انڈین آئل کارپوریشن کے مطابق، دہلی میں پٹرول کی قیمت میں 35 پیسے اضافے کے بعد یہ فی لیٹر 99.86 روپے کی سطح پر آ گیا۔ ڈیزل 89.36 روپے فی لیٹر پر مستحکم رہا۔

نئی دہلی: آئل مارکیٹنگ کمپنیوں نے پیر کے روز مسلسل دوسرے دن پٹرول کی قیمتوں میں اضافہ کیا۔ اس کی وجہ سے دہلی اور کولکتہ میں اس کی قیمت 100 روپے فی لیٹر کے بے حد قریب پہنچ گئی ہے۔ ممبئی اور چنئی میں پٹرول پہلے ہی اس سطح کو عبور کرچکا ہے۔ اسی دوران، ڈیزل کی قیمت میں کوئی تبدیلی نہیں کی گئی۔

ملک کے چار بڑے میٹرو میں آج پٹرول 39 پیسے مہنگا ہوگیا۔ معروف آئل مارکیٹنگ کمپنی انڈین آئل کارپوریشن کے مطابق، دہلی میں پٹرول کی قیمت میں 35 پیسے اضافے کے بعد یہ فی لیٹر 99.86 روپے کی سطح پر آ گیا۔ ڈیزل 89.36 روپے فی لیٹر پر مستحکم رہا۔

پٹرول اور ڈیزل کی قیمتوں میں اضافے کا موجودہ عمل 4 مئی سے شروع

پٹرول اور ڈیزل کی قیمتوں میں اضافے کا موجودہ عمل 4 مئی سے شروع ہوا۔ دہلی میں مئی اور جون میں پٹرول 8.41 روپے اور ڈیزل 8.45 روپے مہنگا ہوا تھا۔ جولائی میں پٹرول کی قیمت میں 1.05 روپے اور ڈیزل کی قیمت میں 18 پیسے فی لیٹر اضافہ ہوا ہے۔

ممبئی میں، پٹرول 34 پیسے مہنگا ہوکر 105.92 روپے فی لیٹر ہوگیا۔ ڈیزل 96.91 روپے فی لیٹر پر مستحکم ہے۔

چنئی میں، پٹرول 31 پیسے مہنگا ہوگیا اور 100.75 روپے فی لیٹر پر فروخت ہوا۔ ڈیزل بغیر کسی تبدیلی کے 93.91 روپے فی لیٹر پر رہا۔

کولکتہ میں، پٹرول 39 پیسے مہنگا ہوگیا اور یہ فی لیٹر 99.84 روپے پر پہنچ گیا۔ وہیں، ایک لیٹر ڈیزل کی قیمت 92.27 روپے فی لیٹر رہی۔

پٹرول اور ڈیزل کی قیمتوں کا روزانہ جائزہ لیا جاتا ہے اور اسی بنا پر روزانہ صبح 6 بجے سے نئی قیمتوں پر عمل درآمد ہوتا ہے۔

آج ملک کے چار میٹرو شہر میں پٹرول اور ڈیزل کی قیمتیں حسب ذیل ہیں:

شہر کا نام —— پیٹرول روپے / لیٹر —— ڈیزل روپے / لیٹر
دہلی ————— 99.86 —————— 89.36
ممبئی ————— 105.92 —————— 96.91
چنئی —————- 100.75 -—————- 93.91
کولکتہ ———— 99.84 —————— 92.27

برطانیہ کی برسٹل یونیورسٹی، آکسفورڈ یونیورسٹی اور کوپن ہیگن یونیورسٹی کی مشترکہ تحقیق میں فیس ماسک کے اثرات کا جائزہ 6 براعظموں میں لیا گیا جس میں یہ بات سامنے آئی۔

لندن: عالمی وبا کورونا سے تحفظ میں فیس ماسک کی اہمیت ایک نئی تحقیق میں سامنے آئی ہے کہ فیس ماسک کا استعمال نئے کورونا وائرس کو پھیلنے سے روکنے میں نمایاں کردار ادا کرتا ہے۔

برطانیہ کی برسٹل یونیورسٹی، آکسفورڈ یونیورسٹی اور کوپن ہیگن یونیورسٹی کی مشترکہ تحقیق میں فیس ماسک کے اثرات کا جائزہ 6 براعظموں میں لیا گیا جس میں یہ بات سامنے آئی۔

تحقیق کے مطابق فیس ماسک کا استعمال کووڈ 19 کو پھیلنے سے روکنے کے لیے اہم ترین رکاوٹ کا کردار ادا کرتا ہے۔ تجرباتی تحقیقی رپورٹس کے مطابق اس سے کسی کے بات کرنے سے بننے والے ذرات یا ہوا میں موجود ذرات کی روک تھام ہوتی ہے۔ تاہم اب تک اس وبائی بیماری کے پھیلاؤ پر اس اثر کا وبائی ڈیٹا کو مدنظر رکھ کر جائزہ نہیں لیا گیا تھا۔

تحقیقی ٹیم نے فیس ماسک کے اثرات کا تجزیہ کیا جو اپنی طرز کا سب سے بڑے سروے بھی ہے جس میں 2 کروڑ افراد اور 6 براعظموں کے 92 خطوں کے ڈیٹا کو دیکھا گیا۔ محققین نے ماضی کے تحقیقی کام کا بھی تجزیہ کیا ہے۔

فیس ماسک کے استعمال سے کیسز کی شرح میں 25 فیصد تک کمی کا امکان 

ڈان میں شائع رپورٹ کے مطابق محققین نے ایک تیکنیک hierarchical Bayesian ماڈلنگ کو استعمال کرکے فیس ماسک پہننے اور اس کے استعمال کی پابندی کے اثرات کا ان خطوں میں کیسز کی تعداد سے موازنہ کیا۔ تحقیق میں دریافت کیا گیا کہ اگر کسی خطے میں سب لوگ اس کا استعمال کریں تو کووڈ 19 کے کیسز کی شرح میں 25 فیصد تک کمی آ سکتی ہے۔

تحقیق میں دریافت کیا گیا کہ فیس ماسک کے لازمی استعمال کی پابندی لوگ بتدریج کرتے ہیں۔ کیسز کی تعداد سے کسی علاقے میں اس کے پہننے کی شرح کی پیش گوئی بھی کی جاسکتی ہے۔

محققین نے کہا کہ اس وقت جب فیس ماسک کا استعمال گھٹ رہا ہے اور ان کو پہننے کی پابندی بھی بتدریج ختم ہورہی ہے، اس وقت ہماری تحقیق سے تصدیق ہوتی ہے کہ کسی آبادی میں فیس ماسکس کووڈ 19 کی روک تھام میں اہم اثرات مرتب کرتیے ہیں۔

اس تحقیقی ٹیم کا کام ابھی جاری ہے اور اب کورونا کی نئی اقسام پر فیس ماسک کے اثرات کا تجزیہ کیا جارہا ہے۔ جبکہ یہ بھی دیکھا جارہا ہے کہ کس قسم کے ماسک کو پہننا بیماری سے زیادہ تحفظ فراہم کرتا ہے۔

پاکستانی وزیر اعظم عمران خان نے ایران کے نو منتخب صدر سید ابراہیم رئیسی سے ٹیلی فون پر رابطہ کرکے ان کی فتح پر مبارکباد دی۔

اسلام آباد: پاکستانی وزیر اعظم عمران خان نے ایران کے نومنتخب صدر سید ابراہیم رئیسی سے ٹیلی فون پر رابطہ کرکے ان کی فتح پر مبارکباد دی۔ امریکی اور نیٹو افواج کے انخلا کے بعد افغانستان کی موجودہ صورتحال پر تبادلہ خیال کیا، اور تشدد پر تشویش کا اظہار کیا۔

وزیر اعظم کے دفتر سے جاری بیان کے مطابق وزیر اعظم عمران خان نے ایران کے نو منتخب صدر سید ابراہیم رئیسی کو 18 جون کو ہونے والے صدارتی انتخابات میں کامیابی پر مبارک باد دی۔انہوں نے نو منتخب ایرانی صدر کو ٹیلی فون کیا اور کہا کہ صدارتی انتخاب میں آپ کی کامیابی ایران کے عوام کا آپ پر اعتماد کا مظہر ہے۔

ڈان میں شائع رپورٹ کے مطابق علاقائی تناظر میں وزیر اعظم عمران خان نے افغانستان میں بگڑتی ہوئی سیکیورٹی کے حالات پر تشویش کا اظہار کیا۔ انہوں نے کہا کہ حالیہ واقعات پاکستان اور ایران کے لیے سنجیدہ احتیاطی تدابیر کا تقاضا کرتے ہیں۔ اس صورت حال سے دونوں ممالک میں افغانستان سے مہاجرین کی آمد کا امکان ہے۔

بات چیت کے ذریعے افغان تنازعہ کے سیاسی حل کی ضرورت پر زور

انہوں نے کہا کہ افغانستان کے تنازعے کے بات چیت سے سیاسی حل کی ضرورت ہے۔ دونوں اطراف نے اس بات پر زور دیا گیا کہ افغانوں کی سرپرستی میں ان کی منشا سے موثر سیاسی حل کی ضرورت ہے۔

وزیر اعظم کے دفتر کے مطابق وزیر اعظم نے مسئلہ جموں کشمیر پر ایران کی جانب سے پاکستان کی بھر پور حمایت پر شکریہ ادا کیا۔

اس موقع پر پاک-ایران سرحد کے ساتھ مارکیٹس کے قیام کو اہمیت کا حامل اقدام قرار دیا گیا۔ اس عزم کا اظہار کیا گیا کہ اس سے دونوں ممالک کے عوام کو سماجی اور معاشی فوائد حاصل ہوں گے۔

انہوں نے بات چیت کے دوران اعلیٰ سطح کے وفود کے تبادلوں پر بھی اتفاق کیا۔ دونوں رہنماؤں نے ایک دوسرے کو سرکاری دوروں کی بھی دعوت دی۔

اترپردیش شیعہ وقف بورڈ کے سابق چیئرمین وسیم رضوی نے عدالت عظمیٰ میں نظرثانی کی عرضی دائر کی ہے، جس پر کل غور کیا جائے گا۔

نئی دہلی: سپریم کورٹ قرآن کی 26 آیات کو حذف کرنے سے متعلق عرضی مسترد کئے جانے کے خلاف نظرثانی عرضی پر پیرکے روز سماعت کرے گا۔ اترپردیش شیعہ وقف بورڈ کے سابق چیئرمین وسیم رضوی نے عدالت عظمیٰ میں نظرثانی کی عرضی دائر کی ہے، جس پر کل غور کیا جائے گا۔ عرضی گزار نے عدالت سے استدعا کی ہے کہ وہ اپنے 12 اپریل کے فیصلے پر دوبارہ نظر ثانی کرے۔ ساتھ ہی اس کے خلاف عائد 50،000 روپے کا جرمانہ بھی واپس لے۔

نظرثانی عرضی میں انہوں نے دلیل پیش کی ہے کہ عدالت عظمیٰ نے قرآن مجید سے 26 آیات کو حذف کرنے سے متعلق عرضی مسترد کرنے سے قبل پہلے قومی سلامتی سے متعلق مسئلے پر غور نہیں کیا۔

واضح رہے کہ جسٹس روہنگٹن پھلی نریمن کی سربراہی میں بنچ نے گزشتہ 12 اپریل کو اتر پردیش شیعہ وقف بورڈ کے سابق چیئرمین وسیم رضوی کی عرضی کو مسترد کرتے ہوئے ان پر 50،000 روپے جرمانہ بھی عائد کیا تھا۔

جسٹس نریمن نے کہا تھا ’’یہ مکمل طور پر غیر سنجیدہ رٹ پٹیشن ہے‘‘۔ معاملے کی سماعت کے دوران جسٹس نریمن نے پوچھا تھا کہ کیا عرضی گزار عرضی کے بارے میں سنجیدہ ہیں۔ انہوں نے کہا تھا ’’کیا آپ عرضی شنوائی کے لئے دے رہے ہیں؟ کیا آپ واقعی سنجیدہ ہیں؟۔

فلپائن کے وزیر دفاع ڈیلفین لورینزانا نے بتایا کہ طیارہ حادثے میں 29 فوجی ہلاک اور 50 زخمی ہوگئے تھے، جب کہ 17 افراد تاحال لاپتہ ہیں۔

منیلا: جنوبی فلپائن میں اتوار کو تباہ ہونے والے فوجی طیارہ میں ہلاک ہونے والوں کی تعداد 29 ہوگئی ہے۔ اس طیارہ حادثے میں 50 دیگر افراد زخمی بھی ہوئے ہیں۔ آرمی حکام نے اتوار کو بتایا کہ 17 جوان تاحال لاپتہ ہیں۔ فوج کا سی -130 ہرکولس طیارہ رن وے پر لینڈ کرنے کی کوشش کے دوران گر کر تباہ ہوگیا۔

فلپائن کے وزیر دفاع ڈیلفین لورینزانا نے بتایا کہ طیارہ حادثے میں 29 فوجی ہلاک اور 50 زخمی ہوگئے تھے، جب کہ 17 افراد تاحال لاپتہ ہیں۔

مسٹر لورینزانا نے بتایا کہ ابتدائی اطلاعات کے مطابق جہاز میں 92 افراد سوار تھے۔ جن میں تین پائلٹ اور عملے کے دیگر ممبر شامل تھے۔ بہت سارے مسافروں نے حال ہی میں بنیادی فوجی تربیت حاصل کی تھی اور انہیں خطے میں دہشت گردی سے لڑنے والی مشترکہ ٹاسک فورس کے حصے کے طور پر شورش زدہ جولو جزیرے میں تعینات کیا جانا تھا۔

فضائیہ نے بتایا کہ ’’امدادی کام جاری ہے۔‘‘

یہ حادثہ صوبہ سولو کے پٹیکول میں پیش آیا اور تصاویر میں درختوں کے درمیان طیارے کے ملبے سے آگ کے لپٹے اور دھواں نکلتے دکھائی دے رہا ہے۔

شہر حیدرآباد میں پٹرول کی قیمت میں ایک مرتبہ پھر اضافہ کیا گیا ہے۔ پٹرول پر 36 پیسے اور ڈیزل پر 20 پیسے کا اضافہ درج کیا گیا ہے۔ 

حیدرآباد: شہر حیدرآباد میں پٹرول کی قیمت میں ایک مرتبہ پھر اضافہ کیا گیا ہے۔ پٹرول پر 36 پیسے اور ڈیزل پر 20 پیسے کا اضافہ درج کیا گیا ہے۔ جس کے بعد ریاستی دارالحکومت میں پٹرول کی قیمت فی لیٹر 103.41 روپئے اور ڈیزل کی قیمت فی لیٹر97.40 روپئے تک جا پہنچی ہے۔

دو ماہ کے عرصہ کے دوران ایک لیٹر پٹرول پر 9 روپئے 18 پیسے کا اضافہ درج کیا گیا ہے، جبکہ ڈیزل کی قیمت میں 8 روپئے 70 پیسے کا اضافہ دیکھا گیا ہے۔

بنگال، آسام، تمل ناڈو، کیرل اور پڈوچیری میں انتخابات کے نتائج کے بعد پٹرولیم اشیا کی قیمتوں میں مسلسل اضافہ ہوتا جا رہا ہے۔ تاہم مئی کے دوسرے ہفتہ سے پٹرولیم اشیا کی قیمتوں میں غیر معمولی اضافہ کیا گیا ہے۔

جولائی میں دو مرتبہ پٹرولیم اشیا کی قیمتوں میں اضافہ ہوا ہے۔ اس اضافہ نے عام آدمی کے بوجھ میں کافی اضافہ کردیا ہے۔ عام آدمی کا کہنا ہے کہ پٹرولیم اشیا کی قیمتوں میں جاری غیر معمولی اضافہ سے ٹرانسپورٹ اور دیگر شعبہ جات پر اثر پڑ رہا ہے اور روز مرہ کی ضروری اشیا کی قیمتیں بھی بڑھ رہی ہیں۔

ملک کا غیر ملکی زرمبادلہ کے ذخائر 25 جون کو اختتام پذیر ہفتہ میں پانچ اعشاریہ صفر سات ارب ڈالر سے بڑھ کر 609 ارب ڈالر کی ریکارڈ سطح پر پہنچ گیا۔

ممبئی: ملک کا غیر ملکی زرمبادلہ کے ذخائر 25 جون کو اختتام پذیر ہفتہ میں پانچ اعشاریہ صفر سات ارب ڈالر سے بڑھ کر 609 ارب ڈالر کی ریکارڈ سطح پر پہنچ گیا۔ اس سے قبل 18 جون کو ختم ہونے والے ہفتے میں غیر ملکی زرمبادلہ کے ذخائر میں 4.15 ارب ڈالر کی کمی سے یہ 603.93 ارب ڈالر رہ گیا تھا۔

ریزرو بینک آف انڈیا (آر بی آئی) سے موصولہ اعداد و شمار کے مطابق فاریکس اثاثے جو غیر ملکی کرنسی کے ذخائر کا سب سے بڑا جزو ہے، 25 جون کو ختم ہونے والے ہفتے کے دوران 4.7 ارب ڈالر سے بڑھ کر 566.24 ارب ڈالر ہوگیا۔ اسی عرصے کے دوران سونے کے ذخائر بھی 36.5 ارب ڈالر کے اضافے سے 36.30 ارب ڈالر ہوگئے۔

اسی ہفتہ میں بین الاقوامی مالیاتی فنڈ کے پاس مختص ذخائر 10 لاکھ ڈالر کے اضافے کے ساتھ 4.97 ارب ڈالر ہو گیا۔ خصوصی ڈرائنگ کے حقوق 1.50 ارب ڈالر پر مستحکم رہا۔

آئی ڈی ایف نے اپنے ٹویٹر پیج پر لکھا ‘‘اسرائیل میں آتش گیر غبارے بھیجے جانے کے جواب میں آئی ڈی ایف نے آج رات حماس کے ہتھیار تیار کرنے والی فیکٹری پر راکٹ لانچر سے حملہ کیا گیا۔

تل ابیب: اسرائیلی فوج نے غزہ پٹی سے آتش گیر غباروں کے چھوڑے جانے کے جواب میں حماس کے اسلحہ تیار کرنے والی ایک فیکٹری کو نشانہ بنایا۔

اسرائیلی دفاعی فورس (آئی ڈی ایف) نے ہفتے کے روز یہ اطلاع دی۔

آئی ڈی ایف نے اپنے ٹویٹر پیج پر لکھا ‘‘اسرائیل میں آتش گیر غبارے بھیجے جانے کے جواب میں آئی ڈی ایف نے آج رات حماس کے ہتھیار تیار کرنے والی فیکٹری پر راکٹ لانچر سے حملہ کیا گیا۔ آئی ڈی ایف غزہ کی پٹی سے ہونے والی دہشت گردی کی تمام کوششوں کا بھرپور جواب دیتا رہے گا‘‘۔

In response to arson balloons launched at Israel, the IDF struck a weapons manufacturing site and a rocket launcher belonging to Hamas tonight.

The IDF will continue to respond firmly to all terror attempts emanating from the Gaza Strip.

— Israel Defense Forces (@IDF) July 3, 2021

خیال رہے فلسطینی تنظیم حماس غزہ پٹی کو کنٹرول کرتی ہے۔ یہ تنظیم اسرائیل کے ساتھ دیرینہ تنازعہ میں شامل ہے۔ اسرائیل اب بھی فلسطین کو ایک آزاد سیاسی اور سفارتی اکائی تسلیم کرنے سے انکار کرتا ہے۔ اسرائیل غزہ پٹی سے ہونے والے کسی بھی حملہ کیلئے حماس کو ذمہ دار قرار دیتا ہے۔

اترپردیش کے ضلع جون پور میں ایک خوفناک سڑک حادثے میں تین موٹر سائیکل سوار نوجوانوں کی موت ہوگئی۔

جون پور: اترپردیش کے ضلع جون پور کے علاقے بادل پور کوتوالی میں ایک خوفناک سڑک حادثے میں تین موٹر سائیکل پر سوار نوجوانوں کی موت ہوگئی۔

پولیس ذرائع نے آج یہاں یہ اطلاع دی۔ انہوں نے بتایا کہ سنگرامئو کے علاقہ کاریگر پور گاؤں کا رہائشی 22 سالہ روی رجک کو ہفتہ کی شب تقریبا ساڑھے دس بجے ایک زہریلے سانپ نے کاٹ لیا تھا، جسے 22 سالہ سچن یادو اور 21 سالہ وکاس رجک علاج کیلئے لے جارہے تھے۔

بادل پور کے علاقے پورہ مکند گاؤں کے قریب لنک روڈ سے نیشنل ہائی وے کو عبور کرتے وقت ایک تیز رفتار گاڑی نے موٹر سائیکل کو ٹکر مار دی۔ اس سے سچن یادو کی موقع پر موت ہوگئی۔ جبکہ وکاس رجک ڈسٹرکٹ اسپتال جاتے ہوئے دم توڑ گیا اور روی رجک کی موت وارانسی کے ٹراما سنٹر میں علاج کے دوران ہوئی۔

انہوں نے بتایا کہ پولیس اس گاڑی کا سراغ لگانے کی کوشش کر رہی تھی جس نے بائیک کو ٹکر ماری تھی۔

ادلب میں مارچ 2020ء سے جاری جنگ بندی کے بعد ایک دن میں یہ سب سے زیادہ ہلاکتیں ہیں۔

دمشق: شامی فوج نے حزب اختلاف کے مضبوط گڑھ مغربی صوبہ ادلب میں ہفتے کے روز توپ خانے سے فائرنگ کی ہے جس کے نتیجے میں چھے بچّوں سمیت آٹھ افراد ہلاک اور سولہ زخمی ہوگئے ہیں۔

برطانیہ میں قائم شامی رصدگاہ برائے انسانی حقوق نے اطلاع دی ہے کہ شامی فوج نے آج صبح ادلب کے جنوب میں واقع علاقہ جبل الزاویہ میں متعدد دیہات پر گولہ باری کی ہے۔

عرب میڈیا کے مطابق اس نے مزید بتایا کہ ایک گاؤں ابلین میں گولہ باری سے ایک ہی خاندان کے پانچ افراد مارے گئے ہیں۔ ان میں میاں بیوی اور ان کے تین بچے ہیں۔ بالیون گاؤں میں گولہ باری سے دو بچے جاں بحق ہوئے ہیں۔ ایک اور گاؤں بالشن میں ایک اور کم سن بچہ شامی فوج کی گولہ باری کی نذر ہوگیا ہے۔

ادلب میں مارچ 2020ء سے جاری جنگ بندی کے بعد ایک دن میں یہ سب سے زیادہ ہلاکتیں ہیں۔ تاہم شامی حکومت کے پشتیبان روس اور حزب اختلاف کے حامی ترکی کی ثالثی کے نتیجے میں طے شدہ اس جنگ بندی کی خلاف ورزیوں کے واقعات رونما ہوتے رہتے ہیں۔

شامی رصدگاہ کے مطابق گذشتہ ہفتوں کے دوران میں روس کے لڑاکا طیاروں نے ادلب کے جنوبی علاقوں میں بمباری کی ہے اور ان فضائی حملوں کے ساتھ شامی فوج نے بھی گولہ باری کی ہے۔
جنگ زدہ ملک میں 2011ء کے اوائل میں صدر بشارالاسد کے خلاف احتجاجی مظاہروں سے شروع ہونے والی خانہ جنگی میں اب تک قریباً پانچ لاکھ افراد مارے جاچکے ہیں۔ ان میں ایک تہائی عام شہری تھے۔