نتیش کمار نے ہدایت دی ہے کہ جن لوگوں کو آدھار کارڈ کی عدم دستیابی کی وجہ سے ویکسین نہیں دی گئی ہے انہیں دوسرے شناختی کارڈ کی بنیاد پر ویکسین دی جائے۔

پٹنہ: بہار کے وزیر اعلیٰ نتیش کمار نے آج ہدایت دی ہے کہ جن لوگوں کو آدھار کارڈ کی عدم دستیابی کی وجہ سے کورونا وائرس کے لیے ویکسین نہیں دی گئی ہے انہیں دوسرے شناختی کارڈ کی بنیاد پر ویکسین دی جائے۔

ہفتہ کو یہاں ایک آنے مارگ میں واقع سنکلپ میں محکمہ صحت کی جائزہ میٹنگ کے دوران مسٹر نتیش کمار نے کہا کہ باقی لوگوں کو جلد از جلد ویکسین دی جائے۔ آدھار کارڈ کی عدم موجودگی کی وجہ سے جن کو ویکسین نہیں دی گئی ہے انہیں کسی دوسرے شناختی کارڈ کی بنیاد پر ویکسین دی جائے اور ان کا آدھار کارڈ بھی بنانا ضروری ہے۔

ویکسینیشن اور آر ٹی پی سی آر ٹیسٹ کرانے والے سرٹیفکیٹ اپنے پاس رکھیں

وزیر اعلیٰ نے کہا کہ ملک کی دوسری ریاستوں میں رہنے والے بہار کے لوگ دیوالی اور چھٹ کے تہوار کے دوران بڑی تعداد میں یہاں آتے ہیں ان سب کا کورونا ٹیسٹ کروائیں۔ اگر انہیں ابھی تک ویکسین نہیں دی گئی ہے تو یقینی طور پر انہیں بھی ویکسین دی جائے۔ یہ اطلاع دیگر ریاستوں میں رہنے والے بہار کے لوگوں کو تشہیر کے ذریعے دیں کہ اگر انہوں نے اپنا ویکسینیشن اور آر ٹی پی سی آر ٹیسٹ کرایا ہے تو سرٹیفکیٹ اپنے پاس رکھیں۔

مسٹر نتیش کمار نے بتایا کہ ریلوے اسٹیشنوں، بس اسٹینڈوں اور بین ریاستی سرحدی چیک پوائنٹس پر باہر سے آنے والوں پر خصوصی نظر رکھیں۔ ان جگہوں پر بھی کورونا کی تفتیش کے انتظامات رکھیں۔ نیپال سے ملحقہ ریاست کے سرحدی اضلاع میں بھی کورونا انفیکشن کے حوالے سے خصوصی چوکسی اختیار کریں۔ ویکسینیشن کے ساتھ ساتھ کورونا ٹیسٹنگ بھی ضروری ہے۔ کورونا ٹیسٹ کی تعداد بڑھائیں۔

مائکنگ کے ذریعہ تشہیر کرکے لوگوں میں کورونا انفیکشن کے بارے میں آگاہ کرتے رہیں

وزیر اعلیٰ نے بتایا کہ اگر باہر سے آنے والے لوگ کورونا پازیٹو پائے جاتے ہیں تو ان کا آر ٹی پی سی آر سے ٹیسٹ کرایا جائے تاکہ تصدیق کی جا سکے کہ وہ کورونا مثبت ہیں یا نہیں۔ انہوں نے کہا کہ مائکنگ کے ذریعہ تشہیر کرکے لوگوں میں کورونا انفیکشن کے بارے میں آگاہ کرتے رہیں۔

میٹنگ میں ایڈیشنل چیف سکریٹری، محکمہ صحت، پرتیا امرت نے ایک پریزنٹیشن کے ذریعے کورونا کے ساتھ ساتھ دیگر بیماریوں کے حوالے سے محکمہ کی جانب سے کئے جانے والے کام کی تازہ ترین صورتحال کے بارے میں تفصیلی اطلاعات فراہم کیں۔ انہوں نے ریاست میں کورونا انفیکشن کی صورتحال، کورونا ٹیسٹ اور ویکسینیشن کے ساتھ ساتھ بلیک فنگس، ٹی بی سمیت دیگر بیماریوں کے بارے میں اطلاع دی۔

موتیہاری ضلع میں 96 فیصد ویکسینیشن

مسٹر امرت نے بتایا کہ چھٹ کے تہوار سے پہلے کورونا ویکسینیشن مہم کو مزید تیز کیا جائے گا اور کورونا ٹیسٹوں کی تعداد میں اضافہ کیا جائے گا۔ کورونا ویکسین کی دوسری خوراک کے لیے 18، 19 اور 20 اکتوبر کو گھر گھر مہم چلائی جائے گی۔ اس دوران لوگ کورونا ویکسین کی دوسری خوراک لینے کے لیے بھی متحرک ہوں گے۔ انہوں نے موتیہاری ضلع کی ویکسینیشن کے حوالے سے عالمی ادارہ صحت (ڈبلیو ایچ او) کی جانب سے کئے گئے سروے کے بارے میں بھی آگاہ کیا۔ ڈبلیو ایچ او کے سروے میں بتایا گیا ہے کہ موتیہاری ضلع میں 96 فیصد لوگوں کو ویکسین دی گئی ہے۔

میٹنگ میں وزیر صحت منگل پانڈے، وزیر اعلی کے پرنسپل سکریٹری دیپک کمار، چیف سکریٹری تری پراری شرن، ڈویلپمنٹ کمشنر عامر سبحانی، محکمہ صحت کے ایڈیشنل چیف سکریٹری پرتیا امرت، وزیراعلی کے سیکرٹری انوپم کمار، اسٹیٹ ہیلتھ کمیٹی کے ایگزیکٹو ڈائریکٹر سنجے کمار سنگھ، ریاستی وزیر صحت مسٹر انیمیش پراسار، ہیلتھ کمیٹی کے ایڈیشنل ایگزیکٹو ڈائریکٹر اور وزیراعلی کے خصوصی ڈیوٹی پر مامور گوپال سنگھ موجود تھے۔

پٹرول کی قیمت میں روزانہ اضافے کے پیش نظر ایک شخص نے اپنی موٹر سائیکل بیچ کر گھوڑا خریدا۔

حیدرآباد: پٹرول کی قیمت میں روز بروز ہو رہے اضافہ کے پیش نظر ایک شخص نے اپنی بائیک فروخت کردی اور گھوڑا خرید لیا۔ یہ واقعہ تلنگانہ کے ضلع جوگولا مباگدوال میں پیش آیا۔

ضلع کے ملکل پلی کے رہنے والے نرسمہلو کو بائیک کے بجائے گھوڑا چلاتے ہوئے دیکھ کر تمام افراد حیرت زدہ ہوگئے۔ اس نے پٹرول کی بڑھتی قیمتوں کے پیش نظر اپنی بائیک کو فروخت کردیا اور گھوڑے کی سواری شروع کردی۔ اس گھوڑے کی پیٹھ پر سوار ہوکر وہ مختلف مقامات کو کام کے سلسلہ میں جا رہا ہے۔ اس نے دو سال پہلے کڑپہ ضلع کے پرودوٹور میں 22 ہزارروپئے میں یہ گھوڑا خریدا تھا۔

اس نے کہا کہ وہ تقریبا 50 کیلومیٹر تک اس گھوڑے پر روزانہ سفر کرتا ہے اور اس پر سفر کرنا اسے اچھا بھی لگتا ہے۔ کیونکہ اس سے اس کے پٹرول کی رقم بچ جاتی ہے۔ اس نے کہا کہ بچپن ہی سے اس کو گھوڑے پر سواری میں دلچسپی تھی اور پٹرول کی قیمت میں حالیہ دنوں کے دوران غیر معمولی اضافہ نے اس کی دلچسپی میں مزید اضافہ کردیا۔

بین الاقوامی مارکیٹ میں خام تیل کی قیمتوں میں ابال جاری رہنے کے درمیان ملک میں پٹرول اور ڈیزل کی قیمتوں میں ہفتے کے روز مسلسل تیسرے دن 35-35 پیسے فی لیٹر کا اضافہ ہوا۔

نئی دہلی: بین الاقوامی مارکیٹ میں خام تیل کی قیمتوں میں ابال جاری رہنے کے درمیان ملک میں پٹرول اور ڈیزل کی قیمتوں میں ہفتے کے روز مسلسل تیسرے دن 35-35 پیسے فی لیٹر کا اضافہ ہوا۔ دارالحکومت دہلی میں آج پٹرول 35 پیسے فی لیٹر سے بڑھ کر 105.49 روپے فی لیٹر اور ڈیزل 94.22 روپے فی لیٹر ہو گیا ہے۔

اس سے قبل پیر کو مسلسل ساتویں دن گھریلو پٹرول 30 پیسے فی لیٹر اور ڈیزل 35 پیسے فی لیٹر مہنگا ہوا۔ اس کے بعد دو دن تک سکون رہا لیکن اس کے بعد سے قیمتوں میں اضافہ کا دور شروع ہوگیا۔ اضافے کے بعد ممبئی میں پٹرول 111.43 روپے اور ڈیزل 102.15 روپے فی لیٹر ہوگیا ہے۔

مدھیہ پردیش کے دارالحکومت بھوپال میں پٹرول 114.09 روپے فی لیٹر اور ڈیزل 103.40 روپے فی لیٹر مہنگا ہو گیا ہے۔ جھارکھنڈ کے دارالحکومت رانچی میں پٹرول اور ڈیزل کی قیمتیں ایک ساتھ سنچری بنانے کی طرف بڑھ رہی ہیں۔ رانچی میں پٹرول 99.92 روپے فی لیٹر اور ڈیزل 99.44 روپے فی لیٹر تک پہنچ گیا ہے تاہم رانچی میں پٹرول اب بھی پورے ملک میں سب سے سستا ہے۔

بیشتر بڑے شہروں میں پٹرول کی قیمت 100 روپے فی لیٹر سے تجاوز

ملک کے بیشتر بڑے شہروں میں پٹرول کی قیمت 100 روپے فی لیٹر سے تجاوز کر چکی ہے اور ملک کے بیشتر بڑے شہروں میں ڈیزل بھی اب سنچری کی طرف بڑھ رہا ہے۔ کچھ شہروں میں ڈیزل 100 روپے سے تجاوز کر گیا ہے۔ اس مہینے میں اب تک ان دونوں ایندھنوں کی قیمتوں میں 16 دنوں میں سے 13 دن اضافہ ہوا ہے۔ اس ماہ اب تک پٹرول 3.85 روپے فی لیٹر اور ڈیزل 4.35 روپے فی لیٹر مہنگا ہو چکا ہے۔

بین الاقوامی مارکیٹ میں خام تیل اب بھی اونچی سطح پر برقرار ہے۔ امریکہ میں جمعہ کو ہفتے کے آخر میں خام تیل میں اضافہ ہوا۔ اس دوران برینٹ کروڈ 0.86 ڈالر کے اضافے کے ساتھ 84.86 ڈالر فی بیرل پر پہنچ گیا۔ امریکی خام تیل 1.17 ڈالر اضافے کے ساتھ 82.28 ڈالر فی بیرل ہوگیا۔

آئل مارکیٹنگ کمپنی انڈین آئل کارپوریشن کے مطابق دہلی میں پٹرول 105.49 روپے فی لیٹر اور ڈیزل 94.22 روپے فی لیٹر تک پہنچ گیا۔

پٹرول اور ڈیزل کی قیمتوں کا روزانہ جائزہ لیا جاتا ہے اور اسی بنیاد پر ہر روز صبح 6 بجے سے نئی قیمتوں کا اطلاق ہوتا ہے۔

شہر -—————   پٹرول   -—————   ڈیزل

دہلی -—————   105.49 —————— 94.22
ممبئی -————— 111.43 —————— 102.15
چنئی-—————   102.70 -—————- 98.59
کولکتہ-————— 106.10 —————— 97.33

افغانستان کے قندھار میں ایک مسجد میں نماز جمعہ کے دوران ہونے والے بم دھماکے میں درجنوں افراد کے ہلاک ہونے کی اطلاعات ہیں۔

کابل: افغانستان کے قندھار میں ایک مسجد میں نماز جمعہ کے دوران ہونے والے بم دھماکے میں درجنوں افراد کے ہلاک ہونے کی اطلاعات ہیں۔

مقامی اسپتالوں کے ذرائع کے حوالے سے خبررساں ایجنسی اسپوتنک نے بتایا کہ دھماکے میں کم از کم 25 افراد کے ہلاک ہونے کا خدشہ ہے۔

اس واقعے کے بعد ایک ویڈیو وائرل ہو رہی ہے جس میں دھماکہ کے بعد کئی لوگوں کے کپڑے برآمد ہوئے ہیں۔

زخمیوں کی تعداد 20 بتائی جا رہی ہے، حالانکہ مرنے والوں اور زخمیوں کی صحیح تعداد تفصیلی خبر سامنے آنے کے بعد ہی واضح ہو گی۔

ناروے کے کونگسبرگ میں ایک شخص نے کمان اور تیر سے متعدد حملے کئے جس کے نتیجے میں کم از کم پانچ افراد ہلاک اور دو دیگر زخمی ہو گئے۔

کوپن ہیگ: ناروے کے دارالحکومت اوسلو سے تقریبا 82 کلومیٹر دور کونگسبرگ میں ایک شخص نے کمان اور تیر سے متعدد حملے کئے جس کے نتیجے میں کم از کم پانچ افراد ہلاک اور دو دیگر زخمی ہو گئے۔

پولیس نے بدھ کی رات بتایا کہ زخمیوں میں ایک پولیس افسر بھی شامل ہے۔ دونوں زخمیوں کو اسپتال میں داخل کرادیا گیا ہے۔

پولیس سربراہ اووند اوس نے بتایا کہ مقامی وقت کے مطابق تقریباً 18:13 بجے اطلاع ملی کہ ایک شخص نے کمان اور تیر سے لوگوں پر حملہ کئے ہیں۔ انہوں نے بتایا کہ اس شخص کو مقامی وقت کے مطابق 18:40 بجے گرفتار کرلیا گیا ہے۔

شامی صوبے حمص کے پالمیرا علاقے میں اسرائیلی میزائل حملے میں ایک شامی فوجی ہلاک اور تین زخمی ہو گئے۔

دمشق: شام کے صوبہ حمص کے پالمیرا علاقے میں اسرائیلی میزائل حملے میں ایک شامی فوجی ہلاک اور تین دیگر زخمی ہو گئے۔ شامی خبر رساں ادارے سانا (سیرین عرب نیوز ایجنسی ’ایس اے این اے‘) نے اپنی رپورٹ میں یہ اطلاع دی۔

سانا نے فوجی ذرائع کے حوالے سے اطلاع دی کہ بدھ کی رات اسرائیلی جنگی طیاروں نے جنوبی شام میں مواصلاتی ٹاور اور کچھ قریب کے فوجی اڈوں کو ہدف بناتے ہوئے میزائل داغے۔

رواں ماہ شام کو نشانہ بنا کر کیا گیا یہ دوسرا اسرائیلی حملہ ہے۔ اس سے قبل 8 اکتوبر کو حمص کے دیہی علاقوں میں ٹی 4 ایئربیس کو ہدف بنا کر حملہ کیا گیا تھا۔

مرکزی وزارت داخلہ نے بی ایس ایف کے پنجاب، آسام اور مغربی بنگال میں دائرہ اختیار کو سرحد کے اندر 50 کلو میٹر تک بڑھانے اور اسے پولیس کی طرز پر ضبطی، تلاشی اور گرفتاری کا حق دینے کا فیصلہ کیا ہے۔

نئی دہلی: مرکزی وزارت داخلہ نے سرحدی علاقوں میں مختلف جرائم پر لگام لگانے کی سمت میں ایک اہم قدم اٹھاتے ہوئے بارڈر سیکیورٹی فورس (بی ایس ایف) کے پنجاب، آسام اور مغربی بنگال میں دائرہ اختیار کو سرحد کے اندر 50 کلو میٹر تک بڑھانے اور اسے پولیس کی طرز پر ضبطی، تلاشی اور گرفتاری کا حق دینے کا فیصلہ کیا ہے۔

وزارت داخلہ نے پیر کو ایک نوٹیفکیشن جاری کرکے کہا کہ بارڈر سیکیورٹی فورس اب مجرمانہ پینل کوڈ اور پاسپورٹ ایکٹ کی دفعات کے تحت آسام، مغربی بنگال اور پنجاب میں سرحد سے ملک کے اندر 50 کلو میٹر تک یہ کارروائی کرسکے گی۔ پہلے اسے سرحد سے ملک کے اندر 15 کلو میٹر تک یہ کارروائی کرنے کا حق تھا۔

اگرچہ گجرات میں اس کے اختیار کا دائرہ 80 کلو میٹر سے کم کرکے 50 کلو میٹر کیا گیا ہے۔ جبکہ راجستھان میں کسی طرح کی تبدیلی نہ کرتے ہوئے اسے 50 کلو میٹر ہی رکھا گیا ہے۔

ناگا لینڈ، میزورم، تریپورہ، منی پور اور لداخ میں بھی بی ایس ایف کو یہ حق حاصل ہے۔ اگرچہ ان علاقوں اور جموں کشمیر و لداخ میں بی ایس ایف کے اختیار کا دائرہ طے نہیں کیا گیا ہے۔ اس کے لئے وزارت داخلہ نے نوٹیفکیشن جاری کرکے بارڈر سیکیورٹی فورس ایکٹ 1968 میں ترمیم کی ہے۔

آسام میں سرکاری مدارس کو بند کرنے کے خلاف بہار مدرسہ ایجوکیشن بورڈ کے چیئرمین اور آل انڈیا اقلیتی تعلیمی بورڈ کے سربراہ عبدالقیوم انصاری کے میمورنڈم پر این سی ایم نے آسام حکومت کو اس ضمن میں نوٹس جاری کرکے جواب طلب کیا ہے۔

نئی دہلی: بہار مدرسہ ایجوکیشن بورڈ کے چیئرمین اور آل انڈیا اقلیتی تعلیمی بورڈ کے سربراہ عبدالقیوم انصاری کی آسام میں سرکاری مدارس کو بند کئے جانے کے خلاف قومی اقلیتی کمیشن (این سی ایم) کو توجہ دلانے پر این سی ایم نے آسام حکومت کو اس ضمن میں نوٹس جاری کرکے جواب طلب کیا ہے۔

اقلیتی کمیشن نے چیف سکریٹری حکومت آسام کے نام جاری نوٹس میں کہا ہے کہ آل انڈیا اقلیتی تعلیمی بورڈ کی طرف سے آسام حکومت کے سرکاری مدارس کو بند کئے جانے کے سلسلے میں میمورنڈم موصول ہوا ہے۔ اس ضمن میں این سی ایم نے حکومت آسام سے درخواست کی ہے کہ اس کی صحیح صورت حال اور اسٹیٹس رپورٹ سے قومی اقلیتی کمیشن کو واقف کرایا جائے۔ این سی ایم نے این سی ایم ایکٹ کے تحت حاصل اختیارات کے تحت یہ نوٹس جاری کیا ہے۔

مسٹر انصاری نے گزشتہ دنوں قومی اقلیتی کمیشن کے چیرمین سے ملاقات کرکے اس جانب توجہ مبذول کرائی تھی اور کہا تھا کہ یہ اقلیتوں کی تعلیم کرنے کے حق کے خلاف ہے۔ساتھ ہی کہا تھا کہ اس ضمن میں انہوں نے حکومت آسام کے فیصلے کے خلاف گوہاٹی کورٹ کا دروازہ کھٹکھٹایا ہے۔

کئی فریقوں نے حکومت آسام کے فیصلے کے خلاف عدالت کا دروازہ کھٹکھٹایا

واضح رہے کہ حکومت آسام نے تمام سرکاری مدارس کو بند کرنے کا حکم جاری کردیا تھا اور بہت سے بند بھی کئے گئے تھے۔ جس کے خلاف بہار مدرسہ ایجوکیشن بورڈ کے چیئرمین عبدالقیوم انصاری نے گوہاٹی ہائی کورٹ سے رجوع بھی کیا ہے۔ ساتھ ہی کئی فریقوں نے حکومت آسام کے فیصلے کے خلاف عدالت کا دروازہ کھٹکھٹایا ہے۔

دریں اثناء گوہاٹی ہائی کورٹ نے وہاں کے متعدد فریق کی رٹ پٹیشن پر حکومت آسام کے فیصلے پر مارچ 2022 تک کے لئے روک لگادی ہے۔

متعدد فریقوں نے 12 فروری 2021 کے حکومت آسام کے جاری کردہ نوٹیفیکشن کو گوہاٹی ہائی کورٹ میں چیلنج کیا تھا، جس میں راحت کی درخواست کی گئی تھی۔ عدالت نے تمام فریق کے وکلاء کے دلائل سننے کے بعد اس پر 31 مارچ 2021 تک کے لئے اسٹے جاری کردیا۔ عدالت نے راحت دیتے ہوئے کہا کہ آسام کے سرکاری مدارس میں مالی سال 2021-22 تک اپنی تعلیم مکمل کرسکتے ہیں۔ مالی سال یعنی 2021-22 کے امتحان اور اس کے نتائج آنے تک یہ راحت جاری رہے گی۔ امتحان کے نتائج آنے کے بعد مدرسہ بورڈ تحلیل ہوجائے گا۔

اس معاملے کی اگلی سماعت 17 نومبر کو ہوگی۔

24 گھنٹوں کے دوران ملک میں کووڈ ویکسینیشن مہم کے تحت 50.63 لاکھ سے زیادہ کووڈ ویکسینز لگائے گئے

نئی دہلی: گزشتہ 24 گھنٹوں کے دوران ملک میں کووڈ ویکسینیشن مہم کے تحت 50.63 لاکھ سے زیادہ کووڈ ویکسینز لگائے گئے جس سے کل ویکسینیشن 96.43 کروڑ سے تجاوز کر گئی ہے۔

مرکزی وزارت صحت اور خاندانی بہبود نے بدھ کے روز یہاں بتایا کہ آج صبح 7 بجے تک 50 لاکھ 63 ہزار 845 کووڈ ویکسین دی جا چکی ہیں۔ ملک میں کل ویکسینیشن 96 کروڑ 43 لاکھ 79 ہزار 212 تک جا پہنچی ہے۔

اعداد و شمار کے مطابق گزشتہ 24 گھنٹوں کے دوران 22844 کووڈ مریض شفایاب ہوئے ہیں۔ اس کے ساتھ ہی کووڈ سے شفایاب ہونے والے افراد کی تعداد تین کروڑ 33 لاکھ 42 ہزار 901 ہو گئی ہے اور یہ شرح 98.06 فیصد ہے۔

گزشتہ 24 گھنٹوں میں کووڈ کے 15823 نئے کیسز رپورٹ ہوئے۔ اس وقت ملک میں دو لاکھ سات ہزار 653 کووڈ مریضوں کا علاج کیا جا رہا ہے اور یہ شرح 0.61 فیصد ہے۔ گزشتہ 24 گھنٹوں میں مجموعی طور پر 13 لاکھ 25 ہزار 399 کووڈ ٹسٹ کیے گئے۔ اب تک ملک میں مجموعی طور پر 58 کروڑ 63 لاکھ 63 ہزار 442 کووڈ ٹسٹ ہو چکے ہیں۔