منی پور میں کئی ماہ سے جاری نسلی تشدد تھمنے کا نام نہیں لے رہا ہے۔ رہ رہ کر تصادم کی خبریں سامنے آ رہی ہیں اور مہلوکین کی تعداد میں بھی دن بہ دن اضافہ ہی ہوتا جا رہا ہے۔ اس درمیان منی پور کے تین اراکین اسمبلی کو منی پور اسمبلی کی مختلف کمیٹیوں کی صدارت سے دستبردار کر دیا گیا ہے۔ قابل ذکر بات یہ ہے کہ تینوں ہی اراکین اسمبلی کوکی طبقہ سے تعلق رکھتے ہیں۔ یہ تینوں اراکین اسمبلی ہیں ماناگلم بم رمیشور، لوسی دِکھو اور ایبومچا۔

منی پور اسمبلی کے ایک بلیٹن میں اس تعلق سے جانکاری دی گئی ہے۔ بلیٹن میں بتایا گیا ہے کہ مایانگلم بم رمیشور کو اسپیکر نے پبلک انٹرپرائزیز کمیٹی کا چیئرمین مقرر کیا گیا تھا۔ رمیشور کاکچنگ اسمبلی حلقہ سے نیشنل پیپلز پارٹی (این پی پی) کے رکن اسمبلی ہیں۔ یہ عہدہ پہلے ایل ایم کھوٹے کے پاس تھا جو چراچندپور سیٹ کی نمائندگی کرتے ہیں۔

ماؤ انتخابی حلقہ کے ناگا پیپلز فرنٹ (این پی ایف) رکن اسمبلی لوسی دِکھو کی گورنمنٹ ایشورنسز کمیٹی کے چیئرمین کی شکل میں تقرر کی گئی تھی۔ یہ عہدہ پہلے سیتوں انتخابی حلقہ کے آزاد رکن اسمبلی ہاؤکھولیٹ کپگین کے پاس تھا۔ اسی طرح لملائی سے بی جے پی رکن اسمبلی ایبومچا کو ونگجاگن والٹے کی جگہ پر اسمبلی لائبریری کمیٹی کا چیئرمین منتخب کیا گیا تھا۔ واضح رہے کہ منی پور میں میتئی اور کوکی کے درمیان نسلی تشدد کی شروعات کے دوران بھیڑ کے ذریعہ حملہ کیے جانے کے بعد والٹے کو سنگین چوٹیں آئی تھیں۔

بہرحال، نئی تقرریوں سے متعلق بلیٹن بدھ کے روز جاری کیا گیا۔ حالانکہ نوٹیفکیشن میں یہ نہیں بتایا گیا ہے کہ مختلف اسمبلی کمیٹیوں کے چیئرمین کیوں تبدیل کیے گئے۔ ویسے اسمبلی کے رول 198(2) کے مطابق اگر (کمیٹی) چیئرمین کسی وجہ سے کام کرنے میں نااہل ہے تو اسپیکر اس کی جگہ پر کسی دیگر چیئرمین کی تقرری کر سکتا ہے۔

راجستھان میں اسمبلی انتخاب کے لیے ووٹنگ کے درمیان سیکر کے فتح پور شیخاوٹی میں دو گروپوں کے درمیان تشدد کا واقعہ پیش آیا ہے۔ بتایا جا رہا ہے کہ بوچیوال بھون کے پیچھے واقع محلے میں دو گروپوں میں کشیدگی کے بعد پتھربازی ہوئی ہے۔ واقعہ کی جانکاری ملنے کے بعد کثیر تعداد میں پولیس فورس جائے حادثہ پر پہنچ گئی ہے۔

پتھراؤ کی وجہ سے پورے محلے میں کشیدگی کی حالت بنی ہوئی ہے۔ اس واقعہ کے سبب کچھ دیر کے لیے ووٹنگ کا عمل بھی متاثر ہوا، لیکن جلد ہی حالات کو قابو میں کر لیا گیا۔ امن و امان برقرار رکھنے کے لیے محلے میں پولیس فورس کی تعیناتی کر دی گئی ہے۔ پولیس کے کئی بڑے افسران بھی موقع پر موجود ہیں۔

موصولہ اطلاع کے مطابق بوچیوال بھون پولنگ بوتھ پر فرضی ووٹنگ کو لے کر پہلے دو فریقین میں تنازعہ شروع ہوا۔ اس کے بعد کانگریس امیدوار حاکم علی خاں و آزاد امیدوار مدھوسودن بھنڈا کے حامی آمنے سامنے آ گئے اور ایک دوسرے پر پتھراؤ کرنے لگے۔ دونوں فریقین میں تقریباً نصف گھنٹے تک پتھراؤ ہوتا رہا۔ اس درمیان کئی لوگوں کو حراست میں بھی لیا گیا ہے۔

نئی دہلی: کانگریس لیڈر جے رام رمیش نے ہفتہ کو کہا کہ راجستھان میں لوگ وزیر اعظم نریندر مودی کی جھوٹ کی اسکیم کو مسترد کر دیں گے اور ان کی حکومت کو یہ بھی باور کرائیں گے کہ مرکزی ایجنسیوں کے غلط استعمال کی ایک حد ہوتی ہے۔

کانگریس کے جنرل سکریٹری انچارج شعبہ مواصلات جے رام رمیش نے کہا ’’راجستھان میں ووٹنگ جاری ہے۔ آج راجستھان کے لوگ وزیر اعظم کی جھوٹ بولو اسکیموں کو مسترد کر دیں گے اور مودی حکومت کو سمجھائیں گے کہ ای ڈی اور سی بی آئی کے غلط استعمال کی بھی ایک حد ہوتی ہے۔‘‘

جے رام رمیش نے کہا کہ راجستھان میں اس بار روایت بدلنے جا رہی ہے۔ انہوں نے کہا، ’’لوگ پولرائزیشن کی سیاست کو مسترد کر رہے ہیں اور کانگریس کی کامیابیوں اور ضمانتوں کو ووٹ دے رہے ہیں۔ اعتماد برقرار ہے۔‘‘

دریں اثنا، کانگریس جنرل سکریٹری (تنظیم) کے سی وینوگوپال نے کہا، ’’راجستھان کے ووٹروں سے میری اپیل ہے کہ ریکارڈ تعداد میں آئیں اور ترقی پسند، خوشحال اور جامع راجستھان کے لیے ووٹ دیں۔‘‘

انہوں نے لوگوں کو کانگریس حکومت کے پانچ سالہ مثالی دور حکومت کی یاد دلائی، جس میں فلاحی پروگراموں نے راجستھان کا چہرہ بدل دیا ہے اور سب کے لیے ایک محفوظ ماحول فراہم کیا ہے۔

انہوں نے کہا، ’’چرنجیوی یوجنا، خواتین کو موبائل فون، اندرا رسوئی اور اس طرح کی غریب نواز اسکیموں نے معنی خیز اثر ڈالا ہے۔ آپ کو بی جے پی کی غلط حکمرانی اور بدعنوانی کا سیاہ دور بھی یاد ہے، جہاں روزمرہ کی زندگی مشکل تھی اور ان کے لیڈر ایک کمیونٹی کو دوسرے کے خلاف کھڑا کرنے اور سرکاری خزانے کو لوٹنے میں مصروف تھے۔‘‘

راجستھان سے راجیہ سبھا ایم پی نے کہا، ’’جب ہم اقتدار میں واپس آئیں گے، ہم انتخابی مہم کے دوران دی گئی تمام سات ضمانتوں کو پورا کریں گے۔ ہم نے کرناٹک میں کیا، راجستھان میں بھی کریں گے۔ اب وقت آ گیا ہے کہ بی جے پی کے عوام پر مبنی حکومت میں خلل ڈالنے کے اس چکر کو توڑا جائے – کانگریس کو مزید 5 سال کے لیے ووٹ دیں۔‘‘

راجستھان میں 200 رکنی اسمبلی کے لیے ووٹنگ آج صبح 7 بجے شروع ہوئی۔ کانگریس ریاست میں لگاتار دوسری بار اقتدار پر قابض ہے اور ریاست کے لوگوں کو دی گئی اپنی سات ضمانتوں پر بھروسہ کر رہی ہے۔ بی جے پی بھی ریاست میں اقتدار میں واپسی پر نظریں جمائے ہوئے ہے۔

راجستھان میں گزشتہ تین دہائیوں سے متبادل پارٹی حکومت کی روایت چلی آ رہی ہے اور کانگریس کو امید ہے کہ اس اسمبلی انتخابات میں اس روایت کو بدل دیا جائے گا۔

اے آئی یعنی آرٹیفیشیل انٹلیجنس (مصنوعی ذہانت) کے بے شمار فوائد ہیں، لیکن اس کے مضر اثرات بھی سامنے آنے لگے ہیں۔ ڈیپ فیک کے بڑھتے معاملوں نے وزیر اعظم نریندر مودی اور صدر جمہوریہ دروپدی مرمو تک کی تشویش میں اضافہ کر دیا ہے۔ اب اے آئی سے متعلق چیف جسٹس آف انڈیا ڈی وائی چندرچوڑ کا انتہائی اہم بیان سامنے آیا ہے۔ چیف جسٹس چندرچوڑ نے ہفتہ کے روز بنگلورو میں منعقد 36ویں لواسیا تقریب میں شرکت کے دوران اے آئی کے اخلاقی استعمال کو لے کر کچھ اہم باتیں لوگوں کے سامنے رکھیں۔ انھوں نے کہا کہ ان دنوں ہم اے آئی کے اخلاقی استعمال کے بنیادی سوالات کا لگاتار سامنا کر رہے ہیں۔

لواسیا تقریب میں چیف جسٹس چندرچوڑ کی تقریر کا عنوان تھا ’شناخت، شخص اور ریاست: آزادی کے نئے راستے‘۔ دراصل لواسیا ایشیا پیسفک علاقوں کے وکلا، ججوں، جیورسٹ اور آئینی اداروں کا ایک ایسو سی ایشن ہے۔ اسی نے ہفتہ کے روز ایک تقریب کا انعقاد کیا جس سے خطاب کرتے ہوئے چیف جسٹس چندرچوڑ نے کہا کہ آزادی کچھ اور نہیں بلکہ اپنے لیے فیصلے لینے کی اہلیت ہے جس سے ہماری زندگی بدل جائے۔ کسی شخص کی پہچان اس کی زندگی میں لیے گئے اس کے فیصلوں سے جڑی ہوتی ہے۔ ساتھ ہی ڈی وائی چندچوڑ نے یہ بھی کہا کہ لوگ اپنی ذات، مذہب، جنس یا جنسی رجحان کے سبب تفریق کا سامنا کرتے ہیں۔ انھیں ہمیشہ استحصال کا سامنا کرنا پڑے گا کیونکہ یہ سماجی طور سے اثرانداز ہے۔

آرٹیفیشیل انٹلیجنس سے متعلق بات کرتے ہوئے چیف جسٹس آف انڈیا ڈی وائی چندرچوڑ نے بتایا کہ ڈیجیٹل دور میں آرٹیفیشیل انٹلیجنس کے کئی پرکشش پہلوؤں کا سامنا کس طرح کیا جاتا ہے۔ انھوں نے کہا کہ آرٹیفیشیل انٹلیجنس یعنی اے آئی اور شخصیت کے درمیان ایک پیچیدہ رشتہ ہے۔

نئی دہلی: کورونا کی وبا نے جہاں پوری دنیا کو ہلا کر رکھ دیا ہے وہیں ایک بار پھر نئی بیماری کی آمد کا خدشہ ہے۔ اس بار بھی یہ نئی بیماری چین سے ہی شروع ہوئی ہے۔ چین کے شمال مشرقی علاقے میں واقع لیاؤننگ صوبے کے بچوں میں اس پراسرار بیماری پھیپھڑوں میں سوجن، سانس لینے میں دشواری کے ساتھ ساتھ کھانسی اور تیز بخار نمونیا کی علامات ظاہر ہو رہی ہیں۔

بیماری کی وبا اتنی شدید ہے کہ حکومت نے یہاں کے اسکول بند کرنے کی تیاریاں کر لی ہیں۔ اس بیماری کی علامات نمونیہ سے ملتی جلتی ہیں لیکن اس کی کچھ علامات نمونیہ سے بالکل مختلف ہیں۔ ڈبلیو ایچ او نے بھی اس بیماری کے حوالے سے وارننگ جاری کی ہے۔

نمونیا آپ کے پھیپھڑوں میں بیکٹیریا، وائرس یا فنگی کی وجہ سے ہونے والا انفیکشن ہے۔ نمونیا آپ کے پھیپھڑوں کے ٹشووں کو سوجن کا باعث بنتا ہے اور آپ کے پھیپھڑوں میں سیال یا پیپ جمع ہونے کا سبب بن سکتا ہے۔ بچوں اور بوڑھوں کو اس انفیکشن کا زیادہ سامنا کرنا پڑتا ہے اور اس سے موت کا خطرہ ہوتا ہے۔ نمونیا کی علامات ہلکے سے شدید تک ہوسکتی ہیں۔ ڈبلیو ایچ او کی 2022 کی رپورٹ کے مطابق ایشیائی اور افریقی ممالک میں اس انفیکشن سے ہونے والی اموات کی تعداد بہت زیادہ ہے۔

اگر ہم نمونیا کی عام علامات کی بات کریں تو اس میں بلغم کے ساتھ یا بغیر کھانسی، بخار، سردی لگنا اور سانس لینے میں دشواری شامل ہے۔ لیکن اگر ہم چین میں پھیلنے والے اس پراسرار نمونیا کی بات کریں تو اس کی علامات میں کھانسی کے بغیر تیز بخار اور پھیپھڑوں میں سوجن شامل ہیں۔ نمونیا کا علاج اینٹی بائیوٹکس، اینٹی وائرل اور اینٹی فنگل ادویات کی مدد سے کیا جا سکتا ہے۔ کسی شخص کو اس انفیکشن سے صحت یاب ہونے میں چند ہفتوں سے ایک مہینہ لگ سکتا ہے۔

یہ سنگین انفیکشن شکار کے پھیپھڑوں پر حملہ کرتا ہے۔ یہ اتنا خطرناک ہے کہ نمونیا میں مبتلا بچوں کو فوری طور پر اسپتال میں داخل کرنے کی ضرورت ہے۔

ڈبلیو ایچ او نے پریس کانفرنس میں کہا کہ چین نے مقامی میڈیا کو اس بیماری کے بارے میں 13 نومبر 2023 کو بتایا تھا۔ صحت کے ادارے نے چین سے بھی کہا ہے کہ وہ اس بیماری سے متعلق معاملات پر گہری نظر رکھے۔ اس کے علاوہ ڈبلیو ایچ او نے چین سے اس بیماری کے بارے میں مزید معلومات فراہم کرنے کو بھی کہا ہے۔

ڈبلیو ایچ او نے چین میں پھیلنے والے اس خطرناک نمونیا وائرس کے حوالے سے کچھ ہدایات جاری کی ہیں۔ ان ہدایات میں لوگوں کو محتاط رہنے کا مشورہ دیا گیا ہے۔ اس کے علاوہ لوگوں سے بھی کہا گیا ہے کہ وہ صفائی کا خاص خیال رکھیں اور اگر جسم میں کوئی علامات ظاہر ہوں تو فوری طور پر ڈاکٹر سے رابطہ کریں۔ اس کے علاوہ سماجی دوری پر عمل کریں اور ماسک کا استعمال کریں۔

مرکزی وزارت صحت کا کہنا ہے کہ ہندوستان میں اس وائرس کے پھیلنے کا خطرہ بہت کم ہے۔ اس کے باوجود وزارت اس صورتحال پر گہری نظر رکھے ہوئے ہے۔ وزارت کے ایک بیان کے مطابق، ‘ہندوستان کو ایویئن انفلوئنزا کیس کے ساتھ ساتھ چین سے رپورٹ ہونے والے سانس کی بیماری کے جھرمٹ سے کم خطرہ ہے۔’ اس رپورٹ میں یہ بھی کہا گیا ہے کہ ہندوستان چین میں پھیلنے والے اس خطرناک وائرس سے پیدا ہونے والی کسی بھی ہنگامی صورتحال کے لیے تیار ہے۔

بچوں کو نمونیا کے اس خطرناک وائرس سے بچانے کے لیے ضروری ہے کہ والدین اپنے بچوں کی خوراک اور قوت مدافعت کا خاص خیال رکھیں۔ بچوں کی خوراک میں ایسی چیزیں شامل کرنا بہت ضروری ہے تاکہ ان کا مدافعتی نظام مضبوط ہو اور وہ اس خطرناک انفیکشن سے لڑ سکیں۔ اس کے علاوہ گھر میں صفائی کا خیال رکھنا اور بچوں کو بھیڑ والی جگہوں پر جانے سے روکنا ضروری ہے۔ جب آپ کا بچہ کھانستا ہے یا چھینکتا ہے تو اسے اپنی ناک اور منہ ڈھانپنا سکھائیں۔ آپ کے بچے کو بھی بار بار ہاتھ دھونے چاہئیں۔ ان اقدامات سے دیگر انفیکشنز کو روکنے میں بھی مدد مل سکتی ہے۔

کریم نگر (تلنگانہ): کانگریس لیڈر راہل گاندھی نے جمعرات کو امید ظاہر کی کہ تلنگانہ میں کانگریس کی لہر ہوگی اور پارٹی اقتدار میں آئے گی۔ ریاست میں ’وجئے بھیری یاترا‘ کے حصے کے طور پر کئی میٹنگوں سے خطاب کرتے ہوئے انہوں نے یقین ظاہر کیا کہ کانگریس اگلے ماہ ہونے والے اسمبلی انتخابات میں کامیابی حاصل کرے گی۔

انہوں نے کہا کہ اسے لکھ لیں۔ تلنگانہ میں کانگریس برسراقتدار آ رہی ہے۔ انہوں نے دہرایا کہ اقتدار میں آنے کے بعد وہ ریاست میں ذات پر مبنی مردم شماری کرائیں گے۔ انہوں نے عوام کو یقین دلایا کہ وہ تلنگانہ کے لئے ہمیشہ دستیاب رہیں گے۔

انہوں نے کہا، ’’تلنگانہ کو جب بھی راہل گاندھی کی ضرورت ہوگی، وہ یہاں موجود ہوں گے۔ آپ کا سپاہی دہلی میں بیٹھا ہے اور جب بھی آپ کو میری ضرورت ہوگی، وہ آ جائے گا۔”

بھوپال پلی، پیڈا پلی اور کریم نگر اضلاع میں جلسوں اور سڑکوں پر جلسوں سے خطاب کرتے ہوئے، انہوں نے کہا کہ تلنگانہ کے ساتھ ان کا رشتہ سیاسی نہیں بلکہ خاندانی اور محبت کا ہے، جیسا کہ جواہر لال نہرو، اندرا گاندھی اور راجیو گاندھی کا ریاست کے ساتھ تھا۔

کانگریس رکن پارلیمنٹ نے یاد دلایا کہ یہ سونیا گاندھی تھیں جنہوں نے یہ جانتے ہوئے کہ اس سے کانگریس کو سیاسی نقصان ہوسکتا ہے تلنگانہ کی تشکیل کی۔ انہوں نے کہا کہ انہوں نے یہ کام تلنگانہ کے غریبوں، کسانوں اور مزدوروں کے لیے کیا ہے۔

راہل گاندھی نے الزام لگایا کہ گزشتہ 10 سالوں میں چیف منسٹر کے سی آر نے تلنگانہ کے عوام کے خواب چکنا چور کر دیئے ہیں۔ انہوں نے کہا کہ اسمبلی انتخابات ‘ڈورل تلنگانہ اور پرجالا تلنگانہ’ (جاگیرداروں کا تلنگانہ اور عوام کا تلنگانہ) کے درمیان مقابلہ ہوگا۔

انہوں نے کہا، ’’کے سی آر اور ان کے خاندان کے افراد زمین، ریت اور شراب سے متعلق تمام اہم محکموں کو کنٹرول کرتے ہیں۔ آپ کے وزیر اعلیٰ ایک بادشاہ کی طرح کام کرتے ہیں، وزیر اعلیٰ کی طرح نہیں۔‘‘ انہوں نے الزام لگایا کہ کے سی آر نے کالیشورم پروجیکٹ کی لاگت میں ایک لاکھ کروڑ روپے سے زیادہ کا اضافہ کیا اور لوگوں کی زمینیں چھین لیں۔

انہوں نے کہا کہ اس پروجیکٹ سے صرف بڑے ٹھیکیداروں کو فائدہ ہوا جو کے سی آر کے دوست ہیں۔ کانگریس کے رکن پارلیمنٹ نے الزام لگایا کہ بی آر ایس حکومت نے زمینی ریکارڈ میں تبدیلی کرکے دھرانی پورٹل کے نام پر بھی زمینیں چھین لی ہیں اور کے سی آر پر تنقید کی کہ وہ دلتوں اور قبائلیوں کو زمین دینے کے وعدے کو پورا کرنے میں ناکام رہے ہیں۔

انہوں نے کہا کہ لوگوں کو ڈبل بیڈروم مکانات نہیں ملے جبکہ کسانوں کے قرضے معاف نہیں کئے گئے۔ انہوں نے یہ بھی الزام لگایا کہ ریتھو بندھو اسکیم سے صرف بڑے زمینداروں کو فائدہ ہوا۔ راہل گاندھی نے قبل ازیں سرکاری ملکیت والی سنگارینی کولیریز کمپنی لمیٹڈ (ایس سی سی ایل) کے ملازمین سے بات چیت کی، انہیں یقین دلایا کہ کانگریس اس کی نجکاری کی اجازت نہیں دے گی۔ انہوں نے ملازمین کو یقین دلایا کہ کانگریس ان کی حفاظت کرے گی۔

مرکز کی بی جے پی حکومت پر بڑے پیمانے پر نجکاری کرنے کا الزام لگاتے ہوئے انہوں نے کہا کہ ان کی پارٹی اس کی مخالفت کرتی ہے اور ملازمین کی حفاظت کے لیے کام کرے گی۔

وزیر اعظم نریندر مودی کو نشانہ بناتے ہوئے راہل گاندھی نے کہا کہ انہوں نے عوام سے جھوٹے وعدے کیے جیسے ہر شہری کے بینک اکاؤنٹ میں 15 لاکھ روپے جمع کرائے جائیں۔ انہوں نے نوٹ بندی کے ذریعے کالے دھن کو ختم کرنے کے مودی کے وعدے کا بھی ذکر کیا۔ انہوں نے دعویٰ کیا کہ وہ مودی اور کے سی آر کی طرح جھوٹ نہیں بولتے۔

انہوں نے تلنگانہ کے لیے پارٹی کی طرف سے اعلان کردہ چھ ضمانتوں کا اعادہ کرتے ہوئے کہا ’’میں جھوٹ بولنے نہیں آیا ہوں۔ میں اپنے خاندان کے افراد سے جھوٹ نہیں بول سکتا۔‘‘ کانگریس لیڈر نے کہا کہ لوگ جا کر دیکھ سکتے ہیں کہ کرناٹک، راجستھان اور چھتیس گڑھ میں کانگریس نے اپنے وعدوں کو کیسے پورا کیا۔

نئی دہلی: کانگریس کے صدر ملکارجن کھرگے نے جمعرات کو پارٹی کی جموں و کشمیر یونٹ میں ایک بڑا ردوبدل کیا اور ایک ایگزیکٹو کمیٹی تشکیل دی، جس میں پارٹی کے سینئر لیڈر کرن سنگھ کو ممبر بنایا گیا۔ کانگریس نے پانچ سینئر نائب صدور، 22 نائب صدور، 51 جنرل سکریٹری، 62 سکریٹری اور 21 ضلعی سربراہوں کا تقرر کیا ہے۔

پارٹی نے ایک بیان میں کہا کہ کھڑگے نے 22 رکنی ایگزیکٹیو کمیٹی بنانے کی تجویز کو منظوری دی جس میں تجربہ کار لیڈر کرن سنگھ اور سیف الدین سوز کے ساتھ سینئر لیڈر غلام احمد میر، طارق حمید قرہ اور تارا چند شامل ہیں۔

کھڑگے نے پانچ نائب صدر نامزد کیے جن میں مولا رام، جی این مونگا، بلوان سنگھ، رویندر شرما، اور محمد انور بھٹ شامل ہیں۔ اس کے علاوہ رجنیش شرما کو یونٹ کا خزانچی مقرر کیا گیا ہے۔ جبکہ وقار رسول وانی جے کے پی سی سی کے سربراہ ہیں۔