حکومت نے فوج میں فیصلہ سازی کے عمل کو تیز کرنے اور فوجی تیاری کو بہتر بنانے کے لیے دفاعی خدمات کے مالیاتی افسران میں اضافہ کرنے کا اعلان کیا ہے۔

نئی دہلی: حکومت نے فوجیوں میں فیصلہ کرنے کے عمل کو تیز کرنے اور فوجی تیاریوں کو بہتر بنانے کے لیے دفاعی خدمات کے مالیاتی افسران میں اضافہ کرنے کا اعلان کیا ہے۔

وزیر دفاع راجناتھ سنگھ نے منگل کے روز اس بابت آرڈر ڈی ایف پی ڈی ایس 2021 جاری کرتے ہوئے کہا کہ اس سے فوج کی فیلڈ آپریشن کو مستحکم کرنے، آپریشن تیاریوں پر توجہ مرکوز کروانے، تجارتی سہولت کو فروغ دینے اور فوجیوں کے درمیان باہم ربط و ضبط کو فروغ دینے میں مدد ملے گی۔

انہوں نے کہا کہ اس سروس ہیڈکوارٹر اور فارمیشنوں کی سطح پر موجودہ وسائل کا بہتر استعمال ہوگا۔ منصوبوں اور تیاریوں کے بارے میں جلد فیصلے کیے جا سکیں گے۔ ساتھ ہی اس سے فوجیوں کی جنگ سے متعلق ضرورتوں کو بھی پورا کیا جا سکے گا۔ فوجیوں میں مختلف سطح پر مالیاتی افسران میں فروغ سنہ 2016 میں کیا گیا تھا۔

مسٹر سنگھ نے کہا کہ ڈی ایف پی ڈی ایس 2021 حکومت کی جانب سے دفاع کے شعبے میں کیے جانے والے اصلاحات کی سمت میں بڑا قدم ہے جس سے ملک میں سیکیورٹی سسٹم کو مضبوط بنایا جا سکے۔ انہوں نے مسلح افواج کی ضرورتوں کو پورا کرنے کے لیے متعلقہ پالیسیز کا جائزہ لینے پر زور دیا اور یقین کا اظہار کیا کہ اس اصلاح کے بعد محض عمل میں لگنے والے وقت میں کمی آئے گی بلکہ افسران کا ڈی سینٹرلائزیشن ہوگا اور آپریشن کی صلاحیت بھی بڑھے گی۔

زرعی قوانین کا جائزہ لینے کے لیے سپریم کورٹ کی جانب سے تشکیل کمیٹی کے ایک رکن نے ہندوستان کے چیف جسٹس آف انڈیا سے کمیٹی کی متعلقہ رپورٹ کو عام کرنے کا مطالبہ کیا ہے۔

نئی دہلی: مودی حکومت کے تین زرعی قوانین کا جائزہ لینے کے لیے سپریم کورٹ کی جانب سے تشکیل کمیٹی کے ایک رکن نے ہندوستان کے چیف جسٹس آف انڈیا (سی جے آئی) این وی رمن سے کمیٹی کی متعلقہ رپورٹ کو عام کرنے کا مطالبہ کیا ہے۔

کمیٹی میں شامل رکن اور شیتکاری تنظیم کے صدر انل جے سنگھ گھنوت نے سی جے آئی کو ایک خط لکھ کر کہا ہے کہ انھیں افسوس ہے کہ کمیٹی کی رپورٹ پر عدالت عظمیٰ نے کوئی توجہ نہیں دی۔

انہوں نے لکھا ہے کہ گذشتہ جنوری میں سپریم کورٹ نے تینوں زرعی قوانین پر عمل درآمد کرنے پر اسٹے کرتے ہوئے ان کے مختلف پہلو پر غور و خوض کے لیے تین رکنی کمیٹی تشکیل دی تھی، جس میں انھیں بھی شامل کیا گیا تھا۔ کمیٹی کو اپنی رپورٹ پیش کرنے کے لیے دو ماہ کا وقت دیا گیا تھا لیکن کمیٹی نے وقت سے پہلے ہی رپورٹ پیش کر دی تھی۔

مسٹر گھنوت نے کہا کہ کمیٹی کی رپورٹ میں کسانوں کو زیادہ سے زیادہ فائدہ پہنچانے کے ارادے سے تمام اسٹیک ہولڈر کے غور و فکر اور مشورے اس میں شامل کیے گئے تھے اور کمیٹی کو پورا یقین تھا کہ اس کی رپورٹ کسانوں کی تحریک کے حل کا راستہ ہموار کرے گی۔

سپریم کورٹ نے متعلقہ رپورٹ پر کوئی توجہ نہیں دی ہے

مسٹر گھنوت نے لکھا ہے، ’کمیٹی کے رکن کے طور پر مجھے اس بات کی بہت تکلیف ہے کہ کسانوں کے مسائل کا حل ابھی تک نہیں ہوا ہے اور تحریک جاری ہے۔ مجھے لگتا ہے کہ سپریم کورٹ نے متعلقہ رپورٹ پر کوئی توجہ نہیں دی ہے‘۔

انہوں نے کہا، ’میری سپریم کورٹ سے درخواست ہے کہ وہ کسانوں کے مسائل کے قابل اطمینان حل اور تحریک کے پرامن حل کے لیے کمیٹی کی رپوٹ عام کرے تاکہ اس کی سفارشات پر عمل کیا جا سکے‘۔

نیٹ امتحان 12 ستمبر کو ہونا ہے اور اسی دن سی بی آئی کا بھی ایک پیپر ہے۔ طلبا کی مانگ ہے کہ انکی دقت کا خیال رکھتے ہوئے نیٹ امتحان کی تاریخ تبدیل کی جانی چاہئے۔

نئی دہلی: کانگریس کے سابق صدر راہل گاندھی اور پارٹی اترپردیش کی انچارج جنرل سکریٹری پرینکا گاندھی واڈرا نے کہا کہ نیشنل ایلجبلیٹی اینٹرنس ٹیسٹ (نیٹ امتحان) کو ملتوی کرنے کی طلبا کی مانگ مناسب ہے اور حکومت کو ان کی بات سننی چاہئے۔

مسٹر گاندھی اور محترمہ واڈرا نے کہا کہ بچوں کی ذہنی صحت پر توجہ دینے کی ضرورت ہے اور اس امتحان میں بیٹھنے والے طلبا کو منصفانہ موقع دینے کی ضرورت ہے۔

مسٹر گاندھی نے ٹویٹ کیا ہندوستانی حکومت طلبا کی پریشانی پر آنکھیں موندے ہوئے ہے۔ نیٹ امتحان ملتوی کریے اور طلبا کو امتحان میں بیٹھنے کا منصفانہ موقع دیجئے۔

GOI is blind to students’ distress.

Postpone #NEET exam. Let them have a fair chance.

— Rahul Gandhi (@RahulGandhi) September 7, 2021

محترمہ واڈرا نے کہا کہ حکومت ایک کے بعد ایک کرکے پورے ملک میں طلبا کی مناسب مانگ کو بھی ٹھکرا رہی ہے۔ جو بچے ہمارے ملک کا مستقبل ہیں اقتدار میں بیٹھے لوگوں کو ان کی بات سننے اور ان کی مدد کرنے میں کیوں پریشانی ہے۔ کیا بچوں کی ذہنی صحت اور انکی بہتری کی فکر نہیں کی جانی چاہئے۔

نیٹ امتحان 12 ستمبر کو ہونا ہے اور اسی دن سی بی آئی کا بھی ایک پیپر ہے۔ طلبا کی مانگ ہے کہ انکی دقت کا خیال رکھتے ہوئے امتحان کی تاریخ تبدیل کی جانی چاہئے۔ یہ معاملہ سپریم کورٹ میں لیا لیکن عدالت نے کہا کہ اس بات کو امتحان لینے والی ایجنسی کے سامنے رکھا جانا چاہئے۔

مسٹر گاندھی اور محترمہ واڈرا کا کہنا ہے کہ طلبا کی فطری دقت کو سمجھتے ہوئے حکومت کو نیٹ امتحان ملتوی کرنا چاہئے۔

برطانوی وزیر اعظم بورس جانسن نے ایک بیان میں کہا کہ وہ طالبان پر زور دے رہے ہیں کہ انخلا کے خواہش مندوں کو محفوظ راستہ دیں اور انسانی حقوق کا خیال رکھیں۔

لندن: برطانیہ کے وزیر اعظم بورس جانسن نے کہا ہے کہ افغانستان سے اب بھی 312 افراد انخلا کے لیے منتظر ہیں، ان میں سے 192 لوگوں نے کالز کا جواب دیا ہے۔

برطانوی وزیر اعظم بورس جانسن نے ایک بیان میں کہا کہ وہ طالبان پر زور دے رہے ہیں کہ انخلا کے خواہش مندوں کو محفوظ راستہ دیں اور انسانی حقوق کا خیال رکھیں۔

انہوں نے کہا کہ مغربی ملکوں نے یقینی بنایا ہے کہ افغانستان میں لڑکیاں اسکول جائیں اور دہشت گرد حملے نہ ہوں۔

دوحہ سے ملنے والی خبروں میں بتایا گیا ہے کہ قطر کے امیر تمیم بن حمد الثانی نے امریکی وزیر خارجہ انٹونی بلنکن اور امریکی وزیر دفاع لائیڈ آسٹن کے ساتھ افغانستان پر طالبان کے قبضے سے پیدا ہونے والی صورت حال اور وہاں سیکیورٹی کو مضبوط بنانے پر بات چیت کی۔

لیبیا میں اقوام متحدہ کے معاون مشن (UNSMIL) نے مشرق میں مقیم فوج کی طرف سے قیدیوں کی رہائی کا خیر مقدم کیا ہے۔

طرابلس: لیبیا میں اقوام متحدہ کے امدادی مشن (یو این ایس ایم آئی ایل) نے مشرق میں مقیم فوج کی طرف سے قیدیوں کی رہائی کا خیر مقدم کیا ہے۔

مشن نے ٹویٹ کیا ’’یو این ایس ایم آئی ایل 23 اکتوبر 2020 کو ہونے والے جنگ بندی معاہدے کے تحت لیبیا عرب مسلح افواج کی طرف سے آٹھ دیگر قیدیوں کی رہائی کا خیر مقدم کرتا ہے‘‘۔

Statement by the United Nations Support Mission in Libya
More: https://t.co/tLFdhB0YzJ pic.twitter.com/b8aDewFNRh

— UNSMIL (@UNSMILibya) September 6, 2021

انہوں نے بتایا کہ ان قیدیوں کو آج مشترکہ فوجی کمیشن کی نگرانی میں سرت کے کوسٹل روڈ پر واقع گیٹ 50 پر رہا کیا گیا۔

مشن نے لیبیا میں قومی مفاہمت، امن اور استحکام کی حمایت کے لیے تمام قیدیوں کی رہائی کا بھی مطالبہ کیا۔

شیئر بازار میں تیزی کا رجحان، سینسیکس 58515.85 کی کل وقتی بلند ترین سطح کو چھونے کے بعد 58296.91 پوائنٹس پر بند ہوا۔

ممبئی: امریکہ میں شرح سود کے طویل عرصے تک کم رہنے کی توقعات میں بیرونی منڈیوں میں تیزی کے باعث سرمایہ کاروں کی مقامی خریداری کی بدولت شیئر بازار میں تیزی کا رجحان، سینسیکس 58515.85 کی کل وقتی بلند ترین سطح کو چھونے کے بعد 58296.91 پوائنٹس پر بند ہوا۔

بی ایس ای کا سینسیکس 166.96 پوائنٹس کے اضافے کے ساتھ پھر سے 58296.91 کی نئی بلندی پر پہنچ گیا۔ اسی طرح نیشنل اسٹاک ایکسچینج (این ایس ای) کا نفٹی بھی 54.20 پوائنٹس بڑھ کر ریکارڈ 17377.80 پوائنٹس پر پہنچ گیا۔

بڑی کمپنیوں کی طرح، چھوٹی اور درمیانی کمپنیوں میں بھی اضافہ درج کیا گیا۔ بی ایس ای کا مڈ کیپ 43.73 پوائنٹس کے اضافے سے 24،425.92 پوائنٹس پر اور اسمال کیپ 161.35 پوائنٹس کے اضافے سے 27466.66 پوائنٹس پر پہنچ گیا۔

بی ایس ای میں مجموعی طور پر 3495 کمپنیوں میں کاروبار ہوا۔ ان میں سے 1691 کمپنیوں میں تیزي رہی جبکہ 1627 کمپنیوں میں گراوٹ درج کی گئی۔ تاہم اس دوران 177 کمپنیوں کے حصص میں کوئی تبدیلی نہیں آئی۔

سینسیکس کے سات گروپوں میں گراوٹ رہی جبکہ 11 گروپوں کے حصص میں اضافہ ہوا۔ اس مدت کے دوران ریئلٹی گروپ کے حصص میں سب سے زیادہ 2.97 فیصد منافع کمایا گیا۔

عالمی سطح پر سعودی عرب کے خام تیل کی قیمت میں کٹوتی کی وجہ سے سرمایہ کاروں کا رخ شیئر بازار کی طرف تیز ہوا۔ اس کے ساتھ، برطانیہ کا ایف ٹی ایس ای 0.59 فیصد، جرمنی کا ڈی اے ایکس 0.58 فیصد، جاپان کا نکئی 1.83 فیصد، ہانگ کانگ کا ہینگ سینگ 1.01 فیصد اور چین کے شنگھائی کمپوزٹ میں 1.12 فیصد کا اضافہ ہوا۔

شمشاد نیوز براڈ کاسٹر نے ذبیح اللہ مجاہد کے حوالے سے کہا "افغانستان میں جنگ کا خاتمہ ہوچکا ہے، اب ہم سب مل کر ملک کی تعمیر نو کے لیے کام کریں گے”۔

کابل: افغانستان پر دوبارہ قبضہ جمانے والی تنظیم طالبان نے پیر کے روز کہا کہ افغانستان میں جنگ کا خاتمہ اب ہوچکا ہے اور توقع ہے کہ اگلے چند دنوں میں نئی ​​حکومت کے قیام کا اعلان کیا جائے گا۔

تنظیم کے ترجمان ذبیح اللہ مجاہد نے کہا کہ افغانستان میں آئندہ چند دنوں میں نئی ​​حکومت کی تشکیل کا اعلان متوقع ہے۔

شمشاد نیوز براڈ کاسٹر نے ذبیح اللہ مجاہد کے حوالے سے کہا "افغانستان میں جنگ ختم ہو چکی ہے، اب ہم سب مل کر ملک کی تعمیر نو کے لیے کام کریں گے”۔

طالبان کے ترجمان نے یقین دہانی کرائی کہ پنجشیر میں ہونے والی جھڑپوں میں کوئی شہری زخمی نہیں ہوا۔ انہوں نے کہا کہ نئی حکومت کی تشکیل کا اعلان آئندہ چند دنوں میں کیا جائے گا۔

اس سے قبل آج دن میں مسٹر ذبیح اللہ مجاہد نے کہا تھا کہ پنجشیر بالآخر ملک کا 34 واں اور طالبان کے کنٹرول میں آنے والا آخری صوبہ بن گیا ہے۔ تاہم مزاحمتی قوتوں نے اس دعوے کی تردید کی ہے۔

امریکی محکمہ خارجہ کے ترجمان نیڈ پرائس نے گنی میں فوج کے اقتدار پر قبضے کی مذمت کرتے ہوئے تمام فریقوں پر زور دیا کہ وہ تشدد کا راستہ چھوڑ کر مذاکرات کریں۔

واشنگٹن: امریکہ نے گنی کے تمام فریقوں سے اپیل کی ہے کہ وہ تشدد کا راستہ چھوڑ کر مذاکرات کریں۔

امریکی محکمہ خارجہ کے ترجمان نیڈ پرائس نے گنی میں فوج کے اقتدار پر قبضے کی مذمت کرتے ہوئے تمام فریقوں پر زور دیا کہ وہ تشدد کا راستہ چھوڑ کر مذاکرات کریں۔

انہوں نے اتوار کو ایک بیان میں کہا ’’تشدد اور کوئی بھی غیر آئینی اقدامات صرف گنی کے امن، استحکام اور خوشحالی کے امکانات کو تباہ کر دیں گے۔ یہ اقدامات امریکہ اور گنی کی دیگر بین الاقوامی پارٹنر ممالک کی مدد کرنے کی صلاحیت کو محدود کر سکتے ہیں‘‘۔

گنی کے حکام نے اتوار کو کہا کہ باغیوں نے صدارتی محل پر حملہ کیا اور صدر الفا کونڈے کو حراست میں لے لیا ہے۔

جنوبی امریکی ریاست فلوریڈا کے علاقے لیک لینڈ میں فائرنگ سے ایک نومولود سمیت چار افراد ہلاک

واشنگٹن: امریکہ کی جنوبی ریاست فلوریڈا کے علاقے لیک لینڈ میں فائرنگ سے ایک نوزائیدہ سمیت 4 افراد ہلاک ہوگئے۔

مقامی میڈیا نے اتوار کو یہ اطلاع دی۔ میڈیا رپورٹس کے مطابق اس واقعے میں ایک 11 سالہ بچی زخمی ہوئی ہے۔

پولک کاؤنٹی شیرف گریڈی جوڈ نے بتایا کہ فائرنگ علی الصبح 4:30 پر دو الگ الگ گھروں میں ہوئی۔ ان کا کہنا تھا کہ ملزم نے اس دوران پولیس کے ساتھ فائرنگ سے زخمی ہونے کے بعد ہتھیار ڈال دیے۔ انہوں نے کہا کہ واقعہ میں کوئی پولیس اہلکار زخمی نہیں ہوا ہے۔

نیپال میں مظاہرین نے مودی کے خلاف احتجاج و مظاہرہ کیا اور وزیر اعظم نریندر مودی کے پتلے جلائے۔ جس پر وزارت داخلہ نے احتجاج میں ملوث افراد کے خلاف کارروائی کی وارننگ دی۔

کاٹھمنڈو: نیپال کے کاٹھمنڈو میں ہندوستان کی سرحد پر مہاکالی ندی میں ڈوب کر ایک نیپالی شخص کی ہلاکت کی خبر کے بعد اتوار کو مظاہرین نے مودی کے خلاف احتجاج و مظاہرہ کیا اور وزیر اعظم نریندر مودی کے پتلے جلائے۔ جس پر وزارت داخلہ نے احتجاج میں ملوث افراد کے خلاف کارروائی کی وارننگ دی۔

سیتوپتی نیوز سائٹ رپورٹ نے بتایا کہ وزارت داخلہ کے جوائنٹ سکریٹری فرنیندر منی پوکھریلی کے آج جاری ایک بیان میں کہا کہ وزارت کی توجہ پڑوسی ملک کے وزیر اعظم کے خلاف نعرے بازی اور ریلیوں اور پتلے جلاکر مبذول کی جا رہی ہے۔

افسران نے ہندوستان کا نام لیے بغیر کہا کہ کسی بھی مسئلے کو سفارتی ذرائع سے حل کیا جائے گا اور پڑوسی ملک کو نشانہ بنانے والی ایسی سرگرمیوں میں ملوث افراد کے خلاف سخت کارروائی کی وارننگ دی جائے گی۔ سی پی این-یو ایم ایل طلبہ ونگ اور نئے رجسٹرڈ سی پی این (یونیفائیڈ سوشلسٹس) نے جمعہ اور ہفتہ کے روز کاٹھمنڈو میں دارچولا واقعے کے خلاف احتجاج کیا اور ہندوستان کے وزیر اعظم کا پتلا نذر آتش کیا۔

واضح رہے کہ 30 جولائی کو روپوے سے مہاکالی ندی کو پار کرنے کے دوران جے سنگھ دھامی (33) ندی میں گرنے کے بعد سے لاپتہ ہوگیا تھا۔ پولیس میں شکایت درج کرائی گئی تھی جس میں الزام لگایا گیا کہ ہندوستان کی بارڈر پولیس، ششتر سیما بل (ایس ایس بی) نے مہاکالی کو عبور کرنے کے لیے استعمال ہونے والی رسی کاٹ دی تھی۔

نیپال کی وزارت داخلہ نے واقعے کی تحقیقات کے لیے ایک کمیٹی تشکیل دی۔