مہاراشٹرا کے تھانے میں واقع ایک اسپتال میں آکسیجن ختم ہونے کی وجہ سے اسپتال کے آئی سی یو میں داخل 12 مریضوں کو دوسرے اسپتال منتقل کرنا پڑا۔ ذرائع کے مطابق اس اسپتال میں کووڈ کے 42 مریض داخل تھے، ان میں سے 12 آئی سی یو میں تھے۔

تھانے: مہاراشٹرا کے تھانے میں واقع ایک اسپتال میں آکسیجن ختم ہونے کی وجہ سے انتہائی نگہداشت یونٹ (آئی سی یو) میں داخل کورونا وائرس سے متاثر 12 مریضوں کو دوسرے اسپتال منتقل کیا گیا ہے۔

ذرائع نے بتایا کہ منگل کی صبح یہاں واقع ایک اسپتال میں آکسیجن ختم ہوگئی جس کی وجہ سے اسپتال کے آئی سی یو میں داخل 12 مریضوں کو دوسرے اسپتال منتقل کرنا پڑا۔ ذرائع کے مطابق اس اسپتال میں کووڈ کے 42 مریض داخل تھے، ان میں سے 12 آئی سی یو میں تھے۔

دریں اثنا ضلع کے وزیر تحفظ ایکناتھ شندے نے ضلع میں وبا کی صورتحال، سرکاری اور نجی اسپتالوں میں آکسیجن اور ریمڈیسیور انجکشن کی دستیابی کا جائزہ لیا۔ اس دوران انہوں نے اسپتالوں کو آگ بجھانے والے آلات، آکسیجن وغیرہ کے آڈٹ تیسرے فریقوں سے کروانے کی ہدایات دیں۔ انہوں نے کورونا میں مبتلا اور اسپتالوں میں داخل خواتین مریضوں کی حفاظت پر خصوصی توجہ دینے کی ہدایت دی ہے۔

دہلی حکومت کورونا بحران کے وقت مہاجر، دہاڑی اور تعمیراتی مزدورں کی مالی مدد کے لیے ہمیشہ تیار ہے۔ دہلی کے وزیراعلیٰ اروند کیجریوال نے بھی مزدوروں اور مہاجروں سے اپیل کی ہے کہ وہ دہلی نہ چھوڑیں کیونکہ دہلی حکومت ان کے لیے ہر طرح کا تعاون یقینی بنا رہی ہے۔

نئی دہلی: دہلی حکومت کورونا وائرس (کووڈ-19) کے دوران متاثر ہونے والے رجسٹرڈ مزدوروں اور ان کے اہل خانہ کو طبی سہولت کے طور پر پانچ ہزار سے 10 ہزار روپیے کی مالی مدد دے گی۔

دہلی حکومت کے محکمہ مزدور نے آج اس کا اعلان کیا۔ متاثر ہوئے رجسٹرڈ مزدوروں کو پانچ سے 10 ہزار روپیے کی امدادی رقم دی جائے گی۔ تعمیراتی مزدورں کی آر ٹی پی سی آر رپورٹ کی آئی سی ایم آر کے پورٹل پر جانچ کرکے امدادی رقم براہ راست ان کے کھاتوں میں بھیجی جائے گی۔ یہ امدادی رقم کورونا کے دوران مزدوروں کے مالی بحران کو کم کرنے میں کارآمد ہوگی۔

انہوں نے کہا کہ دہلی حکومت کی جانب سے مہاجردہاڑی اور تعمیراتی کاموں میں سرگرم مزدوروں کی دیگر ضروریات کو مکمل کرنے کے لیے دہلی کے تمام اضلاع میں کئی اسکول اور کنسٹرکشن سائٹ پر 150 سے زیادہ فوڈ ڈسٹری بیوشن سینٹر بھی شروع کر دیے ہیں۔ ان مراکز کے ذریعے اب تک تقریباً 83 ہزار فوڈ پیکٹ تقسیم کیے جا چکے ہیں۔

کیجریوال کی مہاجر مزدوروں سے دہلی نہ چھوڑنے کی اپیل

دہلی حکومت کورونا بحران کے وقت مہاجر، دہاڑی اور تعمیراتی مزدورں کی مالی مدد کے لیے ہمیشہ تیار ہے۔ دہلی کے وزیراعلیٰ اروند کیجریوال نے بھی مزدوروں اور مہاجروں سے اپیل کی ہے کہ وہ دہلی نہ چھوڑیں کیونکہ دہلی حکومت ان کے لیے ہر طرح کا تعاون یقینی بنا رہی ہے۔

غور طلب ہے کہ دہلی حکومت نے کہا کہ دارالحکومت کے رجسٹرڈ تعمیراتی مزدورں کو پانچ پانچ ہزار روپیے کی مالی امداد دی گئی ہے۔ اب تک تقریباً دو لاکھ مزدوروں کو 100 کروڑ کی مدد دی گئی ہے۔ گذشتہ برس دہلی میں رجسٹرڈ تعمیراتی مزدوروں کی تعداد تقریباً 55 ہزار تھی۔ انھیں گذشتہ برس بھی لاک ڈاؤن کے دوران دہلی حکومت کی جانب سے پانچ پانچ ہزار روپیے کی امدادی رقم دی گئی تھی۔ دہلی میں فی الحال ایک لاکھ 72 ہزار رجسٹرڈ تعمیراتی مزدور ہیں۔

الیکشن کمیشن نے پانچ ریاستوں کے انتخابی نتائج 2 مئی کو آنے کے بعد انتخابات میں فتح کے جشن پر پابندی لگانے کا ایک اہم فیصلہ کیا ہے۔ الیکشن کمیشن نے یہ فیصلہ مدراس ہائی کورٹ کی مداخلت کے بعد کیا ہے۔

نئی دہلی: ملک میں کورونا وائرس کے بڑھتے ہوئے انفیکشن کے پیش نظر منگل کو الیکشن کمیشن نے پانچ ریاستوں کے انتخابی نتائج 2 مئی کو آنے کے بعد انتخابات میں فتح کے جشن پر پابندی لگانے کا ایک اہم فیصلہ کیا ہے۔

واضح رہے کہ 27 مارچ سے 29 اپریل کے درمیان مغربی بنگال، کیرالہ سمیت پانچ ریاستوں میں انتخابات ہورہے ہیں۔

الیکشن کمیشن نے یہ فیصلہ مدراس ہائی کورٹ کی مداخلت کے بعد کیا ہے۔ اس سے قبل مدراس ہائی کورٹ نے کورونا دور میں اسمبلی انتخابات کرانے پر الیکشن کمیشن اور اس کے عہدیداروں کی سخت سرزنش کی تھی۔

الیکشن کمیشن نے اپنے بیان میں کہا ہے کہ "2 مئی کو ووٹوں کی گنتی کے بعد کوئی فریق فتح کا جشن نہیں منا سکے گا۔ فاتح امیدوار کے ساتھ دو سے زیادہ افراد کو جانے کی اجازت نہیں ہوگی۔ صرف اس کا اہل نمائندہ ہی انتخابی نتائج کا سرٹیفکیٹ متعلقہ انتخابی افسر سے حاصل کر سکے گا۔

انہوں نے بتایا کہ پورے ملک میں کووڈ 19 کے معاملات میں اضافے کے پیش نظر کمیشن نے 21 اگست 2020 کی موجودہ جامع ہدایات کو شامل کرتے ہوئے گنتی کے عمل کے دوران مزید سخت التزامات کا فیصلہ کیا ہے۔

اس سے قبل پیر کو مدراس ہائی کورٹ نے ملک میں کورونا وبا کے دوسرے دور کے لئے تنہا الیکشن کمیشن کو ذمہ دار قرار دیا تھا جس نے سیاسی جلسوں پر پابندی عائد نہ کرنے پر الیکشن کمیشن کو تنقید کا نشانہ بنایا تھا۔

عدالت نے یہ بھی انتباہ کیا کہ اگر الیکشن کمیشن نے کووڈ 19 پروٹوکول کی سختی سے پیروی نہیں کی تو اسے 2 مئی کو گنتی کا عمل روکنا پڑے گا۔

عدالت نے کہا کہ الیکشن کمیشن کے افسران پر قتل کے الزام میں مقدمہ درج ہونا چاہئے۔

برطانیہ میں نئے عالمی انسداد بدعنوانی قوانین پر عمل درآمد شروع ہوگیا اور اس کے ساتھ ہی بین الاقوامی کرپشن پر 22 افراد پر پابندیاں عائد اور اثاثے منجمد کردیئے گئے ہیں۔

لندن: برطانیہ میں نئے عالمی انسداد بدعنوانی قوانین پر عمل درآمد شروع ہوگیا اور اس کے ساتھ ہی بین الاقوامی کرپشن پر 22 افراد پر پابندیاں عائد اور اثاثے منجمد کردیئے گئے ہیں۔

خبررساں ایجنسی کے مطابق پابندیوں کا سامنا کرنے والوں کا تعلق روس، جنوبی افریقہ، سوڈان اور لاطینی امریکہ سے ہے، یوروپی یونین سے علیحدگی کے بعد برطانیہ نے اپنے یہ نئے قوانین متعارف کرائے۔

برطانوی وزیر خارجہ نے کہا کہ پابندیوں کا سامنے کرنے والے افراد عالمی سطح پر بڑے کرپشن کیسز میں ملوث ہیں۔ کرپشن سے غریب ملکوں کی دولت ختم ہوجاتی ہے، لوگ غربت میں پھنس جاتے ہیں۔

برطانیہ کی انسانی حقوق سے متعلق پابندیوں کی فہرست میں 78 افراد اور اداروں کے نام شامل ہیں۔ ان کا تعلق روس، سعودی عرب، وینزویلا، پاکستان، میانمار، شمالی کوریا، بیلاروس اور گامبیا سے ہے۔

ملک بھر میں آکسیجن کی بڑھتی ہوئی طلب کے پیش نظر ریلوے نے حیات بخش گیس کی طلب کو پورا کرنے کے لئے مائع میڈیکل آکسیجن لانے کے لئے آکسیجن ایکسپریس ٹرین چلانے کا فیصلہ کیا تھا۔

نئی دہلی: قومی دارالحکومت کے مریضوں کے لئے تقریبا 70 ٹن حیات بخش آکسیجن والی پہلی آکسیجن ایکسپریس ٹرین منگل کی صبح یہاں پہنچی۔

وزیر ریلوے پیوش گوئل نے ٹوئٹر پر یہ معلومات شیئر کیں۔ انہوں نے کہا ’’آکسیجن ایکسپریس چھتیس گڑھ کے رائے گڑھ سے قومی دارالحکومت میں مریضوں کے لئے آکسیجن لے کر دہلی پہنچی ہے۔ ہندوستانی ریلوے کووڈ ۔ 19 کے خلاف ہماری لڑائی میں کوئی کسر نہیں چھوڑے گا اور ملک بھر میں حیات بخش وسائل کی مناسب فراہمی کو یقینی بنائے گا۔ انہوں نے کہا کہ اس آکسیجن کو دارالحکومت کے مختلف اسپتالوں میں پہنچایا جائے گا۔

مسٹر گوئل نے جنوبی دہلی کے ریلوے اسٹیشن پہنچنے والی ٹرین کی 44 سیکنڈ کی ویڈیو کے ساتھ ٹویٹ کیا۔ انہوں نے بتایا کہ پیر کے روز چھتیس گڑھ کے رائے گڑھ میں ’جندل اسٹیل ورکس‘ سے ٹرین دہلی کے لئے روانہ ہوئی۔

#OxygenExpress has reached Delhi from Raigarh, Chhattisgarh with Oxygen for patients in the capital.

Indian Railways is leaving no stone unturned in our collective fight against COVID-19, & ensuring sufficient availability of life-saving resources across the country. pic.twitter.com/X2d6vd339c

— Piyush Goyal (@PiyushGoyal) April 27, 2021

ملک بھر میں آکسیجن کی بڑھتی ہوئی طلب کے پیش نظر ریلوے نے حیات بخش گیس کی طلب کو پورا کرنے کے لئے مائع میڈیکل آکسیجن لانے کے لئے آکسیجن ایکسپریس ٹرین چلانے کا فیصلہ کیا تھا۔

قومی دارالحکومت دہلی میں آکسیجن گیس کی زبردست قلت کا سامنا ہے۔ پیر کو دہلی میں کورونا کے 20،201 نئے کیسز کی تصدیق ہوئی تھی اور 380 مزید افراد اس وبا کی وجہ سے ہلاک ہوگئے۔ دارالحکومت میں کورونا سے متاثرہ افراد کی کل تعداد اب 10،47،916 ہوگئی ہے، جبکہ اس وبا سے اب تک 14،628 مریضوں کی موت ہوچکی ہے۔ گذشتہ 24 گھنٹوں کے دوران 57،690 افراد کے کورونا ٹسٹ کئے گئے۔ اتوار کے دن 30.21 فیصد کے مقابلے میں مثبت شرح 35.02 فیصد پر پہنچ گئی۔

چلی نے کورونا وائرس (کوڈ 19) کی وجہ سے اپنی سرحدوں کو ایک اور ماہ کے لئے بند کرنے کا فیصلہ کیا ہے۔ وزیر صحت اینرک پیرس نے ایک پریس کانفرنس میں نامہ نگاروں کو یہ اطلاع دی۔

بیونس آئرس: چلی نے کورونا وائرس (کووڈ ۔ 19) کے پیش نظر اپنی سرحدوں کو مزید ایک ماہ کے لئے بند رکھنے کا فیصلہ کیا ہے۔

وزیر صحت اینرک پیرس نے ایک پریس کانفرنس میں نامہ نگاروں کو یہ اطلاع دی۔ انہوں نے کہا کہ اگلے 30 دن تک ملک کی سرحدیں بند رہیں گی۔ مسٹر پیرس کی تقریر ٹوئٹر پر بھی نشر ہوئی۔

اس سے قبل چلی کے حکام نے کورونا کے بڑھتے ہوئے کیسز کو مدنظر رکھتے ہوئے 5 اپریل کو سرحدوں کو بند رکھنے کا فیصلہ کیا تھا۔ جس میں اگلے 30 دن کی توسیع کردی گئی ہے۔ ہنگامی صورتحال اور ٹرکوں کی نقل و حرکت سے مستثنیٰ ہوگا۔ انہوں نے کہا کہ ان ہی ٹرک ڈرائیوروں کو بارڈر میں داخلہ دیا جائے گا، جس کی کورونا رپورٹ منفی ہوگی۔

مدراس ہائی کورٹ نے ملک میں کورونا وبا کی دوسری لہر کے لئے الیکشن کمیشن کو مکمل طور پر ذمہ دار ٹھہرایا ہے۔ اس نے سیاسی جلسوں پر پابندی نہ لگانے کے لئے الیکشن کمیشن کو مورد الزام قرار دیا ہے۔

چنئی: مدراس ہائی کورٹ نے ملک میں کورونا وبا کے دوسری لہر کے لئے الیکشن کمیشن کو تنہا ذمہ دار ٹھہرایا ہے۔ اس نے سیاسی جلسوں پر پابندی عائد نہ کرنے پر الیکشن کمیشن کو ذمہ دار قرار دیا ہے۔ عدالت نے پیر کو یہ انتباہ بھی دیا کہ اگر الیکشن کمیشن کورونا کے رہنما خطوط پر سختی سے عمل پیرا ہونے کو یقینی نہیں بناتا ہے تو عدالت 2 مئی کو ووٹوں کی گنتی روکنے پر مجبور ہوگی۔

وزیر ٹرانسپورٹ ایم آر وجے باسکر نے اس سلسلے میں ایک درخواست دائر کی تھی جس میں الیکشن کمیشن سے درخواست کی گئی تھی کہ وہ سخت حفاظتی اقدامات کو یقینی بنانے اور ووٹوں کی منصفانہ گنتی کو یقینی بنانے کے لئے ایک گائیڈ لائن جاری کرے۔

چیف جسٹس سنجیو بنرجی اور جسٹس سینتھل کمار رامامورتی نے 6 اپریل کو ہونے والے مرحلہ 1 کے انتخابات کے دوران سیاسی جماعتوں کو دانستہ طور پر انتخابی جلسوں میں کورونا کے رہنما خطوط کی خلاف ورزی کرنے سے نہ روکنے کے لئے الیکشن کمیشن کی زبردست کھینچائی کی۔

چیف جسٹس این وی رمن کی سربراہی میں بھری عدالت نے جسٹس شانتناگودر کو دو منٹ خاموش خراج تحسین پیش کیا۔ اس کے بعد چیف جسٹس این وی رمن نے آج زیر غور آنے والی تمام عدالتی کارروائیوں کو آنجہانی جج کے اعزاز میں ملتوی کرنے کا اعلان کیا۔ آج کی فہرست میں درج تمام مقدمات کی سماعت کل ہوگی۔

نئی دہلی: آنجہانی جسٹس موہن ایم شانتناگودر کے اعزاز میں پیر کے روز سپریم کورٹ میں عدالتی کارروائی ملتوی کردی گئی۔

چیف جسٹس این وی رمن کی سربراہی میں بھری عدالت نے جسٹس شانتناگودر کو دو منٹ خاموش خراج تحسین پیش کیا۔ اس کے بعد چیف جسٹس این وی رمن نے آج زیر غور آنے والی تمام عدالتی کارروائیوں کو آنجہانی جج کے اعزاز میں ملتوی کرنے کا اعلان کیا۔ آج کی فہرست میں درج تمام مقدمات کی سماعت کل ہوگی۔

چیف جسٹس نے کہا "ہم 24 اپریل کی شام کو اپنے ساتھی جج کے غیر وقتی انتقال ہونے سے سخت رنجیدہ ہیں”۔ اپنے تعزیتی پیغام میں چیف جسٹس این وی رمن نے اتوار کے روز کہا تھا کہ "میں ان (جسٹس شانتناگودر)کے جلد اور مکمل صحت یاب ہونے اور جلد از جلد بنچ میں واپس لوٹ آنے کی امید کررہا تھا”۔

انہوں نے کہا "ان کی وفات کی خبر سخت صدمے کی طرح آئی ہے۔ میں نے اپنا ایک اہم رفیق کار کھو دیا ہے۔ سپریم کورٹ میں چار سال سے ان کے ساتھ وابستہ رہنے سے مجھے ان کے حیرت انگیز قانونی قابلیت سے بہت فائدہ پہنچا ہے”۔

چیف جسٹس نے آنجہانی جسٹس شانتناگودر کے بیٹے سے بھی بات کی تھی اور اپنی طرف سے اور عدالت عظمی کے ساتھی ججوں کی جانب سے غمزدہ لواحقین کے تئيں گہری تعزیت کا اظہار کیا تھا۔

حیدرآباد میں کووڈ مریضوں کیلئے صدر مجلس بیرسٹر اسد الدین اویسی نے 1.40 کروڑ روپئے کے پیکیج کا اعلان کیا ہے۔ کووڈ ہیلپ لائن اور آکسیجن بینک کے قیام کے لئے فنڈس صرف کئے جائیں گے۔

حیدرآباد: حیدرآباد کے رکن پارلیمنٹ بیرسٹر اسد الدین اویسی صدر کل ہند مجلس اتحاد المسلمین نے حیدرآباد میں کووڈ سے لڑنے کے لئے 1.40 کروڑ روپئے کے پیکیج کا اعلان کیا۔

کووڈ ہیلپ لائن اور آکسیجن بینک کے قیام کے لئے فنڈس صرف کئے جائیں گے۔ ہیلپ لائن میں ڈاکٹرس مریضوں کا تعاون کریں گے اور اس عمل کے دوران دیکھ بھال کرنے والوں کی رہنمائی بھی کریں گے۔ ضرورت مند مریضوں میں میڈیکل کٹس کی بھی تقسیم عمل میں لائی جائے گی۔

مجلس کی جانب سے اس سلسلہ میں جاری کردہ پریس ریلیز میں کہا گیا ہے کہ عوام اس وبا سے شدید طور پر متاثر ہیں۔ نہ صرف یہ افراد اس مرض کی روک تھام کے سلسلہ میں فکر مند ہیں بلکہ اسپتالوں میں بستروں، آکسیجن سلنڈرس، ضروری دواؤں کی کمی کے ساتھ ساتھ بروقت طبی توجہ کی کمی دیکھی جارہی ہے۔ اسی لئے صدر مجلس نے اس ریلیف پیکیج کا اعلان کیا ہے۔

ہیلپ لائن صبح 6 بجے تا 12 بجے شب کام کرے گی

پہلے مرحلہ میں 20 کال اگزیکٹیوز کے ساتھ ایک فون ہیلپ لائن قائم کی جائے گی۔ ابتدا میں یہ ہیلپ لائن صبح 6 بجے تا 12 بجے شب کام کرے گی اور اس ہیلپ لائن کے ذریعہ تمام مناسب رہنمائی مریضوں اور ان کی د یکھ بھال کرنے والوں کی ہوگی۔اس میں ہلکی اور اوسط علامات والے مریضوں کو گھر میں دیکھ بھال کے لئے مشورے دیئے جائیں گے۔ تشویشناک حالت والے مریضوں کے لئے پیشہ وارانہ رہنمائی کی جائے گی۔

ہیلپ لائن نمبر 7306600600 ہے۔ ساتھ ہی طبی کٹس بھی تقسیم کئے جائیں گے۔ہر کٹ ضروری دواؤں پر مشتمل ہوگی۔ ان ہی مریضوں کے لئے یہ کٹ ہوگی جن میں ہلکی یا پھر اوسط علامات پائی جاتی ہیں۔ گھر میں زیر علاج مریضوں کے لئے 200 بڑے آکسیجن سلنڈرس اور 50 چھوٹے آکسجن سلنڈرس حاصل کئے گئے ہیں۔ عوام اپنے خالی آکسیجن سلنڈرس لاکر ان کو دوبارہ ری فل کرسکتے ہیں۔

حبیب نگر پولیس اسٹیشن کے قریب واقع آغاپورہ فنکشن ہال کو کووڈ وار روم میں تبدیل کردیا جائے گا جہاں سے ہیلپ لائن کام کرے گی۔ آکسیجن بینک وار روم سے کام کرے گا۔ پہلے مرحلہ کے اخراجات ایک کروڑ 40 لاکھ روپئے کے ہورہے ہیں اور یہ مجلس چیریٹی ایجوکیشنل اینڈ ریلیف ٹرسٹ کی جانب سے ممکن ہوئے ہیں۔

مغربی بنگال میں 294 نشستوں کے لئے آٹھ مرحلے کے اسمبلی انتخابات کے ساتویں مرحلے کے لئے ووٹنگ آج صبح سات بجے شروع ہوئی۔

کولکاتہ: مغربی بنگال میں 294 نشستوں کے لئے آٹھ مرحلے کے اسمبلی انتخابات کے ساتویں مرحلے میں پیر کی صبح 34 نشستوں کے لئے سخت حفاظتی انتظامات کے درمیان ووٹنگ کا آغاز ہوا۔

ساتویں مرحلے کے لئے ووٹنگ آج صبح سات بجے شروع ہوئی۔ اس دوران مرشد آباد سمیت ریاست کے دیگر تمام پولنگ بوتھوں کے باہر رائے دہندگان کی لمبی قطاریں دیکھی گئیں، جو اپنے ووٹ ڈالنے کے منتظر تھے۔ ریاست کے تمام پولنگ بوتھوں پر کورونا پروٹوکول پر عمل کیا جا رہا ہے۔

کچھ امیداوروں کے انتقال کے باعث 34 نشستوں پر انتخابات ہو رہے ہیں

ریاست میں ساتویں مرحلے کے پولنگ کا آغاز آج صبح پانچ اضلاع اور 34 اسمبلی نشستوں پر ہوا۔ جن پانچ اضلاع میں ووٹنگ جاری ہے ان میں مالدہ پارٹ ۔ 1، کولکتہ جنوبی، مرشد آباد پارٹ 1، مغربی وردھمان اور جنوبی دیناج پور شامل ہیں۔ بنگال کے ساتویں مرحلے میں کل 34 نشستوں پر 37 خواتین امیدواروں سمیت کل 268 امیدوار کی قسمت داؤ پرلگی ہوئی ہیں۔ اس سے قبل اس مرحلے میں 36 نشستوں پر انتخابات ہونے تھے، جن میں سے شمشیر گنج اور جانگی پور کے علاقوں کے امیداوروں کے انتقال کے باعث 34 نشستوں پر انتخابات ہو رہے ہیں۔

شمشیر گنج اور جانگی پور اسمبلی حلقوں کے لئے الیکشن کمیشن نے دوبارہ انتخابات کا نوٹیفکیشن جاری کیا ہے۔ اب ان دونوں جگہوں پر 16 مئی کو انتخابات ہوں گے اور انتخابی عمل کا مکمل عمل 21 مئی تک مکمل ہوجائے گا۔

اب تک 294 رکنی اسمبلی میں سے 223 سیٹوں پر پولنگ مکمل

ریاست میں چھ مرحلوں کے انتخابات میں اب تک 294 رکنی اسمبلی میں سے 223 سیٹوں پر پولنگ مکمل ہوچکی ہے۔

الیکشن کمیشن نے ریاست میں آزادانہ اور پرامن ووٹنگ کے لئے مرکزی اور ریاستی سیکیورٹی فورسز کی تعینات کرکے سیکیورٹی کے وسیع انتظامات کیے ہیں۔

بنگال میں ساتویں مرحلے میں، امیدواروں کی تقدیر کا فیصلہ 81.88 لاکھ سے زیادہ رائے دہندگان کریں گے۔ ان میں 39.87 لاکھ خواتین اور 221 تیسرے درجے کے ووٹر شامل ہیں۔ پولنگ کے لئے کل 11376 پولنگ اسٹیشن قائم کئے گئے ہیں۔

برسراقتدار ترنمول کانگریس اور بھارتیہ جنتا پارٹی ریاست کی تمام 34 نشستوں پر انتخاب لڑ رہی ہیں۔ کانگریس، متحدہ محاذ کے بینر کے تحت انتخاب لڑرہی ہے۔ کانگریس 18 نشستوں پر، مارکسسٹ کی کمیونسٹ پارٹی 12، آئی ایس ایف کی چار، آر ایس پی کی تین اور آل انڈیا فارورڈ بلاک ایک نشست پر انتخاب لڑ رہی ہے۔  اس کے علاوہ بہوجن سماج پارٹی 25 نشستوں اور 63 آزاد امیدواروں کے سمیت دیگر 74 امیدوار اپنی قسمت آزما رہے ہیں۔