جمشید پور میں خوفناک سڑک حادثے میں ایک خاتون سمیت تین افراد ہلاک اور چار دیگر شدید طور سے زخمی ہوگئے۔

جمشید پور: جھارکھنڈ میں سرائے کیلا۔ کھرسانواں ضلع کے نیم ڈیہہ تھانہ علاقہ میں اتوار کو خوفناک سڑک حادثے میں خاتون سمیت تین لوگوں کی موت ہوگئی۔ جبکہ چار دیگر شدید طور سے زخمی ہوگئے۔

پولیس ذرائع نے آج یہاں بتایا کہ قومی شاہراہ نمبر ۔32 پر چنڈل اسٹیشن کے نزدیک ٹریلر اور آٹو کے مابین تصادم میں آٹو سوار سدھیر ٹڈو، سکرمنی مارڈی اور آٹو ڈرائیور نیلم کمار ہیمبرم کی موقع پر ہی موت ہوگئی۔ حادثے میں چار افراد شدید طور سے زخمی ہوگئے۔

مقامی لوگوں سے اطلاع ملنے کے بعد موقع پر پہنچی پولیس نے زخمیوں کو نزدیکی اسپتال میں داخل کرانے کے ساتھ ہی لاشیں پوسٹ مارٹم کیلئے بھیج دی ہیں۔

بتایا جاتا ہے کہ آٹو پر سوار لوگ سدھیر ٹڈو کے علاج کیلئے ہرپال ڈیہہ گاﺅں جا رہے تھے تبھی چنڈل اسٹیشن کے نزدیک یہ حادثہ رونما ہوگیا۔ سبھی متوفی اور زخمی جریا ڈیہہ اور نوتن ڈیہہ گاﺅں کے رہنے والے بتائے جاتے ہیں۔

ہریانہ میں عالمی وبا کی دوسری لہر کے پیش نظر دو مئی سے نافذ کیا گیا لاک ڈاؤن پانچ جولائی تک بڑھایا گیا ہے۔ تاہم، اس دوران میں بہت سی پابندیاں ختم کردی گئیں ہیں۔

چنڈی گڑھ: ہریانہ میں کووڈ-19 کی عالمی وبا کی دوسری لہر کے پیش نظر دو مئی سے نافذ کیا گیا لاک ڈاؤن پانچ جولائی تک بڑھایا گیا ہے۔ حالانکہ اس دوران کافی ساری پابندیاں ہٹا دی گئی ہیں۔

ہریانہ اسٹیٹ ڈیزاسٹر منیجمنٹ اتھارٹی کے آج یہاں جاری کردہ بیان کے مطابق کووڈ-19 پازیٹیوٹی شرح اور انفیکشن کے نئے معاملات کی تعداد میں کمی آئی ہے۔ لیکن وبا پر قابو پانے کے لئے احتیاطی تدابیر اختیار کرتے ہوئے وبائی الرٹ-سیف ہریانہ کو پانچ جولائی تک بڑھایا جارہا ہے۔

اتھارٹی کے احکام میں واضح کیا گیا ہے کہ آنگن واڑی مراکز اور کریچ 31 جولائی تک بند رہیں گے۔ یونیورسٹی کیمپس کو ریسرچ اسکالرز، لیبارٹریوں میں پریکٹکل کلاسز وغیرہ کے لئے کھولنے کی اجازت دی گئی ہے۔ تمام دوکانیں صبح نو بجے سے رات آٹھ بجے تک کھلی رہیں گی۔ مال صبح دس بجے سے رات آٹھ بجے تک کھلے رہ سکتے ہیں۔ ریستوراں اور بار صبح دس بجے سے رات دس بجے تک صارفین بیٹھانے کی 50 فیصد صلاحیت کے ساتھ کھلے رہیں گے۔

مذہبی مقامات ایک وقت میں 50 افراد کی موجودگی کے ساتھ کھلے رہیں گے۔ کارپوریٹ دفتر صد فیصد موجودگی کے ساتھ کھلے رکھے جاسکتے ہیں بشرطیکہ ضروری سوشل ڈسٹینسنگ، صفائی اور کووڈ-19 کے پیش نظر ضوابط کی پیروی کی جائے۔ جم کو صبح چھ بجے سے رات آتھ بجے تک 50 فیصد صلاحیت کے ساتھ کھولے جانے کی اجازت ہوگی۔ اسپورٹس کمپلیکس اسٹیڈیم کھیلوں کی سرگرمیوں کے لئے کھلے رہیں گے سوائے رابطہ کھیلوں کے (شائقین کی اجازت نہیں ہوگی) کے علاوہ سوئمنگ پول اور سپا بند ہی رہیں گے۔

جموں ایئر فورس سٹیشن کے ٹیکنیکل ایئریا میں گذشتہ رات کو پانچ منٹ کے وقفے کے اندر دو زوردار دھماکے ہوئے۔ جن کی وجہ سے ایئر فورس کے دو اہلکار زخمی ہو گئے۔

جموں: جموں و کشمیر کے سرمائی دارالحکومت جموں کے جموں ایئر فورس سٹیشن کے ٹیکنیکل ایئریا میں گذشتہ رات کو پانچ منٹ کے وقفے کے اندر دو زوردار دھماکے ہوئے۔ جن کی وجہ سے ایئر فورس کے دو اہلکار زخمی ہو گئے۔ ہائی سیکیورٹی جموں ایئر فورس سٹیشن میں دھماکوں کے بعد اس کی اور دیگر اہم ترین تنصیبات کی سیکیورٹی بڑھا دی گئی ہے۔

سرکاری ذرائع نے بتایا کہ پہلا دھماکہ ہفتہ اور اتوار کی درمیانی شب قریب ایک بجکر 45 منٹ پر ایک عمارت کی چھت پر ہوا۔ جبکہ پانچ منٹ سے بھی کم وقت کے بعد ایک اور دھماکہ کھلے میدان میں ہوا۔

انہوں نے بتایا کہ دھماکوں سے ایک عمارت کو نقصان پہنچا اور ایئر فورس کے دو اہلکار زخمی ہو گئے۔ زخمی اہلکاروں کی شناخت ارونگ سنگھ اور ایس کے سنگھ کے طور پر ہوئی ہے۔

انڈین ایئر فورس نے اپنے آفیشل ٹویٹر ہینڈل پر کہا: ‘جموں ایئر فورس سٹیشن کے ٹیکنیکل ایئریا میں اتوار کی علی الصبح کم شدت والے دو دھماکے ہوئے۔ ایک دھماکے کی وجہ سے ایک عمارت کی چھت کو معمولی نقصان ہوا جبکہ دوسرا ایک کھلے میدان میں پھٹ گیا’۔

Two low intensity explosions were reported early Sunday morning in the technical area of Jammu Air Force Station. One caused minor damage to the roof of a building while the other exploded in an open area.

— Indian Air Force (@IAF_MCC) June 27, 2021

ایک اور ٹویٹ میں کہا گیا: ‘ساز و سامان کو کوئی نقصان نہیں پہنچا۔ تحقیقات میں سول ایجنسیوں کو بھی شامل کیا گیا ہے’۔

بتایا جا رہا ہے کہ یہ دھماکے ڈرونز کے استعمال سے کئے گئے ہیں۔

وزیر دفاع راجناتھ سنگھ نے معاملے پر فضائیہ کے نائب سربراہ ایئر مارشل ایچ ایس اروڑہ سے بات کی ہے۔ ایئر مارشل اروڑہ از خود جموں کا دورہ کر کے صورتحال کا جائزہ لیں گے۔

امریکہ کے البوکرک شہر میں ایک گرم ہوا کے غبارے کا حادثے کا شکار ہوجانے سے کم از کم پانچ لوگوں کی موت ہوگئی۔ پولیس کے مطابق غبارہ سنیچر کی صبح سینٹرل ایوینیو اور انسیر بُلے وارڈ کے نزدیک بجلی کے ہائپر ٹینشن تاروں سے ٹکرا گیا تھا۔

واشنگٹن: امریکہ میں نیو میکسیکو صوبے کے البوکرک شہر میں ایک گرم ہوا کے غبارے کا حادثے کا شکار ہوجانے سے کم از کم پانچ لوگوں کی موت ہوگئی۔ شہر کی پولیس نے یہ اطلاع دی ہے۔

البوکرک پولیس محکمے نے سنیچر کو ٹویٹ کرکے کہا ’’بدقسمتی سے گرم ہوا کے غبارے کے حادثے میں چار لوگوں کی موت ہوگئی۔ ایک دیگر شخص کو سنگین حالت میں مقامی اسپتال لے جایا گیا۔ اس شخص کی اسپتال میں موت ہوگئی‘‘۔

پولیس کے مطابق غبارہ سنیچر کی صبح سینٹرل ایوینیو اور انسیر بُلے وارڈ کے نزدیک بجلی کے ہائپر ٹینشن تاروں سے ٹکرا گیا تھا۔

پولیس نے کہا کہ متاثرین میں تین مرد اور دو خواتین شامل ہیں اور سبھی کی عمریں 40 سے 60 کے درمیان ہیں۔

حادثے کے بعد شہر کے جنوب مغربی حصے میں بجلی سپلائی متاثر ہوگئی۔ وفاقی ہوا بازی انتظامیہ (ایف اے اے) اور قومی ٹرانسپورٹ سلامتی بورڈ (این ٹی ایس بی) کے تعاون سے جانچ کی جارہی ہے۔

آئل مارکیٹنگ کمپنیوں نے آج مسلسل دوسرے دن پٹرول ڈیزل کی قیمتوں میں اضافہ کیا۔ انڈین آئل کارپوریشن کے مطابق، دہلی میں آج دہلی میں پٹرول 35 پیسے اور ڈیزل 25 پیسے مہنگا ہوا۔

نئی دہلی: آئل مارکیٹنگ کمپنیوں نے آج مسلسل دوسرے دن پٹرول ڈیزل کی قیمتوں میں اضافہ کیا۔ ملک کے چار بڑے میٹرو شہروں میں پٹرول کی قیمت میں 35 پیسے تک اور ڈیزل کی قیمت میں 26 پیسے کا اضافہ کیا گیا۔

تیل کی مارکیٹنگ کرنے والی معروف کمپنی انڈین آئل کارپوریشن کے مطابق، دہلی میں آج دہلی میں پٹرول 35 پیسے اور ڈیزل 25 پیسے مہنگا ہوا۔ اس اضافے کے بعد، یہاں پٹرول 98.46 روپے اور ڈیزل 88.90 روپے فی لیٹر کی بلند ترین سطح پر پہنچ گیا ہے۔

دہلی میں جون میں اب تک پٹرول کی قیمت میں 4.23 روپے اور ڈیزل کی قیمت میں 3.75 روپے کا اضافہ ہوا ہے۔ اس سے قبل مئی میں پٹرول 3.83 روپے اور ڈیزل 4.42 روپے مہنگا ہوا تھا۔

ممبئی میں پٹرول کی قیمت 34 پیسے کے اضافے سے 104.56 روپے فی لیٹر ہوگئی۔ ڈیزل 26 پیسے مہنگا ہوکر یہ ریکارڈ 96.42 روپے فی لیٹر تک پہنچ گیا۔

چنئی میں پٹرول 30 پیسے مہنگا ہوکر 99.49 روپے اور ڈیزل 23 پیسے اضافے سے 93.46 روپے فی لیٹر مہنگا ہوگیا۔ کولکاتہ میں پٹرول 33 پیسے اور ڈیزل 25 پیسے مہنگا ہوا۔ وہاں ایک لیٹر پٹرول 98.30 روپے اور ڈیزل کی قیمت 91.75 روپے ہوگیا ہے۔

پٹرول اور ڈیزل کی قیمتوں کا روزانہ جائزہ لیا جاتا ہے اور اسی بنا پر روزانہ صبح 6 بجے سے نئی قیمتوں پر عمل درآمد ہوتا ہے۔

آج ملک کے چار میٹرو شہروں میں پٹرول اور ڈیزل کی قیمتیں کچھ اس طرح رہیں:

شہر کا نام —— پٹرول روپے / لیٹر —— ڈیزل روپے / لیٹر

دہلی ————— 98.46 —————— 88.90
ممبئی ۔————— 104.56 —————— 96.42
چنئی —————- 99.49 -—————- 93.46
کولکتہ ———— 98.33 —————— 91.75

کانگریس کے ترجمان ابھیشیک منو سنگھوی نے ہفتے کے روز پریس کانفرنس میں کہا کہ گذشتہ برس حکومت نے مرکزی اہلکاروں کو مہنگائی بھتہ روکنے کا عجیب و غریب فیصلہ کیا جس سے ایک کروڑ سے زائد مرکزی اہلکار متاثر ہوئے ہیں۔

نئی دہلی: کانگریس نے کہا ہے کہ حکومت نے مرکزی اہلکاروں کا مہنگائی بھتہ روک کر 115 لاکھ سے زائد اہلکاروں کے ساتھ دھوکہ کرکے کروڑوں شہریوں کے حق کو مارا ہے۔

کانگریس کے ترجمان ابھیشیک منو سنگھوی نے ہفتے کے روز پریس کانفرنس میں کہا کہ گذشتہ برس حکومت نے مرکزی اہلکاروں کو مہنگائی بھتہ روکنے کا عجیب و غریب فیصلہ کیا جس سے ایک کروڑ سے زائد مرکزی اہلکار متاثر ہوئے ہیں۔ ان میں 15 لاکھ فوجی اور 26 لاکھ سے زیادہ فوج سے متعلق ریٹائرڈ پینشن ہولڈر ہیں۔

انہوں نے کہا کہ حکومت کو اہلکاروں کے مفاد کا خیال رکھتے ہوئے انھیں مہنگائی بھتے کی بقایا رقم کی ادائیگی کرنی چاہیے۔ ان کا کہنا تھا کہ مرکزی حکومت کے مہنگائی بھتہ روکنے کے فیصلے سے 115 لاکھ اہلکاروں کے ساتھ ہی ان پر منحصر آٹھ کروڑ سے زیادہ ان کے اہل خانہ بھی متاثر ہوئے ہیں۔

ترجمان نے کہا کہ ملک میں کورونا وبا جب قہر برپا کر رہی تھی اور ملک کا ہر خاندان اس سے متاثر تھا تو مودی حکومت نے دوہرا معیار اختیار کرتے ہوئے سب سے پہلے مرکزی اہلکاروں کے حق پر حملہ کرکے ان کے مہنگائی بھتے کی ادائیگی روکی ہے۔

اقوام متحدہ نے اسرائیل پر الزام عائد کیا ہے کہ بین الاقوامی قوانین کی کھلی خلاف ورزی کرتے ہوئے مغربی کنارے اور مشرقی یروشلم میں یہودی آباد کاریوں میں توسیع کی گئی ہے۔

اقوام متحدہ: اقوام متحدہ نے اسرائیل پر الزام عائد کیا ہے کہ بین الاقوامی قوانین کی کھلی خلاف ورزی کرتے ہوئے مغربی کنارے اور مشرقی یروشلم میں یہودی آباد کاریوں میں توسیع کی گئی ہے۔

غیر ملکی خبر رساں ایجنسی کے مطابق اقوام متحدہ نے آبادکاریوں کو غیر قانونی قرار دیتے ہوئے نئی اسرائیلی حکومت پر زور دیا ہے کہ ان کی توسیع کا عمل فوری طور پر روک دیا جائے۔

مشرقی یروشلم میں آبادکاریوں میں توسیع غیر قانونی

اقوام متحدہ کے سکریٹری جنرل انتونیو گوتریس اور مشرق وسطیٰ کے لیے خصوصی مندوب ٹور وینس لینڈ نے جمعرات کو سیکیورٹی کونسل کی 2016 کی قرارد پر عمل درآمد کے حوالے سے رپورٹ کیا تھا۔ جس میں کہا گیا تھا کہ آبادکاریوں کی کوئی قانونی حیثیت نہیں ہے۔ رپورٹ میں مطالبہ کیا گیا تھا کہ مغربی کنارے اور مشرقی یروشلم میں آبادکاریوں میں توسیع کے عمل کو روکا جائے۔

خصوصی مندوب ٹور وینس لینڈ نے 2016 کی قرار داد پر عمل درآمد سے متعلق سیکیورٹی کونسل کو دی گئی بریفنگ میں کہا ہے کہ انہیں اسرائیل کی جانب سے مشرقی یروشلم کے علاقے ہار ہوما میں 540 گھروں اور فوجی چوکیوں کی تعمیر کے منصوبے کی منظوری پر گہری تشویش ہے۔

انہوں نے کہا کہ ایسا کرنا اسرائیلی قانون کے تحت بھی غیر قانونی ہے۔

مسٹر ٹور وینس لینڈ نے کہا کہ یہودی آباد کاریاں دو ریاستی حل کے علاوہ منصفانہ اور دائمی امن قائم کرنے میں رکاوٹ کا سبب ہیں۔ انہوں نے کہا کہ آباد کاریوں میں توسیع کا عمل فوری طور پر روکنا چاہیے۔

فلسطینیوں کی نقل مکانی کا سلسلہ ختم کیا جائے

سکریٹری جنرل انتونیو گوتریس اور مشرق وسطیٰ کے لیے خصوصی مندوب ٹور وینس لینڈ نے اسرائیلی حکام پر زور دیا کہ فلسطینی گھروں اور دیگر املاک کی تباہی سمیت فلسطینیوں کی نقل مکانی کا سلسلہ ختم کیا جائے۔

انہوں نے اسرائیل پر زور دیا کہ منصوبے کی منظوری دی جائے جس کے تحت فلسطینی قانونی طور پر تعمیر کا عمل شروع کر سکیں اور علاقے کی ترقی سے متعلق معاملات سے نمٹ سکیں۔

سیکیورٹی کونسل کی دسمبر 2016 کی قرارداد میں شہریوں پر تشدد کی روک تھام کے علاوہ اسرائیل اور فلسطین پر زور دیا گیا تھا کہ کسی قسم کے اشتعال انگیز بیانات اور اقدامات سے پرہیز کیا جائے۔ رپورٹ میں تمام فریقین پر مذاکرات کا عمل شروع کرنے پر زور دیا گیا تھا تاکہ بین الاقوامی اور علاقائی سطح پر سفارتی کوششوں کے ذریعے دو ریاستی حل ممکن بنایا جا سکے۔

رواں سال مارچ سے جون کے درمیان پرتشدد واقعات میں خطرناک حد تک اضافہ

سکریٹری جنرل انتونیو گوتریس اور خصوصی مندوب ٹور وینس لینڈ نے واضح کیا ہے کہ قرارداد کی منظوری کے ساڑھے چار سال بعد بھی کسی بھی اپیل پر عمل درآمد نہیں کیا گیا۔ مسٹر ٹور وینس لینڈ کے مطابق رواں سال مارچ سے جون کے درمیان پرتشدد واقعات میں خطرناک حد تک اضافہ دیکھا گیا ہے۔ غزہ میں موجود گروہوں اور اسرائیل کے درمیان اس قدر شدت گزشتہ کئی سالوں میں نہیں دیکھی گئی۔

سکریٹری جنرل انتونیو گوتریس نے کہا کہ مارچ سے جون کے درمیان اسرائیلی سیکیورٹی فورسز نے 295 فلسطینیوں کو ہلاک کیا جن میں 42 خواتین اور 73 بچے شامل ہیں جبکہ ایک ہزار 149 زخمی ہوئے۔ جبکہ اس دوران فلسطینیوں کی جانب سے اسرائیلی سیکیورٹی فورسز کے 90 ارکان اور 857 اسرائیلی شہریوں کو زخمی کیا گیا۔

امریکہ کی ایک عدالت نے جارج فلائیڈ کی حراستی موت کے جرم میں نیا پولیس کے سابق پولیس افسر ڈیرک شاون کو 22 سال اور چھ ماہ قید کی سزا سنائی ہے۔

واشنگٹن: امریکہ کی ایک عدالت نے گذشتہ سال سیاہ فام امریکی شہری جارج فلائیڈ کی حراستی موت کے جرم میں نیا پولیس کے سابق پولیس افسر ڈیرک شاون کو 22 سال اور چھ ماہ قید کی سزا سنائی ہے۔

ہنپین کاؤنٹی ڈسٹرکٹ جج پیٹر کاہل نے جمعہ کو متعلقہ کیس کی سماعت کے بعد یہ سزا سنائی۔ انہوں نے سزا سنائے جانے سے قبل کہا ’’یہ سزا آپ کو ملے حقوق کے غلط استعمال اور جارج فلائیڈ کے ساتھ ہوئے ظلم و بربریت کا نتیجہ ہے‘‘۔

جج نے کہا کہ ان کا یہ فیصلہ رائے عامہ کے جذبات سے الہام نہیں ہے اور اسے کچھ پیغام دینے کی کوشش کے تناظر میں نہیں لیا جانا چاہئے۔ انہوں نے کہا ’’ایک عدالت کے جج کا کام قانون کے واضح حقائق کو نافذ کرنے کے ساتھ ہی خصوصی معاملات کو نمٹانا ہے۔”

واضح رہے کہ اپریل 2020 میں 45 سالہ شاون کے قتل کے الزام میں فلائیڈ کو گرفتار کیا گیا تھا۔ حراست میں رکھے جانے کے دوران پولیس افسر نے تھرڈ ڈگری کا استعمال کرتے ہوئے فلائیڈ کی گردن کو اپنے گھٹنوں میں دبا کر رکھا تھا، جس کی وجہ سے اس کی موت ہوگئی۔ اس واقعے کے خلاف ملک بھر میں مظاہرے اور ہنگامے ہوئے تھے۔

مرکزی وزیر داخلہ امت شاہ نے ایک ٹویٹ میں منشیات مخالف مہم چلا رہے نارکوٹکس بیورو کے اہلکاروں کی تعریف کی اور انہوں نے کہا کہ مودی حکومت منشیات کے خلاف سخت کارروائی کرنے کے لئے پرعزم ہے۔

نئی دہلی: مرکزی وزیر داخلہ امت شاہ نے ہفتہ کے روز کہا کہ مودی حکومت منشیات کے خلاف سخت کارروائی کرنے کے لئے پرعزم ہے۔

منشیات کے استعمال اور اس کی غیر قانونی اسمگلنگ کے خلاف عالمی دن کے موقع پر مسٹر شاہ نے ایک ٹویٹ میں منشیات مخالف مہم چلا رہے نارکوٹکس بیورو کے اہلکاروں کی تعریف کی۔

On International Day Against Drug Abuse and Illicit Trafficking, PM @narendramodi govt reiterates its commitment towards the zero-tolerance policy against all kind of narcotics.

I applaud the efforts of our @narcoticsbureau personnel towards eliminating the drug menace in India.

— Amit Shah (@AmitShah) June 26, 2021

مرکزی وزیر داخلہ نے کہا ’’منشیات کے استعمال اور اس کی غیر قانونی اسمگلنگ کے خلاف بین الاقوامی دن پر مودی حکومت ہر طرح کی منشیات کے خلاف زیرو ٹالرینس کی اپنی پالیسی کے عزم کا اعادہ کرتی ہے۔ میں منشیات کے خلاف مہم چلا رہے نارکوٹکس بیورو کے اہلکاروں کی کاوشوں کی تعریف کرتا ہوں‘‘۔

ترکی مغربی ممالک میں بڑھتی ہوئی اہمیت اور دنیا میں سب سے زیادہ پناہ گزینوں کا بوجھ اٹھانے والے ترکی کے لئے یورپی یونین کے ممالک نے شاہی پناہ گزینوں کی مدد کے لئے مزید امداد فراہم کرنے کا عندیہ ظاہر کیا ہے۔

برسلز: ترکی مغربی ممالک میں بڑھتی ہوئی اہمیت اور دنیا میں سب سے زیادہ پناہ گزینوں کا بوجھ اٹھانے والے ترکی کے لئے یورپی یونین کے ممالک نے شاہی پناہ گزینوں کی مدد کے لئے مزید امداد فراہم کرنے کا عندیہ ظاہر کیا ہے۔

ترکی میڈیا کی رپورٹ کے مطابق بیلجیم کے دارالحکومت برسلز میں منعقدہ یورپی یونین کے رہنماؤں کے اجلاس کے بعد، دیر لین نے یوروپی کونسل کے صدر چارلس مشیل اور پرتگال کے وزیر اعظم، یوروپی یونین کے میعاد صدر، انٹونیو کوسٹا کے ساتھ مشترکہ پریس کانفرنس سے خطاب کیا جس میں پناہ گزینوں کی مدد کی بات کا اعادہ کیا گیا۔

یورپی کمیشن کی صدر اُرسلا ون در لین نے کہا ہے کہ ترکی کے زیر اہتمام شامی باشندوں کی مدد کے لئے یورپی یونین 2024 تک 3 ارب یورو کا بجٹ مختص کرے گی۔

مسٹر وان دیر لین نے کہا کہ ترکی کے ساتھ تعلقات اور اس تناظر میں شامیوں کی صورتحال پر ای یو اجلاس میں تبادلہ خیال کیا گیا۔ انہوں نے کہا کہ ہم ترکی کی حمایت جاری رکھیں گے، جو لاکھوں شامی مہاجرین اور دیگر پناہ گزینوں کو اپنے ہاں پناہ دیے ہوئے ہے۔ انہوں نے کہا کہ اس مسئلے اور پناہ گزینوں کی حفاظت اور ان کے میزبانوں کی حمایت کرنا یورپ کے مشترکہ مفاد میں ہے۔ انہوں نے کہا کہ یورپی یونین نے ماضی میں بھی اس مسئلے کی حمایت کی ہے اور یہ آئندہ بھی جاری رکھی جائے گی۔

ہم ترکی میں پناہ گزینوں کی مدد کے لئے 2024 تک مزید 3 بلین یورو مختص کرنے کا ارادہ رکھتے ہیں۔ یہ رقم یورپی یونین کے بجٹ سے پوری ہوگی اور یہ مہاجرین کی سماجی و اقتصادی مدد کے لئے استعمال ہوگی۔ یہ اب صرف ہنگامی امدادی اشیاء نہیں ہوگی۔ کیونکہ شامی برسوں سے اس خطے میں رہ رہے ہیں اور آئندہ برسوں کے لئے وسائل ہیں۔ علاوہ ازیں، ہم ترکی کو اس کی مشرقی سرحد پر نقل مکانی کے انتظام میں مدد کریں گے۔ انہوں نے کہا کہ اسی کے ساتھ، یورپی یونین کمیشن اردن اور لبنان میں شامی باشندوں کو 2024 تک 2.2 بلین یورو فراہم کرے گا۔ انہوں نے کہا، ہم نے یورپی یونین کے اراکین کو مزید فنڈ مہیا کرنے کی اپیل کی ہے۔

انہوں نے کہا کہ یورپی یونین کے رہنما اس پیکیج کی حمایت کرتی ہے اور اسے باقاعدہ طور پر قانونی حیثیت دی جائے گی۔

واضح رہے کہ 2011 میں شام میں شروع ہونے والی خانہ جنگی کے بعد سب سے زیادہ پناہ گزیں ترکی میں ہیں۔