ہماچل پردیش میں ریاستی حکومت نے کورونا پابندیوں کو 31 جنوری تک بڑھا دیا ہے

شملہ: ہماچل پردیش میں کورونا کے پھیلاؤ کو دیکھتے ہوئے ریاستی حکومت نے اس بابت عائد پابندیوں کو 31 جنوری تک بڑھا دیا ہے۔

پابندیوں کے تحت ریاست میں تعلیمی ادارے اب 31 جنوری تک بند رہیں گے۔ اسی طرح جو پابندیاں 14 جنوری سے 26 جنوری تک نافذ کی گئی تھیں اب 31 جنوری تک نافذ رہیں گی۔

حکومت نے 25 جنوری کو ریاستی یوم تاسیس اور 26 جنوری کو یوم جمہوریہ کی تقریبات کے انعقاد سے متعلق رہنما خطوط بھی جاری کیے ہیں۔ ان تقریبات میں صرف 50 فیصد افراد ہی شرکت کر سکیں گے۔

اس سلسلے میں ریاستی اعلیٰ سطحی کمیٹی نے تمام ضلع ڈپٹی کمشنروں اور انتظامیہ کو ہدایات جاری کی ہیں۔ ان ہدایات میں کورونا کے حوالے سے جاری ہدایات پر سختی سے عمل کرنے کو کہا گیا ہے۔

اس دوران سرکاری دفاتر میں ملازمین کی حاضری صرف 50 فیصد رہے گی۔ ہفتہ اور اتوار کو چھٹی ہوگی۔ شادیوں اور دیگر سماجی، مذہبی، سیاسی، کھیل، تعلیمی اور ثقافتی سرگرمیوں میں ہال کے اندر گنجائش کا صرف 50 فیصد یا کھلے میں زیادہ سے زیادہ 100 اور 300 افراد شرکت کر سکتے ہیں۔ تعلیمی اداروں میں آن لائن پڑھائی جاری رہے گی۔ ان پابندیوں کا اطلاق صحت، پولیس، فائر برگیڈ، محکمہ جل شکتی، محکمہ بجلی، بینک، ٹریزری سے متعلق ملازمین پر نہیں ہوگا۔

ریاست میں سیاسی، کھیل، تعلیمی اور ثقافتی تقریبات کے لیے متعلقہ ایس ڈی ایم سے اجازت لینی ہوگی۔ ضلع کے ڈپٹی کمشنر اور پولیس کو کورونا قوانین پر عمل کرنے کی ذمہ داری دی گئی ہے۔ دکانوں کے کھلنے اور بند ہونے کے اوقات مقرر کیے جائیں گے۔ کورونا کے پھیلاؤ کو روکنے کے لیے متعلقہ اضلاع کے ڈپٹی کمشنر، دکانیں کھولنے اور بند کرنے کے لیے بھیڑ کم کرنے کے حوالے سے وقت کا تعین کریں گے۔

کورونا بحران کے دوران غریبوں کو سب سے زیادہ نقصان پہنچا ہے اور اس عرصے میں ان کی آمدنی میں 53 فیصد کمی آگئی ہے، جبکہ امیروں کی آمدنی میں کئی گنا اضافہ ہوا ہے۔

نئی دہلی: کانگریس کے سابق صدر راہل گاندھی نے کہا ہے کہ کورونا وائرس کی عالمی وبا کے دور میں حکومت کی پالیسیوں کی وجہ سے غریب اور امیر کے درمیان فاصلہ بڑھ گیا ہے۔ اور اس دوران جو بھی قدم اٹھائے گئے ان کا فائدہ صرف مودی حکومت کے چند پسندیدہ سرمایہ داروں کو حاصل ہوا ہے۔

کانگریس لیڈر نے کہا کہ کورونا بحران کے دوران غریبوں کو سب سے زیادہ نقصان پہنچا ہے اور اس عرصے میں ان کی آمدنی میں 53 فیصد کمی آگئی ہے، جبکہ امیروں کی آمدنی میں کئی گنا اضافہ ہوا ہے۔

مسٹر راہل گاندھی نے ٹویٹ کیا "پورا ملک کووڈ کے بحران سے دوچار ہوا ہے لیکن غریب اور متوسط ​​طبقہ کو مودی حکومت کی ‘اقتصادی وبا’ کا بھی شکار ہونا پڑاہے۔ امیر اور غریب کے درمیان بڑھتی ہوئی خلیج کو بڑھانے کا سہرا مرکزی حکومت کو جاتا ہے”۔

اس کے ساتھ ہی ایک اخبار میں شائع ہونے والے اعداد و شمار پیش کرتے ہوئے انہوں نے کہا کہ انتہائی غریب، متوسط ​​طبقے اور اعلیٰ متوسط ​​طبقہ کی آمدنی میں 20 فیصد کمی ہوئی ہے جبکہ امیر ترین لوگوں کی آمدنی میں 20 فیصد اضافہ ہوا ہے۔

تلنگانہ کے ایک کسان نے ریاستی وزیر انفارمیشن ٹکنالوجی کے تارک راما راو کو مکتوب روانہ کرتے ہوئے مرنے کی اجازت دینے کی خواہش کی ہے۔

حیدرآباد: تلنگانہ کے ایک کسان نے ریاستی وزیر انفارمیشن ٹکنالوجی کے تارک راما راو کو مکتوب روانہ کرتے ہوئے مرنے کی اجازت دینے کی خواہش کی ہے۔ ضلع نلگنڈہ کے کنگل منڈل کے ایڈاپلی دیہات کے رہنے والے اس نوجوان کسان کی شناخت سی سرینو کے طور پر کی گئی ہے۔

اس نے ریاستی وزیر کے ساتھ ساتھ ضلع کلکٹر پی جے پاٹل کو بھی ٹوئیٹ کے ذریعہ پوسٹ کردہ اس خط میں لکھا ہے کہ وراثت میں ملی اراضی پر وہ کاشت کررہا تھا تاہم پلے پراکُرتی ونم (جنگلات میں اضافہ) کے پروگرام کے حصہ کے طور پر اس کی اراضی 1999 میں حاصل کرلی گئی تھی تاہم متبادل اراضی نہیں دی گئی۔

اس نے کہا کہ اس مسئلہ پر کئی مرتبہ ضلع کلکٹر، تحصیلدار اور متعلقہ رکن اسمبلی سے رابطہ کرچکا ہے اور اس مسئلہ کو بیان کیا گیا تاہم اس کے ساتھ انصاف نہیں کیاگیا۔ اس نے وزیر تارک راما راو سے اس سلسلہ میں مدد کی خواہش کی۔ اس نے کہا کہ صورتحال اس کے لئے خراب ہوگئی ہے اور وہ سڑک پر آگیا ہے۔ اسی لئے اس کو مرنے کی اجازت دی جائے۔

اس نے اس ٹوئیٹ کے سلسلہ میں تلنگانہ کانگریس کے سربراہ ریونت ریڈی، رکن پارلیمنٹ کومٹ ریڈی، ریاستی بی جے پی سربراہ بنڈی سنجے، وزیر بجلی جگدیش ریڈی اور دیگر کو بھی ٹیگ کیا۔

عائشہ ملک نے پاکستان کے سپریم کورٹ کی پہلی خاتون جج کے طور پر حلف لیا

اسلام آباد: جسٹس عائشہ ملک نے پیر کو پاکستان کے سپریم کورٹ کی پہلی خاتون جج کے طور پر حلف لیا۔

جیو ٹی وی نے اپنی رپورٹ میں بتایا کہ پاکستان کے چیف جسٹس گلزار احمد نے جسٹس عائشہ کو حلف دلایا۔ اس موقع پر پاکستان کے اگلے چیف جسٹس کے طور پر نامزد جسٹس عمر عطا بندیال اور سپریم کورٹ کے دیگر جج بھی موجود تھے۔
جسٹس عائشہ اس عہدے کے لئے 21 جنوری کو باضابطہ طور پر منتخب ہوئی تھیں۔

جیو ٹی وی کی رپورٹ کے مطابق جسٹس عائشہ کا سپریم کورٹ کے جج کے طور پر تعینات ہونا آسان نہیں تھا، کیونکہ ملک بھر کے وکیلوں نے سینئر کو بنیاد بناکر ان کی تعیناتی کی مخالفت کی تھی۔ جسٹس سینئرٹی میں لاہور ہائی کورٹ میں چوتھے مقام پر تھیں۔

اس دوران، پاکستان کے بار ایسوسی ایشن نے سپریم کورٹ کی جج کے طور پر محترمہ عائشہ کی تقرری کے خلاف ہڑتال کی اپیل کی ہے۔

میڈیا رپورٹس کے مطابق سعودی اتحادی فورسز نے یمن کے شہر صعدہ کی جیل پر بمباری کی جس میں کم از کم سو قیدیوں کی ہلاکت کی رپورٹس سامنے آئی ہیں

نیویارک: یمن کی جیل پر فضائی حملے کی اقوام متحدہ نے سعودی اتحادی فورسز کے تحقیقات کا مطالبہ کیا ہے۔

میڈیا رپورٹس کے مطابق گزشتہ روز سعودی اتحادی فورسز نے شمالی یمن کی ایک جیل پر فضائی حملے کیے تھے جس کے نتیجے میں تقریباً سو افراد کی ہلاکت کی تصدیق کی گئی ہے۔

میڈیا رپورٹس میں بتایا گیا ہے کہ متحدہ عرب امارات پر مشتبہ ڈرون حملے اور سعودی شہروں پر بھی میزائل اور ڈرون حملوں کے بعد سعودی عرب کی سربراہی میں اتحادی فورسز نے یمن کے حوثیوں پر حملوں میں اضافہ کیا ہے۔

میڈیا رپورٹس کے مطابق سعودی اتحادی افواج نے یمن کے شہر صعدہ کی جیل پر بمباری کی جس میں کم از کم سو قیدیوں کی ہلاکت کی رپورٹس سامنے آئی ہیں۔ جبکہ متعدد قیدی شدید زخمی ہیں جس کے باعث ہلاکتوں میں اضافے کا بھی خدشہ ہے۔

میڈیا رپورٹس میں بتایا گیا ہے کہ فورسز کے حملوں کے نتیجے میں صعدہ کے اسپتال میں 138 زخمیوں کو لایا گیا جبکہ دیگر شہروں کے اسپتالوں میں بھی زخمیوں کو پہنچائے جانے کی اطلاعات ہیں۔

دوسری جانب اقوام متحدہ کے سکریٹری جنرل نے سعودی اتحادی فورسز کے اس حملے کی مذمت کرتے ہوئے تحقیقات کا مطالبہ کیا ہے۔

سکریٹری جنرل نے کہا کہ انصاف کو یقینی بنانے کے لیے ضروری ہے کہ فوری طور پر مؤثر اور شفاف تحقیقات کی جائیں۔

بین الاقوامی تنظیم ریڈ کراس کے ترجمان کا کہنا ہے کہ صعدہ کی جس جیل پر حملہ کیا گیا اس میں مہاجرین کی بھی بڑی تعداد موجود ہوتی ہے، اس حملے کے نتیجے میں 100 سے زائد ہلاکتیں ہوئی ہیں اور ملبہ سے مزید لاشیں نکالی جا رہی ہیں۔

اویسی نے لکھنؤ میں جن ادھیکاری پارٹی لیڈر بابو سنگھ کشواہا اور پریورتن مورچہ کے وامن میشرام کی موجودگی میں ’بھاگیہ داری پریورتن مورچہ‘ کی تشکیل کا اعلان کیا۔ 

لکھنؤ: ملک کی کثیر الآبادی والے صوبہ اترپردیش میں اسمبلی انتخابات کا بگل بجنے کے ساتھ ہی سیاسی پارٹیوں کے درمیان پری۔الیکشن اتحاد کا سلسلہ جاری ہے۔ اسی کڑی میں ہفتہ کو آل انڈیا مجلس اتحاد المسلمن (اے آئی ایم آئی ایم) سربراہ اسد الدین اویسی نے سابق بی ایس پی لیڈر بابو سنگھ کشواہا کی قیادت میں’بھاگیہ داری پریورتن مورچہ‘ کی تشکیل کا اعلان کیا ہے۔

ہفتہ کو اویسی نے لکھنؤ میں جن ادھیکاری پارٹی لیڈر بابو سنگھ کشواہا اور پریورتن مورچہ کے وامن میشرام کی موجودگی میں ’بھاگیہ داری پریورتن مورچہ‘ کی تشکیل کا اعلان کیا۔ اس موقع پر مورچہ میں شامل جنتا کرانتی پارٹی اور بہوجن مکتی پارٹی کے لیڈر بھی موجود تھے۔

اسد الدین اویسی نے مورچہ کی تشکیل کے اعلان کرنے کے بعد میڈیا نمائندوں سے خطاب میں کہا کہ مورچہ میں کل پانچ پارٹیاں شامل ہیں جس کے کنوینر جن ادھیکاری پارٹی کے صدر بابو سنگھ کشواہا ہوں گے۔

انہوں نے کہا کہ انتخابات کے بعد اگر عوام مورچے کو اقتدار سونپتے ہیں تو مورچے کی جانب سے دو وزیر اعلی ہوں گے جن میں سے ایک او بی سی سماج سے ہوگا اور دوسرا دلت سماج کی نمائندگی کرے گا۔

مورچہ کی قیادت والی حکومت کے تین نائب وزرائے اعلی ہوں گے

انہوں نے کہا کہ ساتھ ہی مورچہ کی قیادت والی حکومت کے تین نائب وزرائے اعلی ہوں گے جن میں سے ایک مسلمان ہوگا۔ یہ پوچھے جانے پر کہ مسلم وزیر اعلی کی بات کرنے والے اویسی کے مورچہ میں مسلم وزیر اعلی کیوں نہیں ہوگا، پر اویسی نے کہا کہ ہم نے نائب وزیر اعلی اور تعداد کی بنیاد پر شراکت داری کی بات کہی ہے اور اب بھی اسی پر قائم ہیں۔

وہیں سابق بی ایس پی لیڈر و بھاگیہ داری پریورتن مورچہ کے کنوینر بابو سنگھ کشواہا نے کہا کہ مورچہ کا وہی نظریہ ہے جو آئین کی چاہت اور اس کی منشی ہے۔ ہمارا پہلا نعرہ ہے کہ ’جس کی جتنی بھاگیہ داری اس کی اتنی حصہ داری‘ ہم ذات پر مبنی مردم شماری کے حامی ہیں اور حکومت بننے پر پرانی پنشن اسکیم کی بحالی کے ساتھ بہن بیٹیوں کو سیکیورٹی اور اقلیتوں کو وظائف فراہم کئے جائیں گے۔

مورچے کا دروازہ دیگر پارٹیوں کے لئے بھی کھلا ہے

پریورتن مورچہ کے وامن میشرام نے اتحاد کو دیگر پارٹیوں کے لئے کھلا ہونے کی بات کہتے ہوئے دعوی کیا کہ اس اتحاد کے اعلان کے بعد الیکشن میں جو لڑائی بی جے پی اور سماج وادی پارٹی کے درمیان تھی وہ لڑائی اب بی جے پی اور اس مورچے کے درمیان ہوگئی اور سماج وادی پارٹی تیسرے نمبر پر چلی گئی ہے۔انہوں نے کہا ابھی مزید پارٹیوں سے بات چیت جاری ہے۔ مورچے کا دروازہ بند نہیں ہوا ہے۔

ملحوظ رہے کہ 403 اسمبلی نششتوں والے یوپی میں 58 سیٹوں پر نامزدگی کی آخری تاریخ ختم ہوچکی ہے اب یہ مورچہ بقیہ 348 سیٹوں پر اپنے امیدوار اتارے گا۔ اسد الدین اویسی کی ایم آئی ایم مرحلے کی متعدد سیٹوں سمیت 27 امیدواروں کے ناموں کا اعلان پہلے ہی کرچکی ہے۔

دلچسپ ہے کہ بی جے پی اور ایس پی سے اتحاد نہ ہونے کے بعد اسدالدین اویسی کی ایم آئی ایم و دیگر چھوٹی پارٹیوں سے اتحاد کا اعلان کرنے والے بابو سنگھ کشواہا کا تعلق او بی سی سماج سے ہے۔ ایک محتاط اندازے کے مطابق یوپی میں موریہ، کشواہا اور شاکیہ 6 فیصدی کے ساتھ او بی سی کی تیسری بڑی ذات ہیں۔

مانا جاتا ہے کہ بابو سنگھ کشواہا کا ان ذاتیوں میں کافی مقبولیت ہے۔ وہیں اویسی مسلموں اور بامسیف و بہوجن مکتی پارٹی دلت سماج کو ووٹروں کو اپنی جانب مائل کرنے کے لئے کوشاں ہیں۔

جنوبی ممبئی کے گنجان آباد تاردیو علاقے میں آج صبح بیسویں منزل پر آگ لگنے سے افراتفری مچ گئی اور سات افراد ہلاک

ممبئی: جنوبی ممبئی کی گنجان آبادی والے علاقے تاردیو میں آج صبح بیسویں منزل پر لگی آگ کے نیتجے میں افراتفری مچ گئی ہے اور سات لوگوں کی موت کی اطلاع ہے جبکہ متعدد دھویں سے دم گھٹنے سے بیمار ہوگئے ہیں۔ راحتی کام زور و شور سے جاری ہے۔ کملا نامی عمارت مشہور بھاٹیہ اسپتال سے متصل ہے۔

فائربریگیٹڈ کے مطابق آگ عمارت کی 18 ویں منزل پر لگی ہے۔ متعدد افراد کو بحفاظت عمارت سے نکالا جاچکا ہے۔

فائربریگیڈ اسٹیشن نانا چوک پر واقع ہے، اس لیے فائر انجن اور عملہ فوری طور پر جائے حادثہ پر پہنچ گئے۔ آگ کے شعلے کئی کلومیٹر کے فاصلے سے نظر آرہے ہیں اور دھواں اٹھ رہا ہے۔ اب تک عملہ لوگوں کو بچانے میں مصروف ہے۔آگ بھجا نے لیے لیویٹر وین کو بائیکلہ سے طلب کرلیا ہے کیونکہ عمارت میں جانا خطرے سے خالی نہیں ہے۔

نمائندے نے جائے حادثہ پر دیکھا کہ ڈی جے دادا جی روڈ ایک مصروف ترین شاہراہ ہے اور حاجی علی درگاہ تا چوپاٹی ۔اوپیرا ہاوس کو جوڑتی ہے۔ احتیاطا موٹر گاڑیوں کی آمد بند کردی گئی ہے۔ یہ علاقہ مشہور ممبئی سینٹرل اسٹیشن سے نزدیک ہے اور یہ ایک تجارتی علاقہ ہے۔