹیک اور ماڈرنا نے امریکہ میں ہفتے کے آخر تک دو ٹیکوں کے لئے ایک کروڑ ویکسین کی سپلائی کی ہے۔

ایک نظر ادھر بھی: 

جنوری تک کورونا کی چار کروڑ ویکسین تیار ہوگی: امریکہ

مشرقی افریقی ملک ایتھوپیا میں کچھ نامعلوم بندوق برداروں کے حملے میں 90 سے زائد افراد کی موت ہوگئی۔ حملہ آوروں نے اس وقت حملہ کیا جب لوگ اپنےگھروں میں سو رہے تھے۔

عدیس ابابا: مشرقی افریقی ملک ایتھوپیا کے مغربی صوبہ بینشانگول گوموز میں کچھ نامعلوم بندوق برداروں کے حملے میں 90 سے زائد افراد کی موت ہوگئی۔ میڈیا رپورٹوں کے مطابق حملہ آوروں نے بدھ کے روز بیکوزی کیبلے، بولین وریڈا اور میٹیکل علاقوں میں اس وقت حملہ کیا جب لوگ اپنےگھروں میں سو رہے تھے۔

نیشنل عدیس اسٹینڈرڈ نیوز میگزین نے ایک عینی شاہد کے حوالے سے بتایا کہ "لوگوں کا قتل کیا گیا اور ان کے گھروں کو لوٹا گیا۔ ایک دیگر شاہدین نے بتایا کہ علاقے کے باشندوں نے پولیس کو حملے کی اطلاع دی تھی لیکن پولیس کے پہنچنے سے پہلے حملہ آور فرار ہوچکے تھے۔

قابل ذکر بات یہ ہے کہ ایتھوپیا کے مغربی علاقے میں متعدد قبائلی گروہ آباد ہیں۔ یہاں حملہ آور امہارا برادری کے لوگوں کو اپنا نشانہ بناتے ہیں۔ ایتھوپیا کے ہیومن رائٹس کمیشن نے حملے کی تصدیق کرتے ہوئے تحقیقات کا مطالبہ کیا ہے۔

اسے بھی پڑھیں:

نائیجیریا میں اسکول پر نامعلوم ہتھیار بند افراد کا حملہ، تقریباً 400 بچوں کا اغوا

وزیر تعلیم پارتھو چٹرجی نے آج اعلان کیا ہے کہ مغربی بنگال سیکنڈری اور ہائر سیکنڈری امتحانات جون میں ہوں گے۔ امتحانات کے شیڈول 2021 میں جاری کئے جائیں گے۔

کلکتہ: مغربی بنگال کے وزیر تعلیم پارتھو چٹرجی نے آج اعلان کیا ہے کہ مغربی بنگال بورڈ آف سیکنڈری ایجوکیشن (ڈبلیو بی بی ایس ای) مدھیامک (کلاس 10) اور ہائر سیکنڈری (کلاس 12) بورڈ کے امتحانات یکے بعد دیگرے جون میں منعقد ہوں گے۔

ریاستی وزیر نے کہا کہ مدھیامک پرکچھا اور ایچ ایس ای کونسل نے یہ تجویز پیش کی ہے کہ بورڈ امتحانات جون میں منعقد کرائے جائیں۔ وزیر تعلیم نے بتایا کہ امتحان کا شیڈول 2021 میں جاری کیا جائے گا۔

گذشتہ روز مرکزی وزیر تعلیم رمیش پوکھریال نے ملک بھر کے متعدد اساتذہ سے بات چیت کے دوران اعلان کیا تھا کہ اگلے سال جنوری یا فروری میں سی بی ایس ای بورڈ کے کسی بھی امتحانات کا انعقاد نہیں کیا جائے گا کیونکہ ملک میں کووڈ 19 کے معاملات میں مسلسل اضافہ ہورہا ہے۔

تعلیمی سال 2020 کے چھٹی سے نویں جماعت کے طلباء کو بغیر امتحان کے ترقی

اس سے قبل مغربی بنگال بورڈ آف سیکنڈری ایجوکیشن نے کورونا وائرس کی وجہ سے ڈبلیو بی بی ایس ای سے وابستہ اسکولوں میں بغیر کسی سالانہ امتحان کے 2020 کے تعلیمی سال کے لئے چھٹی سے نویں جماعت کے طلباء کو اگلی کلاس میں ترقی دینے کا فیصلہ کیا تھا۔

اسکولوں کے دوبارہ کھولنے کی ممکنہ تاریخ کے بارے میں ریاستی حکومت کی طرف سے کوئی ہدایت سامنے نہیں آیا ہے۔ وزیر تعلیم پارتھو چٹرجی نے پہلے کہا تھا کہ کووڈ 19 میں صورتحال بہتر ہونے کے بعد حکومت اس معاملے میں رائے لے گی۔

چٹرجی نے مزید کہا تھا کہ جیسے نصاب کمیٹی کی سفارش کی گئی ہے مدھیامک (کلاس 10) اور ہائر سیکنڈری (کلاس 12) نصاب کے 30 فیصد کو کم کیا جائے گا کیونکہ کورونا وائرس کی وجہ سے مارچ سے ہی ملک بھر کے تعلیمی ادارے بند ہیں۔

19 سالہ لڑکی کے ذریعہ اپنی پسند کے لڑکے سے شادی کئے جانے کے بعد کلکتہ ہائی کورٹ میں والد نے عرضی دائر کرتے ہوئے کہا تھا کہ لڑکی کو گمراہ کرکے شادی کی گئی ہے۔

کلکتہ: بیٹی کی شادی کو رد کرنے کی والد کی درخواست پر سماعت کرتے ہوئے کلکتہ ہائی کورٹ نے کہا ہے کہ اگر کوئی بالغ اپنی پسند کے مطابق شادی اور مذہب تبدیل کرنے کا فیصلہ کرتا ہے تو اس میں کسی کو بھی مداخلت کرنے کا حق نہیں ہے۔

19 سالہ لڑکی کے ذریعہ اپنی پسند کے لڑکے سے شادی کئے جانے کے بعد کلکتہ ہائی کورٹ میں والد نے عرضی دائر کرتے ہوئے کہا تھا کہ لڑکی کو گمراہ کرکے شادی کی گئی ہے۔ ان کے ذریعہ ایف آئی آر درج کئے جانے کے بعد مجسٹریٹ کے سامنے ان کی بیٹی کا جو بیان درج کرایا تھا وہ مناسب ماحول نہیں تھا۔

اس عرضی پر سماعت کرتے ہوئے جسٹس سنجیب بنرجی اور جسٹس ارجیت بنرجی پر مشتمل ڈویژن بنچ نے کہا کہ اگر کوئی بالغ اپنی پسند کے مطابق شادی کرتا ہے اور اس کے آبائی گھر میں منتقل ہونے اور آبائی گھر واپس نہیں آنے کا فیصلہ کرتا ہے تو اس معاملے میں کوئی مداخلت نہیں کرسکتا ہے۔

والد کی شکایت پر ہائی کورٹ کی ہدایت

والد کی شکایت پر ہائی کورٹ نے ہدایت دی تھی کہ خاتون تہتہ میں سینئر ترین ایڈیشنل ڈسٹرکٹ جج کے سامنے بیان دیں۔ بنچ نے کہا کہ ایڈیشنل جج کے سامنے لڑکی کے بیانات دینے کے باوجود والد کے شبہات ختم نہیں ہوئے ہیں۔ والد کی نمائندگی کرنے والی وکیل، سسمیتا سہا دتہ نے ڈویژن بنچ کے سامنے دعویٰ کیا کہ شوہر ندیا ضلع کے تہتہ میں عدالت کے احاطے میں موجود تھا جب خاتون جج کے سامنے پیش ہوئی تھیں۔

بنچ نے ہدایت کی کہ والدین کے شبہات کو ختم کرنے کے لئے 23 دسمبر کو ایڈیشنل پبلک پراسٹیکوسر باپولی سے ملاقات کرے گی۔ بنچ نے کہا کہ جب لڑکی باپولی سے ملاقات کریں گی اس وقت اس کے شوہر سمیت کمرے میں کوئی شخص موجود نہیں رہے گا۔ اس معاملے کی کی 24 دسمبر کو دوبارہ سماعت ہوگی۔ باپولی عدالت میں مختصر رپورٹ پیش کریں گے۔

پونہ شہر کے پولیس کمشنر ڈاکٹر شیشوے نے بی جے پی رکن اسمبلی کی شادی کی تقریب میں کورونا قانون کی دھجیاں اڑانے اور تقریب میں مہمانوں کی اکثریت کو بغیر ماسک پہنے پائے جانے کی تحقیقات کا حکم جاری کیا ہے۔

ممبئ: مہاراشٹر کے پونہ شہر کے پولیس کمشنر ڈاکٹر شیشوے نے آج یہاں گذشتہ دنوں شہر میں منعقدہ بی جے پی کے رکن اسمبلی کی شادی کی تقریب میں کورونا بیماری سے متعلق معاشرتی دوری بنائے رکھنے والی رہنمایانہ ہدایتوں کی دھجیاں اڑانے اور تقریب میں مہمانوں کی اکثریت کو بغیر ماسک پہنے پائے جانے کی تحقیقات کا حکم جاری کیا ہے۔

شادی کی تقریب میں چندرکانت پاٹل اور دیویندر فڈنویس کی شرکت 

پولیس کمشنر نے متعلقہ پولیس اسٹیشن کے اسسٹنٹ کمشنر کو حکم دیا ہے کہ وہ اس ضمن میں تحقیقات کرکے اپنی رپورٹ پیش کریں۔ واضح رہے کہ شادی کی اس تقریب میں ریاست کے بی جے پی کے سربراہ چندرکانت پاٹل اور سابق وزیر اعلی دیویندر فڈنویس نے بھی شرکت کی تھی۔

رام ستپوتے ریاست کے شولاپور شہر سے پہلی مرتبہ بی جے پی کی ٹکٹ پر رکن اسمبلی منتخب ہوئے ہیں اتوار کے روز انکی شادی کا استقبالیہ پونہ شہر میں منعقد کیا گیا تھا جسکا ویڈیو سوشل میڈیا پر وائرل ہوا تھا اور وہ ریاست کے سیاسی گلیاروں میں موضوع بحث بنا ہوا ہے۔

ویڈیوز میں بی جے پی کے قدآور لیڈران بغیر ماسک پہنے نظر آئے

ویڈیوز میں بی جے پی کے قدآور لیڈران چندرکانت پاٹل، دیویندر فڈنویس، پرساد لاڑ اور دیگر کو بغیر ماسک پہنے لوگوں سے انتہائی قریب سے بات چیت کرتے ہوئے دکھایا گیا تھا جو کورونا وبا کے دوران معاشرتی دوری بنائے رکھنے والے اصولوں کے خلاف ہے۔

مرکزی حکومت و ریاستی حکومتوں نے لاک ڈاؤن میں نرمی برتنے کے لئے جو رہنمایانہ خطوط مرتب کئے ہیں اسکے مطابق شادی کی تقریب سمیت کسی بھی سماجی تقریب میں صرف پچاس 50 افراد ہی کی اجازت دی گئی ہے۔ جبکہ مذکورہ شادی کی اس تقریب میں بیک وقت ہال میں سینکڑوں افراد موجود تھے۔

راہل گاندھی نے  براہ راست وزیر اعظم نریندر مودی سے سوال کیا کہ اب تک دنیا میں 23 لاکھ افراد کو کووڈ ویکسین کے قطرے پلائے جاچکے ہیں، ہندوستان میں کووڈ کے خلاف ویکسی نیشن کب شروع کی جائے گی؟

نئی دہلی: کانگریس کے سابق صدر راہل گاندھی نے کہا ہے کہ دنیا کے بہت سے ممالک میں کووڈ وبا کو روکنے کے لئے ویکسینیشن مہم شروع ہوچکی ہے۔ اب تک لاکھوں افراد کو یہ ویکسین مل چکی ہے لیکن ہمارے یہاں اس بارے میں کوئی قدم نہیں اٹھایا گیا ہے۔

مسٹر گاندھی نے وزیر اعظم نریندر مودی سے براہ راست سوال کیا کہ اب تک دنیا میں 23 لاکھ افراد کو کووڈ ویکسین کے قطرے پلائے جاچکے ہیں، لہذا وہ (مسٹر مودی) بتائیں کہ ہندوستان میں کووڈ کے خلاف ویکسی نیشن کب شروع کی جائے گی۔

راہل گاندھی نے ٹویٹ کرکے مسٹر مودی سے سوال کیا ’’اب تک دنیا میں 23 لاکھ افراد کو کووڈ کے قطرے پلائےجا چکے ہیں۔ یہ عمل چین، امریکہ، برطانیہ، روس میں شروع ہوچکا ہے۔ مسٹر مودی مجھے بتائیں کہ ہندوستان کا نمبر کب آئے گا۔‘‘

23 lakh people in the world have already received Covid vaccinations.

China, US, UK, Russia have started…

India ka number kab ayegaa, Modi ji? pic.twitter.com/cSmT8laNfJ

— Rahul Gandhi (@RahulGandhi) December 23, 2020

اس کے ساتھ ہی انہوں نے ایک گراف بھی پوسٹ کیا ہے جس میں بتایا گیا ہے کہ چین میں اب تک زیادہ تر لوگوں کو قطرے پلائے جاچکے ہیں۔ اس کے بعد امریکہ اور برطانیہ ہے اور چوتھے نمبر پر روس ہے۔

اسرائیل میں آئندہ سال 23 مارچ کو پارلیمانی انتخابات ہوں گے۔ اسرائیلی پارلیمنٹ کنیسٹ کے اسپیکر یریو لیون نے یہ اطلاع دی۔

کسانوں کی حمایت میں ”کسان نیائے مارچ“ نکال رہے جن ادھیکار پارٹی کے کارکنان پر پولیس نے کی لاٹھی چارج، کئی کارکنان زخمی ہوگئے۔ اس دوران پپو یادو بیچ سڑک پر لیٹ گئے۔

پٹنہ: کسان تحریک کی حمایت میں ”کسان نیائے مارچ“ نکال رہے جن ادھیکار پارٹی کے کارکنان پر آج ہوئی پولیس لاٹھی چارج میں متعدد کارکنان زخمی ہوگئے۔

دارالحکومت پٹنہ میں بائی پاس کے پہاڑی سے جاپ سپریمو اور سابق رکن پارلیمنٹ راجیش رنجن عرف پپو یادو کی قیادت میں کسان تحریک کی حمایت میں بڑی تعداد میں کارکنان نے مارچ نکالا۔ مارچ جیسے ہی کچھ آگے بڑھا تو پولیس نے روکنے کی کوشش کی لیکن کارکنان گورنر ہاﺅس کی جانب پیش قدمی پر بضد تھے۔

پولیس اور جنرل ایڈمنسٹریشن کے سنیئر افسران کے سمجھانے کے باوجود جب کارکنان نہیں مانے تب پہلے واٹر کینن کا استعمال کیا، جس سے بھگڈر کی صورتحال پیدا ہوگئی ۔ ان سب کے مابین مسٹر یادو بیچ سڑک پر لیٹ گئے۔ اس دوران کارکنان مشتعل ہوگئے، جس کی وجہ سے پولیس کو لاٹھی چارج کرنا پڑا۔ لاٹھی چارج سے کچھ کارکنان زخمی بھی ہوگئے۔

دہلی کی سرحدوں پر دھرنے پر بیٹھے کسانوں کے احتجاج کے سبب دہلی، ہریانہ، راجستھان اور اترپردیش کے علاقوں میں تقریبا 14 ہزار کروڑ روپے کا نقصان ہوا ہے۔

نئی دہلی: تجارتی تنظیم ایسوسی ایشن آف آل انڈیا مرچنٹس کنفیڈریشن نے دعوی کیا ہے کہ دہلی کی سرحدوں پر دھرنے پر بیٹھے کچھ ریاستوں کے کسانوں کے احتجاج کے سبب دہلی، ہریانہ، راجستھان اور اترپردیش کے علاقوں میں تقریبا 14 ہزار کروڑ روپے کا بہت بڑا نقصان ہوا ہے۔

کنفیڈریشن نے منگل کو یہ جائزہ جاری کرتے ہوئے کہا کہ کسانوں کے احتجاج کی وجہ سے بیس فیصد ٹرک ملک کی دوسری ریاستوں سے دہلی نہیں آ رہے ہیں۔ دہلی سے دوسری ریاستوں کو بھیجے جانے والے سامان پر بھی بری طرح اثر پڑا ہے۔ تاہم، دہلی میں ضروری اشیا سمیت دیگر اشیا کی کوئی قلت نہیں ہے۔

فیڈریشن نے ایک بیان میں کہا ہے کہ دہلی میں اصل سپلائی قریبی ریاستوں سے ہوتی ہے۔ اس کے علاوہ دوسری ریاستوں سے بھی سامان دہلی آتا ہے۔ کسانوں کے احتجاج کی وجہ سے تقریبا 14 ہزار کروڑ روپے کا کاروبار کا نقصان ہوچکا ہے۔ کنفیڈریشن نے حکومت سے مطالبہ کیا ہے کہ وہ جلد سے جلد احتجاج کو ختم کرے تاکہ عام کاروبار کو بحال کیا جاسکے۔

اعداد و شمار کے مطابق، دہلی میں روزانہ تقریبا 50 ہزار ٹرک مختلف ریاستوں سے ملک بھر میں سامان لاتے ہیں اور روزانہ 30 ہزار کے قریب ٹرک دہلی سے باہر دوسری ریاستوں میں جاتے ہیں۔ سامان کی نقل و حرکت عام طور پر دہلی – جے پور، دہلی – متھورا، آگرہ ایکسپریس وے، دہلی – غازی آباد، دہلی – چندی گڑھ روٹ وغیرہ سے ہوتی ہے۔ سڑک کی ان نقل و حرکت کی وجہ سے، ان پر ٹریفک درہم برہم ہے۔

ممبئی پولیس نے ایک کلب میں چھاپہ مارا جہاں کورونا کی خلاف ورزی کے الزام میں ہندوستانی ٹیم کے سابق بلے باز سریش رینا، مشہور گلوکار گرو رندھاوا سمیت 34 لوگوں کو گرفتار کیا گیا۔

ممبئی: ہندوستانی ٹیم کے سابق بلے باز سریش رینا کو ممبئی ہوائی اڈے کے پاس کورونا سے متعلق رہنما خطوط کی خلاف ورزی کے معاملے میں حراست میں لیا گیا ہے۔ بعد میں انہیں رہا کردیا گیا۔

پولیس نے ممبئی کے ایک کلب میں چھاپہ مارا جہاں کورونا کی خلاف ورزی کے الزام میں رینا، مشہور گلوکار گرو رندھاوا سمیت 34 لوگوں کو گرفتار کیا گیا۔ ساہر پولیس تھانہ کے سینئر افسر نے بتایاکہ کووڈ – 19 سے متعلق رہنماخطوط کی خلاف ورزی کے معاملے میں حراست میں لئے گئے لوگوں میں رینا اور رندھاوا بھی شامل ہیں۔ حالانکہ ملزمین کو بعد میں بیل پر رہا کردیا گیا۔

ممبئی پولیس نے بتایاکہ رینا سمیت 34 ملزمین کو دفعہ 188،269 کے تحت اور عالمی وبا کی دفعہ کے تحت حراست میں لیا گیا ہے۔ ان لوگوں کی گرفتاری ڈریگن فلائی پب سے ہوئی جہاں کورونا کے رہنما خطوط کی خلاف ورزی کی گئی۔

واضح رہے کہ پیر کے روز مہاراشٹر حکومت نے کورونا  وائرس کو پھیلنے سے روکنے کے لئے رات کو کرفیو نافذ کرنے کافیصلہ کیا تھا۔ نئے سال کے پیش نظر ریاستی حکومت نے ممبئی میں 22 دسمبر سے پانچ جنوری تک کئی پابندیاں عائد کی ہیں۔