کلکتہ: ممتا بنرجی کے کابینہ کے سینئر وزیر فرہاد حکیم کو آج صبح سی بی آئی نے ان کے گھر سے ناردا اسٹنگ آپریشن معاملے میں گرفتار کرلیا ہے۔
ریاستی وزیر نے کہا ہے کہ یہ پوری کارروائی کسی پیشگی اطلاع کے بغیر کی گئی ہے۔ اس سے قبل گزشتہ ہفتہ ہی فرہاد حکیم نے وزارت کا حلف لیا تھا۔
اقوام متحدہ: اقوام متحدہ نے اسرائیل اور فلسطین کے مابین جاری جھڑپ کو جلد از جلد روکنے کا مطالبہ کیا ہے۔
اقوام متحدہ کے سکریٹری جنرل انتونیو گوٹیرس نے یہ مطالبہ کیا ہے۔
اقوام متحدہ کی سلامتی کونسل کے اجلاس کے دوران، مسٹر گوٹیرس نے کہا، "لڑائی کا خاتمہ ہونا ضروری ہے۔ اسے فوری طور پر روکا جائے۔ ایک طرف راکٹ اور مارٹر اور دوسری طرف فضائی اور توپ کے جملے بند ہونے چاہئے۔ میں تمام فریقوں سے اپیل کرتا ہوں کہ وہ اس اپیل پر دھیان دیں۔
انہوں نے کہا کہ جنگ بندی کے لئے تنظیم تمام فریقوں سے فوری طور پر بات چیت کر رہی ہے۔
انہوں نے کہا، "اس جھڑپ میں انسانی بحرانوں اور انتہا پسندی کو بڑھاوا دینے کی صلاحیت ہے۔” نہ صرف فلسطین اور اسرائیل بلکہ پورے خطے میں ہی انسانی بحرانوں اور انتہا پسندی میں اضافہ ہوسکتا ہے۔ اس سے خطرناک طور پر عدم استحکام پیدا ہوگا۔ ”
نئی دہلی: ہندوستان نے اتوار کے روز اسرائیل اور فلسطینیوں کے درمیان کشیدگی کم کرنے کے لئے وقت کی ضرورت کا حوالہ دیتے ہوئے دونوں فریقوں کو ‘انتہائی تحمل’ کا مظاہرہ کرنے کی اپیل کی۔
ہندوستان نے دونوں ممالک پر بھی زور دیا کہ وہ بڑھتی ہوئی کشیدگی کی کارروائیوں سے باز رہیں اور موجودہ جمود کو یک طرفہ طور پر تبدیل کرنے کی کوششوں سے باز رہیں۔
اقوام متحدہ میں ہندوستان کے مستقل نمائندہ، ٹی ایس تیرومورتی نے مغربی ایشیاء کے بارے میں کھلی بحث میں کہا، "دونوں فریق کے درمیان کشیدگی کو کم کرنا وقت کی ضرورت ہے تاکہ کسی بھی تباہی کی طرف بڑھنے اور کسی بھی گراوٹ کو روکا جا سکے۔”
انہوں نے کہا کہ غزہ سے بلااشتعال راکٹ فائر کرنے سے اسرائیل میں شہری آبادی کو نشانہ بنایا گیا، جس کی ہندوستان مذمت کرتا ہے۔ اسی دوران، غزہ میں ہونے والے جوابی حملے کرنے سے بھی زبردست تکلیف کا سامنا ہے اور اس کے نتیجے میں خواتین اور بچوں سمیت متعدد افراد کی ہلاکت ہوئی ہے۔
سفیر نے کہا کہ ہندوستان نے تشدد، اشتعال انگیزی اور تباہی کی تمام کارروائیوں کی مذمت کی ہے۔ انہوں نے کہا، "اس راکٹ فائر سے ہندوستان اسرائیل میں مقیم اپنے ایک شہری کو بھی کھو چکا ہے۔ اشکلون میں ایک نگراں۔ ہم ان تمام شہریوں کے ساتھ ان کے انتقال پر دل کی گہرائیوں سے تعزیت کرتے ہیں جو موجودہ تشدد کے دور میں اپنی جانیں گنوا چکے ہیں۔
اہم بات یہ ہے کہ منگل کے روز فلسطینی مزاحمت کاروں کے راکٹ حملے میں کیرل کے اڈوکی کی رہائشی 30 سالہ ہندوستانی خاتون ہلاک ہوگئی۔
غزہ کی پٹی پر گذشتہ ایک ہفتے کے دوران اسرائیلی حملے میں ہلاک ہونے والے فلسطینیوں کی تعداد بڑھ کر 181 ہوگئی ہے، جس میں 52 بچے بھی شامل ہیں۔ تنازعہ کے آغاز سے ہی اسرائیلی فضائی حملوں میں ہلاک ہونے والوں کی تعداد 181 ہوگئی ہے، جس میں 52 بچے اور 21 خواتین شامل ہیں۔ اسرائیلی ہوم فرنٹ کمانڈ نے بتایا ہے کہ غزہ کی پٹی سے حملے میں 10 افراد ہلاک اور 50 کے قریب شدید زخمی اور سیکڑوں دیگر معمولی زخمی ہوئے ہیں۔ یہ سن 2014 کے بعد سے اسرائیل اور فلسطینیوں کے مابین سب سے پُرتشدد تنازعہ ہے۔
احمد آباد: بحیرہ عرب میں اٹھا سمندری طوفان تاوتے اب نہایت شدید (ویری سیویر) زمرہ کے طوفان میں تبدیل ہوگیا ہے۔ اس کے آئندہ چوبیس گھنٹے میں مزید خوفناک شکل اختیار کرلینے اور 18 مئی کی صبح گجرات کے مہووا (بھاو نگر) اور پور بندر کے درمیان سے ساحل سے ٹکرانے کا اندازہ ظاہر کیا گیا ہے۔
محکمہ موسمیات سے آج موصولہ اطلاع کے مطابق یہ طوفان آج دوپہر ساڑھے گیارہ بجے گجرات کے ویراول ساحل سے 620 کلومیٹر جنوب ۔ جنوب مشرق میں واقع تھا۔ اس کے کل گجرات کے ساحل کے مزید قریب پہنچنے کے دوران ہواوں کی رفتار 155 سے لیکر 185 کلومیٹر فی گھنٹہ تک ہو سکتی ہے۔ اس کے ساتھ ہی ساحلی گجرات میں بھاو نگر، گر سومناتھ، امریلی، پوربندر کے علاوہ احمد آباد، ودوڈرہ، بھروچ، ولساڈ وغیرہ میں شدید سے نہایت شدید بارش بھی ہو سکتی ہے۔
سمندر میں اتار چڑھاؤ کی وجہ سے ماہی گیروں کو اس میں نہیں جانے کا مشورہ دیا گیا ہے۔ گجرات کی بندرگاہوں پر بھی دو نمبر کا وارننگ سگنل لگا دیا گیا ہے۔
موسم مرکز کی طرف سے جاری بلیٹن میں کہا گیا ہے کہ طوفان، شدید بارش اور تیز ہواؤں کی وجہ سے ساحلی علاقوں میں کچے و پکے مکانات، سڑکوں، بجلی کے کھمبوں، درختوں اور فصلوں وغیرہ کو نقصان ہو سکتا ہے۔ اس میں خطرے والے علاقوں سے لوگوں کو محفوظ مقامات پر منتقل کرنے، ماہی گیروں میں سمندر میں نہیں جانے، سڑک اور ریل آمد و رفت کو بھی کنٹرول کرنے، طوفان کے دوران لوگوں کو گھروں میں رہنے کا مشورہ بھی دیا گیا ہے۔
نئی دہلی: کووڈ 19 کے پیش نظر دہلی میں لاک ڈاؤن کی مدت 24 مئی تک بڑھا دی گئی ہے۔ دہلی کے وزیر اعلی اروند کیجریوال نے اتوار کو اس کا اعلان کیا۔
مسٹر کیجریوال نے صحافیوں کو بتایا کہ دارالحکومت میں لاک ڈاؤن کی مدت 17 مئی تک نافذ ہے اور اس میں ایک ہفتہ کی توسیع 24 مئی تک کی جا رہی ہے۔ میٹرو خدمات کی معطلی سمیت تمام پابندیاں اب 24 مئی تک نافذ العمل ہوں گی۔
دہلی میں کورونا وائرس کے پھیلنے کو روکنے کے لئے میٹرو خدمات بھی 10 مئی سے معطل ہیں۔
واضح رہے کہ 19 اپریل سے قومی دارالحکومت میں لاک ڈاؤن نافذ ہے۔
تل ابیب: اسرائیل اور فلسطین کے مابین جاری جدوجہد کے دوران مشرقی یروشلم میں کم از کم 360 فلسطینی زخمی ہوگئے ہیں۔
اس سے قبل ریڈ کریسنٹ نے اپنی رپورٹ میں بتایا تھا کہ اسرائیل کے ساتھ جاری جدوجہد میں 1330 فلسطینی زخمی ہوئے ہیں۔ غزہ پٹی میں 100 سے زیادہ جبکہ ویسٹ بینک میں 900 فلسطینی زخمی ہوئے ہیں۔
واضح رہے کہ اسرائیل اور فلسطینی کے مابین جاری جدوجہد کے دوران دونوں اطراف کے کئی شہریوں کی موت ہوئی ہے اور سیکڑوں کی تعدادا میں زخمی ہوئے ہیں۔ جدوجہد کے دوران مرنے والوں میں خواتین اور بچے شامل ہیں۔
نئی دہلی: اتوار کے روز پٹرول اور ڈیزل کی قیمتیں ایک بار پھر بڑھ کر نئی ریکارڈ سطح پر پہنچ گئیں۔ ملک کے چار بڑے میٹرو شہروں میں پٹرول 24 پیسے اور ڈیزل 29 پیسے مہنگا ہوگیا۔ ممبئی میں پٹرول 99 روپے فی لیٹر کے قریب پہنچ گیا ہے، جبکہ ڈیزل پہلی بار 90 روپے کو عبور کرچکا ہے۔
معروف آئل مارکیٹنگ کمپنی انڈین آئل کارپوریشن کے مطابق، آج قومی دارالحکومت میں پٹرول کی قیمت 24 پیسے کے اضافے سے 92.58 روپے اور ڈیزل کی قیمت 27 پیسے کے اضافے سے 83.22 روپے فی لیٹر ہوگئی۔ اس مہینے دہلی میں پٹرول 2.18 روپے اور ڈیزل 2.49 روپے مہنگا ہوچکا ہے۔
ممبئی اور کولکتہ میں پٹرول 23-23 پیسے مہنگا ہوگیا۔ ممبئی میں ایک لیٹر پٹرول کی قیمت 98.88 روپے اور کولکتہ میں 92.67 روپے رہی۔ چنئی میں، یہ 22 پیسے مہنگا ہوکر 94.31 روپے فی لیٹر ہوگیا۔
ممبئی میں ڈیزل کی قیمت 29 پیسے اضافے سے 90.40 روپے، چنئی میں 26 پیسے بڑھ کر 88.07 روپے اور کولکاتہ میں 27 پیسے کے اضافے سے 86.06 روپے فی لیٹر ہوگئی۔ دونوں ایندھنوں کی قیمتیں چاروں میٹرو شہروں میں مستقل طور پر نئی ریکارڈ بلندی پر پہنچ رہی ہیں۔
پٹرول اور ڈیزل کی قیمتوں کا روزانہ جائزہ لیا جاتا ہے اور اسی بنا پر، ہر روز صبح چھ بجے سے نئی قیمتوں کا اطلاق ہوتا ہے۔
ملک کے چار میٹرو شہروں میں آج پٹرول اور ڈیزل کی قیمتیں حسب ذیل رہیں:
شہر ————— پٹرول ————— ڈیزل
دہلی ————— 92.58 —————— 83.22
ممبئی ————— 98.88 —————— 90.40
چنئی ————— 94.31 —————— 88.07
کولکاتا ———— 92.67 —————— 86.06
نئی دہلی: ہوائی جہاز کے ایندھن کی قیمت میں آج سے پانچ فیصد اضافہ کیا گیا ہے، جس سے قومی دارالحکومت میں اس کی قیمت 65 ہزار روپے فی کلو لیٹر کے قریب پہنچ گئی ہیں۔
اس ماہ میں دوسری مرتبہ ہوائی جہاز کے ایندھن کی قیمت میں اضافہ کیا گیا ہے۔ اس سے قبل یکم مئی کو یہ سات فیصد کے قریب مہنگا ہوا تھا۔
ملک کی سب سے بڑی آئل مارکیٹنگ کمپنی انڈین آئل کارپوریشن کے مطابق قومی دارالحکومت دہلی میں 16 مئی کے بعد سے ہوائی جہازوں کے ایندھن کی قیمت 3080.25 روپے یعنی 4.99 فیصد اضافے سے 64770.53 روپے فی کلو لیٹر تک پہنچ گئی ہے۔ دو بار میں اس کی قیمت میں 6965.25 روپے کا اضافہ ہوا ہے۔
اسی طرح ممبئی میں ہوائی جہاز کا ایندھن 3094.12 روپے یعنی 5.17 فیصد مہنگا ہوا ہے اور اتوار سے اس کی قیمت 62917.02 روپے فی کلو لیٹر ہوگئی ہے۔
کولکتہ میں، یہ 2650.12 روپے یعنی چار فیصد اور چنئی میں یہ 3،279.05 روپے یعنی 5.20 فیصد مہنگا ہوگیا ہے۔ کولکتہ میں اب اس کی قیمت 68895.86 روپے اور چنئی میں 66374.41 روپے فی کلو لیٹر تک پہنچ گئی ہے۔
ہوائی جہاز کے ایندھن کی قیمتوں کا ہر پندرہ دن میں جائزہ لیا جاتا ہے۔
کلکتہ: مغربی بنگال حکومت نے بنگال میں کورونا وائرس کے پھیلاؤ کو روکنے کے لئے کل 16 مئی کی شام سے 30 مئی کی شام تک مکمل لاک ڈاؤن کا اعلان کیا ہے۔
چیف سکریٹری الاپن بندو پادھیائے نے کہا کہ کورونا پر قابو پانے کے لئے حکومت نے مزید سخت اقدامات کرنے کا فیصلہ کیا ہے۔ اس کے لئے اتوار کی شام 6 بجے سے 30 مئی تک مکمل لاک ڈاؤن نافذ رہے گا۔ انہوں نے بتایا کہ اس مدت میں تمام سرکاری اور پرائیوٹ دفاتر، شاپنگ کمپلیکس، مالز، بارس، اسپورٹس کمپلیکس، پب اور بیوٹی پارلر بند رہیں گے۔
پرائیوٹ گاڑیوں، ٹیکسیوں، بسوں، میٹرو ریل، لوکل ٹرینوں کی نقل و حرکت کو بھی 15 دنوں تک بند رکھنے کا فیصلہ کیا گیا ہے۔ انہوں نے کہا کہ پٹرول پمپ کھلے رہیں گے اور دودھ، پانی، دوا، بجلی، فائر، لا اینڈ آرڈر سے وابستہ ادارے اور میڈیا اس کے دائرے میں نہیں آئے گا۔ ای کامرس اور ہوم ڈیلیوری خدمات کی اجازت ہوگی۔
حکومت کی گائیڈ لائن کے مطابق رات 9 بجے سے صبح 5 بجے تک کسی کو بھی باہر نکلنے اور موٹر سائیکل کی بھی اجازت نہیں ہوگی۔ تمام پرائیوٹ دفاتر، اسکول، کالج بند رہیں گے۔ بازار، سبزیاں، پھل، دودھ فروخت کرنے والے بازار صبح سات بجے سے صبح دس بجے تک کھلے رہیں گے۔ لوکل ٹرینیں، میٹرو خدمات، انٹر اسٹیٹ بس / ٹرین خدمات، کشتی سروس بھی بند رہیں گے۔
مغربی بنگال کے ڈاکٹروں نے بنگال حکومت کے ذریعہ 15 دنوں کے لئے نافذ کئے جا رہے لاک ڈاؤن کے فیصلے کا خیرمقدم کیا ہے۔ ڈاکٹرو ں نے کہا ہے کہ اس کی وجہ سے کورونا کے چین کو توڑنے میں مدد ملے گی اور اسپتالوں پر بوجھ بھی کم ہوگا۔
ڈاکٹروں نے کہا ہے کہ اس میں کوئی شک نہیں ہے کہ لاک ڈاؤن کی وجہ سے معیشت کو شدید نقصان پہنچے گا۔ مگر لاک ڈاؤن کی وجہ سے انسانی زندگی بچے گی اور لوگوں کے روپے علاج پر خرچ نہیں ہوں گے۔
پیئر لیس اسپتال کے سی ای او سدیپتو مترا نے کہا کہ ہم یہ چاہتے تھے کہ لاک ڈاؤن لگے یہ کہنا غلط نہیں ہوگا۔ کیوں کہ اس وقت کورونا کی صورت حال انتہائی خراب ہے۔ کنٹرول سے باہر حالات ہو رہے ہیں۔ اس نقطہ نظر سے انسانی مفادات کے حق میں ہے کہ لاک ڈاؤن لگے۔ 15 دن کے لئے لاک ڈاؤن کا فیصلہ صحیح قدم ہے۔ انہوں نے کہا کہ پرائیوٹ اسپتالوں میں کل 2500 سے 3000 بیڈ ہیں۔ اسپتال مریضوں سے بھر گئے ہیں۔ اب یہاں بیڈ خالی نہیں ہے۔ ریاست میں صحت کا نظام بوجھ تلے دب رہا ہے۔ اس لئے ہم اس فیصلے کا خیر مقدم کرتے ہیں۔
انہوں نے کہا کہ پبلک ٹرانسپورٹ کا نظام مکمل طور پر بند ہونے کی وجہ سے مریض اسپتال نہیں آسکیں گے۔ کورونا ویکسین میں بھی دشواری ہوگی۔ کیونکہ لوگ ویکسی نیشن سینٹر نہیں آسکیں گے۔ لہذا حکومت کو اس جانب توجہ دینے کی ضرورت ہے۔
ڈاکٹر ارندم بسواس نے کہا کہ حکومت نے ایک اچھا اور بروقت فیصلہ کیا ہے۔ تاہم، حکومت کی اس رہنما اصول کو موثر بنانے کی ضرورت ہے کچھ دن پہلے ریاستی حکومت نے صبح 7 بجے سے صبح 10 بجے تک مارکیٹ کو کھلا رکھنے کا اعلان کیا تھا، لیکن صبح 10 بجے کے بعد بھی مارکیٹ کھلے ہوئے تھے۔ اگر اس بار بھی ایسا ہوتا ہے تو پھر اس لاک ڈاؤن کا کوئی فائدہ نہیں ہوگا۔
امرتسر: کیرالا اور بہار کے سابق گورنر آر ایل بھاٹیا کی کورونا وائرس سے ہفتہ کے روز یہاں موت ہو گئی۔ وہ 100 سال کے تھے۔
مسٹر بھاٹیا گذشتہ کچھ وقت سے بیمار تھے اور کورونا سے متاثر ہونے کے بعد وہ امرتسر کے ایک نجی اسپتال میں داخل تھے، جہاں آج صبح انہوں نے آخری سانس لی۔
امرتسر سے چھ بار رکن پارلیمنٹ منتخب کیے گئے مسٹر بھاٹیا 23 جون 2004 سے 10 جولائی 2008 تک وہ کیرالا اور 10 جولائی 2008 سے لے کر 28 جون 2009 تک بہار کے گورنر تھے۔ وہ 1992 میں پی وی نرسمہا کی حکومت میں وزیر مملکت برائے خارجہ تھے۔
آپریشن بلو اسٹار کے بعد الیکشن میں کئی ردوبدل ہوئے مرکز میں اندرا گاندھی کی حکومت کی جانب سے چار سال مکمل ہونے پر ’غریبی ہٹاؤ‘ نعرے کے ساتھ الیکشن کروائے گئے تھے۔ اس وقت امرتسر میونسیپل کمیٹی کے سربراہ درگا داس بھاٹیا نے کانگریس کے ٹکٹ پر امرتسر لوک سبھا حلقے سے الیکشن جیتا تھا۔ درگا داس بھاٹیا کی ایک سال کے بعد ہی موت ہو گئی۔
درگا داس بھاٹیا کی موت کے بعد کانگریس نے ان کے بھائی رگھو رنجن لال بھاٹیا کو ضمنی الیکشن میں اتارا۔ بھاٹیا نے یگیہ دت شرما کو شکست دی۔
ایمرجنسی کے بعد ہوئے الیکشن میں اس وقت کی جنتا پارٹی کے امیدوار ڈاکٹر بلدیو پرکاش نے رگھونندن لال بھاٹیا کو شکست دی۔ 1980 کے لوک سبھا الیکشن میں رگھونندن لال بھاٹیا نے بی جے پی کے ڈاکٹر بلدیو پرکاش کو شکست دی۔ 1984 میں آپریشن بلو اسٹار اور سکھ مخالف فسادات کے باوجود رگھونندن لال بھاٹیا الیکشن جیت گئے تھے۔ 1989 کے الیکشن کے دوران ریاست میں دہشت پھیلی ہوئی تھی۔ اس وقت چیف خالصا دیوان کے سربراہ کرپال سنگھ بطور آزاد امیدوار میدان میں اترے اور آر ایل بھاٹیا کو شکست دی۔ 1991 اور 1996 کے الیکشن میں بھی بھاٹیا کو جیت ملی۔ امرتسر سے 1952 میں گیانی گُرمُکھ سنگھ مسافر پہلے جٹ سکھ امیدوار تھے۔
اس کے تقریباً 31 سال بعد 1998 کے لوک سبھا انتخابات میں بی جے پی نے ایک شہری سکھ دیا سنگھ سوڑھی کو الیکشن میدان میں اتارا۔ سوڑھی آر ایل بھاٹیا کے دبدبے کو توڑتے ہوئے یہ سیٹ جیت لی۔ 1999 کے لوک سبھا کے دوران جب ریاست میں اکالی-بی جے پی کی حکومت تھی، اس وقت دیا سنگھ سوڑھی نے سابق وزیراعلیٰ پرکاش سنگھ بادل کی طریقہ کار پر بیانات دیے۔ سوڑھی اس الیکشن میں نہیں جیت پائے۔ بعد ازاں بھاٹیا کے دبدبے کو نوجوت سنگھ سدھو نے ختم کیا۔ بی جے پی کے ٹکٹ پر سدھو نے 2004، ضمنی الیکشن 2007 اور 2009 تک مسلسل جیت درج کرتے ہوئے ہیٹرک بنائی تھی۔
Hams Live Urdu - Where voices unite, stories flourish, and community thrives through open dialogue and meaningful connections.
Company
Trending
Categories
© Hams Live Uru
