برکینا فاسو کے شمالی حصے میں ہوئے مسلح افراد کے حملے میں بارہ سیکیورٹی افسران ہلاک ہوگئے ہیں۔ سال 2016 سے دہشت گرد تنظیم القاعدہ اور اسلامک اسٹیٹ سے وابستہ اسلامی گروپوں کی سرگرمیاں وہاں جاری ہیں۔

ماسکو: مغربی افریقی ملک برکینا فاسو کے شمالی صوبے سورو میں ہوئے مسلح افراد کے حملے میں بارہ سیکیورٹی افسران ہلاک ہوگئے ہیں۔

ریڈیو اومیگا نے اتوار کی دیر رات جاری رپورٹ کے مطابق متاثرہ افراد میں سات فوجی اور پانچ گشتی اہلکار شامل ہیں جبکہ مزید سات سیکیورٹی افسران لاپتہ ہیں۔

برکینا فاسو کے شمالی حصے میں سال 2016 سے دہشت گرد تنظیم القاعدہ اور اسلامک اسٹیٹ سے وابستہ اسلامی گروپوں کی سرگرمیاں جاری ہیں۔

وسطی افریقی ملک چاڈ کے مغربی حصے میں رونما ہوئے فرقہ وارانہ فسادات میں کم از کم 21 افراد ہلاک اور 20 دیگر زخمی ہو گئے ہیں۔

نجا مینا: وسطی افریقی ملک چاڈ کے مغربی حصے میں رونما ہوئے فرقہ وارانہ فسادات میں کم از کم 21 افراد ہلاک اور 20 دیگر زخمی ہو گئے ہیں۔ میڈیا نے یہ رپورٹ دی ہے۔

الوحدہ اخبار نے اتوار کو مقامی حکام کے حوالے سے خبر دی کہ چاڈ کے حجر لیمس علاقے میں فرقہ وارانہ جھڑپیں ہوئیں۔

میڈیا رپورٹس کے مطابق کھیت کی زمین کے تنازعہ میں کئی گھنٹوں تک جھڑپیں جاری رہیں، جس سے کم از کم 21 افراد ہلاک اور 20 افراد زخمی ہوئے۔ فسادات سے نمٹنے کے لئے سیکیورٹی فورسز اور ایک وزارتی وفد کو جائے وقوعہ پر بھیجا گیا ہے۔

تشدد بھڑکانے اور جھڑپوں میں ملوث کئی افراد کو حراست میں لیا گیا ہے۔

وزیر صنعت سید شاہنواز حسین نے ذات پر مبنی مردم شماری کے معاملے پر کہا کہ وزیر اعلیٰ نتیش کمار نے وزیر اعظم نریندر مودی کو خط لکھ دیا ہے۔ اس لئے یہ اب ان کے درمیان کا معاملہ ہے۔

گیا: بھارتیہ جنتا پارٹی (بی جے پی) کے سنیئر لیڈر اور بہار کے وزیر صنعت سید شاہنواز حسین نے ذات پر مبنی مردم شماری کے معاملے پر اتوار کو کہا کہ وزیر اعلیٰ نتیش کمار نے وزیر اعظم نریندر مودی کو خط لکھ دیا ہے۔ اس لئے یہ اب ان کے درمیان کا معاملہ ہے۔

مسٹر حسین نے آج یہاں منعقدہ پریس کانفرنس میں ذات کی مردم شماری کے تعلق سے پوچھے گئے سوال کے جواب میں کہا، ’’سی ایم صاحب نے پی ایم صاحب کو خط لکھا ہے۔ اب یہ معاملہ انہیں دونوں کے درمیان ہے۔ الگ الگ پارٹی ہے تو بہت سے امور پر الگ الگ رائے ہوتی ہے۔

وزیر صنعت نے حکمراں جنتادل یونائیٹڈ (جے ڈی یو) کے قومی صدر راجیو رنجن سنگھ کے ملک کی مختلف ریاستوں میں ہونے والے انتخابات میں اتحاد کے تعلق سے دئے بیان پر کہا کہ یہ کوئی بڑی بات نہیں ہے۔ ہمارا اتحاد بہار میں ہے۔ جے ڈی یو پہلے بھی گجرات میں الگ ہوکر لڑی ہے۔ یہ مرکزی قیادت طے کرے گی کہ کس پارٹی سے کہاں اتحاد ہوگا اور کون کہاں الیکشن لڑے گی۔

نتیس کمار کی قیادت میں حکومت پورے پانچ برسوں کا اپنا دور مکمل کرے گی

گیا ضلع کے انچارج وزیر نے مگدھ کے علاقے میں صنعت کاری پر کہا کہ گیا میں کھادی مال کی تعمیر ہو رہی ہے جو نہ صرف مقامی لوگوں کو بلکہ غیر ممالک سے آنے والے سیاحوں کو بھی راغب کرے گا۔ گیا میں ڈوبھی کے پاس سبل بیگھہ گاوں میں انڈسٹریل پارک تیار کیا جارہا ہے جو نہ صرف بہار کے لئے بلکہ پورے ملک کے لئے اہم ہے۔ انہوں نے بہار اور گیا میں کئے جارہے ترقیاتی کاموں کی بات کرتے ہوئے ایک بار پھر دہرایا کہ نتیس کمار کی قیادت میں حکومت پورے پانچ برسوں کا اپنا دور مکمل کرے گی۔

اس موقع پر جے ڈی یو رکن پارلیمنٹ وجے مانجھی، سابق وزیر ڈاکٹر پریم کمار، باراچٹی کی ایم ایل اے جیوتی مانجھی بھی موجود تھیں۔

ہندوستان کی معروف ایئر لائن انڈیگو کی طلائی تمغہ جیتنے والے نیرج چوپڑا کو یہ پیشکش 8 اگست 2021 سے 7 اگست 2022 کی مدت کے لیے ویلڈ ہوگی۔

نئی دہلی: ہندوستان کی معروف ایئر لائن انڈیگو نے ٹوکیو اولمپکس کے طلائی تمغہ جیتنے والے نیرج چوپڑا کو ایک سال کی مدت کے لیے مفت ٹکٹ دینے کا اعلان کیا ہے۔

انڈیگو کی یہ پیشکش 8 اگست 2021 سے 7 اگست 2022 کی مدت کے لیے ویلڈ ہوگی۔

اس کا اعلان کرتے ہوئے انڈیگو کے چیف ایگزیکٹو افسر اور ڈائریکٹر رنجے دتہ نے بتایا کہ ہم سب آپ کی کامیابی پر بہت خوش ہیں۔ آپ قوم کے لیے فخر کا باعث بنے ہیں اور ہم آپ کے لیے ایک سال کے لیے انڈیگو کا ٹکٹ پیش کرتے ہیں۔ میں جانتا ہوں کہ انڈیگو کے تمام ملازمین ہماری کسی بھی پرواز میں آپ کا استقبال کرتے ہوئے خوش ہوں گے۔

امریکی بی 52 بمبار طیاروں نے افغانستان میں طالبان کے ٹھکانوں پر فضائی حملے کئے، جس میں 200 سے زائد دہشت گرد ہلاک ہوئے۔

کابل: امریکی بی 52 بمبار طیاروں نے افغانستان کے صوبے جوزجان کے دارالحکومت شبرغان میں طالبان کے ٹھکانوں پر فضائی حملے کئے، جس میں 200 سے زائد دہشت گرد ہلاک ہوئے۔

افغان وزارت دفاع کے ترجمان فواد امان نے ہفتے کی شب ٹویٹ کیا کہ امریکی بمباروں نے آج شام صوبہ جوزجان کے دارالحکومت شبرغان میں طالبان کے گڑھوں پر فضائی حملے کیے، جس میں 200 سے زائد دہشت گرد ہلاک ہوئے۔ فضائی حملے میں دہشت گردوں کی بڑی تعداد میں اسلحہ، گولہ بارود اور 100 سے زائد گاڑیاں تباہ ہوئیں۔

#Details: More than 200 terrorist Taliban were killed in #Cheberghan city after Air Forces targeted their gathering and hideouts today evening. A large amount of their weapons and ammunition and more than 100s of their vehicles were destroyed as a result of the airstrikes.

— Fawad Aman (@FawadAman2) August 7, 2021

انہوں نے کہا کہ امریکی طیارے نیمروز، جوزجان، قندھار، ہرات، لشکرگاہ اور ہلمند پر طالبان کی گرفت کمزور کرنے کے لیے بھیجے گئے تھے۔

طالبان نے ہفتے کے روز اعلان کیا کہ اس نے جنوب مغربی صوبے نیمروز اور شمالی صوبے جوزجان پر قبضہ کر لیا ہے۔ نیمرز کا دارالحکومت زرنج 2016 میں طالبان کے قبضہ میں آنے والا پہلا صوبائی مرکز بن گیا ہے۔

مرکزی وزارت صحت کے جاری کردہ اعداد و شمار کے مطابق گزشتہ 24 گھنٹوں میں کورونا کے39070 نئے کیسز کی رپورٹ کے ساتھ متاثرین کی مجموعی تعداد تین کروڑ 19 لاکھ 34 ہزار 455 ہو گئی ہے۔ وہیں ایکٹو کیسز 5331 گھٹ کر چار لاکھ چھ ہزار 822 ہو گئے ہیں۔

نئی دہلی: گزشتہ 24 گھنٹوں کے دوران ملک میں کووڈ 19 کے 40 ہزار سے کم نئے کیسز رپورٹ ہوئے۔ ایکٹو کیسز 5331 گھٹ کر چار لاکھ چھ ہزار 822 ہو گئے ہیں۔ اس وبا سے صحت یاب ہونے والے لوگوں کی تعداد زیادہ ہونے کی وجہ سے صحت یاب ہونے کی شرح متاثرہ افراد کی تعداد سے زیادہ ہے۔ یہ شرح 97.39 فیصد تک پہنچ گئی ہے۔

ہفتے کے روز ملک میں 55 لاکھ 91 ہزار 657 افراد کو کورونا کے ٹیکے لگائے گئے اور اب تک 50 کروڑ 68 لاکھ 10 ہزار 492 افراد کو ویکسین دی جا چکی ہے۔

اتوار کی صبح مرکزی وزارت صحت کے جاری کردہ اعداد و شمار کے مطابق گزشتہ 24 گھنٹوں میں کورونا کے39070 نئے کیسز کی رپورٹ کے ساتھ متاثرین کی مجموعی تعداد تین کروڑ 19 لاکھ 34 ہزار 455 ہو گئی ہے۔ اس دوران 43 ہزار 910 مریضوں کی صحت یابی کے بعد اس وبا کو شکست دینے والے افراد کی کل تعداد تین کروڑ 10 لاکھ 99 ہزار 771 ہو گئی ہے۔

ایکٹو کیسز 5331 گھٹ کر چار لاکھ چھ ہزار 822 ہو گئے ہیں۔ اسی عرصے میں 491 مریضوں کی موت کے سے ہلاک شدگان کی مجموعی تعداد بڑھ کر چار لاکھ 27 ہزار 862 ہو گئی ہے۔ ملک میں ایکٹیو کیسز کی شرح گھٹ کر 1.27 فیصد، شفا یابی کی شرح 97.39 فیصد اور اموات کی شرح 1.34 فیصد ہو گئی ہے۔

اترپردیش کے مئو ضلع کے دوہری گھاٹ علاقے میں ایک خوفناک سڑک حادثہ میں چار بچوں اور ایک خاتون سمیت پانچ افراد ہلاک اور دو دیگر زخمی ہوگئے۔

مئو: اترپردیش کے ضلع مئو کے دوہری گھاٹ علاقے میں ایک خوفناک سڑک حادثہ میں چار بچوں اور ایک خاتون سمیت پانچ افراد ہلاک اور دو دیگر زخمی ہوگئے۔

پولیس ذرائع نے اس حادثہ کی یہاں اطلاع دی۔ انہوں نے بتایا کہ ریاست جھارکھنڈ سے سات لوگ ضلع مئو کے دوہری گھاٹ نگر پنچایت کے دوباری موڑ کے رہنے والے پریم مودانوال کے گھر ایک کار میں آ رہے تھے۔ کار ہفتہ کی رات تقریبا 1.30 بجے قابو سے باہر ہو گئی اور بیلولی سون برسا کے قریب سڑک کے کنارے پانی سے بھرے گڑھے میں الٹ گئی۔ اس حادثے میں ایک چار بچوں سمیت پانچ افراد ہلاک ہوگئے۔

انہوں نے بتایا کہ مرنے والوں میں پانچ سالہ میئنک، نو سالہ تانیہ، 38 سالہ ممتا، ڈھائی سالہ بچی اور سات سالہ دویانش شامل ہیں۔ مہیش مودنوال اور دیپیکا مودنوال حادثے میں زخمی ہوئے ہیں۔

ذرائع نے بتایا کہ اس حادثہ کی اطلاع ملنے پر پولیس موقع پر پہنچی اور گاڑی سے پانچوں لاشیں نکال کر پوسٹ مارٹم کے لیے بھیج دیں جبکہ زخمیوں کو اسپتال میں داخل کرایا گیا ہے۔

وزیر اعظم نریندر مودی پیر کو پردھان منتری کسان سمان ندھی (پی ایم کسان) یوجنا کے تحت مالی فوائد کی اگلی قسط جاری کریں گے۔

نئی دہلی: وزیر اعظم نریندر مودی پیر کو پردھان منتری کسان سمان ندھی (پی ایم کسان) یوجنا کے تحت مالی فوائد کی اگلی قسط جاری کریں گے۔

ویڈیو کانفرنسنگ کے ذریعہ منعقدہ اس پروگرام میں 9.75 کروڑ سے زیادہ مستحق کسان کنبوں کو 19,500 کروڑ روپے سے زیادہ کی رقم منتقل کی جاسکے گی۔ پروگرام کے دوران وزیر اعظم کسان مستفید افراد سے بات چیت کریں گے اور قوم سے بھی خطاب کریں گے۔

پی ایم کسان یوجنا کے تحت اہل مستحق کسان کنبوں کو چھ ہزار سالانہ کا مالی فائدہ دیا جاتا ہے اور اس مالی فائدہ کو 2000روپے کی تین قسطوں میں ہرچار مہینے میں دیا جاتا ہے۔ رقم سیدھے مستحق افراد کے بینک اکاؤنٹ میں منتقل کی جاتی ہے۔

اس اسکیم کے تحت اب تک 1.38 لاکھ کروڑ روپے سے زیادہ کی رقم کسان کنبوں کے بینک اکاؤنٹوں میں منتقل کی جا چکی ہے۔ اس موقع پر مرکزی وزیر زراعت بھی موجود رہیں گے۔

ہندوستان کے اسٹار ایتھلیٹ نیرج چوپڑا نے اپنی دوسری کوشش میں 87.58 میٹر کے تھرو کے ساتھ ٹوکیو اولمپک میں نیزہ پھینکنے کے مقابلہ میں طلائی تمغہ جیت کر تاریخ رقم کردی۔

ٹوکیو: ہندوستان کے اسٹار ایتھلیٹ نیرج چوپڑا نے سنیچر کے روز اپنی دوسری کوشش میں 87.58 میٹر کے تھرو کے ساتھ ٹوکیو اولمپک میں نیزہ پھینکنے کے مقابلہ میں طلائی تمغہ جیت کر تاریخ رقم کردی۔

نیرج نے اولمپک میں ہندوستان کا پہلا ایتھلیٹ تمغہ جیتا اور وہ بھی طلائی تمغہ کی شکل میں۔

ہندوستان نے اس کے ساتھ ہی اولمپک میں اپنی بہترین کارکردگی کا ریکارڈ بھی بنایا اور لندن میں چھ تمغے جیتنے کی اپنی سابقہ کارکردگی کو پیچھے چھوڑ دیا۔

ہندوستانی گولفر ادیتی اشوک نے پہلے تین راؤنڈ میں اچھی کارکردگی کا مظاہرہ کیا اور ٹاپ تین میں اپنی جگہ برقرار رکھی۔ ان کی کارکردگی کی وجہ سے سبھی کو ان سے تمغے کی امید تھی لیکن چوتھے اور آخری راؤنڈ میں چوتھے نمبر پر آنے سے وہ پوڈیم (ٹاپ تین) پر ختم نہ کر پائیں۔

ٹوکیو: نوجوان ہندوستانی گولفر ادیتی اشوک ہفتہ کو یہاں خواتین کے انفرادی اسٹروک پلے میں میڈل پانے سے محروم رہ گئیں۔ انہوں نے چوتھی پوزیشن پر مقابلہ ختم کیا جو اولمپکس میں کسی بھی ہندوستانی گولفر کی اب تک کی بہترین کارکردگی ہے۔

ادیتی نے پہلے تین راؤنڈ میں اچھی کارکردگی کا مظاہرہ کیا اور ٹاپ تین میں اپنی جگہ برقرار رکھی۔ ان کی کارکردگی کی وجہ سے سبھی کو ان سے تمغے کی امید تھی لیکن چوتھے اور آخری راؤنڈ میں چوتھے نمبر پر آنے سے وہ پوڈیم (ٹاپ تین) پر ختم نہ کر پائیں۔

امریکہ کی نیلی کورڈا نے اپنے تمام حریفوں کو شکست دیتے ہوئے سرفہرست رہ کر گولڈ میڈل جیتا۔ دوسری جانب جاپان کی انامی مونے نے نیوزی لینڈ کی لیڈیا کیو کو پیچھے چھوڑتے ہوئے فائنل راؤنڈ میں چاندی کا تمغہ جیتنے میں کامیابی حاصل کی۔ لیڈیا کو کانسہ کے تمغے سے مطمئن ہونا پڑا۔

ہندوستان کی دیکشا ڈاگر بھی کچھ خاص نہ کر سکی اور 50 ویں نمبر پر مقابلہ ختم کیا۔ گولڈ میڈل یافتہ نیلی کورڈا کی بہن نے اچھا مظاہرہ کیا۔ وہ 14 ویں نمبر پر رہیں۔