یوکرین کے صدر ولادیمیر زیلنسکی نے ویٹیکن سٹی کے پوپ فرانسس کو روسی فوجی کارروائی کے دوران ملک میں انسانی بحران کے بارے میں آگاہ کیا

کیف: یوکرین کے صدر ولادیمیر زیلنسکی نے منگل کو ویٹیکن سٹی کے پوپ فرانسس کو ملک میں روسی فوجی کارروائی کے درمیان انسانی بحران سے آگاہ کیا۔

مسٹر زیلنسکی نے ایک ٹویٹ میں کہا، ’پوپ فرانسس سے بات کی۔ روسی فوجیوں کی طرف سے انسانی راہداریوں کی ناکہ بندی اور اس سے پیدا ہونے والی مشکل انسانی صورتحال کے بارے میں پوپ کو مطلع کیا‘۔

Talked to @Pontifex. Told His Holiness about the difficult humanitarian situation and the blocking of rescue corridors by Russian troops. The mediating role of the Holy See in ending human suffering would be appreciated. Thanked for the prayers for Ukraine and peace. pic.twitter.com/wj4hmrTRGd

— Володимир Зеленський (@ZelenskyyUa) March 22, 2022

انہوں نے کہا کہ انسانی مصائب کے خاتمے میں پوپ کے ثالثی کے کردار کو سراہا جائے گا۔ انہوں نے کہا، ’یوکرین اور امن کی دعا کرنے کے لیے شکریہ‘۔

قبل ازیں کیف کے میئر ویٹالی کلِٹسکو نے پوپ کو ایک خط لکھ کر یوکرین کے دارالحکومت آنے کی درخواست کی تھی۔

انہوں نے لکھا تھا، ’پوپ کا کیف میں رہنے سے زندگی کو بچانے اور ہمارے شہر، ملک اور اس سے باہر امن بحال کرنے میں اہم کردار ثابت ہوگا‘۔

سی این این نے اطلاع دی ہے کہ میئر نے پوپ کو مشورہ دیا کہ اگر وہ یوکرین میں ذاتی طور پر پیش نہیں ہوسکتے تو صدر زیلنسکی کے ساتھ مشترکہ ویڈیو کانفرنس کرلیں۔

سی این این کے مطابق پوپ نے جنگ کے خاتمے کی اپیل کی اور انہوں نے ثالثی کی پیشکش بھی کی۔

زبردست خریداری کی بدولت اسٹاک مارکیٹ میں تیزی رہی، جس سے سینسیکس 1.22 فیصد اور نفٹی 1.16 فیصد کا اضافہ درج کرنے میں کامیاب رہے

ممبئی: عالمی سطح پر ملنے والے مثبت اشاروں کے ساتھ ہی، گھریلو سطح پر توانائی، تیل و گیس، آئی ٹی، ٹیک اور بینکنگ جیسے گروپوں میں زبردست خریداری کی بدولت اسٹاک مارکیٹ میں تیزی رہی، جس سے سینسیکس 1.22 فیصد اور نفٹی 1.16 فیصد کا اضافہ درج کرنے میں کامیاب رہے۔

بی ایس ای کا حساس انڈیکس سینسیکس 696.81 پوائنٹس بڑھ کر 57989.30 پوائنٹس کی سطح پر اور نیشنل اسٹاک ایکسچینج (این ایس ای) کا نفٹی 197.90 پوائنٹس کے اضافے سے 17315.50 پوائنٹس کی سطح پر بند ہوا۔ بڑی کمپنیوں کے مقابلے میں چھوٹی اور درمیانی کمپنیوں میں خریداری سست رہی، جس کی وجہ سے بی ایس ای مڈ کیپ صرف 0.17 فیصد بڑھ کر 23701.38 پوائنٹس کی سطح پر اورا سمال کیپ 0.15 فیصد بڑھ کر 27852.64 پوائنٹس کی سطح پر پہنچ گیا۔

بی ایس ای کی کل 3513 کمپنیوں میں کاروبار ہوا، جن میں سے 1780 سرخ نشان میں رہیں اور 1629 سبز نشان میں پہنچ سکیں۔ 104 میں کوئی تبدیلی نہیں ہوئی۔

عالمی سطح پر، زیادہ تر بڑے انڈیکس میں تیزي کا رجحان درج کیا گیا، جن میں ہانگ کانگ کا ہینگ سینگ 3.15 فیصد، جاپان کا نکئی 1.48 فیصد، جرمنی کا ڈی ایکس 0.86 فیصد، برطانیہ کا ایف ٹی ایس ای 0.55 فیصد اور چین کے شنگھائی کمپوزٹ میں 0.19 فیصد کا اضافہ شامل ہے۔

آر جے ڈی سپریمو لالو پرساد یادو کی طبیعت پھر سے بگڑ گئی ہے، میڈیکل بورڈ کی سفارش کے بعد لالو پرساد کو دہلی ایمس لے جانے کی تیاری کی جارہی ہے

رانچی: جھارکھنڈ میں چارہ گھوٹالہ کے ڈورنڈا خزانے سے غیر قانونی نکاسی معاملے میں سزا یافتہ آر جے ڈی سپریمو لالو پرساد یادو کی طبیعت پھر سے بگڑ گئی ہے۔

ان کا کریٹنین لیلول 4.1 سے بڑھ کر 4.6 ہوگیا ہے۔ میڈیکل بورڈ کی میٹنگ طلب کی گئی۔ اس میٹنگ میں تمام ماہر ڈاکٹروں نے مسٹر پرساد کی موجودہ صحت کو دیکھتے ہوئے انہیں ہایئر سینٹر (ایمس دہلی) ریفر کرنے کی سفارش جیل انتظامیہ سے کی ہے۔ ریمس کے پیئنگ وارڈ میں زیر علاج مسٹر پرساد کی طبیعت بگڑنے کے بعد ڈاکٹروں کی ٹیم کے ہیڈ ڈاکٹر ودیا پتی کی صدارت میں منگل کو میڈیکل بورڈ کی میٹنگ ہوئی۔

بعد میں نامہ نگاروں سے بات چیت میں ڈاکٹر ودیاپتی نے بتایا کہ لالو پرساد ڈائبٹیز، بلڈ پریشر، امراض قلب، کڈنی مرض، کڈنی اسٹون، تھیلی سیمیا، پروسٹیٹ کا بڑھنا، یوریک ایسیڈ کا بڑھنا، برین سے منسلک بیماری، کمزور ایمیونیٹی ، دائیں کندھے کی ہڈی کا مسئلہ، آنکھوں سے کم نظر آنا سمیت متعدد بیماریوں میں مبتلا ہیں۔ میڈیکل بورڈ کی سفارش کے بعد لالو پرساد کو دہلی ایمس لے جانے کی تیاری کی جارہی ہے۔

چارہ گھوٹالے کے دوسرے سزا یافتہ آر کے رانا کی کی بھی طبیعت خراب ہوگئی ہے۔ آر کے رانا کے پیٹ اور لیور میں پانی بھر گیا ہے۔ اس وجہ سے انہیں آکسیجن کی کمی ہو رہی ہے اور فی الحال انہیں وینٹی لیٹر پر رکھا گیا ہے۔ ڈاکٹروں کے مطابق آر کے رانا کی حالت ایسی ہے، جیسے وینٹی لیٹر پر ملٹی آرگن فیلیئر سسٹم والے مریض کو رکھا جاتاہے۔ ڈاکٹروں نے انہیں بھی ہایئر سینٹر ریفر کیا ہے۔ اور ایئر ایمبولینس کے ذریعہ انہیں دہلی لے جانے کا نظم کیا جا رہا ہے۔

پٹرول اور ڈیزل کی قیمتوں میں اضافے پر ایوان بالا میں ہنگامہ، ایوان کی کارروائی 12 بجے تک ملتوی

نئی دہلی: ایوان بالا راجیہ سبھا میں پٹرول اور ڈیزل کی قیمتوں میں اضافے کو لے کر اپوزیشن نے منگل کو ہنگامہ کیا جس کی وجہ سے ایوان کی کارروائی 12 بجے تک کیلئے ملتوی کر دی گئی۔

چیئرمین ایم ونکیا نائیڈو نے ضروری دستاویزات ایوان کی میز پر رکھنے کے بعد کہا کہ انہیں ضابطہ 267 کے تحت متعدد ارکان کے نوٹس موصول ہوئے ہیں جنہیں خارج کردیا گیا ہے۔

اس کے بعد جب انہوں نے وقفہ صفر شروع کرنے کی کوشش کی تو ڈولا سین، سشمیتا دیو اور ترنمول کانگریس کے دیگر ارکان نعرے لگاتے ہوئے چیئرپرسن کے پوڈیم کے سامنے آ گئے۔ ان کی حمایت میں کانگریس، سماج وادی پارٹی اور بائیں بازو کی جماعتوں کے ارکان اپنی اپنی نشستوں پر کھڑے ہوگئے اور زور زور سے بولنا شروع کردیا۔ ترنمول کانگریس کے ارکان نے ہاتھوں میں پلے کارڈ اٹھا رکھے تھے۔

مسٹر نائیڈو نے ارکان سے اپیل کی کہ وہ اپنی نشستوں پر واپس جائیں اور پرسکون ہوجائیں، لیکن اس کا ارکان پر کوئی اثر نہیں ہوا۔ اس کے بعد انہوں نے ایوان کی کارروائی دوپہر 12 بجے تک ملتوی کر دی۔

عالمی بازار کے مثبت اشارے کے باوجود، کاروباری ہفتے کے پہلے دن شیئر بازار کی گذشتہ دو دن کی تیزی پر بریک لگ گیا

ممبئی: عالمی بازار کے مثبت اشارے کے باوجود، ایس بی آئی، ایل ٹی، ایچ ڈی ایف سی، ریلائنس، آئی ٹی سی اور ٹاٹا اسٹیل جیسی بڑی کمپنیوں میں فروخت کی وجہ سے پیر کو کاروباری ہفتے کے پہلے دن شیئر بازار کی گذشتہ دو دن کی تیزی پر بریک لگ گیا۔

بی ایس ای کا تیس شیئر والا کا سینسری انڈیکس سینسیکس 571.44 پوائنٹس کم ہو کر 57292.49 پوائنٹس اور نیشنل اسٹاک ایکسچینج (این ایس ای) کا نفٹی 169.45 پوائنٹس کم ہو کر 17117.60 پوائنٹس پر آگیا۔ بڑی کمپنیوں کی طرح بی ایس ای کی درمیانی کمپنیوں میں بھی فروخت ہوئی لیکن چھوٹی کمپنیوں کی طرف سرمایہ کاروں کی سرمایہ کاری کا نظریہ مضبوط ہوا۔ اس دوران مِڈ کیپ 162.82 پوائنٹس کم ہو کر 23661.79 پر آگیا، جبکہ اسمال کیپ 104.74 پوائنٹس کے اضافے سے 27811.06 پر آگیا۔

بی ایس ای کے 16 گروپ حصص فروخت کے دباؤ میں گر گئے۔ اس دوران سی ڈی جی ایس 0.87، ایف ایم سی جی 1.46، فائنانس 1.13، انڈسٹریز 0.64، آئی ٹی 0.58، ٹیلی کام 0.58، یوٹیلٹیز 1.89، آٹو 0.99، بینکنگ 1.30، کیپٹل گڈس 1.12، تیل اور گیس 0.88، ریئلٹی 0.68، ٹیک 0.77 اورپاور کے گروپ کے شیئر 1.81 فیصد اتر گئے۔

عالمی بازار میں تیزی کا رجحان رہا۔ اس دوران برطانیہ کے ایف ٹی ایس ای 0.71، جرمنی کے ڈی اے ایکس 0.05، جاپان کی نکئی 0.65 اور چین کے شنگھائی کمپوزٹ میں 0.08 فیصد اضافہ ہوا جبکہ ہانگ کانگ کا ہینگ سینگ 0.89 فیصد گر گیا۔

سپریم کورٹ نے 4 مارچ کو مرکزی حکومت سے کہا تھا کہ وہ یوکرین میں پھنسے شہریوں کے خدشات پر غور کرے، مرکز نے سپریم کورٹ کو بتایا، یوکرین سے واپس لائے گئے طلباء کے مستقبل کی تعلیم جاری رکھنے کے متبادل پر غور کر رہی ہے

نئی دہلی: مرکزی حکومت نے پیر کے روز سپریم کورٹ کو بتایا کہ وہ جنگ زدہ یوکرین سے ’آپریشن گنگا‘ کے تحت واپس لائے گئے تقریباً 22,500 میڈیکل طلباء کے مستقبل کی تعلیم جاری رکھنے کے متبادل پر غور کر رہی ہے۔

چیف جسٹس این وی رمنا کی سربراہی میں تین رکنی بینچ نے مرکزی حکومت کی طرف سے پیش ہونے والے اٹارنی جنرل کے کے وینوگوپال اوردیگر فریقین کے دلائل سننے کے بعد یوکرین سے طلباء کو وطن واپس لانے اور ان کی مستقبل کی تعلیم کے سلسلے میں ظاہر کردہ خدشات سے متعلق دو عرضیوں کو نمٹا دیا۔

مسٹر وینوگوپال نے بینچ کو بتایا کہ حکومت نے 22,500 طلباء کو واپس لانے کا ایک بہت بڑا کام مکمل کرلیا ہے اور اب وہ ان کے مستقبل کی تعلیم سے متعلق خدشات کو دور کرنے کی کوشش پر غور کر رہی ہے۔

عرضی گزار وکیل وشال تیواری نے بینچ کے رو برو استدعا کی تھی کہ طلباء کی تعلیم میں رکاوٹ نہیں ہونی چاہئے اور انہیں یہاں تعلیم جاری رکھنے کی اجازت دی جاسکتی ہے۔

مسٹر تیواری کے علاوہ یوکرین کے اوڈیسا میں نیشنل میڈیکل یونیورسٹی کی طالبہ فاطمہ آہانہ نے یوکرین سے ہندوستانی طلباء کو نکالنے کے لیے مرکزی حکومت کو ضروری ہدایات جاری کرنے کے لیے سپریم کورٹ سے رجوع کیا تھا۔

سپریم کورٹ نے 4 مارچ کو مرکزی حکومت سے کہا تھا کہ وہ یوکرین میں پھنسے شہریوں کے خدشات پر غور کرے۔ مرکزی حکومت نے یوکرین کی مختلف یونیورسٹیوں سے طلباء کو واپس لانے کے لیے ’آپریشن گنگا‘ شروع کیا تھا۔

وزارت خارجہ نے پہلے کہا تھا کہ یوکرین اور پڑوسی ممالک پولینڈ، جمہوریہ سلواکیہ، ہنگری، رومانیہ اور مالڈووا میں سفارت خانے کے افسروں نے 26 فروری کو شروع کئے گئے ’آپریشن گنگا‘ کے تحت ہندوستانی شہریوں کو نکالنے میں روسی زبان بولنے والے افسروں کے ساتھ کوششیں کی تھیں۔

وزیر دفاع راج ناتھ سنگھ نے بھرتی کے معاملے میں پوچھے گئے سوال کے جواب میں مداخلت کرتے ہوئے کہا کہ ہر سال فورسز کی طرف سے 90 سے 100 بھرتی ریلیوں کا نظم کیا جاتا ہے۔

نئی دہلی: حکومت نے آج کہا کہ کووڈ کی وجہ سے لگائی گئی پابندیوں کی وجہ سے سال 2020 اور 2021 میں مسلح فوج میں بھرتی کا عمل متاثر ہوا ہے۔

وزیر مملکت برائے دفاع اجے بھٹ نے پیر کو راجیہ سبھا میں وقفہ سوالات کے دوران کہا کہ گزشتہ دو سالوں میں کووڈ کی پابندیوں کی وجہ سے بھرتی ریلیوں کا انعقاد متاثر ہوا ہے۔ انہوں نے کہا کہ امیدواروں کی ایک بڑی تعداد بھرتی ریلیوں میں حصہ لیتی ہے اس لیے کووڈ کی وجہ سے پچھلے سالوں کی طرح ان کا انعقاد نہیں کیا جا سکا۔ انہوں نے کہا کہ اگرچہ ایئر فورس اور نیوی میں آن لائن بھرتی کا عمل جاری ہے اور بڑی تعداد میں افسران کو بھرتی کیا گیا ہے۔

جب ان سے مسلح افواج میں خواتین کے جنگی کردار کے بارے میں پوچھا گیا تو ان کا کہنا تھا کہ کہیں بھی کوئی رکاوٹ نہیں ہے اور جہاں کچھ سوالات ہیں ان کے بارے میں غور کیا جارہا ہے۔

وزیر دفاع راج ناتھ سنگھ نے بھرتی کے معاملے میں پوچھے گئے سوال کے جواب میں مداخلت کرتے ہوئے کہا کہ ہر سال فورسز کی طرف سے 90 سے 100 بھرتی ریلیوں کا نظم کیا جاتا ہے۔ اس میں اس بات کا خیال رکھا جاتا ہے کہ ملک کا کوئی بھی ضلع اس سے اچھوت نہ رہے۔ انہوں نے کہا کہ یہ ایک مسلسل عمل ہے اور ایک ریلی میں کم از کم 6 سے 8 اضلاع کا احاطہ کیا جاتا ہے۔

جب مسلح افواج میں درج فہرست ذاتوں، درج فہرست قبائل اور دیگر پسماندہ طبقات سے تعلق رکھنے والے افسران کے اعداد و شمار کے بارے میں پوچھا گیا تو مسٹر بھٹ نے کہا کہ ڈیٹا اکٹھا کیا جائے گا۔

وزیر اعظم کے دفتر سے ایک ٹویٹ میں کہا گیا ہے کہ اسرائیل کے وزیر اعظم نفتالی بینیٹ وزیر اعظم ہند نریندر مودی کی دعوت پر 2 اپریل کو ہندوستان کا دورہ کر رہے ہیں

یروشلم؍ نئی دہلی: اسرائیلی وزیر اعظم نفتالی بینیٹ وزیر اعظم نریندر مودی کی دعوت پر 2 اپریل سے ہندوستان کے دورے پر آئیں گے۔

وزیر اعظم کے دفتر سے ایک ٹویٹ میں کہا گیا ہے کہ اسرائیل کے وزیر اعظم نفتالی بینیٹ وزیر اعظم ہند نریندر مودی کی دعوت پر 2 اپریل کو ہندوستان کا دورہ کر رہے ہیں۔

اسرائیلی وزیر اعظم نے بھی ٹویٹ کیا کہ ہندوستان کے وزیر اعظم نریندر مودی کی دعوت پر اپنے پہلے سرکاری دورے پر ہندوستان کا دورہ کرنے کے لئے بہت پرجوش ہوں۔ اسرائیلی حکومت کی طرف سے جاری کردہ ایک بیان میں کہا گیا ہے کہ یہ دورہ دونوں ملکوں کے درمیان تعلقات کے قیام کی 30ویں سالگرہ کے موقع پر ہوگا۔ اسرائیلی وزیر اعظم نفتالی بینیٹ 2 اپریل 2022 سے ہندوستان کے وزیر اعظم نریندر مودی کی دعوت پر ہندوستان کے دورے پر ہوں گے۔

اس سے قبل دونوں رہنماؤں نے گزشتہ سال اکتوبر میں گلاسگو میں اقوام متحدہ کے موسمیاتی تبدیلی کے سربراہی اجلاس کے موقع پر ملاقات کی تھی۔ اس دوران مسٹر مودی نے اسرائیل کے وزیر اعظم کو ہندوستان کے سرکاری دورے پر آنے کی دعوت دی تھی۔

نفتالی بینیٹ ہند میں یہودی برادری کے ارکان سے بھی کریں گے ملاقات

اس دورے کا مقصد دونوں ممالک کے درمیان اسٹریٹجک پارٹنرشپ کو مزید مضبوط بنانا ہے اور اس دورے کا اہتمام دونوں ممالک کے درمیان 30 سالہ تعلقات کی یاد میں کیا گیا ہے۔ اس ملاقات کے دوران دونوں رہنما جدت، معیشت، ترقی اور تحقیق، زراعت اور دیگر بہت سے متعلقہ شعبوں میں تعاون کو مضبوط بنانے پر بات کریں گے۔ دورے کے دوران اسرائیلی وزیر اعظم مسٹر مودی کے علاوہ اعلیٰ سرکاری عہدیداروں اور ملک میں یہودی برادری کے ارکان سے ملاقات کریں گے۔

مسٹر بینیٹ کے حوالے سے ایک سرکاری بیان میں کہا گیا ہے کہ مودی نے ہند ۔ اسرائیل تعلقات کو دوبارہ شروع کیا جو تاریخی اہمیت کے حامل ہیں۔ یہ دو بالکل مختلف ثقافتوں کا تعلق ہے، خواہ ہندوستانی ہو یا اسرائیلی، دونوں کی جڑیں گہری ہیں اور دونوں بامعنی تعاون کو فروغ دیتے ہیں۔ بہت سی چیزیں ہیں جنہیں ہم ہندوستانیوں سے سیکھ سکتے ہیں اور ہم اس کے لیے کوشش کر رہے ہیں۔ ہم مل کر اختراع اور ٹیکنالوجی، سیکورٹی اور سائبر کے ساتھ ساتھ زراعت اور موسمیاتی تبدیلی جیسے شعبوں میں تعاون کو مزید وسعت دیں گے۔

مسٹر بیرن سنگھ کو منی پور میں وزیر اعلیٰ کے طور پر دوسری میعاد ملنے کے ساتھ ہی محترمہ سیتا رمن نے ایک گلدستہ پیش کرتے ہوئے انہیں مبارکباد دی

امپھال: نونگ تھومبم بیرن سنگھ کو اتوار کو متفقہ طور پر دوسری بار منی پور بھارتیہ جنتا پارٹی لیجسلیچر پارٹی کا لیڈر منتخب کیا گیا۔

بی جے پی کی مرکزی مشاہد اور مرکزی وزیر خزانہ نرملا سیتا رمن نے یہاں پارٹی کے ریاستی ہیڈکوارٹر میں پارٹی قانون سازوں کی میٹنگ کے بعد یہ اعلان کیا۔

حالیہ اسمبلی انتخابات کے بعد نگراں وزیر اعلی کے طور پر خدمات انجام دینے والے مسٹر سنگھ نے اس شمال مشرقی ریاست میں پہلی بار مکمل اکثریت کے لئے بی جے پی کی قیادت کی۔ وہ سال 2017 میں منی پور میں بی جے پی کے پہلے وزیر اعلیٰ بنے تھے۔

بطور سابق صحافی اور فٹ بالر مسٹر سنگھ کو منی پور میں وزیر اعلیٰ کے طور پر دوسری میعاد ملنے کے ساتھ ہی محترمہ سیتا رمن نے ایک گلدستہ پیش کرتے ہوئے انہیں مبارکباد دی۔

اس عہدے کے مضبوط دعویدار ٹی بسواجیت نے بھی بی جے پی کے دیگر ایم ایل ایز کے ساتھ مسٹر سنگھ کو مبارکباد دی۔ 10 مارچ کو اسمبلی انتخابات کے نتائج کے اعلان کے بعد، بی جے پی کو اندرونی اختلافات دور کرنے کے لیے بظاہر وزیر اعلی کے اعلان میں دس دن کی تاخیر کرنی پڑی۔

کانگریس کے سینئر لیڈر ہریش راوت نے کہا ہے کہ پنڈتوں کا قتل عام ہوا ہے، ساتھ ہی انہوں نے مطالبہ کیا ہے کہ بھارتیہ جنتا پارٹی کی حکومت کو کشمیری پنڈتوں کی واپسی کے لیے ہمت دکھانی ہوگی

دہرادون: فلم ’دی کشمیر فائلز‘ پر سابق وزیر اعلیٰ اور کانگریس کے سینئر لیڈر ہریش راوت نے کہا ہے کہ پنڈتوں کا قتل عام ہوا ہے۔ ساتھ ہی انہوں نے مطالبہ کیا ہے کہ بھارتیہ جنتا پارٹی کی حکومت کو کشمیری پنڈتوں کی واپسی کے لیے ہمت دکھانی ہوگی۔

مسٹر راوت نے ہفتہ کو کہا کہ سال 1990 میں کشمیر میں وحشیانہ مظالم ہوئے۔ انہوں نے کہا کہ یہ انتہائی تشویشناک بات ہے کہ جس طرح کشمیری پنڈتوں کو چن چن کر قتل کیا گیا، ان کا قتل عام کیا گیا، خواتین پر ظلم کیا گیا، انہیں اپنا گھر بار اور گاؤں چھوڑنا پڑا، اپنی سرزمین چھوڑنی پڑی جس کی یادیں آج بھی ان کے ذہنوں میں نقش ہیں۔ ’دی کشمیر فائلز‘ اس کی ایک سازش ہے، اس پر سیاسی تنازعہ کی کوئی گنجائش نہیں۔

انہوں نے کہا کہ میں اس وقت پارلیمنٹ میں تھا اور ہم نے ان واقعات کو مسلسل اٹھایا۔ اس وقت کے گورنر جگموہن کی غلط پالیسیوں، اس وقت کی مرکزی حکومت جس میں مفتی محمد سعید وزیر داخلہ تھے، ان کی تاریخی غلطیوں پر بہت کچھ کہا گیا ہے۔ سخت گیر دہشت گردوں کو رہا کر دیا گیا۔

سابق وزیر اعلیٰ ہریش راوت نے اپیل کی ہے کہ سابق وزیر اعلیٰ فاروق عبداللہ سمیت کشمیر کی قوم پرست قیادت کا فرض بنتا ہے کہ وہ آگے آئیں اور اس کے لیے ماحول پیدا کریں اور کشمیری پنڈت بھائیوں کو کشمیر واپس آنے کی ترغیب دیں، ان کی جائیدادیں، ان کی حفاظت کو یقینی بنائیں۔