ہندوستان نے افغانستان میں بگڑتی صورتحال کے پیش نظر کابل واقع ہندوستانی سفارت خانے کے تمام عملے اور سفیروں کو فوری واپس بلانے کا فیصلہ کیا ہے۔

نئی دہلی: ہندوستان نے افغانستان کی بگڑتی صورتحال کے پیش نظر کابل واقع ہندوستانی سفارت خانے کے سبھی ملازمین اور سفیر کو فوری طور پر واپس بلانے کا فیصلہ کیا ہے۔

وزارت خارجہ کے ترجمان ارندم باگچی نے منگل کو ٹویٹ کرکے کہا ’’موجودہ حالات کے پیش نظر یہ فیصلہ لیا گیا ہے کہ کابل واقع ہندوستانی سفارتخانے کے سبھی ملازمین اور ہمارے سفیر فوری طور پر ہندوستان واپس آئیں گے‘‘۔

In view of the prevailing circumstances, it has been decided that our Ambassador in Kabul and his Indian staff will move to India immediately.

— Arindam Bagchi (@MEAIndia) August 17, 2021

ہندوستان نے یہ فیصلہ گزشتہ اتوار کو اشرف غنی کو اقتدار سے بے دخل کئے جانے اور وہاں کی بگڑتی ہوئی حفاظت کی صورتحال کے پیش نظر کیا ہے۔

امریکہ نے کہا ہے کہ وہ افغانستان کی نئی طالبان حکومت کی حمایت نہیں کرے گا اگر یہ شدت پسندوں کی پناہ گاہ بن جائے اور بنیادی انسانی حقوق کی خلاف ورزی کرے۔

واشنگٹن: امریکہ نے کہا ہے کہ اگر افغانستان کی نئی طالبان حکومت شدت پسندوں کی پناہ گاہ بنتی ہے اور وہاں لوگوں کے بنیادی حقوق کی خلاف ورزی ہوتی ہے تو وہ اس کی حمایت نہیں کرے گا۔

امریکہ کی وزارت دفاع کے ترجمان نیڈ پائس نے پیر کو صحافیوں سے بات چیت کرتے ہوئے کہا ’’اگر افغانستان کی نئی حکومت اپنے ملک کے عوام کے بنیادی حقوق کی حفاظت کرتی ہے۔ شدت پسندوں کو پناہ نہیں دیتی ہے تو اپنی نصف آبادی یعنی خواتین اور لڑکیوں کے بنیادی حقوق سمیت وہاں کے شہریوں کے بنیادی حقوق کی حفاظت کرتی ہے تو ہم اس کے ساتھ کرپائیں گے‘‘۔

انہوں نے کہا ’’اگر وہاں کی حکومت ایسا نہیں کرتی تو ہم اس کی حمایت نہیں کریں گے‘‘۔

طالبان کے نائب رہنما ملا عبدالغنی برادر نے اعلان کیا ہے کہ جنگ کے خاتمے کے بعد اب طالبان ملک کے لوگوں کی زندگی کو بہتر بنانے کی کوشش کریں گے۔

کابل: افغان دارالحکومت کابل کا کنٹرول سنبھالنے کے بعد طالبان نے پیر کو کہا کہ جنگ ختم ہوچکی ہے اور ملک کے لوگوں کی زندگیوں کو بہتر بنانے کی کوشش کی جائے گی۔

طالبان کے نائب رہنما ملا عبدالغنی برادر نے اعلان کیا ہے کہ جنگ کے خاتمے کے بعد اب طالبان ملک کے لوگوں کی زندگی کو بہتر بنانے کی کوشش کریں گے۔ ملا برادر نے کہا کہ ہم اہل وطن کو بہتر زندگی فراہم کریں گے اور ملک کی سلامتی اور خوشحالی کے لیے کام کیا جائے گا۔

ملا برادر کا یہ بیان ایک ایسے وقت میں سامنے آیا ہے جب طالبان کے افغانستان پر کنٹرول سنبھالنے کے بعد بیشتر ممالک اپنے سفارتکاروں اور عملے کو نکالنے کی کوشش کر رہے ہیں۔

طالبان نے یہ بھی کہا ہے کہ وہ ملک میں سخت شرعی قانون نافذ کرے گا اور ملک کا نام اسلامی امارات افغانستان رکھنے کا اعلان کیا ہے۔ طالبان کے مذاکرات کار سہیل شاہین نے بتایا ہے کہ انہوں نے اپنے مجاہدین کو حکم دیا ہے کہ وہ بغیر اجازت لوگوں کے گھروں میں داخل نہ ہوں۔

شاہین نے بتایا کہ "امارات اسلامیہ نے مجاہدین کو احکامات دیے ہیں اور ایک بار پھر انہیں ہدایت دی گئی ہے کہ وہ بغیر کسی اجازت کے لوگوں کے گھروں میں داخل نہ ہوں۔ کسی کی جان، مال اور عزت کو کوئی نقصان نہیں پہنچے گے اور مجاہدین ان کی حفاظت کریں گے۔‘‘

پاکستان نے طالبان کے ایک سرکردہ رہنما ملا محمد رسول اخوند کو جیل سے رہا کر دیا

دریں اثنا، ایسی اطلاعات بھی ہیں کہ پاکستان نے طالبان کے ایک سرکردہ رہنما ملا محمد رسول اخوند کو جیل سے رہا کر دیا ہے۔ رسول طالبان لیڈر شپ کونسل کے سابق رکن ہیں اور طالبان سے الگ ہونے والے دھڑے کے رہنما رہے ہیں۔

ایک اور پیش رفت میں طالبان نے کابل میں جیلوں سے ہزاروں قیدیوں کو رہا کیا ہے، جن میں تحریک طالبان پاکستان کے سابق نائب سربراہ مولوی فقیر محمد بھی شامل ہیں۔

طالبان نے ابھی تک پروان صوبے کے دارالحکومت چھاریکر اور پنج شیر کے علاقے پر اپنے کنٹرول کا اعلان نہیں کیا ہے۔ ان دو علاقوں کے علاوہ طالبان نے پورے افغانستان پر قبضہ کر لیا ہے۔ اس کے علاوہ طالبان نے خطے کی تمام جیلیں بند کر دیاہے اوران کے تمام قیدیوں کو رہا بھی کر دیا ہے۔

امریکی محکمہ خارجہ کی جانب سے جاری ایک مشترکہ بیان میں کہا گیا ہے کہ سیکیورٹی کی بگڑتی ہوئی صورت حال کو دیکھتے ہوئے، ہم لوگوں کو محفوظ رکھنے کے لیے کام کر رہے ہیں اور تمام فریقوں کے احترام اور سہولت کے لئے غیر ملکی شہریوں اور ملک چھوڑنے کے خواہش مند افغانیوں کی محفوظ اور منظم روانگی کی اپیل کرتے ہیں۔

واشنگٹن: امریکہ، یورپی ممالک اور دیگر سمیت 60 سے زائد ممالک نے کہا ہے کہ افغانستان چھوڑنے والے غیر ملکی شہریوں اور افغانیوں کو محفوظ طریقے سے ایسا کرنے کا موقع ملنا چاہیے۔

امریکی محکمہ خارجہ کی جانب سے اتوار کی تاخیر شب جاری ایک مشترکہ بیان میں کہا گیا ہے ’’سیکیورٹی کی بگڑتی ہوئی صورت حال کو دیکھتے ہوئے، ہم لوگوں کو محفوظ رکھنے کے لیے کام کر رہے ہیں اور تمام فریقوں کے احترام اور سہولت کے لئے غیر ملکی شہریوں اور ملک چھوڑنے کے خواہش مند افغانیوں کی محفوظ اور منظم روانگی کی اپیل کرتے ہیں۔ پورے افغانستان میں برسراقتدار اور اختیارات کے عہدوں پر ہیں انہیں انسانی جان و مال کے تحفظ کے لئے ذمہ داری اور جوابدہی لینی چاہیے۔

بیان میں کہا گیا ہے کہ جو افغان اور بین الاقوامی شہری روانہ ہونا چاہتے ہیں انہیں ایسا کرنے کی اجازت دی جانی چاہیے۔ سڑکیں، ہوائی اڈے اور سرحدیں کھلی رہنی چاہئیں اور امن کو برقرار رکھنا چاہیے۔ افغان عوام حفاظت، سلامتی اور عزت کے ساتھ رہنے کے مستحق ہیں۔ ہم بین الاقوامی برادری میں ہیں، ان کی مدد کے لیے تیار رہیں‘‘۔

امریکہ اگلے 48 گھنٹوں کے اندر افغانستان میں اپنی فوجیوں کی تعداد بڑھا کر تقریباً 6 ہزار کر دے گا۔

کابل: امریکہ اگلے 48 گھنٹوں کے اندر افغانستان میں اپنی فوجیوں کی تعداد بڑھا کر تقریباً 6 ہزار کر دے گا۔ اس کے ساتھ ہی یہ اگلے کئی دنوں میں اپنے ہزاروں شہریوں کو بحفاظت ملک سے باہر نکالے گا۔

امریکی محکمہ خارجہ اور محکمہ دفاع نے ایک مشترکہ بیان میں یہ بات کہی ہے۔ بیان میں کہا گیا ہے کہ ’’اگلے 48 گھنٹوں کے دوران ہم نے اپنی سیکیورٹی کی موجودگی کو تقریباً 6 ہزار فوجیوں تک بڑھا دیا ہے، جن کا مشن مکمل طور پر ان کوششوں کو آسان بنانے پر مرکوز ہے اور ہوائی ٹریفک کنٹرول اپنے قبضے میں لینا ہوگا‘‘۔

واضح رہے کہ طالبان اسلامی مہم اتوار کو کابل میں داخل ہوگئی جس کے بعد موجودہ صدر اشرف غنی نے اپنے استعفیٰ کا اعلان کیا اور ملک چھوڑ دیا۔ مسٹر غنی نے کہا کہ ان کا فیصلہ تشدد کو روکنا ہے کیونکہ شدت پسند دارالحکومت پر حملہ کرنے کے ارادے سے آئے تھے۔

امریکی محکموں نے کہا ہے کہ ’’کل اور آنے والے دنوں میں ہم افغانستان میں رہنے والے ہزاروں امریکی شہریوں کے ساتھ ساتھ کابل میں امریکی مشن کے مقامی طور پر کام کرنے والے ملازمین اور ان کے خاندانوں اور دیگر خاص طور پر کمزور افغان شہریوں کو ملک سے باہر منتقل کریں گے‘‘۔ ہم امریکہ کے خصوصی مہاجر ویزا کے مستحق ہزاروں افغانوں کو نکالنے میں تیزی لائیں گے، جن میں سے تقریباً 2000 پہلے دو ہفتوں میں امریکہ پہنچ چکے ہیں۔

دہلی پولیس نے ایسے جعلساز گروہ کے دو افراد کو گرفتار کیا ہے جو خود کو انڈین ایڈمنسٹریٹو سروس کے سینئر افسر بتاکر بے روزگاروں کو ریلوے میں نوکری دلانے کے نام پر کروڑوں روپے ٹھگ چکے تھے۔

نئی دہلی: دہلی پولیس نے ایسے جعلساز گروہ کے دو افراد کو گرفتار کیا ہے جو خود کو انڈین ایڈمنسٹریٹو سروس (آئی اے ایس) کے سینئر افسر بتاکر بے روزگاروں کو ریلوے میں نوکری دلانے کے نام پر کروڑوں روپے ٹھگ چکے تھے۔

دہلی پولیس کی اقتصادی کرائم برانچ کے ایڈیشنل ڈپٹی کمشنر آر کے سنگھ نے اتوار کو بتایا کہ برج کشور (34) اور سچن کمار (36) کو متاثرین کی شکایت کی بنیاد پر گرفتار کیا گیا ہے۔ بہار میں پٹنہ کے کے کنکر باغ کے رہنے والے برج کشور نے جے پور سے بی ٹیک مکمل کرنے کے بعد ایک نجی کمپنی میں کام کیا۔ راتوں رات امیر بننے کے لیے اس نے مختلف سرکاری محکموں میں ٹرانسفر اور تقرری کے نام پر لوگوں کو دھوکہ دینا شروع کیا۔ الزام ہے کہ اس نے خود کو سینئر آئی اے ایس افسر بتاکر 40 بے روزگار لوگوں سے2 کروڑ 44 لاکھ روپے کی دھوکہ دہی کی۔

نوجوانوں کا اعتماد حاصل کرنے کے لئے دہرہ دون میں دلاتا تھا ٹریننگ

انہوں نے بتایا کہ ملزم سیدھے سادھے بے روزگار نوجوانوں کو ریلوے میں نوکری کا جھانسہ دیکر پیسے لیکر باقاعدہ فرضی تقرری کے ساتھ تربیتی کاغذات بھی دیتا تھا۔ نوجوانوں کا اعتماد حاصل کرنے کے لئے وہ اتراکھنڈ کی راجدھانی دہرہ دون میں ٹریننگ دلاتا تھا۔ اس کے گروپ میں شامل اترپردیش کے دیوبند تحصیل کے سہارنپور کا سچن بے روزگاروں کو تربیت دینے کا ڈرامہ کرتا تھا۔ بی کام کی پڑھائی کرنے کے بعد اس نے وہاں ’این آر ٹی انڈیا‘ نام سے کوچنگ سینٹر چلایا تھا اور وہیں فرضی طریقے سے تربیت دیتا تھا۔

مسٹر سنگھ نے بتایا کہ متاثرہ کی شکایت پر ایک ٹیم تشکیل دی گئی۔ شکایت کنندگان کے پاس برج کشور کے گھر کا پتہ نہیں تھا، صرف اس کے موبائل نمبر تھے۔ اسی کی بنیاد پر ٹیم نے جانچ شروع کی اور دہلی سے باہر کئی علاقوں پر چھاپے مارنے کے بعد ملزمین کو گرفتار کرلیا گیا۔

انہوں نے بتایا کہ اس معاملے میں اقتصادی کرائم برانچ میں اس برس 21 جنوری کو تعزیرات ہند کی دفعہ 419، 420، 406، 467، 468، 471 اور 120 بی دفعات کے تحت معاملہ درج کیا گیا تھا۔

بہار کے وزیر اعلیٰ نتیش کمار نے 75 ویں یوم آزادی پر یہاں تاریخی گاندھی میدان میں پرچم کشائی کے بعد ریاست کے لوگوں کو خطاب کرتے ہوئے زراعت، تعلیم اور سیاحت کی ترقی کے ساتھ ہی خواتین، کسانوں، سرکاری ملازمین اور طلبا و طالبات کیلئے نو اعلانات کئے۔

پٹنہ: بہار کے وزیر اعلیٰ نتیش کمار نے 75 ویں یوم آزادی پر بہار زرعی یونیورسٹی سبور کے تحت تین کالجوں کا قیام، سبھی زرعی بازار کمیٹیوں تجدید اور ترقی، تمام طبقات کے امیدواروں کیلئے سول سروس حوصلہ افزا منصوبہ اور پرائمری اسکولوں میں ہیڈ ٹیچر کیڈر، ہائی اسکولوں میں ہیڈ ماسٹر کیڈر کی تشکیل اور سرکاری ملازمین کے لئے مہنگائی بھتہ 28 فیصد کئے جانے کا اعلان کیا۔

مسٹر کمار نے اتوار کو یہاں تاریخی گاندھی میدان میں پرچم کشائی کے بعد ریاست کے لوگوں کو خطاب کرتے ہوئے زراعت، تعلیم اور سیاحت کی ترقی کے ساتھ ہی خواتین، کسانوں، سرکاری ملازمین اور طلبا و طالبات کیلئے نو اعلانات کئے۔ انہوں نے کہا کہ بہار زرعی یونیورسٹی سبور کے تحت تین کالجوں کا قیام عمل میں لایا جائے گا۔ سبور میں زرعی بایو ٹیکنالوجی کالج، بھوجپور میں جدید زرعی انجینئرنگ کالج اور پٹنہ میں کالج آف زرعی بزنس مینجمنٹ کا قیام ہوگا۔

وزیر اعلیٰ نے کہا کہ اسی طرح ریاست کے کسانوں کو زرعی پیدوار کیلئے بازار کی سہولیات مہیا کرانے کے مقصد سے تمام زرعی بازار کمیٹیوں کی تجدید اور فروغ مرحلہ وار طریقے سے کی جائے گی۔ یہاں پر اناج، پھل، سبزی اور مچھلی کا الگ الگ بازار کا نظم اور اسٹوریج کی سہولیات وغیرہ سے متعلق کام کرائے جائیں گے۔ اس پر لگ بھگ 2700 کروڑ روپے کی لاگت آئے گی۔

بہار حکومت طلبا ۔ طالبات کیلئے فیملی انکم کی حد ڈھائی لاکھ سے بڑھا کر تین لاکھ روپے کرے گی

وزیر اعلیٰ نے کہا کہ پوسٹ میٹرک اسکالر شپ کے لئے درج فہرست ذات ۔ قبائل اور پسماندہ طبقہ کے طلبا ۔ طالبات کیلئے فیملی انکم کی حد مرکزی حکومت نے ڈھائی لاکھ روپے مقرر کی ہے۔ بہار حکومت اب درج فہرست ذات ۔ قبائل اور انتہائی پسماندہ طبقہ کے طلبا ۔ طالبات کیلئے فیملی انکم کی حد ڈھائی لاکھ سے بڑھا کر تین لاکھ روپے کرے گی۔ انہوں نے کہا کہ بڑھی ہوئی فیملی انکم حد کی وجہ سے ہونے والے اضافی اخراجات کو بہار حکومت برداشت کرے گی۔

مسٹر کمار نے کہا کہ اسکولی تعلیم کے فروغ اور معیار میں سدھار کیلئے اسکولی سطح پر ماہر اور موثر قیادت کی ضرورت ہوتی ہے۔ اس کیلئے محکمہ تعلیم کے تحت پرائمری اسکولوں میں ہیڈ ٹیچر کا کیڈر اور ہائی اسکولوں میں ہیڈ ماسٹر کے کیڈر کی تشکیل کی جائے گی۔ انہوں نے کہا کہ ہیڈ ٹیچر اور ہیڈ ماسٹر کے عہدے پر تقرری مقابلہ جاتی امتحانات کے توسط سے کرائیں جائیں گے۔

وزیر اعلیٰ نے کہا کہ مرکزی حکومت کی طرز پر ریاستی حکومت کے افسران، ملازمین اور پنشن ہولڈروں کو یکم جولائی 2021 سے مہنگائی بھتہ کی شرح 11 فیصد سے بڑھاتے ہوئے 17 فیصد کے مقام پر 28 فیصد کئے جانے کا اعلان کیا۔ انہوں نے کہا کہ اس سے متعلق حکم محکمہ مالیات جاری کرے گا۔

اقوام متحدہ کے سربراہ نے کہا کہ شہروں اور قصبوں کے کنٹرول کے لیے طالبان اور افغان سیکیورٹی فورسز کے درمیان لڑائی بہت زیادہ نقصان پہنچا رہی ہے اور شہری اس کی قیمت ادا کر رہے ہیں۔

اقوام متحدہ: اقوام متحدہ کے سکریٹری جنرل انتونیو گوٹریس نے طالبان سے مطالبہ کیا ہے کہ وہ فوری طور پر افغان حکومتی افواج کے خلاف حملے بند کریں اور افغانستان اور اس کے شہریوں کے مفادات کی خدمات کے اچھے ارادے کے ساتھ مذاکرات کی طرف لوٹیں۔

مسٹر گوٹریس نے جمعہ کے روز نیویارک میں اقوام متحدہ کے ہیڈ کوارٹرز میں صحافیوں کو بتایا کہ افغانستان میں حالات تیزی سے قابو سے باہر ہو رہے ہیں اور انسانی ضروریات بڑھتی جارہی ہیں۔

افغانستان میں غیر ملکی فوجیوں کے انخلا کے دوران طالبان کے حملوں میں اضافہ ہوا ہے۔ طالبان اب تک افغانستان کے 34 صوبائی دارالحکومتوں میں سے تقریبا نصف اور اس جنوبی ایشیائی ملک کا تقریبا دو تہائی حصہ کنٹرول کر چکے ہیں۔ ہفتہ کو افغانستان کے دارالحکومت کابل سے صرف 50 کلومیٹر دور طالبان کے پہنچنے کی اطلاعات ہیں۔ طالبان نے افغانستان کا دوسرا بڑا شہر قندھار اور تیسرا بڑا شہر ہرات پر قبضہ کر لیا ہے۔

مسٹر گوٹیریس نے کہا ‘افغانستان جو طویل عرصے سے تنازعات کی زد میں ہے، ایک بار پھر اس میں پھنس رہا ہے۔ یہ تنازع ایک طویل عرصے سے یہاں تشدد سے متاثرہ لوگوں کے لئے ایک خوفناک سانحہ ہے۔

طالبان اور افغان سیکیورٹی فورسز کے درمیان لڑائی انتہائی نقصان دہ

اقوام متحدہ کے سربراہ نے کہا کہ شہروں اور قصبوں کے کنٹرول کے لیے طالبان اور افغان سیکیورٹی فورسز کے درمیان لڑائی بہت زیادہ نقصان پہنچا رہی ہے اور شہری اس کی قیمت ادا کر رہے ہیں۔

انہوں نے کہا "میں تمام فریقوں پر زور دیتا ہوں کہ وہ تنازعات کے بڑے نقصان اور شہریوں پر اس کے اثرات پر توجہ دیں۔ ان سب کو شہریوں کی حفاظت کے لیے زیادہ سے زیادہ کوششیں کرنی چاہئیں۔”

مسٹر گوٹریس نے کہا کہ انہیں ان خبروں سے بہت دکھ ہوا ہے کہ طالبان اپنے زیر کنٹرول علاقوں میں انسانی حقوق کی پامالی کر رہے ہیں، خاص طور پر خواتین اور صحافیوں کو نشانہ بنا رہے ہیں۔

انہوں نے کہا کہ یہ انتہائی خوفناک اور دل دہلا دینے والی بات ہے کہ افغان لڑکیوں اور عورتوں نے جو حقوق حاصل کرنے کے لیے بہت محنت کی ہے، ان سے چھین لیا جا رہا ہے۔

بہار کی نائب وزیر اعلیٰ اور ڈیزاسٹر مینجمنٹ کی وزیر رینو دیوی نے یہاں صحافیوں سے بات چیت میں کہا کہ فی الحال ریاست میں 15 اضلاع کے 82 بلاک سیلاب کی زد میں ہیں۔

پٹنہ: بہار کی نائب وزیر اعلیٰ رینو دیوی نے آج کہا کہ ریاست کے 15 اضلاع کے 82 بلاک سیلاب کی زد میں ہیں اور اس سے اب تک پانچ افراد کی موت ہوئی ہے۔

نائب وزیر اعلیٰ اور ڈیزاسٹر مینجمنٹ کی وزیر رینو دیوی نے یہاں ہفتہ کے روز بھارتیہ جنتا پارٹی (بی جے پی) کے ریاستی ہیڈکوارٹر میں پروگرام کے بعد صحافیوں سے بات چیت میں کہا کہ فی الحال ریاست میں 15 اضلاع کے 82 بلاک سیلاب کی زد میں ہیں۔ ان میں پٹنہ، مظفرپور، دربھنگہ، سہرسہ، سپول، لکھی سرائے، بھاگل پور، بھوج پور، کھگڑیا، سارن، بکسر، بیگوسرائے، کٹہار، مونگیر اور سمستی پور اضلاع شامل ہیں۔

محترمہ رینو دیوی نے کہا کہ ان 15 اضلاع کے 82 بلاک میں راحت اور بچاؤ کیمپ چلائے جا رہے ہیں۔ اسی طرح کل 178 کمیونٹی کچن چلائے جا رہے ہیں، جہاں ایک لاکھ سے زائد افراد کے لئے کھانے کا انتظام کیا گیا ہے۔ انہوں نے کہا کہ متاثرہ علاقوں میں ڈاکٹروں کی ٹیم بھی کیمپ کر رہی ہے اور ضرورت ہونے پر لوگوں کی جانچ کے ساتھ ہی دوا بھی دی جا رہی ہے۔ اس کے علاوہ مویشیوں کے لئے بھی انتظامات کئے گئے ہیں۔

اب تک سیلاب سے پانچ لوگوں کی موت ہونے کی اطلاع

نائب وزیر نے کہا کہ اب تک سیلاب سے پانچ لوگوں کی موت ہونے کی اطلاع ہے۔ حکومت ہر سطح پر اقدامات کر رہی ہے جس سے متاثرہ علاقوں میں لوگوں کو کسی طرح کی پریشانی نہ ہو۔ متاثرہ علاقوں میں 1729 کشتیاں چلائی جا رہی ہے اور نیشنل ڈیزاسٹر رسپانس فورس (این ڈی آر ایف) و اسٹیٹ ڈیزاسٹر رسپانس فورس (ایس ڈی آر ایف) کے اہلکار تعینات کیے گئے ہیں۔

انہوں نے کہا کہ ندیوں کے بڑھتی آبی سطح پر محکمہ آبی وسائل کے انجینئر 24 گھنٹے گہری نظر رکھے ہوئے ہیں۔ نائب وزیر اعلیٰ نے اپوزیشن لیڈر تیجسوی یادو کے راگھوپور کے سیلاب متاثرہ علاقے کے دورہ کے تعلق سے کہا کہ ان کے پاس صرف ایک اسمبلی حلقہ ہے جبکہ میرے پاس ریاست کی ذمہ داری ہے۔ اپنی ذمہ داریاں بخوبی ادا کر رہی ہوں۔ وزیراعلیٰ نتیش کمار مسلسل سیلاب سے متاثرہ علاقوں کا دورہ کرکے افسران کے ساتھ میٹنگ کررہے ہیں۔

محترمہ رینو دیوی نے اپوزیشن لیڈر کے سیلاب متاثرین کو چھ ہزار روپے دینے کے بجائے مزید رقم دینے پر انہوں نے کہا کہ جتنا بجٹ ہے اس حساب سے کام کیا جا رہا ہے۔ ان کا کہنا تھا کہ اس پر مرکزی حکومت کی گائیڈ لائن کے مطابق ہی کام کیا جاتاہے۔

ترکی میں تباہ کن سیلاب پر دنیا بھر سے افسوس اور دکھ کا اظہار کرنے کے ساتھ ساتھ تعاون کی پیش کش کی جا رہی ہے۔

انقرہ: ترکی میں تباہ کن سیلاب کی تباہ کاریوں پر دنیا بھر سے افسوس اور دکھ کا اظہار کرنے کے ساتھ ساتھ تعاون کی پیش کش کی جا رہی ہے۔

ترکی میڈیا کی رپورٹ کے مطابق مغربی بحیرہ اسود کے علاقے میں شدید بارش اور سیلاب کی وجہ سے اپنی جان گنوا بیٹھنے والے شہریوں کے لیے دنیا بھر سے ترکی کو تعزیت اور یکجہتی کے پیغامات موصول ہو رہے ہیں۔

انقرہ میں امریکہ کے سفارت خانے کے ٹوئٹر اکاؤنٹ پر شیئر کی گئی پوسٹ میں کہا گیا ہے کہ اس ہفتے ترکی کے بحیرہ اسود کے علاقے میں آنے والے مہلک سیلاب میں اپنی جانیں گنوائیں اور زخمی ہونے والے افراد کے دکھ میں برابر کے شریک ہیں۔ ہم اپنے نیٹو اتحادی ترکی کے ساتھ کھڑے ہیں، نقصان پہنچنے والوں کی مدد کے لیے تیار ہیں۔

انقرہ میں برطانوی سفارت خانے کی ایلچی کی انڈر سیکریٹری اور ڈپٹی ہیڈ آف مشن، ماریان ینگ نے کہا کہ انہیں سیلاب اور مٹی کے تودے گرنے سے ہونے والے جانی نقصان اور مصائب کو دیکھ کر افسوس ہوا ہے اور وہ متاثرہ افراد کے لواحقین سے اظہار تعزیت کرتی ہیں۔

اسرائیلی سفارت خانے کی جانب سے ترک عوام سے اظہار تعزیت

انقرہ میں جرمن سفارت خانے کی جانب سے ٹوئٹر پر دیے گئے بیان میں سیلاب سے متاثرہ افراد سے اظہار تعزیت کرتے ہوئے یکجہتی کا پیغام دیا گیا ہے۔ ہسپانوی سفارت خانے کی طرف سے ٹوئٹر پر سیلاب کی وجہ سے پہنچنے والے نقصانات پر اظہار افسوس کیا گیا ہے اور متاثرین کے خاندانوں اور ترک عوام کے ساتھ ہ اظہار یکجتی کیا گیا ہے۔ دوسری جانب اسرائیلی سفارت خانے نے اپنی جانیں گنوانے والے افراد کے اہلِ خانہ اور ترک عوام سے اظہار تعزیت کیا ہے۔

انقرہ میں روسی سفارت خانے کی جانب سے ترکی کے مغربی بحیرہ اسود کے علاقے میں سیلاب اور لینڈ سلائیڈنگ کے نتیجے میں اپنے رشتہ داروں، عزیزوں اور اپنے گھروں سے محروم ہونے والوں کے لیے تعزیت اور یکجہتی کا پیغام پہنچایا گیا۔

انقرہ میں چینی سفارت خانے کی جانب سے ٹوئٹر پر شیئر کی گئی پوسٹ میں، ”ہم بحیرہ اسود کے علاقے کے مختلف حصوں میں سیلاب کی تباہی کی وجہ سے دوست ترک عوام کے درد میں شریک ہیں اور اپنی نیک خواہشات پیش کرتے ہیں۔