مسٹر مودی بنگلہ دیش کی وزیر اعظم شیخ حسینہ کی دعوت پر پڑوسی ملک کے قیام کے گولڈن جبلی اور بانیٔ ملک بنگ بندھو شیخ مجیب الرحمن کے سوسالہ یوم پیدائش کی تقریب کے موقع پر شرکت کے لئے وہاں گئے ہیں۔

نئی دہلی: وزیر اعظم نریندر مودی بنگلہ دیش کے دو روزہ دورے پر جمعہ کی صبح ڈھاکہ کیلئے روانہ ہوگئے۔

مسٹر مودی بنگلہ دیش کی وزیر اعظم شیخ حسینہ کی دعوت پر پڑوسی ملک کے قیام کے گولڈن جبلی اور بانیٔ ملک بنگ بندھو شیخ مجیب الرحمن کے سوسالہ یوم پیدائش کی تقریب کے موقع پر شرکت کے لئے وہاں گئے ہیں۔

ذرائع کے مطابق مسٹر مودی ڈھاکہ پہنچنے کے فوراً بعد شہدا کی قومی یادگار جائیں گے اور بنگلہ دیش کی آزادی کی جنگ میں شہدا کو خراج عقیدت پیش کریں گے۔ اس کے بعد وہ سہ پہر میں بنگلہ دیش کے قومی دن کے پروگرام میں شرکت کے بعد شام کو ’باپوبنگ بندھو ڈیجیٹل ویڈیو نمائش‘ کا افتتاح کریں گے۔

ذرائع کے مطابق وزیراعظم بنگلہ دیش کے صدر عبدالحمید سے ملاقات کریں گے اور میزبان وزیر اعظم حسینہ کے ساتھ ایک وفد سطح کی میٹنگ میں شرکت کریں گے۔ وہ بنگلہ دیش کی مختلف سیاسی پارٹیوں کے رہنماؤں اور سرکردہ شخصیات سے بھی ملاقات کریں گے۔

کسانوں کا احتجاج کرتے ہوئے 100 دن ہو چکے ہيں اور اب 26 مارچ کو بھارت بند کا اعلان کیا گیا ہے۔ کسان لیڈروں نے بند کو کامیاب بنانے کے لئے ضلع بھر کے تجارتی اداروں سے رابطہ کیا ہے۔

الور: راجستھان کے الور میں زراعتی قوانین کے خلاف شاہجہاں پور-ہریانہ سرحد پر کسانوں کا احتجاج کرتے ہوئے 100 دن ہو چکے ہيں اور اب 26 مارچ کو بھارت بند کا اعلان کیا گیا ہے۔

کسان لیڈروں نے بند کو کامیاب بنانے کے لئے ضلع بھر کے تجارتی اداروں سے رابطہ کیا ہے۔ بند سے ایک روز قبل جمعرات کے روز کسان رہنماؤں نے بہروڑ، نیمرانہ، الور سمیت مختلف مقامات پر تاجروں سے ملاقاتیں کیں۔ بارڈر پر بیٹھے کسانوں نے انتباہ دیا ہے کہ وہ شاہراہ پر ٹریفک جام رکھیں گے۔

مقامی انتظامیہ بھارت بند کے حوالے سے الرٹ ہے۔ اس سے قبل ٹول فری کے دن کسانوں نے ضلع بھر میں مختلف مقامات پر احتجاج کیا تھا۔ کسان رہنما راجہ رام میل اور بلویر چلر نے بتایا کہ ملک گیر بند کی تیاریاں جاری ہیں۔ ہر جگہ پر کاروباری تنظیموں سے مدد مل رہی ہے۔

تعلیمی ادارے اور ہاسٹل بند رکھنے کے فیصلے کے خلاف تلنگانہ کے سکندرآباد میں طلباء نے پی جی کالج سکندرآباد کے سامنے دھرنا دیا۔ طلبہ نے مطالبہ کیا کہ فوری طور پر بند تعلیمی اداروں کو کھولا جائے۔

حیدرآباد: کورونا کی روک تھام کے نام پر تعلیمی اداروں اور ہاسٹلس کو بند کرنے کے فیصلہ کے خلاف تلنگانہ کے سکندرآباد میں طلبہ نے پی جی کالج سکندرآباد کے سامنے دھرنا دیا۔ طلبہ نے اپنے ہاتھوں میں پلے کارڈس تھام کر دھرنا دیا اور اپنے مطالبہ کی حمایت میں نعرے بازی کی۔

طلبہ نے مطالبہ کیا کہ فوری طور پر بند تعلیمی اداروں کو کھولا جائے۔ سڑک کے بیچوں بیچ دیئے گئے اس دھرنے کے نتیجہ میں بڑے پیمانہ پر ٹریفک جام ہوگئی اور گاڑی سواروں کو شدید مشکلات کا سامنا کرناپڑا۔

طلبہ نے کہا کہ ہاسٹلس کو بند کرنے سے ان کو شدید مشکلات کا سامنا ہے اور کلاسس کے نہ ہونے کی وجہ سے ان کی تعلیم متاثر ہو رہی ہے۔ طلبہ نے اپنے ساتھ انصاف کرنے کا مطالبہ کیا۔

راجستھان کے شری گنگا نگر ضلع کے راجیاسر تھانہ علاقہ میں چھتر گڑھ ہائی وے پر فوج کے ایک جپسی کے الٹنے کے نتیجے میں 3 فوجی ہلاک اور پانچ زخمی ہوگئے۔

شری گنگا نگر: راجستھان کے ضلع شری گنگا نگر کے راجیاسر تھانہ علاقے میں چھتر گڑھ شاہراہ پر فوج کی ایک جپسی پلٹنے اور اس میں آگ لگنے سے 3 فوجیوں کی موت ہو گئی اور پانچ زخمی ہوگئے۔

تھانہ انچارج وکرم تیواری نے بتایا کہ زخمی فوجیوں کو سورت گڑھ کے سرکاری اسپتال میں داخل کرایا گیا ہے۔ انہوں نے بتایا کہ راجیاسر تھانہ علاقے میں بدھ کی دیر رات تقریبا ڈیڑھ بجے چھتر گڑھ شاہراہ پر اندرا گاندھی نہر کے نزدیک یہ حادثہ پیش آیا۔

فوج کی 47 آرمرڈ رجمنٹ (بٹھنڈا یجکہہ، پنجاب) کے آٹھ فوجی جپسی میں جارہے تھے۔ اچانک جپسی بے قابو ہوکر پلٹتے ہوئے سڑک کے کنارے جھاڑیوں اور درختوں میں جا گری۔ اس کے بعد جپسی میں آگ لگ گئی۔ فوجیوں کو باہر نکلنے کا موقع نہیں ملا۔

انہوں نے بتایا کہ اس وقت آس پاس کے لوگ جپسی پلٹنے کی آواز سن کر اور آگ کی لپٹیں دیکھ  کر بھاگ آئے، گاؤں والوں نے سخت مشقت کرکے پانچ جوانوں کو باہر نکالا لیکن تین کو باہر نہیں نکالا جاسکا۔ ان کی موقع پر ہی جلنے کی وجہ سے موت ہو گئی۔

مرنے والوں کی شناخت صوبیدار اے ممیجر، ہیڈ کانسٹیبل دیو کمار اور حوالدار ایس کے شکلا کے طور پر ہوئی ہے۔ زخمیوں میں ایس کے پرجاپتی (35)، انکت باجپائی (34)، امیش یادو (27)، اشوک اوجھا (28) ببلو (27) شامل ہیں۔ ایمرجنسی سروس 108 کی ایمبولینس سے زخمیوں کو سورت گڑھ کے سرکاری اسپتال بھیج دیا گیا۔ پولیس ذرائع نے بتایا کہ موقع پر پہنچے گاؤں والوں نے سورت گڑھ میں فائر بریگیڈ کو فون کیا۔ فوج کے افسر بھی موقع پر پہنچ گئے ہیں اور معاملے کی جانچ کر رہے ہیں۔

وزیر اعظم ٹروڈو اور مسٹر وان ڈیر لین نے عالمی وبا کورونا، کینیڈا اور یوروپی یونین میں اس سے لڑنے اور لوگوں کی جان بچانے کے لئے اٹھائے جا رہے اقدامات پر تبادلہ خیال کیا۔

اوٹاوا: کینیڈا کے وزیر اعظم جسٹن ٹروڈو نے کورونا وائرس ( کووڈ-19) کے معاملے پر یورپی کمیشن کی صدر اروسولا وان ڈیر لین سے بات چیت کی۔

یہ اطلاع کنیڈا کے وزیر اعظم کے دفتر نے دی۔ وزیر اعظم کے دفتر نے کہا ’’آج وزیر اعظم جسٹن ٹروڈو نے یوروپی کمیشن کی صدر اروسولا وان ڈیر لین سے بات کی۔ وزیر اعظم ٹروڈو اور مسٹر وان ڈیر لین نے عالمی وبا کورونا، کینیڈا اور یوروپی یونین میں اس سے لڑنے اور لوگوں کی جان بچانے کے لئے اٹھائے جا رہے اقدامات پر تبادلہ خیال کیا‘‘۔

وزیر اعظم کے دفتر نے کہا ’’اس دوران دونوں رہنماؤں نے کینیڈا اور یوروپی یونین کے درمیان تعاون کے قریبی تعلقات کو جاری رکھنے سمیت محفوظ اور مؤثر ویکسین لگانے کی اہمیت پر رضا مندی ظاہر کی‘‘۔ دونوں رہنماؤں نے کمزور ممالک کو تعاون دینے سمیت اس وبا کے خلاف بین الاقوامی لڑائی کی کوششوں کے لئے حمایت دینے پر زور دیا اور 29 مارچ کو اقوام متحدہ میں انٹر نیشنل ڈیبٹ ڈھانچے اور لیکویڈیٹی کے معاملے پر آئندہ اعلی سطحی اجلاس کے لئے تیاری دکھائی۔

ترنمول کانگریس کے ہنگامے کے درمیان راجیہ سبھا نے ‘مالیاتی بل 2021’ کو لوک سبھا کو لوٹا دیا۔ 

نئی دہلی: ترنمول کانگریس کے ہنگامے کے درمیان راجیہ سبھا نے بدھ کے روز ‘مالیاتی بل 2021’ کو صوتی ووٹوں سے لوک سبھا کو لوٹا دیا۔

ایوان میں وزیر خزانہ نرملا سیتارمن نے بل پر بحث کا جواب دیتے ہوئے کہا کہ وزیر اعظم نریندر مودی کی حکومت بدعنوانی سے پاک ہے اور معاشرے کے استحصال کے شکار، محروم اور غریب طبقے کو براہ راست مدد فراہم کی جارہی ہے۔ حکومت کی معاشی اصلاحات سے بینکوں کے غیر منفعت بخش اثاثوں میں کمی آئی ہے۔

انہوں نے کہا کہ مالیاتی بل میں ٹیکس کو منطقی اور آسان بنانے کی کوشش کی گئی ہے اور انکم ٹیکس کی شرحوں میں کوئی تبدیلی نہیں کی گئی ہے۔ آسانی سے کاروبار کرنے کی سہولت سے معیشت کو فروغ دینے پر زور دیا گیا ہے اور اس کی تعمیل کے لئے بہت ساری اہم تبدیلیاں بھی کی گئیں ہیں۔ اس سلسلے میں پروڈکشن ڈیوٹی میں بھی تبدیلی کی گئی ہے۔

وزیر خزانہ نے جی ایس ٹی سے متعلق ممبروں کے سوالوں کا جواب دیتے ہوئے کہا کہ جی ایس ٹی وزارت خزانہ کا معاملہ نہیں ہے۔ جی ایس ٹی میں کوئی بھی فیصلہ جی ایس ٹی کونسل کرتی ہے اور وہ اس سے متعلق تبدیلیاں لا سکتی ہے۔ یہ کونسل ملک کی تمام ریاستوں کے نمائندوں پر مشتمل ہے اور انہیں تبدیلی کا حق ہے۔ ریاستی حکومتوں کو چاہئے کہ وہ پٹرول اور ڈیزل کی قیمتوں کو کم کرنے کے لئے کونسل کے اجلاس میں ایک تجویز پیش کرے۔ جی ایس ٹی میں بار بار تبدیلیاں ہوتی رہی ہیں اور تفصیلی تبادلہ خیال کے بعد اس کا فیصلہ کیا گیا ہے۔

آزادانہ اور منصفانہ الیکشن پر زور دیتے ہوئے الیکشن کمیشن آف انڈیا نے کہا ہے کہ وہ آٹھ مرحلے کے اسمبلی انتخابات سے پہلے اور اس کے دوران کسی بھی طرح کی بدامنی یا تشدد کو برداشت نہیں کرے گی۔ کمیشن نے ریاست میں آزادانہ اور منصفانہ پولنگ کو یقینی بنانے کے لئے مرکزی افواج کی تعیناتی کی ہدایت بھی دی۔

سلی گوڑی: آزادانہ اور منصفانہ رائے دہی پر زور دیتے ہوئے آج بدھ کو چیف الیکشن کمشنر سنیل اروڑا کی سربراہی میں الیکشن کمیشن آف انڈیا (ای سی آئی) کے فل بنچ نے کہا ہے کہ وہ آٹھ مرحلے کے اسمبلی انتخابات سے پہلے اور اس کے دوران کسی بھی طرح کی بدامنی یا تشدد کو برداشت نہیں کرے گی۔

الیکشن کمیشن نے یہ بھی کہا ہے کہ آئینی ذمہ داریوں کو بروئے کار لاتے ہوئے تمام کووڈ ضابطوں پر سختی سے عمل کیا جائے گا۔ ای سی آئی نے پولنگ بوتھ میں معاشرتی دوری کو برقرار رکھنے، ماسک پہننے اور سینیٹائزر کے استعمال کو یقینی بنایاجائے گا۔ کمیشن نے ضلعی انتظامیہ سے پولنگ بوتھ میں تھرمل اسکیننگ کے لئے پی پی ای کٹس اور مشینری بھی خریدنے کا مطالبہ کیا ہے۔ مغربی بنگال میں 27 مارچ سے شروع ہونے والے آٹھ مرحلے کے انتخابات ہوں گے اور آخری مرحلہ کی پولنگ 27 اپریل کو ہوگی۔ نتائج کا اعلان 2 مئی کو کیا جائے گا۔

آزادانہ اور منصفانہ پولنگ کے لئے مرکزی افواج کی تعیناتی کی ہدایت

چیف الیکشن کمشنر سنیل اروڑا کی سربراہی میں کمیشن کے فل بنچ نے ریاست بھر میں امن و امان کی صورتحال کا جائزہ لینے کے لئے ریاستی چیف سکریٹری علاپن بندیو پادھیائے اور ڈی جی پی نیرج نارائن سے سلی گوڑی میں ملاقات کی۔ ای سی آئی نے انتظامیہ کو ہدایت کی کہ وہ پولنگ بوتھ پر ویب کاسٹنگ کے انتظامات کو یقینی بنائیں۔ الیکشن کمیشن نے ریاست میں آزادانہ اور منصفانہ پولنگ کو یقینی بنانے کے لئے مرکزی افواج کی تعیناتی کی ہدایت بھی دی۔

الیکشن کمیشن کا وفد سلی گوڑی کے دو روزہ دورے پر

پولنگ سے قبل کئی اضلاع میں ہتھیاروں کی برآمدگی پر ناراضگی ظاہر کرتے ہوئے کمیشن نے کہا کہ سختی سے نمٹا جائے گا۔ انہوں نے کہا کہ بنگال اور آسام میں روپے بھی برآمد ہو رہے ہیں ہم اس پر سختی سے نمٹیں گے۔ الیکشن کمیشن کا وفد سلی گوڑی کے دو روزہ دورے پر ہے۔ کمیشن کے فل بنچ نے چار خصوصی مبصرین کی موجودگی میں ریاست کے تمام ضلعی مجسٹریٹوں اور پولیس عہدیداروں سے ورچوئل میٹنگیں کیں۔

پچاس فیصد حساس بوتھوں میں ویب کاسٹنگ کی ہدایت

منگل کو مسٹر اروڑا کی سربراہی میں کمیشن نے شمالی بنگال کے آٹھ اضلاع کے 54 اسمبلی حلقوں میں انتخابی تیاریوں کا بھی جائزہ لیا۔ غیر قانونی اسلحہ کے خلاف اضافی نگرانی پر زور دیتے ہوئے 50 فیصد حساس بوتھوں میں ویب کاسٹنگ کی ہدایت بھی دی۔ سی ای سی اروڑا اور الیکشن کمشنرز سوشیل چندر اور راجیو کمار نے بھی بنگال کے چیف انتخابی افسر ایریز آفتاب، خصوصی پولیس مبصر ویویک دوبے اور اے ڈی جی (امن و امان) جگ موہن سمیت دیگر لوگوں کے ساتھ ریاستی اور مرکزی فورسوں کی تعیناتی پر غور کیا۔ الیکشن کمیشن ریاست کے 23 اضلاع میں مرکزی فورسیس کی ایک ہزار سے زیادہ کمپنیاں تعینات کرنے پر غور کر رہا ہے۔

جسٹس رمن نے سائنس اور قانون میں گریجویشن کے بعد 10 فروری 1983 سے قانون کے پیشے سے آغاز کیا۔ اپنے وکالت کے کریئر کے دوران انہوں نے نہ صرف آندھرا پردیش ہائی کورٹ میں بلکہ مرکزی انتظامیہ ٹریبونل (سی اے ٹی) اور سپریم کورٹ میں بھی پریکٹس کی۔

نئی دہلی: سپریم کورٹ کے دوسرے سینئر ترین جج این وی رمن اگلے چیف جسٹس آف انڈیا (سی جے آئی) ہوں گے۔

چیف جسٹس شرد اروند بوبڈے جو 23 اپریل کو رٹائر ہو رہے ہیں نے جسٹس رمن کے نام کی سفارش کی ہے۔

جسٹس رمن نے سائنس اور قانون میں گریجویشن کے بعد 10 فروری 1983 سے قانون کے پیشے سے آغاز کیا۔ اپنے وکالت کے کریئر کے دوران انہوں نے نہ صرف آندھرا پردیش ہائی کورٹ میں بلکہ مرکزی انتظامیہ ٹریبونل (سی اے ٹی) اور سپریم کورٹ میں بھی پریکٹس کی۔

27 جون 2000 کو آندھرا پردیش ہائی کورٹ کا مستقل جج مقرر ہونے کے بعد انہیں 13 مارچ سے 20 مئی 2013 تک اسی ہائی کورٹ کا قائم مقام چیف جسٹس مقرر کیا گیا تھا۔ بعد میں انہیں ترقی دیکر 2 ستمبر 2013 کو دہلی ہائی کورٹ کا چیف جسٹس مقرر کیا گیا۔ 17 فروری 2014 کو ا انہیں اعلی عدالت میں ترقی دی گئی۔

جسٹس رمن 26 اگست 2022 کو رٹائر ہونے والے ہیں۔ عدالت عظمیٰ میں چیف جسٹس سمیت 34 منظور شدہ ججز ہیں اور فی الوقت سپریم کورٹ میں 29 ججز ہیں۔

چیئرمین ایم وینکیا نائیڈو نے صبح دس بجے ایوان بالا کی کارروائی کا آغاز کیا اور محمد جان کے انتقال کے بارے میں آگاہ کیا۔ انہوں نے کہا کہ مسٹر محمد جان ایک وفادار سیاسی اور سماجی کارکن تھے۔

نئی دہلی: ایوان بالا راجیہ سبھا میں بدھ کے روز اپنے مرحوم ممبر اے محمد جان کو خراج عقیدت پیش کیا اور اس کے بعد ایوان کو ایک گھنٹہ کے لئے ملتوی کردیا گیا۔

چیئرمین ایم وینکیا نائیڈو نے صبح دس بجے ایوان کی کارروائی کا آغاز کیا اور محمد جان کے انتقال کے بارے میں آگاہ کیا۔ انہوں نے کہا کہ مسٹر محمد جان ایک وفادار سیاسی اور سماجی کارکن تھے۔ انہوں نے اپنے سیاسی کریئر کا آغاز تمل ناڈو میں انتہائی نچلے درجے سے کیا تھا۔

ایوان نے مسٹر محمد جان کو خاموش خراج تحسین پیش کیا۔ اس کے بعد چیئرمین نے صبح 10.30 بجے سے ساڑھے 11 بجے تک کیلئے ایوان کو ملتوی کرنے کا اعلان کیا۔

منگل کو تمل ناڈو کے سابق وزیر اور اے آئی اے ڈی ایم کے کے رکن راجیہ سبھا محمد جان کا انتقال ہوگیا، وہ 72 سال کے تھے۔ انہوں نے بے چینی کی شکایت کی تھی جس کے بعد انہیں ضلع رانی پیٹ کے والجاپیٹ جنرل اسپتال پہنچایا گیا جہاں ڈاکٹروں نے انہیں مردہ قرار دے دیا۔ وہ اسمبلی انتخابات کے لئے انتخابی مہم چلانے کے بعد اپنے آبائی ضلع رانی پیٹ واپس لوٹے تھے۔

خیال رہے مسٹر محمد جان اس وقت کی وزیر اعلی جے للیتا کی کابینہ میں پسماندہ طبقات کے وزیر تھے۔