وزیر اعظم نریندر مودی نے ایک منفرد انٹر ایکٹو پروگرام – پریکشا پہ چرچا کا تصور پیش کیا

نئی دہلی: تعلیم اور ہنرمندی کے فروغ کے مرکزی وزیر دھرمیندر پردھان نے آج طلبا، اساتذہ اور والدین کو ‘‘پریکشا پہ چرچا 2023’’ کی چھٹی تقریب میں حصہ لینے اور وزیر اعظم نریندر مودی کی سرپرستی پانے کا موقع حاصل کرنے کی دعوت دی۔

وزیر اعظم نریندر مودی نے ایک منفرد انٹر ایکٹو پروگرام – پریکشا پہ چرچا کا تصور پیش کیا جس میں ملک بھر کے اور بیرون ملک سے بھی طلبا، والدین، اساتذہ ان کے ساتھ بات چیت کرتے ہوئے امتحانات سے پیدا ہونے والے تناؤ پر قابو پانے پر بات چیت کر سکیں تاکہ زندگی کو اتسو کے طور پر منایا جا سکے۔

اس تقریب کا انعقاد پچھلے پانچ برسوں سے وزارت تعلیم کے اسکول ایجوکیشن اینڈ لٹریسی کا محکمہ کامیابی کے ساتھ کرتا آ رہا ہے۔ درجہ نہم 9 سے یازدہم 11 تک کے اسکولی طلبا، اساتذہ اور والدین کا انتخاب ایک آن لائن تخلیقی تحریری مقابلے کے ذریعے کیا جائے گا۔

پورٹلhttps:nnovateindia.mygov.in/ppc-2023 نیچے دئیے گئے موضوعات کے گلدستے سے متعلق 25 نومبر 2022 سے رجسٹریشن کے لئے لائیو ہے اور یہ 30 دسمبر 2022 تک کھلا رہے گا۔

مائی گوو پر مقابلوں کے ذریعے منتخب ہونے والے تقریباً 2050 طلبا، اساتذہ اور والدین کو پی پی سی کٹس اور این سی ای آر ٹی کے ڈائریکٹر کی جانب سے توصیفی سند دی جا سکتی ہے۔

گجرات اسمبلی انتخابات کے پہلے مرحلے میں تقریباً 57.75 فیصد ووٹروں نے اپنے حق رائے دہی کا استعمال کیا

گاندھی نگر: گجرات اسمبلی انتخابات کے پہلے مرحلے میں جمعرات کو سوراشٹرا-کچھ اور جنوبی گجرات کے 19 اضلاع کی 89 سیٹوں کے لیے ہوئے تقریباً 57.75 فیصد ووٹروں نے اپنے حق رائے دہی کا استعمال کیا۔

سخت حفاظتی انتظامات کے درمیان صبح آٹھ بجے شروع ہونے والی پولنگ شام پانچ بجے ختم ہوگئی۔ مقررہ مدت پوری ہونے کے بعد بھی کئی بوتھوں پر ووٹروں کی قطاریں لگی ہوئی تھیں اور قواعد کے مطابق ووٹ ڈالنے کے بعد ہی ای وی ایم مشینوں کو سیل کیا جائے گا۔ اس سے ووٹنگ فیصد بڑھنے کا امکان ہے۔

امریلی میں سب سے کم 52.73 فیصد پولنگ

چیف الیکٹورل آفیسر کے دفتر نے بتایا کہ ووٹنگ فیصد کی گنتی اور مرتب کرنے کا کام ابھی جاری ہے۔ شام 5 بجے تک رائے دہندگان کا ابتدائی اوسط تخمینہ ٹرن آؤٹ 57.75 فیصد سے زیادہ ہے۔ تاپی ضلع میں زیادہ سے زیادہ 72.32 فیصد، ڈانگ میں 64.84، نرمدا میں 68.09 فیصد، گیر سومناتھ میں 60.46 فیصد، کچھ میں 54.91، جام نگر 53.98، جوناگڑھ 54.95، دیو بھومی دوارکا 59.11، نواساری 65.91، پوربندر 53.84، بوٹاد 57.15، بھاو نگر 57.81، موربی 61.96، راجکوٹ 55.93، ولساڈ 65.24، سورت 57.83، سریندر نگر 60.71 اور امریلی میں سب سے کم 52.73 فیصد پولنگ ہوئی۔

چیف الیکٹورل آفیسر پی بھارتی نے کہا کہ پہلے مرحلے کے لیے 1,06,963 ملازمین/ افسروں کو تعینات کیا گیا تھا، جن میں 27,978 ریٹرننگ افسران اور 78,985 پولنگ عملہ شامل ہیں۔ پہلے مرحلے میں 19 اضلاع کی 89 نشستوں کے لیے کل 2,39,76,670 ووٹر اہل تھے، جن میں 1,24,33,362 مرد، 1,15,42,811 خواتین اور 497 خواجہ سرا ووٹر شامل ہیں۔ ان میں سے 57.75 فیصد سے زائد ووٹروں نے اپنا حق رائے دہی استعمال کیا۔

انہوں نے بتایا کہ پولنگ اسٹیشنوں اور عملے کے تمام ضروری انتظامات اور الیکشن میں استعمال ہونے والے ای وی ایم اور وی وی پی اے ٹی (34324 BUs، 34324 CUs اور 38,749 VVPATs) کا استعمال کیا گیا۔ پہلے مرحلے میں 65-موربی سیٹ پر 17 امیدوار ہونے سے 02 بیلٹ یونٹ تھے، جب کہ سورت کے 163-لمبایت حلقے میں 44 امیدوار ہونے سے تین بیلٹ یونٹ تھے۔

عالمی منڈیوں میں آنے والی تیزی کی بدولت آج مسلسل چھٹے روز شیئر بازار گلزار رہا

ممبئی: امریکی فیڈ ریزرو کی بیاج کی شرح میں اضافے کی رفتار کم ہونے کے اشاروں سے عالمی منڈیوں میں آنے والی تیزی کی بدولت آج مقامی سطح پر آئی ٹی، دھات، ریئلٹی، ٹیک اور کموڈٹیز سمیت 12 زمروں میں خریداری دیکھی گئی جس کی وجہ سے آج مسلسل چھٹے روز شیئر بازار گلزار رہا۔

بی ایس ای کا حساس انڈیکس سنسیکس 184.54 پوائنٹس یعنی 0.29 فیصد کے اضافے سے 63284.19 پوائنٹس کی نئی چوٹی پر پہنچ گیا اور نیشنل اسٹاک ایکسچینج (این ایس ای) کا نفٹی 54.15 پوائنٹس کے اضافے سے 18812.50 پوائنٹس پر پہنچ گیا۔ اسی طرح بی ایس ای مڈ کیپ بھی 0.62 فیصد اضافے سے 26,112.00 پوائنٹس اور اسمال کیپ 0.63 فیصد اضافے سے29,704.91 پوائنٹس پر پہنچ گیا۔

اس دوران بی ایس ای میں کل 3636 کمپنیوں کے حصص کا کاروبار ہوا جن میں سے 2073 میں خریداری ہوئی 1411 میں فروخت ہوئی۔ جبکہ 152 میں کوئی تبدیلی نہیں ہوئی۔ اسی طرح، این ایس ای میں، 23 کمپنیوں میں اضافہ ہوا جبکہ باقی 27 میں گراوٹ ہوئی۔

دسمبر سے شرح سود میں اضافے کا امکان

امریکی سینٹرل بینک فیڈر ریزرو کے چیئرمین جیروم پاول نے بدھ کے روز کہا کہ سینٹرل بینک دسمبر سے شرح سود میں اضافے کی رفتار کو کم کر سکتا ہے۔

تاہم، انہوں نے خبردار کیا کہ مہنگائی کے خلاف جنگ ابھی ختم نہیں ہوئی ہے۔ تجزیہ کاروں کا خیال ہے کہ پاول کے بیان سے سرمایہ کاروں کے لیے ایک مثبت اشارہ ملا ہے۔ نیز، ہفتوں کے مظاہروں کے بعد، توقع ہے کہ چین جلد ہی کووِڈ کی پابندیوں میں نرمی کا اعلان کرے گا۔

ان عوامل کی بدولت بین الاقوامی منڈیوں میں تیزی دیکھنے میں آئی۔ اس عرصے کے دوران برطانیہ کا ایف ٹی ایس ای 0.09، جرمنی کا ڈی اے ایکس 0.36، جاپان کا نکئی 0.92، ہانگ کانگ کا ہینگسینگ 0.75 اور چین کا شنگھائی کمپوزٹ 0.45 فیصد اضافے کے ساتھ بند ہوا۔

گھریلو شیئر بازار میں جاری تیزی کی بدولت روپیہ تین پیسے مضبوط ہوکر 81.68 فی ڈالر پر پہنچ گیا۔

ممبئی: درآمد کنندگان اور بینکروں کی فروخت کے ساتھ ہی گھریلو شیئر بازار میں جاری تیزی کی بدولت آج انٹر بینک کرنسی مارکیٹ میں روپیہ تین پیسے مضبوط ہوکر 81.68 فی ڈالر پر پہنچ گیا۔

وہیں پچھلے کاروباری دن روپیہ ایک پیسہ پھسل کر 81.71 روپے فی ڈالر پر رہا تھا۔

شروعاتی کاروبار میں روپیہ 10 پیسے گراوٹ کے ساتھ 81.81 فی امریکی ڈالر پر کھلا اور سیشن کے دوران خریداری کے دباؤ میں 81.83 روپے فی ڈالر کی نچلی سطح پر لڑھکر گیا۔ اگرچہ فروخت کے باعث یہ 81.61 روپے فی ڈالر کی بلند ترین سطح پر پہنچ گیا۔ آخر میں پچھلے سیشن کے 81.71 روپے فی ڈالر کے مقابلے تین پیسے اضافے کے ساتھ 81.68 روپے فی ڈالر پر پہنچ گیا۔

اردو صحافت کادو سو سالہ سفر بہت سے نشیب و فراز والا رہا، مگر بیش بہا قربانیوں اور صحافتی اصولوں پر چل کر ایک عظیم اور روشن تاریخ رقم کی ہے

ڈاکٹر یامین انصاری

اردو صحافت نے 27؍ مارچ 2022ء کو 200؍ سال مکمل کر لئے۔ یہ کوئی معمولی عرصہ نہیں ہے۔ اتنا ہی غیر معمولی اردو صحافت کا سفر بھی ہے۔ اردو صحافت نے یقیناً دو سو سال میں ایک عظیم اور شاندار تاریخ رقم کی ہے۔ یہ ہماری خوش قسمتی ہے کہ صحافت کے ایک طالب علم کی حیثیت سے اردو صحافت کی اس عظیم تاریخ میں اپنا ایک ادنیٰ سا کردار اداکر سکے۔ اگر ہم اس کے دو سو سالہ سفر کا جائزہ لیں تو معلوم ہوگا کہ اردو صحافت نے نہ صرف اس زبان کی خدمت اور آبیاری کی ہے، بلکہ ملک و قوم کے لئے ایثار و قربانی اور جذبہ حب الوطنی کو فروغ دینے میں پیش پیش رہی ہے۔

جد و جہد آزادی سے لے کر حصول آزادی تک اور اس کے بعد ملک کی تعمیر و ترقی تک اردو صحافت کی خدمات کو کبھی فراموش نہیں کیا جا سکتا۔ اردو صحافت نے ہمیشہ سیکولرازم، تفہیم ادیان، کثرت میں وحدت اور ہندوستان کی گنگا جمنی تہذیب کو فروغ دینے میں اہم کردار ادا کیا ہے۔

اردو صحافت کا کردار

اس میں کوئی شک نہیں ہے کہ اردو صحافت کا کردار زیادہ تر سیکولر ہی رہا ہے۔ اگر آزادی سے پہلے کا دور دیکھیں تو مسلم لیگ کی حمایت میں اردو صحافی کم ہی نظر آئیں گے۔ جس وقت مسلمانوں کا ایک طبقہ مسلم لیگ سے وابستہ ہو گیا تھا، اس وقت بھی بیشتر اردو صحافی یا اخبارات، چاہے وہ کلکتہ کا آزاد ہند ہو، چاہے وہ انقلاب ہو، چاہے وہ دہلی سے الجمعیت ہو، یا لاہور سے زمیندار ہو یا دوسرے اخبارات ہوں، ان کا کردار قومی یکجہتی والا ہی رہا۔ وہ مہاتما گاندھی کے ساتھ رہے، مولانا آزاد کے ساتھ رہے۔

خود مولانا آزاد کا البلاغ ہو یا الہلال، انھوں نے ہندوستان کی جد و جہد آزادی کے دوران جو ذہن سازی کی، اس نے مسلمانوں کی ایک ایسی نسل تیار کی، جس نے جنگ آزادی میں بڑھ چڑھ کر حصہ لیا اور ہندوستان کی تعمیر و ترقی میں بھرپور کردار ادا کیا۔ اس سے پہلے مولوی محمد باقر نے اپنے ’دہلی اردو اخبار‘ میں 1857ء کی بغاوت کا آنکھوں دیکھا حال پیش کرنے کی کوشش کی۔

ہندوستان کی بغاوت کو انگریز حکمرانوں نے غدر قرار دے کر ایک اشتہار چھاپا، اسے جامع مسجد کے دروازوں اور کئی نمایاں مقامات پر چسپاں کیا۔ مولوی محمد باقر نے اس اشتہار کا دندان شکن جواب دیا۔ اس طرح وہ حاکم انگریزوں کی نگاہوں میں کھٹکنے لگے۔ مولوی محمد باقر کو گرفتار کیا گیا اور فرنگی جاسوسی محکمہ کے انچارج کیپٹن ہڈسن کے سامنے پیش کیا گیا، جس کے حکم سے انہیں 16؍ستمبر 1857ء کو دہلی میں شہید کردیا گیا۔ اس طرح اردو کے پہلے صحافی نے جام شہادت نوش کیا اور حب الوطنی کے محاذ کی قربان گاہ پر اردو صحافت کے پہلے قوم پرور اور محب وطن کی قربانی ہوئی۔ بقول شاعر؎

لاکھ کہتے رہیں ظلمت کو نہ ظلمت لکھنا
ہم نے سیکھا نہیں پیارے بہ اجازت لکھنا

اردو کا پہلا اخبار

ہم سب جانتے ہیں کہ اردو کا پہلا اخبار ’جام جہاں نما‘ 27؍ مارچ 1822ء کو کولکاتہ سے جاری ہوا تھا۔ اس کے مالک ہری ہردت اور مدیر سدا سکھ لال تھے۔ اس کے بعد بھی لا تعداد غیر مسلم صحافی اردو صحافت کے فروغ اور اس کو پروان چڑھانے میں پیش پیش رہے۔ اس کی ایک طویل فہرست ہے، جس پر تفصیل سے اور علیحدہ سے گفتگو کی جا سکتی ہے۔

آج بھی ملک کا مقبول ترین اخبار ’انقلاب‘ ہو یا ’روزنامہ سہارا‘ یا پھر ای ٹی وی نیٹ ورک، برادران وطن اردو صحافت کے فروغ میں اپنا بھر پور تعاون پیش کر رہے ہیں۔ لہذا ہم اردو کو کسی مذہبی یا مخصوص دائرے میں قید نہیں کر سکتے۔ یہ در اصل اس ملک کی زبان ہے، اس ملک کے لوگوں کی زبان ہے، اس ملک کے ہر باشندے کی زبان ہے، یہی وہ زبان ہے جو شمال سے لے کر جنوب تک اور مشرق سے لے کر مغرب تک بولی اور پڑھی لکھی جاتی ہے۔ اردو صحافت کے دائرے کو بھی ہمیں اسی وسیع تناظر میں دیکھنا چاہئے۔

اپنے دو سو سالہ سفر میں اردو صحافت نے کتنے نشیب و فراز دیکھے، کیسے کیسے حالات کا سامنا کیا، اردو صحافیوں نے کتنی صعوبتیں برداشت کیں، اپنی جانوں کے نذرانے پیش کئے، ملک و قوم کی بے لوث خدمت انجام دی اور ملک کے آئین کی پاسداری کرتے ہوئے اقدار و روایات کو کبھی پامال نہیں ہونے دیا۔ غرض یہ کہ اردو صحافت اپنے اندر ایک روشن تاریخ سمیٹے ہوئے ہے۔ اردو صحافت کی انہیں خدمات کے اعتراف میں ملک بھر میں پورے سال مختلف مقامات پر جشن کا سلسلہ جاری رہا۔ دہلی، کلکتہ، حیدرآباد، پٹنہ،ممبئی وغیرہ میں مختلف پروگرام منعقد کئے گئے۔

اردو صحافت کا دو سو سالہ جشن

اس سلسلے میں 30؍ مارچ 2022ء کو دہلی کے انڈیا اسلامک کلچرل سینٹر میں ایک بڑی تقریب کا اہتمام کیا گیا۔ جس میں ملک کی مقتدر اور معتبر شخصیات نے اردو صحافت کی خدمات کا اعتراف کیا۔ اسی طرح مغربی بنگال اردو اکیڈمی نے بھی پوری شان و شوکت کے ساتھ اردو صحافت کا دو سو سالہ جشن منایا۔

دہلی میں واقع غالب اکیڈمی نے بھی اسی سلسلے میں ایک تقریب کا اہتمام کیا۔ مختلف یونیورسٹیوں، اداروں اور تنظیموں کے زیر اہتمام بھی مختلف پروگرام اور سیمینار وغیرہ کا انعقاد کیا گیا۔ اخبارات، رسائل اور جرائد میں لاتعداد مضامین قلم بند کئے گئے اور یہ سلسلہ ہنوز جاری ہے۔ ان میں سب سے پر وقار اور اہم تقریب حال ہی میں مولانا آزاد نیشنل اردو یونیورسٹی کے شعبہ صحافت نے منعقد کی۔

اس میں ملک بھر سے نہ صرف اردو صحافیوں کو شامل کیا گیا، بلکہ دیگر زبانوں کے اہم ترین صحافیوں نے بھی شرکت کرکے نہ صرف اردو اور اردو صحافت پر تبادلہ خیال کیا، بلکہ مجموعی طور پر اردو صحافت کے ’ماضی ، حال اور مستقبل‘ اور موجودہ دور میں صحافت کے کردار پر بحث و مباحثہ کیا گیا۔

اُردو صحافت کی دو سو سالہ تاریخ

’کاروانِ اُردو صحافت‘ کے عنوان سے 13، 14؍ اور 15؍ نومبر کو منعقد سہ روزہ عالمی جشن اُردو صحافت میں ملک بھر کے سنجیدہ، فعال، وسیع تجربے کے حامل اور صحافت کو صحافتی معیارات پر برتنے والے اہل علم و قلم کی گفتگو نے اس جشن میں چار چاند لگا دئیے۔ سبھی نے اس بات کا اعتراف کیا کہ اُردو صحافت کی دو سو سالہ تاریخ واقعی ملک کی گنگا جمنی تہذیب کو پروان چڑھانے اور شجاعت و قربانی کی مثال قائم کرنے والی تاریخ رہی ہے۔

اگر ہم دیکھیں تو زندگی کا کوئی بھی شعبہ صحافت کے اثرات سے محفوظ نہیں ہے۔ اردو صحافت نے بھی ملک اور زندگی کے ہر شعبے کو متاثر کیا ہے۔ یہ اردو صحافت ہی ہے جس نے ہمیشہ حقیقی تناظر میں حق اورسچ کو پیش کرنے کو ہی ترجیح دی، جو دراصل حقیقی صحافت ہے۔

باشعور سماج کی تعمیر صحافت کی اہم ذمہ داری ہے، معاشرے کو ظلم و استبداد کے اندھیروں سے نکال کر روشنی سے متعارف کرنے کا نام ہے صحافت ہے، صحافت قوموں کی فکر سازی اور نظریاتی تبدیلی میں ایک کارگر وسیلے کا کام کرتی ہے، قوموں کے عروج و زوال میں صحافت کا اہم رول ہوتا ہے، عوامی ذہن سازی اور فکر سازی میں صحافت کا کردارنا قابل فراموش رہا ہے۔ معلومات پہنچانے میں حقیقت بیانی ،سچ جھوٹ، صحیح غلط، خبر کے تمام ممکنہ زاویوں اور امکانات پر روشنی ڈالنا صحافت کا خاصہ ہوتا ہے۔

دو سو سالہ تاریخ میں اردو صحافت

اپنی دو سو سالہ تاریخ میں اردو صحافت نے ان تمام رموز و نکات کا خیال رکھا اور صحافت کے ان اصولوں کو کبھی پامال نہیں ہونے دیا۔ آج بھی جبکہ میڈیا کا ایک بڑا طبقہ نفرت کا آتش فشاں بن چکا ہے، نفرت پھیلانے میں پیش پیش ہے۔ اس کے تحت مسلمانوں کو نشانہ بنایا جارہا ہے، اسلاموفوبیا سے متاثر ہو کر میڈیا میں جھوٹ اور پروپیگنڈہ پر مبنی خبریں چلائی جا رہی ہیں اور بے بنیاد کہانیاں سوشل میڈیا پر پھیلائی جارہی ہیں۔ یہی نہیں، کبھی مبینہ ’لو جہاد‘، کبھی ’یوپی ایس سی جہاد‘ اور کبھی ’کورونا جہاد‘ جیسے عنوانات سے مباحثے ہورہے ہیں ۔ لہذا ایسے حالات میں جب موجودہ میڈیا اپنا فریضہ ادا کرنے میں ناکام ہے اردو صحافت اپنا منصبی کردار اور فرض ادا کرکے صحافت اور ملک کی خدمت میں مصروف ہے۔
بقول افتخار عارف ؎

وقت شاہد ہے کہ ہر بیعت فاسق کے خلاف
خط تنسیخ جو کھنچتا ہے، وہ ہم کھینچتے ہیں

(مضمون نگار انقلاب دہلی کے ریزیڈنٹ ایڈیٹر ہیں) yameen@inquilab.com

پنجاب کے لوگوں نے خوابوں میں بھی نہیں سوچا تھا کہ ایک دن ان کے گھروں کا بجلی کا بل صفر ہو جائے گا لیکن اب یہ سچ ثابت ہو گیا ہے

چنڈی گڑھ: پنجاب کے وزیر اعلی بھگونت مان نے کہا ہے کہ آنے والے مہینوں میں ریاست کے 95 فیصد سے زیادہ خاندانوں کا بجلی کا بل صفر ہو جائے گا جس سے انہیں بڑی راحت ملے گی۔

مسٹر مان نے ہفتہ کو یہاں کہا کہ لوگوں کو ہر بل پر 600 یونٹ مفت بجلی فراہم کی جا رہی ہے۔ جس سے پہلی بار 86 فیصد گھرانوں کو بجلی کا بل صفر ہو گیا ہے اور آنے والے مہینوں میں 95 فیصد سے زائد گھرانوں کو مفت بجلی کا یہ فائدہ گھریلو صارفین کے لیے ایک بڑی راحت ہے۔ جنہیں اب تک ہر ماہ بجلی کے بلوں کی مد میں بہت زیادہ رقم خرچ کرنی پڑتی تھی۔

انہوں نے کہا کہ ہم جو بھی وعدہ کرتے ہیں اسے پورا بھی کرتے ہیں۔ صاف نیت کے ساتھ کیے گئے اعمال کے نتائج ہمیشہ اچھے ہوتے ہیں۔ پنجابیوں نے خوابوں میں بھی نہیں سوچا تھا کہ ایک دن ان کے گھروں کا بجلی کا بل صفر ہو جائے گا لیکن اب یہ سچ ثابت ہو گیا ہے۔ اب بہت سے خاندانوں نے بجلی کی بچت بھی شروع کر دی ہے، تاکہ وہ 600 یونٹ مفت بجلی کا فائدہ اٹھا سکیں۔ اس سے بجلی کی کھپت میں بھی کمی آئے گی۔

بجلی کی پیداوار بڑھانے کا بڑا اعلان

ریاست میں بجلی کی پیداوار بڑھانے کا بڑا اعلان کرتے ہوئے انہوں نے کہا کہ پی ایس پی سی ایل۔ جھارکھنڈ میں الاٹ کی گئی پچواڑہ کے قریب کان آپریشنل ہو گئی ہے اور دسمبر کے پہلے ہفتے میں اس کان سے پنجاب کو کوئلہ سپلائی کیا جائے گا، جس سے پنجاب میں بجلی کی پیداوار میں مزید اضافہ ہو گا۔ یہ کان 2015 سے بند پڑی تھی اور ہماری حکومت نے اس کان کو شروع کرنے کے لیے بھرپور کوششیں کیں جس کے نتیجے میں اب کوئلے کی سپلائی شروع ہونے جا رہی ہے۔

وزیر اعلیٰ نے سرکاری عمارتوں کو بجلی کی فراہمی کے حوالے سے خود کفیل بنانے کے لیے کہا کہ تمام سرکاری عمارتوں میں سولر پینل لگائے جائیں گے جس سے حکومت پر بجلی کے بلوں کا بوجھ بھی کم ہوگا اور بہت زیادہ رقم کی بچت ہوگی۔

اس موقع پر وزیر توانائی ہربھجن سنگھ ای ٹی او، چیف منسٹر کے ایڈیشنل چیف سکریٹری اے کے۔ وینو پرساد، پی ایس پی سی ایل بلدیو سنگھ سرن، چیئرمین کم منیجنگ ڈائریکٹر اور دیگر عہدیدار بھی موجود تھے۔