این ڈی ٹی وی کے جاری کردہ ایک بیان میں کہا گیا ہے کہ اڈانی گروپ کو لین دین کو مکمل کرنے کے لیے مارکیٹ ریگولیٹرایس ای بی آئی سے منظوری لینی ہوگی

نئی دہلی: نیوز براڈ کاسٹر این ڈی ٹی وی نے جمعرات کو کہا کہ اس کے پروموٹر پر نئے رائے اور رادھیکا رائے پر حصص کی خرید یا فروخت اور سیکورٹیز مارکیٹ سے منسلک ہونے پر پابندی لگائی گئی ہے، اس لیے اڈانی گروپ کو لین دین کو مکمل کرنے کے لئے مارکیٹ ریگولیٹر سیکیورٹیز اینڈ ایکسچینج بورڈ آف انڈیا (ایس ای بی آئی) سے منظوری لینی ہوگی۔

این ڈی ٹی وی کے جاری کردہ ایک بیان میں کہا گیا ہے کہ سیکورٹیز اینڈ ایکسچینج بورڈ آف انڈیا (ایس ای بی آئی) کے 27 نومبر-2020 کے حکم کے تحت، اس کے پروموٹرز کے حصص کی خرید یا فروخت اور سیکورٹیز مارکیٹ کے ساتھ وابستگی پر دوسال کے لئے پابندی لگائی گئی ہے اور یہ مدت اگلے 26 نومبر-2022 کو ختم ہو رہی ہے۔ بیان میں دعویٰ کیا گیا کہ اڈانی گروپ کو لین دین کو مکمل کرنے کے لیے مارکیٹ ریگولیٹرایس ای بی آئی سے منظوری لینی ہوگی۔

این ڈی ٹی وی میں 29.18 فیصد حصص حاصل کرے گا

کاروباری گوتم اڈانی کی قیادت میں اڈانی گروپ نے منگل کو اعلان کیا تھا کہ اس کی میڈیا ونگ اے ایم جی میڈیا نیٹ ورکس لمیٹڈ (اے ایم این ایل) بالواسطہ طور پر این ڈی ٹی وی میں 29.18 فیصد حصص حاصل کرے گا اور 26 فیصد حصص کے لیے کھلی پیشکش بھی کرے گا۔ اسی دن گروپ نے اسٹاک ایکسچینج بی ایس ای اور این ایس ای کو بھی مطلع کیا کہ اے ایم این ایل نے وی سی پی ایل میں 100 فیصد ایکویٹی حصص حاصل کر لیا ہے۔

اڈانی گروپ کے اعلان کے فوراً بعد، این ڈی ٹی وی نے کہا تھا کہ وی سی پی ایل کے ذریعہ حقوق کا استعمال بغیر کسی ان پٹ، بات چیت یا این ڈی ٹی وی کے بانیوں کی رضامندی کے بغیر کیا گیا ہے۔

قابل ذکر ہے کہ این ڈی ٹی وی کے پاس تین بڑے قومی چینلز اور ایک مضبوط ڈیجیٹل پلیٹ فارم ہے۔ میڈیا کمپنی نے 123 کروڑ روپے کے سود، ٹیکس، فرسودگی اور معافی سے قبل کی کمائی کے ساتھ 421 کروڑ روپے کا ریونیو اور مالی سال -22 میں 85 کروڑ روپے کا خالص منافع درج کیا ہے۔

میڈیا رپورٹس کے مطابق گوتم اڈانی این ڈی ٹی وی کے حصول کے بعد مکیش امبانی کے سامنے میڈیا سیکٹر میں چیلنج کھڑا کریں گے، جن کے کنٹرول میں نیٹ ورک-18 ہے۔

امریکہ نے صدر جو بائیڈن کے اقتدار سنبھالنے کے بعد سے یوکرین کو 13.5 ارب ڈالر سے زیادہ کی سیکیورٹی امداد دینے کا عزم ظاہر کیا ہے

واشنگٹن: امریکہ نے یوکرین کو تقریباً 3 ارب ڈالر مالیت کی سیکورٹی امداد کی اضافی قسط دینے کا اعلان کیا ہے، جو روس اور یوکرین کے تنازع کو چھ ماہ تک پہنچنے کے بعد سب سے بڑا پیکیج ہے۔

امریکہ نے صدر جو بائیڈن کے اقتدار سنبھالنے کے بعد سے یوکرین کو 13.5 ارب ڈالر سے زیادہ کی سیکیورٹی امداد دینے کا عزم ظاہر کیا ہے۔

مسٹر بائیڈن نے اپنے بیان میں کہا کہ یہ پیکیج یوکرین کے عوام کی حمایت کرنے کی ان کے ملک کے عزم کا حصہ ہے کیونکہ انہوں نے اپنی خودمختاری کے دفاع کے لیے لڑائی جاری رکھی ہے۔

امریکی وزارت دفاع کے مطابق، نئے اعلان کردہ پیکیج میں چھ اضافی نیشنل ایڈوانسڈ سرفیس ٹو ایئر میزائل سسٹمز، 155 ایم ایم آرٹلری گولہ بارود، 65 ہزار راؤنڈ 120 ایم ایم مارٹر گولہ بارود، 24 کاؤنٹر آرٹلری ریڈارز، پوما بغیر پائلٹ ایریل سسٹم (یو اے ایس) اور اسکین ایگل یواے ایس سسٹم کے لیے معاون ڈیوائس، ویمپائر کاؤنٹر یو اے ایس سسٹم اور لیزر سے چلنے والا راکٹ سسٹم شامل ہے۔

سی بی آئی کے افسران نے آج صبح سلی گوڑی میں واقع نارتھ بنگال یونیورسٹی کے کیمپس کا دورہ کیا، کیمپس کے اندر ہی وائس چانسلر سبریش بھٹاچاریہ کی سرکاری رہائش گاہ ہے، تفتیش کاروں نے وہاں جا کر تلاشی لی

کلکتہ: اسکول سروس کمیشن کے سابق چیئرمین اور نارتھ بنگال یونیورسٹی کے وائس چانسلر سبریش بھٹاچاریہ اساتذہ کی تقرری میں بدعنوانی کے معاملے میں اب سی بی آئی کی نظر میں ہیں۔ سی بی آئی نے سلی گوڑی میں ان کی سرکاری رہائش گاہ اور جنوبی کلکتہ میں مکانات کی بیک وقت تلاشی لی۔

اساتذہ کی بھرتی میں بدعنوانی کے معاملے میں سابق ریاستی وزیر پارتھو چٹرجی اس وقت جیل میں ہیں۔ ای ڈی نے سابق وزیر تعلیم کو گرفتار کیا ہے۔ ایس ایس سی کے سابق مشیر شانتی پرساد سنہا اور کمیٹی ممبر اشوک ساہا کو بھی سی بی آئی نے گرفتار کیا ہے۔ ان دونوں کی گرفتاری سے قبل مرکزی تفتیشی افسروں نے نظام پیلس میں ان سے سات گھنٹے تک پوچھ گچھ کی۔ ذرائع کے مطابق شانتی پرساد سنہا اور اشوک ساہا کے بیانات میں کئی تضادات پائے گئے ہیں۔

سی بی آئی افسران کا سلی گوڑی میں واقع نارتھ بنگال یونیورسٹی کیمپس کا دورہ

سی بی آئی کے افسران نے آج صبح سلی گوڑی میں واقع نارتھ بنگال یونیورسٹی کے کیمپس کا دورہ کیا۔ ان کے ساتھ مرکزی سیکورٹی فورسیس کے جوان تھے۔ کیمپس کے اندر ہی وائس چانسلر سبریش بھٹاچاریہ کی سرکاری رہائش گاہ ہے۔ تفتیش کاروں نے وہاں جا کر تلاشی لی۔ یہاں تک کہ سی بی آئی جنوبی کلکتہ میں سبریش بھٹاچاریہ کے گھر جاکر تلاشی لینے کی کوشش کی۔ کیوں کہ فلیٹ میں تالا لگا ہوا ہے ملا۔ آخر کار فلیٹ سیل کر دیا گیا۔ پارتھو چٹرجی نے شمالی بنگال یونیورسٹی سے پی ایچ ڈی کی جب وہ ریاست کے وزیر تعلیم تھے۔

ریاست میں اساتذہ کی تقرری میں بدعنوانی کے الزامات کا سلسلہ جاری ہے۔ ہائی کورٹ کے حکم پر سابق وزیر تعلیم پارتھا چٹوپادھیائے کو سی بی آئی کے دفتر میں حاضر ہونا ہے۔ ایس ایس سی کے اس وقت کے چیئرمین سدھارتھ مجمدار نے اس سال مئی میں اچانک استعفیٰ دے دیا تھا۔ ذمہ داری لینے کے 4 ماہ کے اندر بھی! اس کے بعد نہ صرف استعفیٰ قبول کر لیا گیا بلکہ کچھ ہی دیر میں ریاستی حکومت نے نئے چیئرمین کی تقرری کا نوٹیفکیشن بھی جاری کر دیا۔

سماعت پوری ہونے کے بعد ہری شنکر جین نے دعوی کیا کہ مسلم فریق نے گیان واپی مسجد کو وقف بورڈ کی ملکیت ثابت کرنے کے لئے جو دستاویزات عدالت میں پیش کئے ہیں وہ حقیقت میں گیان واپی احاطے سے ڈیڑھ کلو میٹر واقع عالم گیر مسجد کے ہیں

وارانسی: اترپردیش کے ضلع وارانسی میں واقع گیان واپی مسجد احاطے میں شرنگار گوری مندر کی مستقل پوجا کے مطالبے سے متعلق عرضی میں مقدمے کی سماعت کے جواز کے نکتے پر ضلع انتظامیہ نے بدھ کو سماعت پوری کرتے ہوئے فیصلہ محفوظ کرلیا ہے۔ عدالت نے اس معاملے میں آئندہ 12 ستمبر کو اپنا فیصلہ سنائے گی۔

سماعت کے بعد ہندو فریق کے ایک وکیل نے بتایا کہ ضلع جج ڈاکٹر اجئے کرشن وشویش کی عدالت میں مدعی و مدعا علیہ کی سماعت پوری ہو گئی ہے۔ انہوں نے بتایا کہ یہ معاملہ مسجد احاطے میں مدعی کے شرنگا گوری مندر میں مستقل پوجا۔ پاٹ کرنے کی اجازت دئیے جانے سے وابستہ ہے۔ اس معاملے کی سماعت وارانسی واقع سول جج سینئر ڈویژن کی عدالت میں ہوئی۔ بعد میں مسلم فریق نے معاملے کی سماعت کے لئے متعلقہ عدالت میں نہ ہونے کا دعوی کرتے ہوئے سپریم کورٹ میں عرضی داخل کر کے مقدمے کی جواز پر سوال کھڑا کردیا تھا۔

سپریم کورٹ نے اس معاملے میں ‘مقدمے کی سماعت کے جواز’ کے مسئلے پر ضلع عدالت کو سماعت کرنے کی ہدایت دی تھی۔ اس پر ضلع جج کی عدالت نے اس معاملے میں دونوں فریقین کی دلائل سننے کے بعد آج اپنا فیصلہ محفوظ کر تے ہوئے مقدمے کی اگلی تاریخ 12 ستمبر طے کی ہے۔

عدالت اس اہم فیصلے کی اگلی تاریخ 12 ستمبر کو اپنا فیصلہ سنائے گی

انہوں نے بتایا کہ عدالت اس اہم فیصلے کی اگلی تاریخ 12 ستمبر کو اپنا فیصلہ سنائے گی۔ قابل ذکر ہے کہ اس معاملے کی سماعت پہلے وارانسی کے سول جج (سینئر ڈویژن) کی عدالت میں چل رہی تھی۔ اس دوران ہندو فریق کی مانگ پر عدالت نے گیان واپی احاطے کا ویڈیو گرافی سروے کرائے جانے کی اجازت دی تھی۔ جس میں مسجد کے وضو خانے میں شیو لنگ کے ملنے کا دعوی کیا گیا تھا جبکہ مسجد کمیٹی کا کہنا تھا کہ یہ حوض میں لگا ہوا فوارہ ہے۔

مسلم فریق نے سپریم کورٹ میں عرضی داخل کر کے سول پروسیزر ایکٹ کے رول 7آرڈر 11 کا حوالہ دیتے ہوئے دعوی کیا کہ نچلی عدالت متعلق معاملہ سننے کی اہل نہیں ہے۔ عدالت عالیہ نے ضلع جج کو اس نکتے پر سماعت کرنے کی ہدایت دی تھی۔ قانونی عمل سے جڑے اس نکتے پر عدالت میں اب تک دونوں فریقین اپنی دلائل دے رہے تھے۔

سماعت پوری ہونے کے بعد ہری شنکر جین نے دعوی کیا کہ مسلم فریق نے گیان واپی مسجد کو وقف بورڈ کی ملکیت ثابت کرنے کے لئے جو دستاویزات عدالت میں پیش کئے ہیں وہ حقیقت میں گیان واپی احاطے سے ڈیڑھ کلو میٹر واقع عالم گیر مسجد کے ہیں۔ جین نے کہا کہ انہوں نے آج عدالت کو اس حقیقت سے آگاہ کراتے ہوئے شواہد و دلائل کی بنیاد پر بتایا کہ متعلقہ دستاویزات کا تعلق گیان واپی احاطے سے نہیں ہے۔ جین نے الزام لگایا کہ مسلم فریق نے فرضی دستاویز پیش کر کے عدالت کو گمراہ کرنے کی کوشش کی ہے۔

ٹک ٹاک اسٹار سونالی پھوگاٹ نے سال 2019 میں بی جے پی کے ٹکٹ پر آدم پور کی اسمبلی سیٹ سے کانگریس کے مسٹر کلدیپ بشنوئی کے خلاف ہریانہ کا الیکشن لڑا تھا

پنجی: ٹک ٹاک اسٹار اور بھارتیہ جنتا پارٹی (بی جے پی) لیڈر سونالی پھوگاٹ کو دل کا دورہ پڑنے سے پیر کی رات یہاں انتقال ہوگیا۔ وہ 41 سال کی تھیں۔

بی جے پی کے ایک لیڈر نے منگل کے روز یو این آئی کو محترمہ پھوگاٹ کی موت کی خبر کی تصدیق کی۔ تاہم مقامی حکام نے ابھی تک اس کی تصدیق نہیں کی ہے۔ محترمہ پھوگاٹ اپنے عملہ کے ارکان کے ساتھ گوا کے دورے پر تھیں۔

محترمہ پھوگاٹ نے سال 2019 میں بی جے پی کے ٹکٹ پر آدم پور کی اسمبلی سیٹ سے کانگریس کے مسٹر کلدیپ بشنوئی کے خلاف ہریانہ کا الیکشن لڑا تھا۔

محترمہ پھوگاٹ انتخابات کے دوران ٹک ٹاک پر اپنی ویڈیوز کے لیے بھی سرخیوں میں تھیں۔

اسمبلی میں قاعدہ 293 کے تحت بحث کا جواب دیتے ہوئے مہاراشٹر کے وزیر اعلی ایکناتھ شندے نے کہا کہ کسانوں کو بھاری بارش کی وجہ سے فصل کے نقصان کا معاوضہ دیا جائے گا

ممبئی: مہاراشٹر کے وزیر اعلی ایکناتھ شندے نے منگل کو اسمبلی میں کہا کہ اگر مسلسل بارش کی وجہ سے 33 فیصد سے زیادہ نقصان ہوتا ہے تو کسانوں کو پنچنامہ بنا کر معاوضہ دیا جائے گا۔

اسمبلی میں قاعدہ 293 کے تحت بحث کا جواب دیتے ہوئے مسٹر شندے نے کہا کہ کسانوں کو بھاری بارش کی وجہ سے فصل کے نقصان کا معاوضہ دیا جائے گا۔ انہوں نے یہ بھی کہا کہ گھونگھا، پیت موزائیک جیسی کیڑے مکوڑوں کی بیماریوں کے پھیلنے سے ہونے والے نقصان کے تعلق سے بھی پنچنامہ بنایا گیا ہے اور متاثرہ کسانوں کو ایسے کیڑوں سے فصلوں کو ہونے والے نقصان کے ازالے کے لیے بھی مدد دی جائے گی۔

وزیر اعلیٰ نے ایوان میں کہا کہ اس سے قبل بارش اور موسم سے متعلق دیگر واقعات کا اندازہ لگانے کے لیے 2400 ریونیو ڈویژنوں میں ایک خودکار موسمیاتی مرکز قائم کیا گیا ہے۔ انہوں نے کہا کہ اگرچہ یہ تعداد ناکافی ہے لیکن خودکار ویدر اسٹیشنز کی تعداد میں اضافہ کیا جائے گا اور اس سے کسانوں کو موسم کی درست پیشن گوئی ملے گی اور کسانوں کے انشورنس کلیمز کا جلد ازالہ کیا جاسکے گا۔

انشورنس کمپنی کو فصل کے نقصان کے معاوضے کے لیے ہدایات

مسٹر شندے نے کہا کہ انشورنس کمپنی کو فصل کے نقصان کے معاوضے کے لیے ہدایات دی گئی ہیں۔ اس کے ساتھ ساتھ انشورنس کمپنیوں کو تحریری ہدایات بھی دی جائیں گی تاکہ نقصان کی اطلاع، درخواست محکمہ زراعت کے دفتر، تحصیل آفس یا بینک جہاں انشورنس کی ادائیگی کی جاتی ہے اور ان درخواستوں کو منظور کیا جائے گا۔ انہوں نے کہا کہ باقاعدہ قرض ادا کرنے والے کسانوں کو 50,000 روپے کی ترغیبی سبسڈی مختص کرنے کا ستمبر میں شروع کی جائے گی۔

پنچنامہ کے لیے موبائل ایپ کا استعمال

وزیر اعلیٰ نے کہا کہ پنچنامہ کے لیے موبائل ایپ کا استعمال اب قدرتی آفات کے دوران متاثرہ لوگوں کو امدادی رقوم کی تقسیم میں تاخیر کو کم کرنے کے لیے کیا جائے گا۔ انہوں نے کہا کہ جلد ہی موبائل ایپلیکیشن کے ذریعے ای-پنچنامہ تیار کرنے، مطلوبہ رقم کی درخواست کرنے اور متعلقہ کے آدھار سے لنک بینک اکاؤنٹ میں براہ راست رقم جمع کرنے کے لیے ایک نیا نظام تیار کیا جا رہا ہے۔ اس میں ریموٹ سینسنگ ٹیکنالوجی (سیٹیلائٹ امیج) استعمال کی جائے گی اور نقصان کا اندازہ لگانے کے لیے ڈرون ٹیکنالوجی بھی استعمال کی جائے گی۔ مسٹر شندے نے کہا کہ جدید زراعت میں ڈرون ٹکنالوجی، نینو یوریا، آبپاشی آٹومیشن، کنٹرول فارمنگ کے استعمال میں حکومت کی طرف سے مدد کی جائے گی۔ انہوں نے کہا کہ فصلوں کے تنوع کے تحت ‘تیل کے تلہن، دلہن اور باغبانی’ پر خصوصی زور دیا جائے گا۔

مرکزی حکومت کی اسکیموں کو نافذ کرنے کے لئے منصوبہ

انہوں نے کہا کہ مرکزی حکومت کی اسکیموں کو صحیح طریقے سے نافذ کرنے کے لئے منصوبہ بند طریقے سے کام کیا جائے گا۔ مثال کے طور پر، زرعی انفراسٹرکچر فنڈ کو تیز رفتار سمت کے لیے پروجیکٹ مانیٹرنگ یونٹ فراہم کرنے کا اختیار دیا جائے گا۔ آرگینک کاشتکاری اور قدرتی کاشتکاری کے حوالے سے مرکز کی اسکیموں کو مؤثر طریقے سے نافذ کیا جائے گا تاکہ ہماری زراعت زہر سے پاک ہو۔

وزیر اعلیٰ نے کہا کہ کسانوں کی آمدنی بڑھانے کے لیے فارم سے منڈی تک ایک مکمل کوالٹی چین بنانے کے لیے اقدامات کیے جائیں گے۔ فارمر پروڈیوسر گروپس کو فروغ دینے کے لیے کام کیا جائے گا۔

مسٹر شندے نے کہا کہ ریاست میں کسانوں کی خودکشی کو روکنے کے لیے حکومت کے مختلف محکموں کے ساتھ تال میل میں ایک جامع ایکشن پلان تیار کرنے کے لیے کارروائی کی جا رہی ہے۔ انہوں نے کہا کہ اس حوالے سے جلد جامع پالیسی کا اعلان کیا جائے گا۔

پیغمبر اسلام کی شان میں بی جے پی رکن اسمبلی کی جانب سے گستاخی کی ویڈیو وائرل ہونے بعد مسلمانوں میں شدید برہمی، غم و غصہ اور بڑے پیمانہ پر احتجاج کے پیش نظر بی جے پی نے راجہ سنگھ کو معطل کردیا ہے۔

حیدرآباد: محسن انسانیت حضور اکرم ؐ کی شان اقدس میں تلنگانہ بی جے پی کے رکن اسمبلی راجہ سنگھ کی جانب سے گستاخی کئے جانے کے ویڈیو کے وائرل ہونے کے بعد تلنگانہ کے دارالحکومت حیدرآباد کے ساتھ ساتھ ریاست کے کئی حصوں میں مسلمانوں میں شدید برہمی، غم و غصہ اور بڑے پیمانہ پر احتجاج کے پیش نظر بی جے پی نے راجہ سنگھ کو معطل کردیا ہے۔

تلنگانہ اسمبلی میں گوشہ محل حلقہ کی نمائندگی کرنے والے راجہ سنگھ کو پارٹی کی مرکزی تادیبی کمیٹی نے پارٹی اور دیگر تمام ذمہ داریوں سے فوری اثر کے ساتھ معطل کردیا ہے۔ تادیبی کمیٹی کے سکریٹری اوم پرکاش نے رکن اسمبلی سے خواہش کی کہ وہ اپنے متنازعہ اور قابل اعتراض ریمارکس پر اندرون 10دن یعنی 2 ستمبر تک جواب دیں۔ اس رکن اسمبلی کے ریمارکس کے خلاف مسلم طبقہ میں کافی برہمی دیکھی گئی تھی اور اس کے خلاف سخت کارروائی کرنے کامطالبہ کرتے ہوئے شدید احتجاج بھی کئے گئے تھے۔

بی جے پی نے اس بیان پر راجہ سنگھ سے اظہار لاتعلقی کیا ہے۔ اسی دوران بی جے پی کے ترجمان کرشناساگر راو نے کہا کہ ہماری پارٹی تمام عقائد کا احترام کرتی ہے اور کوئی اس سے انحراف کرتا ہے تو ہم اس معاملہ پر کارروائی کریں گے۔ ہماری قومی پارٹی ہے، جو عقائد میں اختلافات کو نہیں مانتی۔ بی جے پی تمام کو یکساں مانتی ہے۔ ہم نفرت کی تقریر کی تصدیق نہیں کرتے اور راجہ سنگھ نے اگر اس سے انحراف کیا ہے تو پارٹی اس معاملہ سے نمٹ لے گی۔

انفارمیشن ٹیکنالوجی کے وزیر محمد اسرائیل منصوری نے کہا کہ بہار میں خشک سالی سے متاثرہ کسانوں کی حکومت ہر ممکن مدد کرے گی

گیا: بہار کے انفارمیشن ٹیکنالوجی کے وزیر محمد اسرائیل منصوری نے آج کہا کہ حکومت ریاست میں خشک سالی سے متاثرہ کسانوں کو ہر ممکن مدد فراہم کرے گی۔

وزیرکم گیا ضلع کے انچارج وزیر منصوری نے پیر کو یہاں نامہ نگاروں سے خطاب کرتے ہوئے کہا کہ ہماری حکومت خشک سالی کو لے کر سنجیدہ ہے۔ وزیر اعلیٰ خود اس سلسلے میں بہار کے مختلف اضلاع کا دورہ کر رہے ہیں۔ گیا ضلع میں خشک سالی کی صورتحال کے بارے میں بھی اطلاعات موصول ہوئی ہیں۔ تمام پہلوؤں پر سروے کرنے کے بعد حکومت خشک سالی سے متاثرہ کسانوں کی ہر ممکن مدد کرے گی۔

مشہور پترپکچھ میلے کے سوال پر انہوں نے کہا کہ حکومت ملک اور بیرون ملک سے آنے والے پنڈ دانیوں کو ہر ممکن سہولیات فراہم کرائی جائے گی۔ اس کے لیے وزیر اعلیٰ نتیش کمار نے خود آج گیا ضلع میں دیوگھاٹ، وشنوپد مندر، ربڑ ڈیم سمیت کئی دیگر مقامات کا معائنہ کیا ہے۔

اس کے ساتھ ہی عہدیداروں کے ساتھ میٹنگ کے بعد زائرین کو بہتر سہولیات فراہم کرنے کے لیے ضروری ہدایات دی گئی ہیں۔ گیا ضلع میں آنے والے یاتریوں کو بہتر سہولیات فراہم کرنے کی کوشش کی جائے تاکہ گیا ضلع سے ملک اور دنیا میں ایک اچھا پیغام جا سکے۔

ہندو فریق کے ذریعہ عدالت میں اپنا موقف پیش کئے جانے کے بعد مسلم فریق کی جانب سے اپنے دلائل پیش کرتے ہوئے نیسان نے 1944 اور 1936 کے ان عدالتی فیصلوں کا بھی حوالہ دیا جن میں کہا گیا کہ گیان واپی مسجد احاطہ وقف بورڈ کی ملکیت ہے

وارانسی: اترپردیش کے ضلع وارانسی میں واقع گیان واپی احاطہ تنازع معاملے میں چل رہی عدالتی سماعت کے دوران مسلم فرقی نے دستاویزی شواہد کی بنیاد پر گیان واپی احاطے کو وقف بورڈ کی ملکیت ہونے کا دعوی کیا ہے۔

ڈسٹرکٹ عدالت اجئے کرشن وشویش کی عدالت میں پیر کو سماعت کے دوران مسلم فریق کے وکیل اخلاق نیسان نے کہا کہ گیان واپی احاطہ وقف بورڈ کی سو نمبر رجسٹرڈ ملکیت کے طور پر درج ہونے کے ثبوت پہلے ہی عدالت کے سامنے پیش کئے جاچکے ہیں۔

ہندو فریق کے ذریعہ عدالت میں اپنا موقف پیش کئے جانے کے بعد مسلم فریق کی جانب سے اپنے دلائل پیش کرتے ہوئے نیسان نے 1944 اور 1936 کے ان عدالتی فیصلوں کا بھی حوالہ دیا جن میں کہا گیا کہ گیان واپی مسجد احاطہ وقف بورڈ کی ملکیت ہے۔

مسلم فریق کی بحث منگل کو بھی جاری رہے گی۔ اس کے بعد مسلم فریق کے جواب میں ہندو فریق کے وکیل اپنے دلائل پیش کریں گے۔ مقدمے کے ایک دیگر مسلم فریق و گیان واپی مسجد انتظامیہ کا انتظام کرنے والی انجمن انتظامیہ مسجد کمیٹی کے وکیل شمیم احمد نے دلیل دی کہ یہ ملکیت ‘آفاق’ ہے۔ لہذا اس معاملے کی سماعت دیوانی عدالت میں نہیں ہوسکتی ہے۔ احمد نے کہا کہ اس معاملے کی سماعت وقف بورڈ عدالت میں ہی ہوسکتی ہے۔

سماعت کے دوران ہندو فریق کی جانب سے سینئر وکیل ہری شنکر زین، وشنو شنکرزین، سدھری ترپاٹھی اور مدن موہن یادو سمیت دیگر وکیل بھی عدالت میں موجود تھے۔

پاکستان کے زیر قبضہ کشمیر کے باغ ضلع میں ٹرک گہری کھائی میں گرنے سے نو فوجی ہلاک اور چار دیگر زخمی

اسلام آباد: پاکستان کے زیر قبضہ کشمیر (پی او کے) کے باغ ضلع میں اتوار کو ایک ٹرک گہری کھائی میں گرنے سے کم از کم نو فوجی ہلاک اور چار دیگر زخمی ہوگئے۔

حکام کے مطابق واقعہ ضلع باغ کے علاقے شجاع آباد کے قریب پیش آیا۔ واقعہ کے وقت ٹرک میں ڈرائیور سمیت کل ملاکر 13 جوان سوار تھے۔ تمام زخمیوں کو نزدیکی اسپتال میں داخل کرایا گیا ہے۔

انہوں نے بتایا کہ ریسکیو ٹیم نے موقع پر پہنچ کر امدادی مہم شروع کردی ہے۔