سوشل میڈیا پی آر قدغن کے جو ضابطے حکومت آج یا کل سے نافذ کرنے جا رہی ہے، وہ 25 فروری کو شائع ہوئے تھے اور اب تین ماہ پورے ہونے کے بعد انھیں نافذ کیا جانا ہے۔ اس نئے ضابطے کے تحت حکومت کی کوشش آئینی حقوق اور آئینی اداروں کا گلا گھونٹنے اور انھیں اپنے اشاروں پر چلنے کے لیے مجبور کرنا ہے۔ کوئی حکومت کے خلاف آواز نہ اٹھائے یا اس کی کوئی مخالفت نہ ہو، اسی مقصد سے یہ قانون بنایا گیا ہے۔

نئی دہلی: کانگریس نے سوشل میڈیا کے لیے نئے ضابطوں کو مودی حکومت کی تاناشاہی قرار دیتے ہوئے کہا کہ اب تک اس پلیٹ فارم کا استعمال اظہار خیال کی آزادی کے طور پر ہوتا آیا ہے۔ لیکن نئے ضابطے نافذ کرکے حکومت اس پر قدغن لگا رہی ہے۔ کانگریس کے ترجمان ابھیشیک منو سنگھوی نے بدھ کے روز پریس کانفرنس میں کہا کہ اظہار خیال کی آزادی پر مودی حکومت جن نئے ضابطوں کو نافذ کر رہی ہے، وہ بے درد، بے رحم، بے ایمانی اور تاناشاہی کی مثالیں ہیں۔

انہوں نے کہا کہ اظہار خیال کی آزادی پر شمالی کوریا کا تاناشاہ بھی اتنی بے رحمی سے ضابطے نافذ نہیں کرتا ہے۔ ان کا کہنا تھا کہ جس بے رحمی سے مودی حکومت یہ ضابطے لا رہی ہے، وہ شمالی کوریا کے تاناشاہ کے لیے بھی باعث تحریک ہو سکتا ہے۔

ترجمان نے کہا کہ سوشل میڈیا پی آر قدغن کے جو ضابطے حکومت آج یا کل سے نافذ کرنے جا رہی ہے، وہ 25 فروری کو شائع ہوئے تھے اور اب تین ماہ پورے ہونے کے بعد انھیں نافذ کیا جانا ہے۔ ان ضابطوں کو ڈیجیٹل میڈیا کے لیے 2020-21 کا ضابطہ کہا جاتا ہے۔ ان ضابطوں میں جو انتظام کیا گیا ہے، وہی شمالی کوریا کے حکمراں کا سوشل میڈیا اور پریس کے تئیں ہوتا ہے۔

مسٹر سنگھوی نے کہا کہ اس نئے ضابطے کے تحت حکومت کی کوشش آئینی حقوق اور آئینی اداروں کا گلا گھونٹنے اور انھیں اپنے اشاروں پر چلنے کے لیے مجبور کرنا ہے۔ کوئی حکومت کے خلاف آواز نہ اٹھائے یا اس کی کوئی مخالفت نہ ہو، اسی مقصد سے یہ قانون بنایا گیا ہے۔

انہوں نے کہا کہ اس ضابطے میں سب سے خرابی یہ ہے کہ اس کے ذریعے ایکٹ پر حملہ کیا جا رہا ہے۔ ماہرین قانون اسے سنگین صورتحال مانتے ہیں کیونکہ ایسا کبھی نہیں ہوا ہے لیکن یہاں حکومت نے تاناشاہی رویہ اختیار کرکے من مانی کی ہے۔

ترجمان نے کہا کہ بولنے کی آزادی انسانی ثقافت کی آکسیجن ہے اور یہ صورتحال جمہوریت کے شعبے میں بھی آکسیجن کی کمی پیدا کرتی ہے۔ حکومت نے آج بہت ہی سنگین حالات پیدا کر دیے ہیں۔ یہ مسئلہ ہماری تہذیب میں تبادلہ خیال سے منسلک ہے اور اس پر سنجیدگی سے سوچا جانا چاہیے۔

خلیج بنگال میں برپا یاس طوفان اڑیسہ کے بالاسور کے ساحل سے صبح 9.15 بجے ٹکرانا شروع کردیا ہے۔ ممتا بنرجی کی رپورٹ کے مطابق، ساحلی علاقے میں 60 کلومیٹر پشتے تباہ ہوگئے ہیں۔ بہت سے ڈیم ٹوٹ چکے ہیں۔ یہاں تک کہ نندی گرام بھی سیلاب کی زد میں آگیا ہے۔

کلکتہ: خلیج بنگال میں برپا ’’یاس طوفان‘‘ اڑیسہ کے بالاسور کے ساحل سے صبح 9.15 بجے ٹکرانا شروع کردیا ہے۔ وزیر اعلی ممتا بنرجی جنہوں نے پوری رات ریاستی سیکریٹریٹ نوبنو میں کنٹرول روم میں بیٹھ کر مورچہ سنبھال رہی ہیں نے کہا کہ مشرقی مدنی پور میں صورت حال بہت ہی خراب ہے۔ بڑے پیمانے پر تباہی ہوئی ہے۔

ممتابنرجی نے کہا کہ یاس طوفان کی وجہ سے بنگال میں سیلاب کی صورتحال ہے۔ ہم مجموعی طور پر 15 لاکھ افراد کو نکالنے میں کامیاب ہوگئے ہیں۔ بہت سارے علاقے سیلاب کے پانیوں میں غرق ہو رہے ہیں۔ جو پانی میں آپ دیکھ رہے ہیں وہ خوفناک ہے۔ کم سے کم 30 ہزار مکانات تباہ ہوچکے ہیں۔ حالات پر میری پوری نگاہ ہے۔

وزیر اعلی نے کہا کہ مشرقی مدنی پور میں 51 ڈیموں کو نقصان پہنچا ہے۔ مشرقی مدنی پور سے اب تک 3.6 لاکھ افراد کو نکالا جا چکا ہے۔ ضرورت پڑنے پر فوجی دستے تعینات کیے جائیں گے۔ممتا بنرجی کی رپورٹ کے مطابق، ساحلی علاقے میں 60 کلومیٹر پشتے تباہ ہوگئے ہیں۔ بہت سے ڈیم ٹوٹ چکے ہیں۔ یہاں تک کہ نندی گرام بھی سیلاب کی زد میں آگیا ہے۔

ممتا بنرجی نے کہا کہ ان کی حکومت اور سرکاری عملہ شہریوں کی خدمات کے لے مستعد ہیں۔ وہ خود ہی مشرقی مدنی پور ضلع حکام کے ساتھ رابطے میں ہیں۔ ممتا بنرجی نے کہا کہ یہ تباہی 6 سے 7 گھنٹے تک جاری رہے گی۔

ادھر، یاس کا لینڈ فال شروع ہوچکا ہے۔ صبح 9.15 بجے سے طوفان یاس نے بالشور میں دھامرا بندرگاہ کے قریب زوردار گولہ باری شروع کردی۔ اگلے 3 گھنٹوں تک لینڈ کا عمل جاری رہے گا۔

زمین پر نا جائز قبضہ کو لے کر پونیہ ضلع کے بائسی میں ہوئے تنازعہ کو فرقہ پرستی کا رنگ دینے والے سیمانچل کی گنگا جمنی تہذیب کے دشمن ہیں، سبھی مذہب اور ہر طبقہ کے لوگوں کو مل کر سیمانچل کے بھائی چارہ کو زندہ رکھنا ہے: اخترالایمان

رپورٹ: مفتی منظر محسن

پورنیہ: پورنیہ ضلع کی بائیسی تحصیل کے مجھوا گاؤں میں گزشتہ دنوں دو فریق کے درمیان زمین کے معاملے میں جھگڑا ہو گیا تھا جسے بعض سماج دشمن عناصر فرقہ وارانہ رنگ دینے کی ناپاک کوشش کر رہے ہیں۔ اسی معاملے کو لے کر گزشتہ کل (25/ مئی 2021) صدر مجلس بہار اور امور اسمبلی حلقہ کے ایم ایل اے جناب اخترالایمان صاحب نے ضلع پورنیہ کے ڈی ایم کے ساتھ ان کے دفتر میں ملاقات کی اور ان سے ضلع کے امن و امان کے تحفظ کو یقینی بنانے کے لیے بات چیت کی۔

صدر مجلس بہار اخترالایمان صاحب نے کہا کہ "مجھوا بائیسی کا حالیہ معاملہ انتہائی افسوس ناک معاملہ ہے۔ آزادی کے بعد سے آج تک ملک بھر میں ہزاروں فرقہ وارانہ فسادات ہوئے، لاکھوں گھرانے لٹ گئے، کروڑوں نہیں اربوں، کھربوں کا نقصان ہو چکا، لیکن ہمیں فخر ہے کہ سیمانچل کے اس مسلم اکثریتی خطے نے کبھی بھی یہاں کے اقلیتی طبقے کے ساتھ ظلم کو روا نہیں رکھا۔”

جناب اختر الایمان نے مزید کہا کہ "محبتوں کی یہ زمین ہمیشہ فرقہ وارانہ فسادات سے پاک رہی، لیکن چند سالوں سے جس طرح ملک بھر میں فرقہ وارانہ فسادات کرائے جا رہے ہیں۔ منظم پلاننگ کے تحت کسی خاص طبقے کی معیشت کو کمزور کرنے کی ناپاک کوششیں ہو رہی ہیں، اس کی آگ میں ملک کا اکثر حصہ جل رہا ہے۔ سیمانچل کے انسان دوست جیالوں نے ایسے برے حالات میں بھی خود کو بھارت کی  گنگا جمنی تہذیب سے جوڑے رکھا ہے، جس سے ذات پات اور مذہب کے نام پر سیاست کرنے والے حکومت، اقتدار اور جاہ و منصب کے  بھوکے بھیڑیے پریشان ہیں۔ وہ امن و شانتی کی اس سرزمین کو ناپاک کرنا چاہتے ہیں۔ یہی وجہ ہے کہ وہ دو فریق کے درمیان زمین کے معاملے کو لے کر ہوئے جھگڑے کو فرقہ وارانہ رنگ دینے کی کوشش کی جا رہی ہے۔

"مجھوا بائیسی کا حالیہ معاملہ انتہائی افسوس ناک معاملہ ہے۔ آزادی کے بعد سے آج تک ملک بھر میں ہزاروں فرقہ وارانہ فسادات ہوئے، لاکھوں گھرانے لٹ گئے، کروڑوں نہیں اربوں، کھربوں کا نقصان ہو چکا، لیکن ہمیں فخر ہے کہ سیمانچل کے اس مسلم اکثریتی خطے نے کبھی بھی یہاں کے اقلیتی طبقے کے ساتھ ظلم کو روا نہیں رکھا۔” اختر الایمان

انہوں نے کہا کہ ہمیں مل کر فرقہ پرستی کے ڈنک کو ختم کرنا ہوگا۔ اگر اسے ختم نہیں کیا گیا تو سیمانچل اس جگہ پر پہنچ جائے گا جہاں چاہ کر بھی سنبھالنا مشکل ہوجائے گا۔ انہوں نے ضلع پورنیہ کے ڈی ایم صاحب اور یہاں انتظامیہ کے سبھی ذمہ داران سے پُر زور اپیل کی کہ وہ ایسے سماج دشمن عناصر پر نکیل لگائیں۔

مجلس اتحاد المسمین بہار کے ریاستی صدر نے ڈی ایم پورنیہ سے ملاقات کے دوران اس بات کا منصفانہ مطالبہ بھی کیا کہ مجھوا بائسی معاملے میں تعصب سے اوپر اٹھ کر اعلیٰ سطحی جانچ کرائی جائے اور جو گنہگار ہوں اسے سخت سزا دی جائے۔ انہوں نے یہ یقینی بنانے کو کہا کہ کسی بے گناہ کو ہرگز ہراساں نہ کیا جائے۔

ڈی ایم پورنیہ نے اخترالایمان صاحب کو یقین دہانی کرائی کہ وہ اس معاملے کی صاف و شفاف تحقیقات کروائیں گے اور یہ کہ کسی بھی مجرم کو بخشا نہیں جائے گا اور کسی بے گناہ پر ظلم نہیں ہونے دیا جائے گا۔

ڈی ایم صاحب سے پُر امید ملاقات کے بعد ایم ایل امور اپنے اسمبلی حلقہ کے مختلف مقامات کے دورے پر روانہ ہو گئے۔ انہوں نے راے بر پنچایت کے ہریا کاشی باڑی پہنچ کر ماسٹر سلیم الدین صاحب مرحوم کے اہل خانہ سے تعزیت کیا جن کا انتقال 24 مئی میں ہوا تھا، وہاں سے خوش حال پور چوک اور دوسرے کئی گاؤں کے لوگوں سے ملاقات کرکے علاقے کے حالات کا جائزہ لیا۔ کووڈ 19 کے حوالے سے عوام کو ضروری ہدایات و احکامات سے رو شناس کرایا اور ڈاکٹروں اور حکومت ہند کے ذریعے جاری کی گئی ہدایات پر عمل کرنے کی تاکید کی۔

بی جے پی حکومت میں اقلیتیں محفوظ نہیں ہیں۔ انہیں وقتا فوقتا بلاجواز مارا پیٹا اور ان کو ہلاک کیا جا رہا ہے۔ کارروائی کے نام پر ملزمان کو کھلی چھوٹ ملی ہوئی ہے۔ ضلع اناؤ کے بانگڑ مئو کے سبزی فروش فیصل کو پیٹ پیٹ کر ہلاک کر دیا جانا قابل مذمت و ناقابل معافی جرم ہے۔

پرتاپ گڑھ: بی جے پی کی حکومت میں اقلیتی طبقہ محفوظ نہیں ہے۔ انہیں بلاجواز وقت وقت پر مارا پیٹا اور ان کو ہلاک کیا جا رہا ہے۔ کارروائی کے نام پر ملزمان کو کھلی چھوٹ ملی ہوئی ہے۔ ضلع اناؤ کے بانگڑ مئو کے سبزی فروش فیصل کو پیٹ پیٹ کر ہلاک کر دیا جانا قابل مذمت و ناقابل معافی جرم ہے۔ جب عوام کی حفاظت کرنے والے ہی ظالم ہو جائے تو ایسے میں نظم نسق پر ایک سوالیہ نشان ضرور ہے۔ حکومت فیصل کو ہلاک کرنے والے ملزمان کے خلاف سخت کارروائی کر ان کے اہل خانہ کو پچاس لاکھ روپیہ معاوضہ اور ایک فرد کو ملازمت دے۔

پیس پارٹی کے قومی صدر ڈاکٹر ایوب سرجن نے جاری پریس ریلیز کے ذریعہ مذکورہ تاثرات کا اظہار کیا۔

ڈاکٹر ایوب سرجن نے کہا کہ ملک کے مختلف صوبوں سے وقت وقت پر اخباروں کی سرخی ماب لنچنگ جیسے واقعات ہوتے ہیں۔ سر پسند عناصر جو ملک میں ایسے واقعات کا انجام دے رہے ہیں، ان کے خلاف کوئی سخت قانونی کارروائی نہ ہونے کے سبب ان کے حوصلے بلند ہیں۔ یہاں تک کہ اب سرکاری مشینری بھی حکومت کی فرقہ وارانہ منشاء کے بموجب کام کر رہی ہے، جس کی مثال بے گناہ غریب فیصل کا قتل ہے، اگر کسی ملزم کے خلاف کارروائی بھی کی جاتی ہے تو کیس اتنا بے اثر ہوتا ہے کہ وہ آرام سے جلد عدالت سے رہا ہو جاتا ہے۔ جب ماب لنچنگ کے انجام دینے والے سر پسند عناصر کا خیرمقدم بی جے پی کے وزیر کریں گے اور حمایت میں بیان دیں گے تو ایسے حالات و واقعات میں اضافہ ہوگا کہ کمی آئے گی؟

ڈاکٹر ایوب نے کہا کہ پیس پارٹی مقتول فیصل کے اہل خانہ کا ہر طرح سے تعاون کرے گی اور عدالت میں مقدمہ لڑے گی۔ پیس پارٹی ملک کے ہر غریب، کمزور و مظلوم افراد کے ساتھ کھڑی ہے، چاہے وہ کسی ذات یا مذہب کا ہو۔ ہم مذہبی بنیاد کی سیاست نہیں کرتے، بلکہ سبھی کے لیے بلا امتیاز انصاف کی بات کرتے ہیں۔ انہوں نے کہا کہ پیس پارٹی مستقبل میں ہونے والے ایسے واقعات پر قدغن لگانے و ملزمان کے خلاف سخت کارروائی اور مقتول فیصل کے اہل خانہ کو پچاس لاکھ روپیہ و ایک فرد کو ملازمت دینے کا مطالبہ کرتی ہے۔

پاکستان کے وزیر خارجہ شاہ محمود قریشی نے مسئلہ فلسطین پر زور دیتے ہوئے کہا کہ اقوام متحدہ کی سلامتی کونسل (یو این ایس سی) اب فلسطین کے مسئلے کو ’نظر انداز‘ کرنے کی حالت میں نہیں ہے اور اس ضمن میں اس کو فیصلہ کرنا پڑے گا۔ ایک سوال کے جواب میں انہوں نے کہا کہ امریکہ وہ واحد ملک ہے جس کی اسرائیل سنے گا۔

انقرہ: پاکستان کے وزیر خارجہ شاہ محمود قریشی نے مسئلہ فلسطین پر زور دیتے ہوئے کہا کہ اقوام متحدہ کی سلامتی کونسل (یو این ایس سی) اب مسئلہ فلسطین پ کو ’نظر انداز‘ کرنے کی حالت میں نہیں ہے اور اس ضمن میں اس کو فیصلہ کرنا پڑے گا۔ یہ بات انہوں نے ایک ترکی ٹیلی ویژن کو انٹرویو دیتے ہوئے کہی۔

’ڈان‘ میں شائع ایک رپورٹ کے مطابق فلسطین کے مسئلے پر اقوام متحدہ کی جنرل اسمبلی (یو این جی اے) کے 193 رکنی ہنگامی اجلاس کے بعد ترکی کے ٹیلی ویژن چینل ‘ٹی آر ٹی’ پر نشر ہونے والے ایک انٹرویو میں انہوں نے کہا کہ فلسطین پر اسرائیل کی جارحیت کے حالیہ واقعات نے ان لوگوں کو جھنجھوڑ دیا جو باہر بیٹھے ہیں۔ انہوں نے کہا کہ دنیا بھر میں اسرائیلی حملوں پر ردعمل کی توقع نہیں تھی۔ انہوں نے کہا کہ کسی کو بھی توقع نہیں تھی کہ اسلامی تعاون کونسل (او آئی سی) اور عرب لیگ عملی طور پر فعال ہو جائے گی، نان الائن موومنٹ متحرک ہو جائے گی اور اس کے نتیجے میں جنرل اسمبلی کا خصوصی ہنگامی اجلاس منعقد ہوگا۔ انہوں نے اسے ’ایک بے مثال سیشن‘ قرار دیا۔

سلامتی کونسل کا اجلاس ایک واضح پیغام بھیجے گا

انہوں نے زور دے کر کہا کہ سلامتی کونسل کا اجلاس ایک واضح پیغام بھیجے گا کہ ’بہت‘ ہوگیا ہے اور جو لوگ بنیادی حقوق پر یقین رکھتے ہیں انہیں ضرور آواز بلند کرنی چاہیے اور وہ اب ‘ایک طرف ہو کر نہیں بیٹھ سکتے‘۔

یو این جی اے، یو این ایس سی اور اقوام متحدہ کی سلامتی کونسل کی جانب سے اٹھائے جانے والے اقدامات سے متعلق سوال کے جواب میں شاہ محمود قریشی نے کہا کہ انہیں سب سے پہلے جنگ بندی کرانے کی ضرورت ہے۔

وزیر خارجہ نے کہا کہ ان کا یو این جی اے اجلاس میں شرکت کا ایک نکاتی ایجنڈا تھا جو جنگ بندی کی ضرورت پر زور دینا تھا۔ انہوں نے کہا کہ ’جب اس ایجنڈے میں کامیابی ملے گی تو تمام دیگر مراحل بھی حل ہو جائیں گے‘۔

بین الاقوامی تحفظ فورس جیسی کوئی فورس تشکیل دینے کی ضرورت

انہوں نے ایک سوال کے جواب میں کہا کہ او آئی سی رکن ممالک کے وزرائے خارجہ جو اس دن نیویارک میں موجود تھے وہ یو این جی اے کے صدر سے ملاقات کریں گے اور انہیں بین الاقوامی تحفظ فورس جیسی کوئی فورس تشکیل دینے کی تجویز پیش کریں گے۔ انہوں نے کہا کہ ہم اس خیال کو آگے بڑھائیں گے اور جنرل اسمبلی کے صدر کے ساتھ اس کے طریقہ کار پر تبادلہ خیال کریں گے۔

ایک سوال کے جواب میں انہوں نے کہا کہ امریکہ وہ واحد ملک ہے جس کی اسرائیل سنے گا۔ انہوں نے مزید کہا کہ امریکہ کا اسرائیل پر اثر و رسوخ ہے اور اسے اسرائیل کو راضی کرنے میں زیادہ فعال کردار ادا کرنا چاہیے کہ جو کچھ وہ کررہا ہے وہ دنیا کو قبول نہیں ہے۔

یاس طوفان کی شدت کے بعد مغربی بنگال حکومت نے ریاست کے نو اضلاع مدنی پور، مرشد آباد، ہوڑہ، ہگلی اور بردوان کے دو اضلاع میں ہائی الرٹ جاری کردیا ہے۔ انتظامیہ کو خدشہ ہے کہ طوفان کی وجہ سے ریاست کے 9 اضلاع میں سیلاب کی صورتحال پیدا ہوسکتی ہے۔

کلکتہ: مغربی بنگال حکومت نے یاس طوفان کی شدت کے بعد ریاست کے 9 اضلاع مدنی پور، مرشد آباد، ہوڑہ، ہگلی اور بردوان کے دو اضلاع میں ہائی الرٹ جاری کردیا ہے۔ منگل کی سہ پہر یاس طوفان میں شدت آ گئی ہے اس وقت اڑیسہ کے 360 کلومیٹر دور ہے۔

جنوبی 24 پرگنہ اور شمالی 24 پرگنہ کے نشیبی علاقوں سے لاکھوں افراد کو نکال لیا گیا ہے۔ انہیں امدادی کیمپوں میں رکھا گیا ہے۔ کیمپوں میں کورونا کے پروٹوکول کا خاص خیال رکھا جارہا ہے۔ امدادی کیمپوں میں ماسک اور سینیٹائزر شامل ہیں۔

بنگال میں مشرقی مدنی پور اور جنوبی 24 پرگنہ کے ساحلی علاقے سب سے زیادہ متاثر ہوسکتے ہیں۔ دیگھا میں فوج تعینات کردیا گیا ہے۔ انتظامیہ کو خدشہ ہے کہ یاس طوفان کی وجہ سے ریاست کے 9 اضلاع میں سیلاب کی صورتحال پیدا ہوسکتی ہے۔ ضلع انتظامیہ کو اس سے باخبر کردیا گیا ہے۔ منگل کی صبح سے طوفان یاس کی وجہ سے جنوبی بنگال کے تمام اضلاع میں بارشوں کا سلسلہ جاری ہے۔ صبح سے ہی آسمان پر بادل چھائے ہوئے ہیں۔ رک رک کر بارش ہورہی ہے۔ کلکتہ میں آج ہلکی بارش ہوئی ہے۔

آئندہ 24 سے 48 گھنٹوں میں کولکاتہ میں تیز اور موسلا دھار بارش کا امکان ہے۔ بارش کی وجہ سے درجہ حرارت میں کمی واقع ہوئی ہے۔ آج صبح تک بارش کی مقدار 34.6 ملی میٹر ہے۔ آج کلکتہ میں کم سے کم درجہ حرارت 25.5 ڈگری سینٹی گریڈ ہے جو معمول سے ایک ڈگری کم ہے۔ نمی زیادہ سے زیادہ 95 فیصد ہے۔ تاہم، یاس کی وجہ سے کلکتہ میں شاید کوئی بڑا نقصان نہیں ہوگا۔ محکمہ موسمیات علی پور نے بتایا کہ کلکتہ اس مرتبہ محفوظ رہ جائے گا۔

مشرقی وسطی ریلوے کے سمستی پور ریلوے بورڈ کے انتظامیہ نے خلیج بنگال میں طوفان ‘یاس’ کی وجہ سے احتیاطی اقدام کے طور پر نو بڑی ایکسپریس ٹرینوں کو منسوخ کرنے کا فیصلہ کیا ہے۔

سمستی پور: خلیج بنگال میں اٹھے گردابی طوفان ’یاس‘ کی وجہ سے مشرقی وسطی ریلوے کی سمستی پور ریلوے بورڈ انتظامیہ نے احتیاط کے طور پر 9 بڑی ایکسپریس ٹرینوں کے آپریشن کو منسوخ کرنے کا فیصلہ کیا ہے۔

سینئر ڈویژنل کمرشل منیجر اور میڈیا انچارج سرسوتی چندر نے آج یہاں بتایا کہ گردابی طوفان کے سبب 03021 ہاوڑہ-ایکسپریس ٹرین، 03019 ہاوڑہ-کٹھگودام ایکسپریس ٹرین، 03043 ہاوڑہ-ریکسول ایکسپریس ٹرین 26 مئی کو منسوخ رہیں گی۔ اس تاریخ کو 03185 سیالدہ – جیان نگر خصوصی ٹرین سیالدہ سے منسوخ رہے گی۔

انہوں نے بتایا اس کے علاوہ مظفر پور سے چلنے والی 03158 مظفر پور ۔ کولکاتہ خصوصی ٹرین، 05234 دربھنگہ – کولکاتہ خصوصی ٹرین دربھنگہ سے، ریکسول سے 03022 ریکسول۔ہاوڑہ اسپیشل ٹرین اور جیان نگر سے 03186 جیان نگر – سیالدہ خصوصی ٹرین 26 مئی کو منسوخ کردی جائے گی ہے۔ مسٹر چندر نے بتایا کہ اسی طرح کولکتہ سے چلنے والی 05233 کولکتہ دربھنگہ خصوصی ٹرین آئندہ 27 مئی کو منسوخ کر دی گئی ہے۔

آندھرا پردیش کے سلیرو ندی میں مہاجر مزدوروں کو لے جانے والی دو کشتیاں ڈوب گئیں، آٹھ افراد ڈوب گئے۔ اطلاعات کے مطابق حیدرآباد کے مضافات میں اینٹوں کے بھٹوں میں کام کرنے والے افراد گھر واپس جانے کے لئے سیلور پہنچے۔ لاک ڈاؤن کی وجہ سے، گاڑیوں کی عدم دستیابی کی وجہ سے، وہ دیر رات دیسی کشتیوں پر سوار ہوکر جارہے تھے کہ اچانک کشتیاں ڈوب گئیں۔

حیدرآباد: ریاست آندھرا پردیش کے سلیرو ندی میں نقل مکانی کرنے والے مزدوروں کو لے جانے والی دو کشتیاں ڈوب گئیں جس کے نتیجہ میں 8 افراد غرق ہوگئے۔

فوری ملی اطلاعات کے مطابق حیدرآباد کے نواح میں اینٹ کی بھٹیوں میں کام کرنے والے افراد اپنے ارکان خاندان کے ساتھ آبائی ریاست واپس ہونے کیلئے کل رات سیلور پہنچے۔ لاک ڈاون کی وجہ سے گاڑیوں کی سہولت دستیاب نہ ہونے کی وجہ سے وہ رات دیرگئے دیسی کشتیوں میں سوار ہوکر جارہے تھے کہ اچانک کشتیاں ڈوب گئیں۔

بتایا گیا ہے کہ ان کی تعداد تقریبا 35 تھی۔ کشتیوں میں دس تا 11 افراد کو ایک کے بعد ایک لے جایا جارہا تھا کہ یہ حادثہ ہوا۔ معلوم ہوا ہے اس وقت کشتیوں میں 11 سوار تھے جن میں بچے بھی شامل ہیں۔ اس واقعہ میں 8 افراد غرق ہوگئے۔ تین افراد بچ نکلنے میں کامیاب ہوگئے۔ ضلع حکام کی جانب سے بچاؤ راحت کاری کے کام جاری ہیں۔

گزشتہ 4 مئی سے اب تک، پٹرول ڈیزل کی قیمتوں میں 13 دن اضافہ کیا گیا ہے، جبکہ ان کی قیمتوں میں 9 دن کوئی تبدیلی نہیں کی گئی ہے۔۔ اس دوران، ممبئی میں پٹرول کی قیمت 99.71 روپے فی لیٹر پہنچ گئی۔

نئی دہلی: پٹرول ڈیزل کی قیمتوں میں منگل کے روز ایک بار پھر اضافہ کیا گیا جس کی وجہ سے ممبئی میں پٹرول کی قیمت 99.71 روپے فی لیٹر پہنچ گئی۔

ملک کے چار بڑے میٹرو شہروں میں آج پٹرول کی قیمت میں 23 پیسے اور ڈیزل کی قیمت میں 27 پیسے کا اضافہ کیا گیا، جو ایک نئی تاریخی سطح تک پہنچ گیا۔

گزشتہ 04 مئی سے اب تک، پٹرول اور ڈیزل کی قیمتوں میں 13 دن اضافہ کیا گیا ہے، جبکہ ان کی قیمتوں میں نو دن کوئی تبدیلی نہیں کی گئی ہے۔۔ اس دوران، دہلی میں پٹرول 3.04 روپے اور ڈیزل میں 3.59 روپے مہنگا ہوگیا ہے۔

معروف آئل مارکیٹنگ کمپنی انڈین آئل کارپوریشن کی ویب سائٹ کے مطابق ممبئی میں آج پٹرول کی قیمت 22 پیسے اضافے کے ساتھ 99.71 روپے فی لیٹر ہوگئی۔  ملک کے کچھ شہروں میں یہ پہلے ہی 100 روپے فی لیٹر عبور کرچکا ہے۔

قومی دارالحکومت دہلی میں پٹرول 23 پیسے مہنگا ہوکر 93.44 روپے فی لیٹر اور ڈیزل 25 پیسے بڑھ کر 84.32 روپے فی لیٹر پہنچ گیا۔ چنئی میں پٹرول کی قیمت 20 پیسے اور کولکاتہ میں 22 پیسے کے اضافے کے ساتھ بالترتیب 95.06 اور 93.49 روپے فی لیٹر ہوگئی۔

ممبئی میں ڈیزل کی قیمت میں 27 پیسے، چنئی میں 24 پیسے اور کولکاتہ میں 25 پیسے کا اضافہ ہوا ہے۔ ممبئی میں ایک لیٹر ڈیزل کی قیمت 91.57 روپے، چنئی میں 89.11 روپے اور کولکتہ میں 87.16 روپے پہنچ گئی۔

پٹرول اور ڈیزل کی قیمتوں کا روزانہ جائزہ لیا جاتا ہے اور اسی بنا پر، ہر روز صبح چھ بجے سے نئی قیمتوں کا اطلاق ہوتا ہے۔

ملک کے چار میٹرو شہروں میں آج پٹرول اور ڈیزل کی قیمتیں حسب ذیل رہیں:

شہر  ——— پیٹرول —— ڈیزل

دہلی ——— 93.44 —— 84.32
ممبئی ——— 99.71 ——91.57
چنئی ———95.06 —— 89.11
کولکتہ ——— 93.49 ——87.16