فلسطینی صدر محمود عباس نے کہا ’’ہم نے اس وقت تک انتخابات ملتوی کرنے کا فیصلہ کیا ہے جب تک کہ مشرقی یروشلم کے فلسطینی عوام کو ووٹ ڈالنے کی اجازت نہیں دی جاتی ہے‘‘۔

رملہ: فلسطینی صدر محمود عباس نے جمعہ کے روز اعلان کیا ہے کہ ملک میں 22 مئی کو ہونے والے قانون ساز انتخابات کو آئندہ اطلاع تک ملتوی کردیا گیا ہے۔

مسٹر محمود عباس نے کہا ’’ہم نے اس وقت تک انتخابات ملتوی کرنے کا فیصلہ کیا ہے جب تک کہ مشرقی یروشلم کے فلسطینی عوام کو ووٹ ڈالنے کی اجازت نہیں دی جاتی ہے‘‘۔

صدر محمود عباس نے مغربی کنارے کے شہر رملہ میں فلسطین لبریشن آرگنائزیشن (پی ایل او) کی قیادت والی میٹنگ کے بعد عام انتخابات ملتوی کرنے کا فیصلہ کیا۔ انہوں نے کہا کہ ہم قومی اتحاد کی حکومت بنانے کے لئے کام کریں گے، جو بین الاقوامی تجاویز پر عمل کرے گی۔

انہوں نے کہا کہ ہم نے عالمی برادری بالخصوص امریکہ، اقوام متحدہ، یوروپی یونین، روس اور چین پر زور دیا ہے کہ وہ اسرائیل پر دباؤ ڈالیں کہ وہ فلسطینیوں کو مشرقی یروشلم میں ہونے والے انتخابات میں حصہ لینے کی اجازت دے۔ یہ طریق کار 1993 کے اوسلو معاہدے جیسے پی ایل او اور اسرائیل کے درمیان گزشتہ معاہدوں کے مطابق کرائے۔

مشرقی یروشلم کے بغیر کوئی بھی انتخابات نہیں ہوسکتا

خیال رہے جمعرات کی شام پی ایل او کی سربراہی میں میٹنگ بلائی گئی تھی۔ میٹنگ کے دوران مسٹر محمود عباس نے اس بات کی تصدیق کی کہ مشرقی یروشلم کے بغیر کوئی بھی انتخابات نہیں ہوسکتا۔

انہوں نے کہا کہ اسرائیلی حکومت نے مشرقی یروشلم میں مقبوضہ فلسطینی والے علاقہ میں انتخابات کو روک دیا ہے۔ اسرائیل کی طرف سے اس موضوع پر منصفانہ فیصلہ لینے کے لئے انتخابات سے انکار کرنے کے بعد انہوں نے ایک میٹنگ بلائی تھی۔

صدر محمود عباس نے اصرار کیا کہ مشرقی یروشلم میں فلسطینی عوام کو انتخابات میں ووٹ ڈالنے کا حق حاصل ہے۔

اہم بات یہ ہے کہ مسٹر محمود عباس نے جنوری میں 2021 کے عام انتخابات کا اعلان کیا جس میں 22 مئی کو قانون ساز انتخابات، 31 جولائی کو صدارتی انتخابات اور 31 اگست کو فلسطین کی قومی کونسل کے اعلی ترین فیصلہ ساز ادارہ کے انتخابات بھی شامل ہوں گے۔

میڈیکل گریڈ آکسیجن کی مانگ کو پورا کرنے کے لئے اڈیشہ کے پارادیپ میں چوتھے آکسیجن پلانٹ کا حکم دیا گیا ہے۔ اس کی پیداواری صلاحیت 150 کیوبک میٹر فی گھنٹہ ہوگی۔ توقع ہے کہ اس کی پیداوار 15 جون تک شروع ہو جائے گی۔ اس سے اسپتالوں کو مفت آکسیجن مل سکے گی۔

نئی دہلی: انڈین فارمرز فرٹیلائزر کوآپریٹو (افکو) نے ملک کی خدمت میں اسپتالوں کو مفت آکسیجن فراہم کرنے کے لئے چوتھی یونٹ کے قیام کی منظوری دے دی ہے۔

جمعرات کو افکو کے منیجنگ ڈائریکٹر یو ایس اوستھی نے ٹویٹ کیا کہ میڈیکل گریڈ آکسیجن کی مانگ کو پورا کرنے کے لئے اڈیشہ کے پارادیپ میں چوتھے آکسیجن پلانٹ کا حکم دیا گیا ہے۔ اس سے قبل تین آکسیجن پلانٹ لگانے کی منظوری دی گئی تھی۔

#IFFCO orders it’s 4th Oxygen plant for Free Oxygen to hospitals in nation’s service with capacity of 150 Cubic Mtr/hr in its #Paradeep unit in #Odisha. Produce 520 cylinders per day, Commence by 15th June. @narendramodi @DVSadanandGowda @nstomar @mansukhmandviya @Naveen_Odisha

— Dr. U S Awasthi (@drusawasthi) April 29, 2021

پارادیپ پلانٹ کی پیداواری صلاحیت 150 کیوبک میٹر فی گھنٹہ ہوگی۔ توقع ہے کہ اس کی پیداوار 15 جون تک شروع ہو جائے گی۔ اس سے اسپتالوں کو مفت آکسیجن مل سکے گی۔

ہندوستان میں کورونا وائرس کی دوسری لہر کی تشویشناک حالات سے نمٹنے کے لئے جہاں پوری دنیا سے مدد کے لئے ہاتھ آگے بڑھ رہے ہیں، وہیں اقوام متحدہ نے بھی کووڈ 19 جنگ میں ہندوستان کی مدد کرنے کی پیش کش کی ہے۔

اقوام متحدہ: ہندوستان میں کورونا وائرس کی تشویشناک حالات سے نمٹنے کے لئے پوری دنیا سے مدد کے لئے ہاتھ آگے بڑھ رہے ہیں۔ اقوام متحدہ نے بھی کووڈ 19 جنگ میں ہندوستان کی مدد کرنے کی پیش کش کی ہے۔

یہ اطلاع اقوام متحدہ کے ترجمان نے دی ہے۔ اقوام متحدہ کے سکریٹری جنرل انتونیو گٹیرس کے نائب ترجمان فرحان حق نے کہا ’’ہندوستان میں ریذیڈنٹ کوآرڈینیٹر ریناٹا لوک ۔ ڈیسالین کی سربراہی میں اقوام متحدہ کی ٹیم آلات اور سامان فراہم کرکے اس وبا سے نمٹنے کے لئے ہندوستانی حکام کی مدد کررہی ہے”۔

انہوں نے کہا کہ عالمی ادارہ صحت (ڈبلیو ایچ او) اور اقوام متحدہ کا فنڈ برائے اطفال (یونیسف) سامان اور آلات کی خریداری کررہے ہیں جس میں آکسیجن کی فراہمی کے لئے 7000 آکسیجن کنسٹریزر اور 500 ناک کے سازوسامان کے ساتھ ساتھ آکسیجن تیار کرنے والے آلات، کووڈ ۔ 19 تجرباتی مشین اور کٹس شامل ہیں۔

طبی حکام کی مدد کے لئے 2600 ڈبلیو ایچ او فیلڈ افسران تعینات

انہوں نے کہا کہ ڈبلیو ایچ او ہندوستان میں موبائل اسپتال یونٹوں کو قائم کرنے اور لیبارٹریوں کی فراہمی میں مدد فراہم کررہا ہے۔ طبی حکام کی مدد کے لئے 2600 ڈبلیو ایچ او فیلڈ افسران کو فوری طور پر تعینات کیا گیا ہے۔ ملک کی مغربی ریاست مہاراشٹر جو ہندوستان میں آبادی کے لحاظ سے دوسری بڑی ریاست ہے، یونیسف نے اس وائرس سے نمٹنے کے لئے ماہرین کو تعینات کیا ہے۔

انہوں نے کہا کہ ہندوستان میں اقوام متحدہ کی ٹیم بھی اپنی مہم جاری رکھ رہی ہے جس میں ماسک پہننا، ہاتھ دھونا، اور سماجی دوری کو بنائے رکھنے کے لئے انھیں چھ فٹ دور رہنے کو کہا گیا ہے۔

ڈبلیو ایچ او نے بتایا کہ دنیا بھر میں 25 اپریل کو ختم ہوئے ہفتے میں کورونا کے مجموعی معاملات میں سے 38 فیصد اکیلے ہندوستان میں ہیں۔ ہندوستان میں گذشتہ سات دنوں میں اس وبا کی وجہ سے 15،161 افراد اپنی جانیں گنوا چکے ہیں۔

ریوا کلکٹر ایلیاراجا ٹی نے ریوا ضلع میں دفعہ 144 کے تحت ضلع میں 7 مئی کی صبح 6 بجے تک کورونا کرفیو نافذ کرنے کا احکامات صادر کئے ہیں۔ اس کے ساتھ ہی ضلع میں 30 اپریل کو صبح 6 بجے سے 3 مئی کی صبح 6 بجے تک مکمل لاک ڈاؤن رہے گا۔ اس دوران عام طور پر طبی مقاصد کے لئے اپنے گھر سے باہر جانے کی اجازت ہوگی۔

ریوا: کورونا انفیکشن پر قابو پانے کے لئے ریوا کلکٹر ایلیاراجا ٹی نے ریوا ضلع میں دفعہ 144 کے تحت ضلع میں 7 مئی کی صبح 6 بجے تک کورونا کرفیو نافذ کرنے کا احکامات صادر کئے ہیں۔

اس کے ساتھ ہی ضلع میں 30 اپریل کو صبح 6 بجے سے 3 مئی کی صبح 6 بجے تک مکمل لاک ڈاؤن رہے گا۔ اس دوران عام طور پر طبی مقاصد کے لئے اپنے گھر سے باہر جانے کی اجازت ہوگی۔

کلکٹر اور ضلع مجسٹریٹ ڈاکٹر ایلیاراجا ٹی کے جانب سے جاری احکامات کے مطابق کورونا کرفیو کے دوران دودھ، ڈسپنسری، کیمسٹ اسپتال، کووڈ ویکسینیشن سنٹر اور پٹرول پمپ کھلے رہیں گے۔

مکمل لاک ڈاؤن کے دنوں کے اضافی کورونا کرفیو کے دوران ریوا شہر کی کرہیا منڈی صبح 9 بجے تک کھلی رہے گی۔ ہاتھ ٹھیلے والوں کو صبح 6 بجے سے دوپہر 11 بجے تک سبزیاں اور پھل فروخت کرنے کی اجازت ہوگی۔ پیداوار سے متعلق سرگرمیاں بلا تعطل جاری رہیں گی۔ سرکاری آمدنی کے کاموں میں نرمی رہے گی اور پبلک ڈسٹری بیوشن کی دکانیں طے شدہ اوقات کے مطابق کھلیں گی۔ تمام سرکاری دفاتر جیسے محصول، پولیس، بینک، بجلی، لوکل باڈیز اور دیگر ہنگامی خدمات لاک ڈاؤن سے مستثیٰ رہیں گی۔

مغربی بنگال اسمبلی انتخابات کے آٹھویں اور آخری مرحلے کے لئے جمعرات کی صبح 7 بجے سے ریاست کی 294 سیٹوں میں سے 35 سیٹ پر ووٹنگ شروع ہو گئی ہے۔

کولکتہ: کورونا کی دوسری لہر کے درمیان مغربی بنگال اسمبلی میں انتخابات کے آٹھویں اور آخری مرحلے کے لئے جمعرات کی صبح 7 بجے سے ریاست کی 294 سیٹوں میں سے 35 سیٹ پر ووٹنگ شروع ہو گئی ہے۔ جو شام کے ساڑھے چھ بجے تک جاری رہے گی۔

بنگال میں آخری مرحلے میں چار اضلاع مالدہ، کولکتہ شمالی، مرشد آباد اور ویربھوم کی 35 اسمبلی سیٹوں کے لئے آج پرامن طریقے سے پولنگ شروع ہو گئی ہے۔ ان میں ویربھوم اور مرشد آباد کی 11 – 11، کولکتہ شمالی کی سات اور مالدہ کی چھ سیٹوں پر پولنگ ہو رہی ہے۔ ریاست میں آخری مرحلے میں 35 خواتین امیدواروں سمیت کل 283 امیدواروں کی قسمت کا آج فیصلہ ہوگا۔

ان امیدواروں کی قسمت کا فیصلہ 53،55،835 مرد، 41،21،735 خواتین ووٹرز اور 158 ٹرانس جینڈر ووٹروں سمیت 84،77،728 ووٹرز کریں گے۔ ووٹنگ کے لئے کل 11،860 پولنگ مراکز قائم کئے گئے ہیں۔

ریاست میں حکمران جماعت ترنمول کانگریس کی کارکردگی پر سب کی نگاہیں ہیں کیونکہ ان انتخابات میں فیصلہ ہوگا کہ وزیر اعلیٰ اور ترنمول کی سربراہ ممتا بنرجی 2 مئی کو ووٹوں کی گنتی کے بعد تیسری مدت کار کے لئے واپس آسکیں گی یا نہیں۔ تاہم مرکز میں برسر اقتدار بھارتیہ جنتا پارٹی نے محترمہ بنرجی کو اس مرتبہ اقتدار سے بے دخل کرنے میں کوئی کسر نہیں چھوڑی ہے۔

ریاست میں آٹھویں مرحلے کے لئے آزادانہ اور غیرجانبدارانہ انتخابات کے انعقاد کے لئے مرکزی فورسز کی 641 کمپنیاں تعینات کی گئیں ہیں۔ ان میں سے 224 ضلع ویربھوم، 212 مرشد آباد، 110 مالدہ اور 95 شمالی کولکاتہ میں تعینات کی گئی ہیں۔

ہجوم سے بچنے کے لئے ہر بوتھ میں صرف 1000 ووٹر ووٹ ڈال سکیں گے۔

اسے بھی پڑھیں:

الیکشن کمیشن نے انتخابی نتائج کے بعد فتح کے جشن پر لگائی پابندی

سونو سود ضرورت مند کی مدد کے لئے پہچانے جاتے ہیں۔ کورونا وائرس کی دوسری لہر میں بھی سونو سود غریبوں، مسکینوں، مزدوروں اور طلبا کی مدد جاری رکھے ہوئے ہیں۔ سونو سود ہزاروں لوگوں کی مدد کرچکے ہیں۔

ممبئی: ہندی فلموں کے مشہور اداکار سونو سود کا کہنا ہے کہ بلاک بسٹر فلم کا حصہ بننے کے بجائے ضرورت مند کی مدد کرنا کہیں زیادہ بہتر کام ہے۔

سونو سود حاجت مند لوگوں کی مدد کے لئے پہچانے جاتے ہیں۔ کورونا وائرس کی دوسری لہر میں بھی سونو سود غریبوں، مسکینوں، مزدوروں اور طلبا کی مدد جاری رکھے ہوئے ہیں۔ سونو سود ہزاروں لوگوں کی مدد کرچکے ہیں۔ انہوں نے کہا ہے کہ بلاک بسٹر فلم کا حصہ بننے کے بجائے ضرورت مند لوگوں کی مدد کرنا کہیں بہتر کام ہے۔

سونو سود نے ٹویٹر اکاؤنٹ پر لکھا ’’آدھی رات کو بہت ساری کالز کے بعد اگر آپ ضرورت مندوں کے لئے بستر، کچھ لوگوں کے لئے آکسیجن کا بندوبست کرپاتے ہیں اور ان کی جانیں بچا پاتے ہیں تو قسم سے… یہ 100 کروڑ والی فلم کا حصہ بننے سے لاکھوں گنا زیادہ اطمینان بخش ہوتا ہے۔ ہم سو نہیں سکتے جب اسپتال کے باہر بستر کے لئے لوگوں کی لائنیں لگی ہوں‘‘۔

In the middle of night,after making numerous calls if u r able to get beds for needy, oxygen for some people n save few lives, I swear..it's million times more satisfying than being a part of any 100cr film. We can't sleep when people are infront of hospitals waiting for a bed.

— sonu sood (@SonuSood) April 27, 2021

پورے ملک میں کورونا کی دوسری لہر نے کہرام برپا کر رکھا ہے۔ ادھر بالی ووڈ کی کئی مشہور شخصیات لوگوں کی مدد کے لئے آگے آ رہی ہیں۔ ایسے میں اکشے کمار اور ان کی اہلیہ ٹوئنکل کھنہ بھی کورونا کے خلاف جنگ میں اپنا تعاون دینے کے لئے آگے آئے ہیں۔

ممبئی: بالی ووڈ کے کھلاڑی اکشے کمار اور ان کی اہلیہ اداکارہ ٹوئنکل کھنہ کورونا مریضوں کی مدد کے لئے آگے آئے ہیں۔

پورے ملک میں کورونا کی دوسری لہر نے کہرام برپا کر رکھا ہے۔ ادھر بالی ووڈ کی کئی مشہور شخصیات لوگوں کی مدد کے لئے آگے آ رہی ہیں۔ ایسے میں اکشے کمار اور ان کی اہلیہ ٹوئنکل کھنہ بھی کورونا کے خلاف جنگ میں اپنا تعاون دینے کے لئے آگے آئے ہیں۔

ٹوئنکل کھنہ نے پوسٹ شیئر کرتے ہوئے لکھا ’’ایک بہت اچھی خبر ہے کہ لندن ایلیٹ ہیلتھ کے ڈاکٹر درشنکا پٹیل اور ڈاکٹر گووند بنکانی دیوک فاؤنڈیشن کے ذریعہ 120 آکسیجن کنسٹریٹرز عطیہ کررہے ہیں۔ وہیں میں نے اور اکشے کمار نے 100 آکسیجن کنسٹریٹرز کا بندوبست کیا ہے۔ اب ہمارے پاس کل 220 آکسیجن کنسٹریٹرز ہوگئے ہیں۔ رہنمائی کا شکریہ۔ آئیے سب اپنا تعاون دیتے ہیں’’۔

اس سے قبل ٹوئنکل کھنہ نے ایک پوسٹ شیئر کرتے ہوئے لکھا ’’براہ کرم، مجھے تصدیق شدہ، قابل اعتماد اور رجسٹرڈ این جی اوز کے بارے میں معلومات فراہم کریں جو 100 آکسیجن کنسٹریٹرز (فی منٹ 4 لیٹر آکسیجن کی فراہمی کرنے والے) دینے میں مدد کرسکیں۔ یہ کنسٹریٹرز براہ راست برطانیہ سے ان تک پہنچائے جائیں گے‘‘۔

نیشنل سینٹر فار سیسمولوجی کے مطابق آج صبح 7:51 بجے آسام میں زلزلے کے شدید جھٹکے محسوس کیے گئے۔

گوہاٹی: آسام میں بدھ کے روز زلزلے کے شدید جھٹکے محسوس کیے گئے۔ نیشنل سینٹر فار سیسمولوجی کے مطابق آج صبح 7:51 بجے محسوس کئے گئے۔

زلزلے کی شدت ریکٹر اسکیل پر 6.4 ریکارڈ کی گئی۔ زلزلے کا مرکز ضلع سونت پور تھا۔ نیشنل سینٹر فار سیسمولوجی نے بتایا کہ زلزلے کا مرکز 26.69 ڈگری شمالی عرض بلد اور 92.36 ڈگری مشرقی طول بلد میں تھا۔ زلزلے کے جھٹکے گوہاٹی میں بھی محسوس کئے گئے۔