ترنمول کانگریس نے ضمنی انتخابات میں چاروں سیٹوں پر کامیابی حاصل کی ہے۔ ادین گوہا نے ضمنی انتخابات میں بڑے فرق سے جیت حاصل کرکے ریکارڈ حاصل کیا ہے۔

کلکتہ: ترنمول کانگریس نے ضمنی انتخابات میں چاروں سیٹوں پر کامیابی حاصل کی ہے۔ 2021 میں کوچ بہار میںس دن ہاٹا میں ترنمول کانگریس کے امیدوار کو محض 56 ووٹوں سے شکست کا سامنا کرنا پڑا تھا مگر اس مرتبہ ترنمول کانگریس کے ادین گوہا نے 189575 ووٹوں سے ریکارڈ جیت حاصل کی ہے جب کہ بی جے پی امیدوار کو محضِ 11 فیصد ووٹ ملے۔ ادین گوہا نے ضمنی انتخابات میں بڑے فرق سے جیت حاصل کرکے ریکارڈ حاصل کیا ہے۔

گوسابا سے ترنمول کانگریس کے امیدوار سبرتو منڈل نے 161474 وو ٹ حاصل کی ہے۔ انہیں کل 87 فیصد ووٹ ملے ہیں جب کہ بی جے پی کے امیدوار پالس رانا کو محض 9.95 فیصد ووٹ ملے ہیں۔

کھردہ سے ریاستی وزیر شوبھن دیب چٹرجی نے 114086 ووٹ حاصل کرکے جیت درج کی ہے۔دوسری پوزیشن کے لئے بی جے پی اور سی پی آئی کے درمیان زبردست مقابلہ تاہم بعد میں بی جے پی کے امیدوار جے ساہا نے 13 فیصد ووٹ حاصل کیا اور سی پی آئی ایم کے امیدوار کو دیب جیوتی داس کو 10.30 فیصد ووٹ ملے۔

بی جے پی اور سی پی آئی کے درمیان دوسری پوزیشن کے لئے سخت مقابلہ

شانتی پور جہاں گزشتہ انتخاب میں ترنمول کانگریس کے امیدوار کو شکست کا سامنا کرنا پڑا تھا۔ اس مرتبہ ترنمول کانگریس کے برجس گوسوامی نے 112087 ووٹ حاصل کرکے جیت حاصل کی ہے۔ یہاں بھی بی جے پی اور سی پی آئی کے درمیان دوسری پوزیشن کے لئے سخت مقابلہ ہوا اور بی جے پی کو 23 فیصد ووٹ ملے تو سی پی آئی ایم کو 19 فیصد ووٹ ملے ہیں۔

دن ہاٹا میں ریکارڈ ووٹوں سے جیت حاصل کرنے کے بعد نو منتخب ممبر اسمبلی ادیان گوہا نے کہا کہ یہاں کے عوام کا قرض بڑھ گیا ہے۔ ریاستی وزیر فرہاد حکیم بھی دن ہاٹا کی جیت پر خوشی کا اظہار کرتے ہوئے کہا کہ میں نے دن کے وقت سرحدی علاقے کا دورہ کیا تھا۔ میں نے لوگوں کا جوش دیکھا۔ بی جے پی کا کوئی وجود نہیں ہے۔ بی جے پی بنگال کو شمالی بنگال میں تقسیم کرنے کی کوشش کر رہی تھی۔ عام آدمی نے جواب دیا ہے۔

خیال رہے کہ بی جے پی کے کوچ بہار کے ممبر پارلیمنٹ نے یہاں سے ادیان گوہا کو محض 56 ووٹوں سے ہرایا تھا مگر بعد میں انہوں نے پارلیمنٹ کی رکنیت برقرار رکھتے ہوئے ممبر اسمبلی کا عہدہ رکھا۔ بعد میں انہیں مرکزی وزیر مملکت برائے داخلہ بنایا گیا۔ ضمنی انتخاب کا شیڈول کا اعلان ہونے کے بعد سے ہی وہ اس حلقے میں سرگرم تھے۔ انہیں مبصر مقرر کیا گیا تھا۔ مگر اس بوتھ پر جہاں ان کا ووٹ ہے وہاں پر بھی بی جے پی کے امیدوار کو جیت نہیں دلا سکے۔

کمیشن کے ذرائع کے مطابق اس بوتھ پر بی جے پی امیدوار اشوک منڈل کو صرف 95 ووٹ ملے۔ ترنمول کانگریس کے اُدین گوہا کو اس بوتھ پر 360 ووٹ ملے۔ اس بوتھ میں کل ووٹوں کی تعداد 492 ہے۔ مرکزی وزیر کے اپنے بوتھ پر بی جے پی 275 ووٹوں سے ہارگئے۔ ترنمول کانگریس کے پولنگ ایجنٹ پارتھا پرتیم رائے نے کہا کہ نشیتھ پرمانک کے لیے یہ شرم کی بات ہے۔

ممبئی پولیس کمشنر پرم بیر سنگھ کی طرف سے بدعنوانی کے الزامات عائد کیے جانے کے بعد انیل دیشمکھ نے اس سال اپریل میں ریاست کے وزیر داخلہ کے عہدے سے استعفیٰ دے دیا تھا۔

ممبئی: انفورسمنٹ ڈائریکٹوریٹ (ای ڈی) نے مہاراشٹر کے سابق وزیر داخلہ انیل دیشمکھ کو منی لانڈرنگ معاملہ میں 13 گھنٹے سے زائد کی پوچھ گچھ کے بعد گرفتار کر لیا۔

ذرائع نے منگل کے روز یہ اطلاع دی۔

ذرائع کے مطابق ای ڈی نے اس سے پہلے مسٹر دیشمکھ کو پانچ سمن جاری کئے تھے۔ مسٹر دیشمکھ پیر کے روز ای ڈی کے سامنے پیش ہوئے۔ پوچھ گچھ کے دوران وہ ای ڈی کے ساتھ مکمل تعاون نہیں کر رہے تھے اور سوالات کے جواب دینے میں ٹال مٹول کر رہے تھے۔ انہیں رات میں تقریباََ ڈیڑھ بجے گرفتار کر لیا گیا۔

ممبئی پولیس کمشنر پرم بیر سنگھ کی طرف سے بدعنوانی کے الزامات عائد کیے جانے کے بعد مسٹر دیشمکھ نے اس سال اپریل میں ریاست کے وزیر داخلہ کے عہدے سے استعفیٰ دے دیا تھا۔

مدھیہ پردیش میں چار اسمبلی ضمنی انتخابات کے لیے آج صبح 8 بجے ووٹوں کی گنتی سخت حفاظتی انتظامات کے درمیان شروع ہو گئی۔

بھوپال: مدھیہ پردیش کے کھنڈوا پارلیمانی حلقہ، رائےگاؤں، پرتھوی پور اور جوبٹ اسمبلی ضمنی انتخابات کے لیے آج صبح 8 بجے ووٹوں کی گنتی سخت حفاظتی انتظامات کے درمیان شروع ہو گئی۔ سب سے پہلے پوسٹل بیلٹ کی گنتی کی جائے گی۔

کھنڈوا پارلیمانی حلقہ کی حدود میں آنے والی باگلی اسمبلی حلقہ کے ووٹوں کی گنتی ضلع دیواس ہیڈکوارٹر، مندھاتا اور پندھانا کے ووٹوں کی گنتی کھنڈوا میں، برہان پور اور نیپا نگر کے ووٹوں کی گنتی برہان ضلع ہیڈکوارٹر میں کی جا رہی ہے۔ اسی طرح بڑوہا اور بھیکھن گاوں اسمبلی حلقوں کی گنتی کھرگون میں شروع ہو گئی ہے۔ وہیں پرتھوی پور اسمبلی حلقہ کے ووٹوں کی گنتی نیواڑی میں، رائےگاؤں کی ستنا اور جوبٹ کی علی راج پور میں کی جا رہی ہے۔

ہر اسمبلی حلقہ میں ووٹوں کی گنتی کے لیے دو ہال بنائے گئے ہیں جن میں سات سات میزیں لگائی گئی ہیں۔ پوسٹل بیلٹ پیپرز کے ووٹوں کی گنتی کے لیے نیواڑی، علی راج پور، ستنا اور کھنڈوا میں الگ الگ کمرے بنائے گئے ہیں۔ پرتھوی پور میں 22 راؤنڈ، رائےگاؤں میں 23 اور جوبٹ میں 30 راؤنڈ میں ووٹوں کی گنتی ہوگی۔ اسی کھنڈوا پارلیمانی حلقہ میں باگلی میں 26، مندھاتا میں 22، کھنڈوا میں 28، پندھانا میں 28، نیپا نگر میں 27 اور برہان پور میں 32، بھیکن گاؤں میں 25 اور بڑوہا اسمبلی حلقہ میں 22 راؤنڈ میں ووٹوں کی گنتی کی جائے گی۔

گنتی کے تمام مقامات پر ضلعی پولیس اور مرکزی نیم دستوں کی تعیناتی کی گئی ہے۔ ووٹوں کی گنتی کے دوران اور نتائج کے اعلان کے بعد کوئی بھی جیت کا جلوس نہیں نکالا جائے گا۔ متعلقہ ریٹرننگ آفیسر کی طرف سے جیتنے والے امیدوار کو انتخابی سرٹیفکیٹ فراہم کرایا جائے گا ، جس میں جیتنے والے امیدوار کے ساتھ زیادہ سے زیادہ دو افراد ہوں گے۔

دہرادون پہنچے امت شاہ کو کالے جھنڈے دکھانے جا رہے کانگریس کارکنان کو پولیس نے گرفتار کرلیا۔

دہرادون: اتراکھنڈ کے دہرادون پہنچے مرکزی وزیر داخلہ امت شاہ کو ہفتے کو کالے جھنڈے دکھانے جا رہے کانگریس کارکنان کو پولیس نے گرفتار کرلیا۔

یہ کارکنان اسٹوڈنٹ لیڈر ہمانشو راوت کی قیادت میں گھنٹہ گھر چوک پر کالے جھنڈے لے کر جمع ہوکر پروگرام کی جگہ بنو اسکول جانے والے تھے۔ نعرے بازی کرنے والے کارکنان کو پولیس نے آگے نہیں جانے دیا تو وہ پولیس اہلکاروں سے الجھنے لگے۔ ہلکی کہا سنی کے بعد سبھی کو پولیس نے گرفتار کرلیا۔

کانگریس رہنما ہمانشو راوت نے کہا کہ ریاست میں پچھلے دنوں آئی آفت میں مرکز نے کوئی مدد نہیں کی، نہ ہی ریاست میں روزگار دینے کے لئے مرکز اور ریاست کی جانب سے کوئی پختہ قدم اٹھایا جا رہا ہے۔ بی جے پی کا ایجنڈا صرف الیکشن جیتنے کا ہے۔ اس کے علاوہ انہیں ملک میں بڑھتی بے روزگاری اور دیگر مسئلوں سے کوئی واستہ نہیں۔ گرفتار کارکنان کو گرفتار کرکے پولیس لائن لے جایا گیا، جہاں سے سبھی کو نجی مچلکے پر رہا کردیا گیا ہے۔

ممتا بنرجی نے دعوی کیا کہ کانگریس کی وجہ سے مودی زیادہ طاقتور بن پائے ہیں۔ مغربی بنگال میں کانگریس نے میرے خلاف الیکشن کیوں لڑا۔

پنجی: مغربی بنگال کی وزیر اعلی اور ترنمول کانگریس کی سربراہ ممتا بنرجی نے ہفتے کو دعوی کیا کہ وزیر اعظم نریندر مودی کانگریس کی وجہ سے طاقتور بنتے جا رہے ہیں۔

ترنمول سربراہ نے یہاں ایک تقریب میں کہا، ’’میں ابھی کچھ نہیں کہہ سکتی۔ ان کے پاس کئی سارے موقع تھے، لیکن انہوں نے کچھ نہیں کیا۔ مودی کانگریس کی وجہ سے زیادہ طاقتور بن پائے ہیں۔ مغربی بنگال میں کانگریس نے میرے خلاف الیکشن کیوں لڑا۔‘‘

انہوں نے کہا، ’’کانگریس مودی جی کی ٹی آر پی ہے۔ اب بہت ہوگیا۔ میں کانگریس کے بارے میں زیادہ کچھ نہیں کہنا چاہتی۔ میری خود کی اپنی پارٹی ہے۔‘‘

محترمہ بنرجی سے اسمبلی اور لوک سبھا الیکشن میں کانگریس کے ساتھ اتحاد کے بارے میں بھی سوال کیا گیا۔

عالمی بازار میں جمعہ کو خام تیل کے بلند ترین سطح پر قائم رہنے کے درمیان پٹرول – ڈیزل کی قیمتوں میں گھریلو سطح پر مسلسل تیسرے دن اضافہ جاری ہے۔

نئی دہلی: عالمی بازار میں جمعہ کو خام تیل کے بلند ترین سطح پر قائم رہنے کے درمیان پٹرول – ڈیزل کی قیمتوں میں گھریلو سطح پر مسلسل تیسرے دن اضافہ جاری ہے۔ سرکاری آئل مارکیٹنگ کمپنیوں نے ہفتے کو مسلسل چوتھے دن ان دونوں کی قیمتوں میں 35-35 پیسے فی لیٹر اضافہ کیا جس کے بعد قومی دارالحکومت نئی دہلی میں پٹرول 108.99 روپے فی لیٹر اور ڈیزل 97.72 روپے فی لیٹر کے اب تک ریکارڈ سطح پر پہنچ گیا۔

اس اضافے کے بعد ممبئی میں پٹرول 114.81روپے اور ڈیزل 105.86 روپے فی لیٹر، مدھیہ پردیش کے دارالحکومت بھوپال میں سب سے مہنگا پٹرول 117.71 روپے فی لیٹر اور ڈیزل 107.13 روپے فی لیٹر، پٹنہ میں پٹرول 112.76 روپے اور ڈیزل بنگلورو میں 104.35 روپے فی لیٹر پٹرول 112.79 روپے اور ڈیزل 103.72 روپے فی لیٹر پر پہنچ گیا ہے۔

کولکاتا میں بھی پٹرول 109.46 روپے فی لیٹر اور ڈیزل 100.84 روپے فی لیٹر پر پہنچ گیا ہے۔ رانچی میں ان دونوں کی قیمتوں میں فرق صرف 11 پیسے ہے۔ پٹرول 103.20 روپے اور ڈیزل 103.20 روپے فی لیٹر ہے۔ نوئیڈا، دہلی این سی آر میں پٹرول کی قیمت 106.12 روپے اور ڈیزل کی قیمت 98.38 روپے فی لیٹر ہے۔

ڈیزل بھی بیشتر شہروں میں سنچری لگا رہا ہے

ابھی ملک کے تمام بڑے شہروں میں پٹرول کی قیمت 105 روپے فی لیٹر سے تجاوز کر گئی ہے۔ ڈیزل بھی بیشتر شہروں میں سنچری لگا رہا ہے۔ اس مہینے میں اب تک 30 دنوں میں سے 23 دنوں میں ان دونوں کی قیمتوں میں اضافہ ہوا ہے۔ اس ماہ اب تک پٹرول 7.35 روپے فی لیٹر اور ڈیزل 7.95 روپے فی لیٹر مہنگا ہو چکا ہے۔

مارکیٹ اسٹڈی اور کریڈٹ ریٹنگ کمپنی گولڈمین سیکس نے اگلے سال تک برینٹ کروڈ 110 ڈالر فی بیرل تک پہنچنے کی رپورٹ کے بعد امریکی بازار میں خام تیل میں تیزی تھی۔

جمعہ کو سنگاپور میں خام تیل کی تجارت اضافے کے ساتھ شروع ہوئی۔ برینٹ کروڈ کی قیمت 83.72 ڈالر فی بیرل پر رہا جبکہ امریکی کروڈ 0.50 فیصد کے اضافے کے ساتھ 83.22 ڈالر فی بیرل پر بند ہوا۔

آئل مارکیٹنگ کمپنی انڈین آئل کارپوریشن کے مطابق دہلی میں پٹرول 108.99 روپے فی لیٹر اور ڈیزل 97.72 روپے فی لیٹر پر پہنچ گیا۔

ان دونوں کی قیمتوں کا روزانہ جائزہ لیا جاتا ہے اور اس کی بنیاد پر ہر دن صبح 6 بجے سے نئی قیمتوں کا نفاذ کیا جاتا ہے۔

ملک کے چار میٹرو شہروں میں آج پٹرول اور ڈیزل کی قیمت اس طرح ہے:

شہر——————پٹرول روپے—————ڈیزل 
دہلی ————— 108.99—————— 97.72
ممبئی-————  114.87—————— 105.86
چنئی ————— 105.74—————— 101.92
کولکتہ ————  109.46—————— 100.84

عالمی مارکیٹ میں مسلسل گراوٹ سے مایوس سرمایہ کاروں کی مقامی سطح پر چوطرفہ فروخت سے گھریلو شیئر بازار میں آج دوسرے دن بھی ہلچل جاری رہی۔

ممبئی: آن لائن مارکیٹ پلیس ایمیزون اور موبائل فون بنانے والی کمپنی ایپل کے کمزور سہ ماہی نتائج کی وجہ سے عالمی مارکیٹ میں مسلسل گراوٹ سے مایوس سرمایہ کاروں کی مقامی سطح پر چوطرفہ فروخت سے گھریلو شیئر بازار میں آج دوسرے دن بھی ہلچل جاری رہی۔

بی ایس ای کا تیس حصص کا حساس انڈیکس سینسیکس 677.77 پوائنٹس گر کر 59,306.93 پوائنٹس اور نیشنل اسٹاک ایکسچینج (این ایس ای) کا نفٹی 185.60 پوائنٹس کا غوطہ لگا کر 17,671.65 پوائنٹس پر رہا۔ تاہم بڑی اور چھوٹی کمپنیوں کے برعکس درمیانے درجے کی کمپنیوں میں خریداری ہوئی۔ بی ایس ای کا اسمال کیپ 107.17 پوائنٹس گر کر 27،982.80 پر رہا، جبکہ مڈ کیپ 41.44 پوائنٹس کے اضافے سے 25،277.72 پر پہنچ گیا۔

بی ایس ای پر کل 3399 کمپنیوں کے حصص کا کاروبار ہوا۔ ان میں سے 1819 کی قیمتوں میں کمی جبکہ 1427 کی قیمتوں میں تیزی رہی جبکہ 153 کی قیمتوں میں کوئی تبدیلی نہیں ہوئی۔ اسی طرح این ایس ای میں 32 کمپنیوں نے غوطہ لگایا جبکہ 18 میں اضافہ ہوا۔

اس دوران، رئیلٹی، دھاتیں، کنزیومر ڈیور بلس، آٹو، ہیلتھ کیئر، بیسک میٹیریل گروپ کی 0.55 فیصد کی تیزی کے علاوہ بقیہ گروپس میں مندی رہی۔ اس دوران ٹیک 1.35، پاور 0.70، آئل اینڈ گیس 0.52، کیپٹل گڈز 0.73، بینکنگ 1.12، یوٹیلٹیز 0.93، ٹیلی کام 0.46، آئی ٹی 1.60، فنانس 0.95 اور گروپ کے حصص میں 1.90 فیصد اضافہ ہوا۔

غیر ملکی منڈیوں میں گراوٹ کا رجحان رہا۔ اس دوران برطانیہ کا ایف ٹی ایس ای 0.35، جرمنی کا ڈیکس 0.90 اور ہانگ کانگ کا ہینگ سینگ 0.70 فیصد اتر گیا۔ جبکہ جاپان کے نکیئی میں 0.25 فیصد اور چین کے شنگھائی کمپوزٹ میں 0.82 فیصد کی تیزی رہی۔

اترپردیش کے کشی نگر میں ایک سڑک حادثے میں دیوریا ضلع کے پانچ نوجوانوں کی موت ہوگئی جبکہ چار زخمی ہیں۔

دیوریا: اترپردیش کے کشی نگر ضلع کے رام پور باگہا کُٹی کے نزدیک ایک سڑک حادثے میں دیوریا ضلع کے پانچ نوجوانوں کی موت ہوگئی جبکہ چار زخمی ہیں۔

پولیس ذرائع نے جمعہ کو بتایا کہ رودرپور قصبے کے شیوالہ وارڈ کے رام کرپال ورما کے بیٹے کی منگنی کی رسم رام کولا مندر میں ہوئی تھی اور اس رسم کے بعد جمعرات کی رات واپس رودرپور آ رہی کار رام کولا علاقے کے رام پور باگہا کٹی کے نزدیک سامنے سے آ رہی ٹریکٹر ٹرالی سے ٹکرا گئی۔

اس حادثے میں پیارے لال کی موقع پر ہی موت ہوگئی جبکہ سنگین طور پر زخمی ابھیشیک ورما، رودریش چوبے، ارباز انصاری، راج اور جیتو مدھیشیا کی میڈیکل کالج گورکھپور لے جاتے وقت راستے میں موت ہوگئی۔ حادثے میں چار نوجوان شیو کمار، منشی، سونو اور پون سنگین طور پر زخمی ہیں جن کا علاج میڈیکل کالج گورکھپور میں ہورہا ہے۔ مرنے والوں نوجوان رودرپور کے رہنے والے ہیں۔ سبھی نوجوان ایک ہی کار میں سوار تھے۔

ممبئی ہائی کورٹ نے آرین خان اور دیگر ملزمین کو بحری جہاز میں منشیات کی ریو پارٹی میں شرکت کرنے اور اسکے استعمال کے معاملے میں مشروط ضمانت پر رہا کئے جانے کا حکم جاری کیا۔

ممبئی: ممبئی ہائی کورٹ نے آج یہاں ٢۵ دنوں کی جیل کی صعوبتیں برداشت کرنے کے بعد بالآخر فلم اداکار شاہ رخ خان کے بیٹے آرین خان اور دیگر ملزمین کو بحری جہاز میں منشیات کی ریو پارٹی میں شرکت کرنے اور اسکے استعمال کے معاملے میں مشروط ضمانت پر رہا کئے جانے کا حکم جاری کیا۔

آرین خان اور اسکے دیگر ساتھیوں کو تین ہفتوں سے قبل ممبئی کے ساحل پر ایک کروز جہاز پر نارکوٹکس کنٹرول بیورو (این سی بی) کے چھاپے کے دوران گرفتار کیا گیا تھا اور ان کے قبضہ سے ۱۳؍گرام کوکین، ۵؍گرام ایم ڈی، ۲۱؍گرام چرس اور ایس ٹی سی نامی منشیات کی ۲۲؍گولیاں و تقریباً ڈیڑھ لاکھ روپیہ نقد ضبط کیا گیا تھا۔

ممبئ ہائی کورٹ کے جج حسٹس نیتن سامبرے نے اپنے یک سطری حکم میں کہا کہ تینوں ملزمین کی درخواست ضمانت کو منظور کر رہی ہے لیکن اپنا مکمل حکم نامہ کل ظاہر کرے گی۔

آرین کو ضمانت پر رہا کرتے ہوئے عدالت نے اس پر مختلف شرائط بھی عائد کرنے کا تذکرہ کیا اور کہا کہ ضمانت کی شرائط بھی کل ہی ظاہر کی جائے گی۔ خان اور اس کے دو دوست ارباز مرچنٹ اور من من دھمیچا کو بھی عدالت نے ضمانت پر رہا کیا ہے۔ دفاعی وکلاء نے عدالت سے نقد رقم ادا کرنے کی بھی درخواست کی جسے عدالت نے یہ کہہ کر مسترد کر دیا کہ کل حتمی فیصلہ دیا جائے گا۔

آرین خان فی الوقت ممبئ کے آرتھر روڈ جیل میں

آرین خان فی الوقت ممبئ کے آرتھر روڈ جیل میں مقید ہیں گزشتہ دنوں انہیں جیل کے قرنطینہ سنٹر سے دیگر قیدیوں کے بیرک میں منتقل کیا گیا تھا۔

پورے ملک میں موضوع بحث بننے والی بالخصوص قانونی حلقوں میں گہری نظروں سے دیکھی جانے والی آرین خان کی درخواست ضمانت کی استغاثہ نے خصوصی عدالت میں پرزور لفظوں میں مخالفت کی تھی۔ اور عدالت کو کہا تھا کہ آرین خان منشیات کا عادی ہے اور اس کے موبائل پر دستیاب وہاٹس ایپ چیٹ سے حاصل شدہ گفتگو سے یہ ثابت ہوتا ہے کہ ملزم کے عالمی سطح پر منشیات فروشوں سے روابط تھے۔ لہذا ایسے ملزم کو ضمانت پر نہیں رہا کیا جانا چاہیئے کیونکہ اس کی رہائی سے جاری تفتیش متاثر ہوگی اور ثبوت و شواہد کے تباہ ہونے کا بھی اندیشہ ہو گا۔

استغاثہ کی پیروی ایڈشنل سالیسیٹر جنرل انل سنگھ نے کی تھی اور انہوں نے عدالت کو بتلایا کہ اس بات سے کوئی انکار نہیں کہ آرین خان کے قبضہ سے کوئی منشیات نہیں دستیاب ہوئی ہے۔ لیکن آرین کے دوستوں کے پاس جو منشیات این سی بی نے ضبط کی ہے اس کی مقدار تجارتی ہے اور چونکہ وہ اس گروہ کا رکن تھا جن کے قبضہ سے تجارتی مقدار کی منشیات ضبط ہوئی ہے۔ لہذا ان منشیات فروشوں پر قانون کی جو سخت دفعات اور جو سزائیں تجویز کی جا سکتی ہیں وہ آرین خان پر بھی نافذ ہوتی ہیں۔

استغاثہ کے دلائل کی وکلاء دفاع نے مخالفت کی

استغاثہ کے ان دلائل کی وکلاء دفاع سینئر وکلاء مکل روہتگی امیت دیسائی، ستیش مانے شندے اور دیگر نے مخالفت کی اور کہا تھا کہ ملزم کے قبضہ سے کوئی منشیات برآمد نہیں ہوئی ہے۔ نیز وہ اس کا استعمال کرتے ہوئے پایا گیا ہوگا کیونکہ وہ ایک گمراہ کن نوجوان ہے۔ لہذا اسے اصلاح کا موقع فراہم کرنا چاہیئے اور اسے ضمانت پر رہا کرنا چاہیئے۔

وکلاء دفاع نے عدالت کو مزید بتلایا تھا کہ چرس اور گانجے کو عالمی سطح پر مختلف ممالک میں منشیات کی فہرست سے ہی نکال دیا ہے۔ نیز آرین خان سمیت دیگر ملزمین کو اپنے کیئے کی سزا مل چکی ہے اور وہ ایک طویل عرصہ سے جیل کی سلاخوں کے پیچھے مقید ہیں اور تقاضہ وقت ہے کہ انہیں اصلاح کیلئے ضمانت پر رہا کیا جائے۔

2 اکتوبر کو شام میں ہوئی آرین کی گرفتاری

2؍ اکتوبر کو شام میں آرین کی گرفتاری کے بعد اسے 3؍اکتوبر کو ممبئی کی مقامی عدالت میں پیش کیا گیا تھا جس نے اسے ۵؍اکتوبر تک این سی بی کی حراست میں رکھے جانے کا حکم جاری کیا تھا۔ اس کے بعد ۵؍اکتوبر کو ہی آرین سمیت دیگر کو عدالت نے ۱۴؍دنوں کیلئے عدالتی تحویل میں بھیج دیا تھا۔ جس کے بعد انہیں ممبئی کے آرتھر روڈ جیل میں مقید کیا گیا تھا۔ اس دوران دفاعی وکلاء نے مقامی عدالت میں درخواست ضمانت دائر کی تھی لیکن مجسٹریٹ نے اسے یہ کہہ کر مسترد کر دیا تھا کہ ضمانت پر رہا کرنا مقامی عدالت کے دائرہ اختیار میں نہیں ہے۔

مقامی عدالت کی جانب سے ضمانت مسترد کیئے جانے کے بعد آرین اور دیگر نے سیشن عدالت میں درخواست ضمانت داخل کی تھی جس پر عدالت نے ۲۰؍اکتوبر تک اپنا فیصلہ محفوظ رکھا تھا۔ اور درخواست کو یہ کہکر مسترد کر دیا تھا کہ بادی النظر میں ملزمین کے خلاف شواہد موجود ہیں اور ضمانت پر رہائی سے تفشیش متاثر ہوں گی۔

منشیات کی ریو پارٹی میں شریک آرین کو رہائی کا نامکمل پروانہ دستیاب

٢۵؍دنوں تک این سی بی اور جیل کی صعوبتیں برداشت کرنے کے بعد آج آرین کو رہائی کا نامکمل پروانہ دستیاب ہوا۔ کیونکہ حتمی فیصلہ ابھی آنا باقی ہے اور اسکے بعد کل یا پرسوں اسکی جیل سے رہائی عمل میں آئے گی۔

آرین نے گزشتہ دنوں جیل میں اپنے والدین سے بھی ویڈیو کال پر دس منٹ کیلئے گفتگو کی تھی۔ شاہ رخ خان اور انکی اہلیہ گوری خان نے بھی جیل جاکر آرین سے جزباتی ملاقاتیں کی تھی۔ جیل میں قیام کے دوران آرین سے سرکاری ماہرین نفسیات نے بھی ملاقات کی تھی اور اس کی اصلاح کیلئے مختلف مشورے دیئے تھے۔

منشیات کنٹرول بیورو (این سی بی ) کی آرین پر کی جانے والی یہ کارروائی سیاسی حلقوں میں بھی موضوع بحث بنی تھی اور مہاراشٹر کے ایک کابینی وزیر نواب ملک نے تفتیشی ایجنسیوں پر الزام عائد کیا تھا کہ اس نے قانون کی دھجیاں اڑاتے ہوئے اس معاملے میں خلاف ورزیاں کی ہیں۔ اور پوری کارروائی پر انہوں نے شک کے دائرے میں لائے جانے کے الزامات عائد کیے تھے جبکہ این سی بی نے اسے بے بنیاد اور گمراہ کن قرار دیا تھا۔