امریکہ کے میامی شہر میں بندوق سے انجام دیے گئے فائرنگ کے واقعہ میں دو افراد کی موت اور 20 سے زائد زخمی ہوگئے۔

واشنگٹن: امریکہ کے شہر میامی میں فائرنگ کے واقعہ میں دو افراد کی موت اور 20 سے زائد زخمی ہوگئے۔

میامی ڈیڈ محکمہ پولیس کے ڈائریکٹر الفریڈو ’فریڈی‘ رمیریز نے اتوار کو یہ اطلاع دی۔

مسٹر رمیریز نے ٹویٹ کیا ’’بندوق سے انجام دیے گئے اس بزدلانہ تشدد میں دو افراد کی موت ہو گئی اور 20 سے زیادہ افراد زخمی ہو گئے ہیں۔ قاتلوں نے ہجوم پر اندھا دھند فائرنگ کردی۔ ہم انصاف کا مطالبہ کریں گے۔ سوگوار کنبوں کے تیئں میری تعزیت‘‘۔

I am at the scene of another targeted and cowardly act of gun violence, where over 20 victims were shot and 2 have sadly died. These are cold blooded murderers that shot indiscriminately into a crowd and we will seek justice. My deepest condolences to the family of the victims.

— Alfredo "Freddy" Ramirez III (@MDPD_Director) May 30, 2021

این بی سی میامی نشریاتی ادارے کے مطابق اتوار کی صبح ایل مولا بینکٹ ہال کے باہر فائرنگ کی گئی۔

پٹرول اور ڈیزل کی قیمتوں میں پیر کے روز ایک بار پھر اضافہ کیا گیا۔ قومی دارالحکومت دہلی میں پٹرول 29 پیسے اضافے کے ساتھ 94.23 روپے اور ڈیزل 28 پیسے بڑھ کر 85.15 روپے فی لیٹر پر ہوگیا۔ گزشتہ کئی دنوں سے ان کی قیمتیں ہر دن اضافے کے ساتھ نئے ریکارڈ بنا رہی ہیں۔

نئی دہلی: پٹرول اور ڈیزل کی قیمتوں میں پیر کے روز ایک بار پھر اضافہ کیا گیا۔ مئی میں ان کی قیمتوں میں 16 دن اضافہ کیا گیا جس کی وجہ سے دہلی میں پٹرول 3.87 روپے اور ڈیزل 4.42 روپے مہنگا ہوگیا۔

معروف آئل مارکیٹنگ کمپنی انڈین آئل کارپوریشن کی ویب سائٹ کے مطابق دہلی سمیت ملک کے چار بڑے شہروں میں آج پٹرول کی قیمت میں 29 پیسے اور ڈیزل کی قیمت میں 28 پیسے کا اضافہ ہوا۔ قومی دارالحکومت دہلی میں پٹرول 29 پیسے اضافے کے ساتھ 94.23 روپے اور ڈیزل 28 پیسے بڑھ کر 85.15 روپے فی لیٹر پر ہوگیا۔ گزشتہ کئی دنوں سے ان کی قیمتیں ہر دن اضافے کے ساتھ نئے ریکارڈ بنا رہی ہیں۔

ممبئی میں پٹرول اور ڈیزل کی قیمتوں میں 28-28 پیسے کا اضافہ ہوا ہے۔ ایک لیٹر پٹرول کی قیمت 100.47 روپے اور ڈیزل 92.45 روپے فی لیٹر ہوگئی۔ چنئی میں ان کی قیمتوں میں 25-25 پیسے کا اضافہ ہوا اور پٹرول 95.76 روپے اور ڈیزل 89.90 روپے فی لیٹر فروخت ہوا۔

کولکاتہ میں پٹرول 28 پیسے مہنگا ہوکر 94.25 روپے اور ڈیزل 26 پیسے اضافے کے ساتھ 88 روپے فی لیٹر پہنچ گیا۔

پٹرول اور ڈیزل کی قیمتوں کا روزانہ جائزہ لیا جاتا ہے اور اسی بنا پر، ہر روز صبح چھ بجے سے نئی قیمتوں کا اطلاق ہوتا ہے۔

ملک کے چار میٹرو شہروں میں پٹرول اور ڈیزل کی قیمتیں کچھ اس طرح رہیں:

شہر _____ پٹرول _____ ڈیزل

دہلی ____    94.23 ____  85.15
ممبئی ____  100.47 ____ 92.45
چنئی ____  95.76 ____   89.90
کولکتہ ___  94.25 ____   88.00

اسے بھی پڑھیں:

مودی سرکار مسلسل پٹرول-ڈیزل کی قیمتوں میں اضافہ کرکے لوگوں کو مشکلات میں ڈال رہی ہے: گہلوت

راجستھان کے وزیراعلیٰ اشوک گہلوت نے کہا کہ بین الاقوامی بازار میں کچے تیل کی قیمت کم ہونے کے باوجود پٹرول ڈیزل کی قیمت مسلسل بڑھ رہی ہے۔ متعدد ریاستوں میں پٹرول کی قیمت سو روپے لیٹر سے زیادہ ہوگئی ہے۔ ایک طرف عام آدمی کووڈ اور آمدنی کم ہونے سے پریشان ہے وہیں مودی حکومت مہنگائی سے اس کے لئے مشکل پیدا کررہی ہے۔

جئے پور: راجستھان کے وزیراعلیٰ اشوک گہلوت نے مرکز کی مودی حکومت پر مہنگائی بڑھانے کا الزام عائد کرتے ہوئے کہا کہ وہ عالمی وبا کورونا میں پٹرول ڈیزل کی قیمتوں میں مسلسل اضافہ کرکے لوگوں کو مشکل میں ڈال رہی ہے۔

مسٹر گہلوت نے سوشل میڈیا کے ذریعہ آج یہ بات کہی۔ انہوں نے کہا کہ بین الاقوامی بازار میں کچے تیل کی قیمت کم ہونے کے باوجود پٹرول اور ڈیزل کی قیمت مسلسل بڑھ رہی ہے۔ متعدد ریاستوں میں پٹرول کی قیمت سو روپے لیٹر سے زیادہ ہوگئی ہے، ایک طرف عام آدمی کووڈ اور آمدنی کم ہونے سے پریشان ہے وہیں مودی حکومت مہنگائی سے اس کے لئے مشکل پیدا کررہی ہے۔

انہوں نے کہا کہ مرکزی حکومت پٹرول اور ڈیزل پر ایکسائز ڈیوٹی کو لگاتار کم کررہی ہے جس میں ریاستوں کو حصہ ملتا تھا لیکن اسپیشل ایکسائز ڈیوٹی اور ایڈیشنل ایکسائز ڈیوٹی لگاکر اپنی جیب بھر رہی ہے۔ مرکزی حکومت کی ایک تہائی کمائی پٹرول-ڈیزل کے ٹیکس سے ہورہی ہے۔

انہوں نے کہا کہ جب مرکزی حکومت کو پٹرول-ڈیزل پر ٹیکس کم کرکے عام آدمی کو راحت دینی چاہیے تھی تب اس سال کے بجٹ میں ان پر ایک نیا ٹیکس لگادیا۔ اس سے ٹرانسپورٹیشن چارج بڑھ گئے ہیں جس سے ابھی چیزوں پر مہنگائی بڑھ رہی ہے۔ عام آدمی مودی حکومت کے ذریعہ بنے گئے اس مہنگائی کے جال سے بری طرح تنگ آچکا ہے۔

راجستھان کے وزیراعلیٰ اشوک گہلوت نے سوشل میڈیا کے ذریعہ ہندی صحافت کے دن پر نیک خواہشات پیش کرتے ہوئے کہا کہ ہندی صحافت کی ملک میں سنہری تاریخ ہے۔ تحریک آزادی سے لے کر آج تک یہ اپنا اہم کردار ادا کرتی آئی ہے۔

جئے پور: راجستھان کے وزیراعلیٰ اشوک گہلوت نے منصفانہ صحافت کو جمہوریت کی ضرورت بتاتے ہوئے کہا ہے کہ جتنی مضبوط صحافت ہوگی، اتنی ہی مضبوظ جمہوریت ہوگی۔

مسٹر گہلوت نے سوشل میڈیا کے ذریعہ ہندی صحافت کے دن پر آج یہ بات کہی۔ انہوں نے اس موقع پر نیک خواہشات پیش کرتے ہوئے کہا کہ ہندی صحافت کی ملک میں سنہری تاریخ ہے۔ تحریک آزادی سے لے کر آج تک یہ اپنا اہم کردار ادا کرتی آئی ہے۔

انہوں نے کہا کہ غیرجانبدارانہ صحافت ہمارے جمہوریت کی ضرورت ہے، جتنی مضبوط صحافت ہوگی، اتنی ہی مضبوط جمہوریت ہوگی۔

اس موقع پر اپوزیشن لیڈر گلاب چند کٹاریا نے ہندوستانی جمہوریت میں بنیادی ستون کی شکل میں عوام کو بیدارکرنے کے لئے پرعزم تمام صحافیوں کو ہندی صحافت کے دن کی دلی مبارک باد پیش کی۔

مشہور ہنی ٹریپ معاملے میں مدھیہ پردیش پولیس کی خصوصی تحقیقاتی ٹیم نے کمل ناتھ کو نوٹس جاری کرکے 2 جون کو اس کے سامنے بیان اور فزیکل ایویڈنس (سی ڈی/پین ڈرائیو) مہیا کرانے کے لئے کہا ہے۔

اندور: مشہور ہنی ٹرپ معاملے میں مدھیہ پردیش پولیس کی خصوصی تحقیقاتی ٹیم (ایس آئی ٹی) نے سابق وزیراعلیٰ کمل ناتھ کو نوٹس جاری کرکے 2 جون کو اس کے سامنے بیان اور فزیکل ایویڈنس (سی ڈی/پین ڈرائیو) مہیا کرانے کے لئے کہا ہے۔

ایس آئی ٹی کے تفتیشی اسسٹنٹ (انسپکٹر) ششیکانت چورسیا کی جانب سے مسٹر کمل ناتھ کو ایک صفحہ کا نوٹس جاری کیا گیا ہے، جو آج میڈیا تک پہنچا۔ نوٹس کے مطابق مسٹر کمل ناتھ سے توقع کی گئی ہے کہ وہ 2 جون کو دوپہر 12:30 بجے بھوپال کے شیام لال ہلس تھانہ علاقہ میں واقع اپنی رہائش گاہ پر حاضر ہوکر زیر دستخط (مسٹر چورسیا) کے سامنے بیان اور فزیکل ثبوت سی ڈی/پین ڈرائیو) ایس آئی ٹی کو دینے کی زحمت کریں۔

پولیس ذرائع نے یہاں بتایا کہ کل بھیجے گئے نوٹس میں مشہور ہنی ٹرپ کی اس مبینہ پین ڈرائیو کا ذکر کیا گیا ہے، جس کا ذکر سینئر کانگریس لیڈر کمل ناتھ نے حال ہی میں 21 مئی کو منعقدہ ایک آن لائن پریس کانفرنس میں کیا تھا۔ نوٹس میں اسی پین ڈرائیو کو جانچ کے لئے دستیاب کرائے جانے اور اسی پین ڈرائیو کے تعلق سے بیان درج کرائے جانے کی توقع کی گئی ہے۔

نوٹس کے مطابق مسٹر کمل ناتھ کے ذریعہ کی گئی پریس کانفرنس میں کہا گیا ہے کہ ہنی ٹرپ معاملہ کی سی ڈی اور پین ڈرائیو ان کے پاس موجود ہے۔ اس پریس کانفرنس کو سوشل میڈیا پر بھی نشر کیا گیا تھا اور متعلقہ خبریں اخباروں میں شائع ہوئیں۔

برطانیہ کے وزیر اعظم بورس جانسن نے چھپ چھپا کر اپنی گرل فرینڈ کیری سائمنڈ سے شادی کر لی۔ ایک سو نناوے برس میں پہلا موقع ہے کہ کسی برطانوی لیڈر نے وزارت عظمیٰ کے دور میں شادی کی ہو۔ 56 سالہ بورس جانسن کی یہ تیسری اور کیری سائمنڈ کی پہلی شادی ہے۔

لندن: برطانیہ کے وزیر اعظم بورس جانسن نے چھپ چھپا کر اپنی گرل فرینڈ کیری سائمنڈ سے شادی کر لی۔ برطانوی اخبار ’دی سن‘ نے دعویٰ کیا ہے کہ بورس جانسن اور کیری سائمنڈ کی شادی ویسٹ منسٹر کے کیتھیڈرل میں ہوئی، جس میں صرف 30 افراد نے شرکت کی۔ میڈیا کا کہنا ہے کہ تاریخی عمارت سیاحوں سے یہ کہہ کر خالی کرائی گئی کہ لاک ڈاؤن کیا جارہا ہے۔

ایک سو نناوے برس میں پہلا موقع ہے کہ کسی برطانوی لیڈر نے وزارت عظمیٰ کے دور میں شادی کی ہو۔ مقامی میڈیا نے اتوار کے روز اپنی رپورٹوں میں یہ اطلاع دی۔ خیال رہے برطانوی وزیر اعظم کی یہ شادی 30 جولائی 2022 کو ہونے والی تھی۔

اخبار’دی سن‘ کے مطابق بورس جانسن اور سائمنڈ کی تقریب تقریبا ڈیڑھ گھنٹہ جاری رہی اور اس دوران چرچ بند کردیا گیا تھا۔ اخبار نے چرچ کے ایک کارکن کے حوالے سے بتایا ’’وہ پریشان نظر آئے‘‘۔

56 سالہ بورس جانسن کی یہ تیسری اور کیری سائمنڈ کی پہلی شادی ہے۔

ریزرو بینک آف انڈیا سے حاصل کردہ اعداد و شمار کے مطابق 21 مئی کو ختم ہونے والے ہفتے کے دوران غیر ملکی زرمبادلہ کے ذخائر میں 2.87 ارب ڈالر کے اضافے سے یہ 592.89 ہوگیا، جو اب تک کی بلند ترین سطح ہے۔

ممبئی: ملک کا غیر ملکی زرمبادلہ کا ذخائر ساتویں ہفتہ میں بڑھتا ہوا تقریبا 593 ارب ڈالر کے ریکارڈ سطح پر پہنچ گیا ہے۔ ریزرو بینک آف انڈیا سے حاصل کردہ اعداد و شمار کے مطابق 21 مئی کو ختم ہونے والے ہفتے کے دوران غیر ملکی زرمبادلہ کے ذخائر میں 2.87 ارب ڈالر کے اضافے سے یہ 592.89 ہوگیا۔ جو اب تک کی بلند ترین سطح ہے اس سے قبل 14 مئی کو ختم ہونے والے ہفتہ میں یہ 56.3 ارب ڈالر کے اضافے سے 590.03 ارب ڈالر رہا تھا۔

مرکزی بینک نے اطلاع دی ہے کہ زرمبادلہ کے ذخائر کا سب سے بڑا جزو غیر ملکی کرنسی کے اثاثے 21 مئی کو ختم ہونے والے ہفتے کے دوران 1.65 ارب ڈالر اضافے سے 548.52 ارب ڈالر ہوگیا۔ اسی عرصے کے دوران سونے کے ذخائر میں بھی 1.19 ارب ڈالر کا اضافہ ہوا اور یہ 37.84 ارب ڈالر تک جا پہنچا۔

بین الاقوامی مالیاتی فنڈ کے پاس مختص 2.2 کروڑ ڈالر سے بڑھ کر 5.02 ارب ڈالر اور خصوصی ڈرائنگ کے حقوق 70 لاکھ ڈالر کے اضافے سے 1.51 ارب ڈالر ہوگیا۔

اے آئی ایم آئی ایم کے ذریعہ ایمبولینس، وینٹی لیٹر، آکسیجن کنسٹریٹر سمیت میڈیکل کٹ اور مختلف طبی آلات کشن گنج، پورنیہ و ارریہ صدر ہسپتالوں کے سپرد

کشن گنج: آل انڈیا مجلس اتحاد المسلمین (اے آئی ایم آئی ایم) کے سربراہ وممبرپارلیمنٹ اسدالدین اویسی کے ذریعہ کورونا وبا میں بھیجے گئے ایمبولینس، وینٹی لیٹر، آکسیجن کنسٹریٹر، آکسی میٹر، تھرمامیٹر، میڈیسن ودیگر میڈیکل کٹ کو آج ہری جھنڈی دکھا کر کشن گنج اور ارریہ کے صدراسپتالوں میں سول سرجنوں کے حوالہ کردیا گیا۔ ان طبی سامانوں کو پارٹی کے ریاستی صدر وامور اسمبلی حلقہ کے ممبراسمبلی اخترالایمان نے پارٹی کے دیگر ممبران اسمبلی کے ساتھ ہسپتالوں کے سپرد کردیا۔

اس موقع پر اخترالایمان کے علاوہ کوچادھامن کے ممبراسمبلی اظہار آصفی، سابق میئر حیدرآباد مہندی پٹنم، کارپوریٹر ماجد حسین، بائسی کے ممبراسمبلی سید رکن الدین، بہادر گنج کے ممبراسمبلی انظار نعیمی اور ارریہ کے جوکی ہاٹ ممبراسمبلی شہنواز عالم موجود تھے ۔ ہسپتال کے اہلکار نے آل انڈیا مجلس اتحاد المسلمین کے ذریعہ اٹھائے گئے اس قدم کی تعریف کرتے ہوئے یقین دہانی کرائی کہ اسپتال کی طبی ٹیم پوری ایمانداری سے مریض کے علاج میں میڈیکل کٹ کا استعمال کرے گی۔

واضح رہے کہ پارٹی سربراہ اسدالدین اویسی نے حیدرآباد سے اپنے وفد کے ذریعہ سبھی ممبران اسمبلی کے ضلع ہیڈکوارٹر تک کورونا وبا سے لڑنے کے لیے وینٹی لیٹر، آکسجین کنسنٹریٹر اور مختلف طبی سازوسامان و میڈیکل کٹ بھجوایا ہے۔ پارٹی کے ریاستی صدر اخترالایمان نے بتایا کہ ملک میں جب بھی کوئی مسئلہ پیش آیا ہے، ان کی پارٹی قدرتی آفات میں ہمیشہ سے مدد کے لیے آگے آتی رہی ہے۔ اس کے بارے میں اے آئی ایم آئی ایم نے اپنے آفیشیئل ٹویٹر ہینڈل میں اطلاع بھی دی:

AIMIM बिहार प्रदेश अध्यक्ष और अमौर विधायक @Akhtaruliman5 ने, AIMIM बिहार के तमाम विधायकों तथा पूर्व मेयर हैदराबाद @Md_MajidHussain की मौजूदगी में पूर्णिया, किशनगंज और अररिया ज़िले के लिए, AIMIM बिहार पार्टी ऑफिस (दारूल ईमान) से हरी झंडी दिखा कर एंबुलेंस सर्विस का आग़ाज़ किया। pic.twitter.com/WXYVMU2mJW

— AIMIM (@aimim_national) May 29, 2021

اخترالایمان نے کہا کہ "ہمارے پارٹی لیڈر اسدالدین اویسی نے سیمانچل کے تینوں اضلاع پورنیہ، ارریہ، کشن گنج کے لیے کورونا کے وبا کے دور میں اچھے قسم کا وینٹی لیٹر دیا ہے، جو بچوں کے علاج میں بھی کام آسکتا ہے۔ جو طبی سازوسامان دئے گئے ہیں ان میں تین ایمبولینس کے علاوہ اور وینٹی لیٹر کے علاوہ تین آکسیجن کنسٹریٹر، آکسی میٹر، تھرمامیٹر، اور دیگر ادویات شامل ہیں۔ انہوں نے کہا کہ اس وقت ضرورت اس بات کی ہے کہ مندر، مسجد کی تعمیر سے زیادہ اہم کام مریضوں کی خدمت کی جائے۔ ہم یہاں کے ڈاکٹروں کی بھی تعریف کرتے ہیں جو بہت محنت سے اپنا کام کررہے ہیں۔

کل 28 مئی کو یہی سامان پورنیہ میں بھی دیے گئے تھے جہاں کے صدر ہسپتال کے سول سرجن ایس کے ورما نے آل انڈیا مجلس اتحاد المسلمین کے ذریعہ اٹھائے گئے اس قدم کی تعریف کرتے ہوئے یقین دہانی کرائی تھی کہ وہ اور اسپتال میں ان کی پوری ٹیم پوری ایمانداری سے مریض کے علاج میں میڈیکل کٹ کا استعمال کریں گے۔

واضح رہے کہ یہاں آکسیجن کی کمی ہے۔ موجودہ وقت میں حکومت بہار نے ایم ایل اے کے پیسے کاٹ لیے ہیں۔ آکسیجن کی کالا بازاری جاری ہے۔ آفات کے قانون کی کھلم کھلا خلاف ورزی کی جارہی ہے اور لوگ پریشان ہو رہے ہیں۔ پانچ روپے کا سامان 7 روپے میں فروخت ہورہا ہے۔ دودھ 60 روپے فی لیٹر پر فروخت ہورہا ہے۔ سرسوں کے تیل اور دیگر اشیائے خوردونوش کی قیمتوں نے آسمان چھو رکھا ہے۔ ایسے وقت میں حکومت کو اس پر دھیان دینا چاہیے۔ جہاں تک عام لوگوں کا رویہ ہے وہ اپنے ٹیکس کے پیسوں کے سرکاری خزانے سے کچھ نہیں چاہتے ہیں۔ وہ یہ چاہتے ہیں کہ ریلیف کا کچھ مال مل جائے۔ کچھ لوگ بے روزگار ہوچکے ہیں اور سوالات کرنا شروع کردیئے ہیں۔ ایک طرف، وزیر اعلی نے اعلان کیا اور اپنے ملازمین کو ہدایت دی کہ وہ لاؤڈ اسپیکر کے ذریعے اعلانات کریں اور لوگوں کو روزگار فراہم کریں۔ اور یہ کام کہیں بھی ٹھیک سے نہیں ہو رہا ہے۔

رپورٹ کے مطابق مصری وفد غزہ میں مختلف فلسطینی جماعتوں کی قیادت سے ملاقات کی۔ ان ملاقاتوں میں امریکہ کی جانب سے غزہ اور فلسطینی اراضی میں جنگ بندی کے حوالے سے سامنے آنے والی تجاویز اور دیگر امور پر بحث کی گئی۔

غزہ: مصری وفد نے اسرائیل اور فلسطین کے درمیان جنگ بندی کو مضبوط اور مستحکم بنانے کے لئے ایک ہفتے میں تیسری بار غزہ کا دورہ کیا ہے۔

عرب میڈیا کی رپورٹ کے مطابق فلسطین کے علاقے غزہ پٹی میں فلسطینی تنظیموں اور اسرائیل کے درمیان 22 مئی کو ہونے والے جنگ بندی معاہدے کو مزید مضبوط اور مستحکم بنانے کے لیے عالمی سطح پر کوششیں جاری ہیں۔ مصر سمیت عالمی برادری اس پر گہری نظر رکھ رہی ہیں کہ کسی طرح پھر سے کشیدگی نہ بڑھ جائے۔ اسی ضمن میں مصر کے اعلیٰ سطح کے حکام بار بار غزہ پٹی کا دورہ کر رہے ہیں۔ کل جمعہ کے روز مصر کا ایک وفد بیت حانون گذرگاہ سے غزہ پہنچا۔ ایک ہفتے میں یہ مصری وفد کا غزہ کا تیسرا دورہ ہے۔

رپورٹ کے مطابق مصری وفد غزہ میں مختلف فلسطینی جماعتوں کی قیادت سے ملاقات کی۔ ان ملاقاتوں میں امریکہ کی جانب سے غزہ اور فلسطینی اراضی میں جنگ بندی کے حوالے سے سامنے آنے والی تجاویز اور دیگر امور پر بحث کی گئی۔

مصر کی جانب سے غزہ کی پٹی میں جنگ بندی کے بعد اسے مستحکم کرنے، حماس، اسلامی جہاد اور اسرائیل کے درمیان محاذ آرائی کو ٹالنے اور غزہ کی تعمیر نو کا عمل آگے بڑھانے کی کوشش کی جا رہی ہے۔ مصری وفد فلسطینی تنظیموں کی قیادت سے قاہرہ میں کل جماعتی کانفرنس بلانے اور ان کے سامنے غزہ میں جامع جنگ بندی کے حوالے سے مسودہ پیش کرے گا۔

مصری انٹیلی جنس چیف عباس کامل آئندہ ہفتے میں غزہ کا دورہ کریں گے

ایک باخبر فلسطینی ذرائع نے بتایا کہ مصری انٹیلی جنس چیف عباس کامل آئندہ ہفتے کے وسط میں غزہ کا دورہ کریں گے۔ ان کے اس دورے کا مقصد فلسطینی قیادت سے ملاقات، جنگ بندی کو مضبوط بنانا اور جنگ کے بعد پیدا ہونے والی صورت حال اور تعمیر نو کا جائزہ لینا ہے۔ مصری انٹیلی جنس چیف فلسطینی اتھارٹی کے ہیڈ کواٹر رام اللہ کا بھی دورہ کریں گے۔

خیال رہے کہ 10 مئی کو اسرائیلی فوج نے فلسطین کے علاقے غزہ پر حملہ کردیا تھا۔ 21 مئی تک جاری رہنے والی اسرائیلی فوجی کارروائی میں ڈھائی سو سے زائد فلسطینی شہید اور ڈیڑھ ہزار سے زائد زخمی ہوگئے تھے۔ 22 مئی کو مصر اور دوسرے ملکوں کی کوششوں سے اسرائیل اور فلسطینی تنظیموں کے درمیان جنگ بندی پر اتفاق کیا گیا تھا۔

ذرائع نے بتایا کہ ایف سی آئی حکام کے ٹھکانوں سے ضبط کی گئی نقدی مختلف لفافوں اور لکڑی کی الماری میں چھپاکر رکھی گئی تھی۔ اس کے علاوہ جو دستاویز ملے ہیں ان میں کئی لوگوں کے نام، تاریخ، رقم کا ذکر ہے۔ چھاپے میں ایک اہم دستاویز کے طور پر ڈائری بھی ملی ہے جس میں روپیوں کے لین دین سے منسلک افراد کے نام، تاریخ، رقم اور دیگر چیزوں کا ذکر ہے۔ ایک نوٹ گننے کی مشین بھی ملی ہے۔

بھوپال: مرکزی تفتیشی بیورو (سی بی آئی) کی طرف سے ایک لاکھ روپے کی رشوت لینے کے معاملہ میں گرفتار فوڈ کارپوریشن آف انڈیا (ایف سی آئی) کے چار حکام کے ٹھکانوں پر چھاپے کی کارروائی کے دوران تقریباً تین کروڑ روپے نقدروپے، روپیوں کے لین دین سے متعلق دستاویزات، نوٹ گننے کی مشین اور دیگر اہم دستاویزات برآمد ہوئے ہیں۔

سی بی آئی کے ذرائع کے مطابق ایف سی آئی کے یہاں تعینات چار حکام ہریش ہنونیا، ارون سریواستو، موہن پرتے اور کشور مینا کو کل یہاں ایک سیکیورٹی ایجنسی سے منسلک لوگوں سے ایک لاکھ روپے کی رشوت لیتے ہوئے رنگے ہاتھوں گرفتار کیا گیا تھا۔ بعد میں ان کے ٹھکانوں پر چھاپے کی کارروائی کی گئی۔ آج دوپہر تک ان کے قبضہ سے تقریباً تین کروڑ روپے نقد، 387 گرام سونے کے زیورات اور 670 گرام چاندی کے زیورات ملے ہیں۔

ذرائع نے بتایا کہ ضبط کی گئی نقدی مختلف لفافوں اور لکڑی کی الماری میں چھپاکر رکھی گئی تھی۔ اس کے علاوہ جو دستاویز ملے ہیں ان میں کئی لوگوں کے نام، تاریخ، رقم کا ذکر ہے۔ چھاپے میں ایک اہم دستاویز کے طورپر ڈائری بھی ملی ہے جس میں روپیوں کے لین دین سے منسلک افراد کے نام، تاریخ، رقم اور دیگر چیزوں کا ذکر ہے۔ ایک نوٹ گننے کی مشین بھی ملی ہے۔

ذرائع نے کہا کہ ایک کمپنی نے شکایت درج کرائی تھی کہ ایف سی آئی کے بھوپال ڈویزن آفس کے منیجر (اکاونٹس) بقایہ واجبات کی ادائیگی کے عوض ڈیڑھ لاکھ روپے کی رقم مانگ رہا ہے۔ اس پر سی بی آئی نے شکایت درج کرکے آگے کی کارروائی کی اور کل چار حکام کو رشوت کے معاملے میں گرفتار کرلیا۔ اس کے بعد ان کے ٹھکانوں پر چھاپے کی کارروائی کی گئی۔