شہریت ترمیمی ایکٹ اور این آر سی سے متعلق پوچھے گئے سوال کا جواب ٹالتے ہوئے مرکزی وزیر داخلہ امت شاہ نے کہا کہ شہریت ترمیمی ایکٹ کے قوانین ابھی نہیں بنے ہیں۔

کلکتہ: مغربی بنگال کے دو روزہ دورے کے دوران ایک پریس کانفرنس میں شہریت ترمیمی ایکٹ اور این آر سی سے متعلق پوچھے گئے سوال کا جواب ٹالتے ہوئے مرکزی وزیر داخلہ امت شاہ نے کہا کہ شہریت ترمیمی ایکٹ کے قوانین ابھی نہیں بنے ہیں۔ ملک بھر میں کورونا وائرس کے بحران کی وجہ سے ہم نے اس جانب توجہ نہیں دی ہے اور اس وقت ملک اتنے بڑے مہم کا متحمل نہیں ہوسکتا ہے۔

امت شاہ این آر سی کے سوال پر خاموش

پریس کانفرنس کے دوران ایک نامہ نگار نے مرکزی وزیر داخلہ کے بیان کا حوالہ دیتے ہوئے سوال کیا کہ آپ شہریت ترمیمی ایکٹ اور این آرسی سے متعلق کورونا لوجی کی بات کرتے تھے مگر ایک سال بیت جانے کے باوجود شہریت ترمیمی ایکٹ نافذ نہیں ہوا ہے اور این آر سی کا۔ اس سوال کے جواب پر امت شاہ نے کہا کہ کورونا وائرس کی وجہ سے شہریت ترمیمی ایکٹ کے قوانین نہیں بنے ہیں۔ جب یہ قانون بن جائیں گے اور ملک کے حالات پرامن ہوجائیں گے تو شہریت ترمیمی ایکٹ نافذ کردیا جائے گا۔ تاہم امت شاہ نے این آر سی کے نفاذ سے متعلق کچھ بھی نہیں کہا۔

خیال رہے کہ بی جے پی کے جنرل سکریٹری کیلاش وجے ورگی نے اس سے قبل کہا تھا کہ بنگال میں جنوری سے شہریت ترمیمی ایکٹ نافذ کردیا جائے گا۔

بنگال کے دو وزہ دورے کے دوران امت شاہ شمالی 24 پرگنہ کے متوا برادری کے گڑھ کا دورہ کرنے والے تھے۔مگر ذارئع کے مطابق شہریت ترمیمی ایکٹ کے نفاذ میں تاخیر کی وجہ سے اس دورے کو رد کردیا گیا ہے۔
مغربی بنگال میں غیرقانونی دراندازی کے لئے ترنمول کانگریس کو ذمہ دار ٹھہراتے ہوئے امت شاہ نے کہا کہ جب تک مغربی بنگال میں ممتا بنرجی کا اقتدار ہے اس وقت تک بنگلہ دیش سے دراندازی کا سلسلہ نہیں روکے گا۔ غیرقانونی دراندازی روکنے کے لئے بی جے پی کا اقتدار میں آنا ضروری ہے۔

غیر قانونی دراندازی کے لئے مرکزی حکومت ذمہ دار

ترنمول کانگریس دراندازی کے لئے بی جے پی کو ذمہ دار ٹھہراتی رہی ہے کہ سرحد کی حفاظت مرکزی فورسیس کی ہے۔ اس لئے اگر غیر قانونی دراندازی ہوتی ہے تو اس کے لئے بھی مرکزی حکومت ذمہ دار ہے۔

اس سے قبل شانتی نکتین میں روڈ شو کے بعد امت شاہ نے کہا کہ میں نے اپنی زندگی میں متعدد روڈ شوز میں شرکت کی اور اس کا اہتمام کیا لیکن اس سے پہلے کبھی بھی اتنا بڑا روڈ شو نہیں دیکھا ہے۔ یہ روڈ شو ممتا بنرجی حکومت کے خلاف لوگوں کے غم و غصے کی عکاس ہے۔ یہ ہجوم نریندر مودی جی کے ترقیاتی ایجنڈے پر لوگوں کے اعتماد کی عکاسی کرتا ہے۔ انہوں نے کہا کہ رابندر ناتھ ٹیگور کے سونار بنگلہ کا خواب پورا کیا جائے گا اور بنگال کی عظمت واپس دلائی جائے گی۔

امت شاہ نے باہری قرار دئیے جانے پر کہا کہ ممتا بنرجی اپنا دماغی توازن کھودی ہیں۔ انہیں ملک کی سالمیت اور اتحاد کی کوئی فکر نہیں ہے۔ انہوں نے کہا کہ بنگال اس طرح کی تنگ نظری کا متحمل نہیں ہوسکتا ہے۔ کیا ممتا بنرجی کے زمانے میں اندرا گاندھی، راجیو گاندھی اور نرسمہا راؤ بنگال کا دورہ نہیں کرتے تھے۔

اترپردیش کے بلیا ضلع میں دو بچوں کے 15 سالہ پرانے اغوا کیس میں 6 مجرموں کو عمر قید اور دس دس ہزار روپے کے جرمانے کی سزا سنائی گئی۔

بلیا: اترپردیش میں بلیا ضلع کے اڈیشنل سیشن جج (اول) چندر بھان سنگھ نے دو بچوں کے اغوا کے 15 سال پرانے مقدمے میں چھ مجرموں کو عمر قید اور دس دس ہزار روپے کے جرمانے کی سزا سنائی۔

استغاثہ فریق کے مطابق ریوتی کی رہنے والی کنک پانڈے نے سات مارچ 2005 کو تھانے میں رپورٹ درج کرائی تھی کہ اس کے دو چچا زاد بھائی رتنیش اور شبھم کوچنگ جارہے تھے۔ راستے میں بائیک سوار بدمعاشوں نے ان کا اغوا کرلیا۔

پولیس نے اس معاملے میں گوپال نگر سے بچے کو برآمد کرتے ہوئے میر حسن اور پردیپ کو گرفتار کیا تھا۔ جانچ کے دوران پولیس نے اس معاملے میں چار اور ملزمین گوپال نگر کے اصغر، ریوتی کے منیر اور بہار صوبے کے سیوان ضلع کے رگھوناتھ پور علاقے کے نرہن کے رہنے والے ستیندر اور سرل کو بھی ملزم پاتے ہوئے عدالت میں سبھی کے خلاف چارج شیٹ داخل کی تھی۔

اس مقدمے کی سماعت کرتے ہوئے ہفتہ کو جج نے دونوں فریقوں کی دلیل سننے کے بعد سھبی چھ ملزمین کو قصوروار قرار دیتے ہوئے عمر قید کے ساتھ ساتھ دس دس ہزار روپے کا جرمانہ لگایا۔

کاٹھمنڈو: نیپال کے وزیر اعظم کے پی شرما اولی نے اتوار کے روز غیر متوقع طور پر سخت اقدامات اٹھاتے ہوئے صدر بدیادیوی بھنڈاری کو پارلیمنٹ تحلیل کرنے کی سفارش کرنے کا فیصلہ کیا۔

’کاٹھمنڈو پوسٹ‘ کی رپورٹ کے مطابق آج صبح اولی حکومت کی کابینہ کے ہنگامی اجلاس میں صدر کو وفاقی پارلیمنٹ کو تحلیل کرنے کی سفارش کرنے کا فیصلہ کیا گیا۔ وزیر توانائی برشمین پن نے کہا ’’آج کی میٹنگ میں کابینہ نے صدر کو پارلیمنٹ تحلیل کرنے کی سفارش کرنے کا فیصلہ کیا‘‘۔

مسٹر اولی پر آئنی کونسل ایکٹ سے متعلق ایک آرڈیننس واپس لینے کا دباؤ تھا جسے انہوں نے منگل کو جاری کیا تھا جس پر صدر نے اپنی منظوری بھی دی تھی۔

چین میں ایک کیمیکل پلانٹ میں دھماکہ ہونے سے 3 افراد ہلاک اور 4 زخمی ہوگئے۔ میڈیا رپورٹس کے مطابق یہ واقعہ ہفتہ کے روز مقامی وقت کے مطابق رات 12:46 بجے اینڈا شہر کے ایک کیمیکل پلانٹ میں پیش آیا۔ دھماکے کے بعد پلانٹ میں آگ لگ گئی، جسے اس دن صبح تک بجھایا نہیں جاسکا۔

بیجنگ: چین کے شمال مشرقی صوبے ہیئلونگ ژیانگ میں ایک کیمیائی پلانٹ میں ہونے والے دھماکے میں کم از کم تین افراد ہلاک اور چار زخمی ہوگئے۔ میڈیا رپورٹس کے مطابق یہ واقعہ ہفتہ کے روز مقامی وقت کے مطابق رات 12:46 بجے اینڈا شہر کے ایک کیمیکل پلانٹ میں پیش آیا۔ دھماکے کے بعد پلانٹ میں آگ لگ گئی، جسے اس دن صبح تک بجھایا نہیں جاسکا۔

ابتدائی اطلاعات میں ایک شخص کی ہلاکت کی تصدیق کی گئی تھی جبکہ دو افراد کے لاپتہ ہونے کی اطلاع ہے۔ آج صبح لاپتہ افراد کی لاشوں کی تلاشی کے بعد ہلاک ہونے والوں کی تعداد تین ہوگئی۔ اس واقعہ میں چار افراد زخمی ہوئے ہیں، جن میں دو کی حالت تشویشناک بتائی جارہی ہے۔

دھماکے کی وجوہات کے بارے میں معلوم کیا جارہا ہے۔ وزارت ماحولیات کی ایک ٹاسک فورس نے ماحول میں کسی بھی مضر کیمیائی مادے کی موجودگی کا پتہ لگانے کے لئے دھماکے کی جگہ کی تحقیقات شروع کردی ہے۔

اترپردیش کے سرکاری اسکولوں کے اساتذہ کے لئے جاری ہدایات میں کہا گیا ہے کہ خواتین اور مرد امیدوار 18 تا 22 دسمبر کے درمیان آن لائن درخواست دے سکتے ہیں۔

پریاگ راج: اترپردیش کے سرکاری اسکولوں کے ٹیچروں کے لئے جاری ہدایات میں بیسک ایجوکیشن کونسل نے کہا کہ سرکاری اسکولوں کے خاتون ٹیچر کو 2 سال اور مرد ٹیچر کو 5 سال کی خدمات پوری کرنے کے بعد انہیں بین ضلعی تبادلہ کا فائدہ دیا جائے گا۔

بیسک ایجوکیشن کونسل کے سکریٹری پرتاپ سنگھ کی جانب سے جاری نوٹیفکیشن میں کہا گیا ہے کہ وہ خاتون ٹیچر جو شادی کے بعد تبادلے کا فائدہ لے چکی ہیں دوبارہ تبادلے کا فائدہ نہیں لے سکتی ہیں۔ خواتین اور مرد امیدوار 18 تا 22 دسمبر کے درمیان آن لائن درخواست دے سکتے ہیں۔

نوٹیفکیشن میں کہا گیا ہے کہ درخواست فارم دینے کے بعد 22 تا 24 دسمبر کے درمیان ضلع سطح پر کاؤنسلنگ اور آن لائن تصدیق ہوگی۔ 26 دسمبر کو بی ایس اے کی جانب سے کاؤنسلنگ کے بعد ڈاٹا لاک کیا جائے گا۔

این آئی سی کی جانب سے درخواست فارم کی بنیاد پر 26 دسمبر کو فہرست تیار کی جائے گی۔ 29 دسمبر کو این آئی سی کی جانب سے تیار فہرست کا جائزہ لیا جائےگا اور 30 دسمبر کو تبادلے کی حتمی فہرست جاری کردی جائے گی۔

خیال رہے کہ جمعہ ہی سے تبادلے کے آن لائن درخواست دینے کے سلسلے کا آغاز ہوچکا ہے۔ اس ضمن میں بیسک ایجوکیشن کونسل نے تبادلے کے لئے ضروری ہدایات جاری کی ہیں تاکہ امیدواروں کو کسی قسم کے شکوک وشبہات نہ ہوں اور جو امیدوار اس کے اہل ہیں اور اپنا تبادلہ چاہتے ہیں وہ فارم پر کرسکیں۔

شوبھندو ادھیکار ی نے آج ترنمول کانگریس سے 21 سالہ رشتہ ختم کرتے ہوئے 9 ممبران اسمبلی کے ساتھ امت شاہ کی موجودگی میں بی جے پی میں شمولیت اختیار کی۔ ترنمول کانگریس سے دوری بنانے کے بعد پہلی مرتبہ ممتا بنرجی کے خلاف جارحانہ تنقید کرتے ہوئے کہا کہ اس مرتبہ آپ پہلے نمبر پر نہیں ہوں گے۔ آپ دوسرے نمبر پر ہیں۔

کلکتہ: سابق ریاستی وزیر شوبھندو ادھیکار ی نے آج ترنمول کانگریس سے 21 سالہ رشتہ ختم کرتے ہوئے مرکزی وزیر داخلہ امت شاہ کی موجودگی میں مدنی پور میں عوامی جلسے میں بی جے پی میں شامل ہوگئے۔

ترنمول کانگریس سے دوری بنانے کے بعد پہلی مرتبہ ممتا بنرجی کے خلاف جارحانہ تنقید کرتے ہوئے کہا کہ اس مرتبہ آپ پہلے نمبر پر نہیں ہوں گے۔ آپ دوسرے نمبر پر ہیں۔ شوبھندو ادھیکاری نے کہا کہ میری ماں گائتری دیوی ہے میں کبھی بھی ماں سے غدار نہیں ہوسکتا ہے۔ شوبھندو ادھیکاری نے کہا کہ امت شاہ ملک کے وزیر داخلہ ہیں۔ وہ میرے بڑے بھائی ہیں اور میں ان کا چھوٹا بھائی ہوں۔ امت شاہ نے جو وعدے کئے ہیں اس کو انہوں نے پورا کیا ہے۔

شوبھندو ادھیکاری نے کہا کہ میں نے بنگال کی ترقی کے لئے ترنمول کانگریس چھوڑا ہے۔ میں بنگال کی سرزمین کا قرض دار ہوں اور اس کو ادا کرنے کی کوشش کررہا ہوں۔ گزشتہ دس سالوں میں بنگال میں ترقی روک دیا گیا ہے۔ انہوں نے کہا کہ میں عہدہ کی لالچ میں بی جے پی میں شامل نہیں ہوا ہوں۔ بطور کارکن بی جے پی میں کام کرتا رہوں گا۔ ایک ایک بوتھ پر جاؤں گا۔ میں پارٹی کا جھنڈا اور دیوار لکھنے کو تیار ہوں۔

امت شاہ کو باہری کہنے پر انہوں نے کہا کہ پہلے ہم ہندوستانی ہیں پھر بنگالی ہیں۔ انہوں نے کہا کہ کلکتہ اور دہلی کے درمیان کوئی فرق نہیں ہے۔ انہوں نے ابھیشیک بنرجی کی سخت تنقید کرتے ہوئے کہا کہ ممتا بنرجی کو بھتیجا تباہ کردے گا۔

بی جے پی میں شامل ہونے والے ممبران اسمبلی

شوبھندو ادھیکاری کے ساتھ سنیل منڈل (ممبر پارلیمنٹ)، دسرتھ ترکے (سابق ممبر)، بنسری میتی (ایم ایل اے، نارتھ کانتی، مشرقی میدنا پور) ، تاپسی منڈل (ایم ایل اے، ہلدیہ، مشرقی میدنی پور)، اشوک ڈنڈا (ایم ایل اے، تملوک، مشرقی مدنی پور)، سددیپ مکھرجی (ایم ایل اے، پرولیا)، بسجیت کندو (ایم ایل اے، کالنا)، ساکت پنجا (ایم ایل اے، مشرقی بردوان)، شیلبھدرا دت (ممبر اسمبلی بارک پور، شمالی 24 پرگنہ)، دیپالی بسواس (ایم ایل اے)، گزول ( مالدا)، سکرا منڈا (ایم ایل اے، نگرکاٹا، جلپائی گورڑی)، شیام پرساد مکھرجی (سابق وزیر) بی جے پی میں شامل ہوئے ہیں۔

مرکزی حکومت کی جاری کی گئی مستفید افراد کی فہرست میں ضلع سمستی پور کے ایک ہزار 593 انکم ٹیکس دہندگان کسانوں نے فرضی طریقے سے پی ایم کسان سمان ندھی اسکیم کا فائدہ لیا ہے۔ مرکزی حکومت نے مستفید کسانوں کے کھاتوں کا جب آدھار کارڈ سے لنک کرکے سافٹ ویئر کے ذریعہ تحقیقات کی تب اس بڑے فراڈ کا انکشاف ہوا۔

سمستی پور: بہار کے ضلع سمستی پور میں پردھان منتری کسان سمان نیدھی اسکیم کے تحت دھوکہ دہی کرکے انکم ٹیکس ادا کرنے والے کسانوں کے ذریعہ کروڑوں روپے لینے کے معاملے کا انکشاف ہوا ہے۔

ڈسٹرکٹ ایگریکلچر آفیسر وکاس کمار نے ہفتہ کو یہاں بتایا کہ ضلع کے 225153 کسانوں کو پی ایم کسان سمان ندھی یوجنا کا فائدہ مل رہا ہے۔ انہوں نے بتایا کہ مرکزی حکومت نے مستفید کسانوں کے کھاتوں کا جب آدھار کارڈ سے لنک کرکے سافٹ ویئر کے ذریعہ تحقیقات کی تب اس بڑے فراڈ کا انکشاف ہوا۔

مرکزی حکومت کی جاری کی گئی مستفید افراد کی فہرست میں ضلع سمستی پور کے ایک ہزار 593 انکم ٹیکس دہندگان کسانوں نے فرضی طریقے سے اس اسکیم کا فائدہ لیا ہے۔ مسٹر کمار نے بتایا کہ مرکزی حکومت کی ہدایت پر پی ایم کسان سمان ندھی یوجنا کا فائدہ لے رہے ان کسانوں سے رقم واپس لینے کے لئے نوٹس جاری کی گئی ہے۔

انہوں نے کہا کہ اب تک ضلع کے 1593 مستفید افراد میں سے 9 انکم ٹیکس ادا کرنے والے کاشتکاروں نے اس اسکیم کے تحت لی گئی 76 ہزار روپے کی رقم ڈی بی ٹی کے ذریعہ حکومت ہند کو واپس کردی ہے۔ محکمہ زراعت کو غلط معلومات دے کر اس اسکیم سے فائدہ اٹھا رہے کسانوں کو نوٹس جاری کرکے کہا گیا ہے کہ اسکیم کے تحت ملی رقم مقررہ حد کے اندر لوٹا دیں۔ اگر جو کاشتکار رقم واپس نہیں کریں گے تو ان کے خلاف سرٹیفکیٹ کیس درج کرائے جائیں گے۔

غزنی کے صوبائی گورنر کے ترجمان وحید اللہ جمعہ زادہ نے بتایا کہ ایک شخص بیٹری رکشہ چلا رہا تھا اور اس کے گاؤں میں داخل ہوتے ہی بچوں نے اسے گھیر لیا۔ اسی دوران یہ دھماکہ ہوا۔ جس میں 15 بچے ہلاک اور دیگر 20 زخمی ہوگئے ہیں۔ دھماکہ گاؤں کے ایک ایسے گھر کے قریب ہوا جہاں قرآن خوانی کی تقریب ہورہی تھی۔ 

کابل: افغانستان کے مشرقی صوبے غزنی میں ہوئے ایک خوفناک دھماکے میں 15 بچے ہلاک اور دیگر 20 زخمی ہوگئے۔
افسران اور پولیس ذرائع نے ہفتہ کے روز بتایا کہ غزنی کے ضلع گیلان میں جمعہ کے روز ہوئے زبردست دھماکے کی وجوہات کا ابھی تک پتہ نہیں چل سکا ہے۔

چند عینی شاہدین نے بتایا کہ ممکنہ طور پر یہ بچے ایک خریدار کو ہتھیار بیچنے کی کوشش کر رہے تھے۔ تبھی اس میں یہ دھماکہ ہوگیا۔ طالبان دہشت گردوں نے بھی کہا ہے کہ یہ دھماکہ حادثاتی طور پر ہوا ہے۔

یہ دھماکہ گاؤں کے ایک ایسے گھر کے قریب ہوا جہاں قرآن خوانی کی تقریب ہورہی تھی۔

غزنی کے صوبائی گورنر کے ترجمان وحید اللہ جمعہ زادہ نے بتایا کہ ایک شخص بیٹری رکشہ چلا رہا تھا اور اس کے گاؤں میں داخل ہوتے ہی بچوں نے اسے گھیر لیا۔ اسی دوران یہ دھماکہ ہوا۔ ترجمان نے خدشہ ظاہر کیا کہ مرنے والوں کی تعداد میں اضافہ ہوسکتا ہے۔

قابل ذکر بات یہ ہے کہ قطر کی راجدھانی دوحہ میں افغانی حکام اور طالبان کے مابین بات چیت شروع ہونے کے باوجود ملک میں تشدد جاری ہے۔

امریکی صدر نے ایک ایسے قانون پر دستخط اور منظوری دے دی ہے جس کے نتیجے میں چینی کمپنیوں پر امریکی اسٹاک مارکیٹ میں کام کرنے پر پابندی لگ سکتی ہے۔ اس قانون کے مطابق امریکی اسٹاک مارکیٹ میں کام کرنے والی کمپنیوں کو یہ بتانا ہوگا کہ اس کا مالک کون ہے اور اس کو چلاتا کون ہے۔

واشنگٹن: امریکی صدر ڈونلڈ ٹرمپ نے ایک ایسے قانون پر دستخط اور منظوری دے دی ہے جس کے نتیجے میں چینی کمپنیوں پر امریکی اسٹاک مارکیٹ میں کام کرنے پر پابندی لگ سکتی ہے۔ وہائٹ ​​ہاؤس نے جمعہ کو ایک پریس ریلیز میں یہ اطلاع دی۔

ریلیز کے مطابق 18 دسمبر 2020 کو صدر نے ایس 945 پر دستخط اور منظوری دی، جو غیر ملکی کمپنیوں کے احتساب کا تعین کرتی ہے، جس میں غیر ملکی حکومت کے زیر ملکیت یا ان کے زیر کنٹرول کمپنیوں کو بھی ریاست ہائے متحدہ امریکہ کے ساتھ ساتھ سخت حفاظتی قواعد پر عمل کرنا ہوگا۔ آڈٹ کے طے شدہ معیارات کے پیش نظر پبلک کمپنی اکاؤنٹس سپروائزر بورڈ سے بھی منظوری لینی ہوگی۔

امریکی کانگریس کے ایوان زیریں اور ایوان نمائندگان نے اس ماہ اس قانون کی منظوری دی، جبکہ سینیٹ نے اسے مئی میں ہی منظور کرلیا تھا۔ اس قانون کے مطابق امریکی اسٹاک مارکیٹ میں کام کرنے والی کمپنیوں کو یہ بتانا ہوگا کہ اس کا مالک کون ہے اور اس کو چلاتا کون ہے۔

مغربی بنگال میں جھوٹے مقدمات کے خلاف بی جے پی لیڈروں کی عرضیوں پر سپریم کورٹ نے ممتا سرکار کو نوٹس جاری کیا ہے۔ عدالت نے بی جے پی کے رہنماؤں کے خلاف کوئی بھی قابل سزا کارروائی پر فی الحال روک لگا دی ہے۔

نئی دہلی: سپریم کورٹ نے مغربی بنگال میں بھارتیہ جنتا پارٹی (بی جے پی) کے رہنماؤں کے خلاف جھوٹے مقدمات کی بابت جمعرات کے روز ریاستی حکومت کو نوٹس جاری کیا۔

جسٹس سنجے کشن کول، جسٹس دنیش مہیشوری اور جسٹس رشی کیش رائے کی بینچ نے بی جے پی رہنماؤں ارجن سنگھ، سوربھ سنگھ، پرنو کمار سنگھ اور کیلاش وجے ورگیہ کی عرضیوں پر سنوائی کے دوران ریاستی حکومت کو نوٹس جاری کیا۔

عدالت عظمیٰ نے بی جے پی کے رہنماؤں کے خلاف کوئی بھی قابل سزا کارروائی پر فی الحال روک لگا دی ہے اور معاملے کی سنوائی آئندہ ماہ تک کے لیے ملتوی کر دی ہے۔