ممبئی: مہاراشٹر کے نائب وزیر اعلی دیویندر فڑنویس کے خلاف مقدمہ درج کرانے والے وکیل اور سماجی کارکن ستیش اوئیکے کے خلاف مکوکا کے تحت مقدمہ درج کیا گیا ہے۔ اس معاملے میں سماجی کارکن اوئیکے کے علاوہ 6 دیگر کے خلاف بھی ایف آئی آر درج کی گئی ہے۔ ان 6 افراد میں اوئیکے کے بھائی، بیوی اور دیگر رشتہ دار شامل ہیں۔

ناگپور امپرومنٹ ٹرسٹ کے ڈویژنل انجینئر پنکج پاٹل نے اوئیکے کے خلاف شکایت درج کرائی ہے۔ اس کے بعد منگل کو مہاراشٹر کنٹرول آف آرگنائزڈ کرائم ایکٹ، 1999 (مکوکا) کے تحت اوئیکے اور چھ دیگر کے خلاف مقدمہ درج کیا گیا۔ الزام ہے کہ ان ساتوں نے مل کر زمین کے جعلی دستاویزات بنائے، جو اصل میں وٹھل دھاولے کی ملکیت تھی۔ اس وقت اس زمین کی ملکیت 1990 کی دہائی کے اواخر سے شہری اتھارٹی کے پاس ہے۔

اطلاعات کے مطابق سماجی کارکن ستیش اوئیکے ممبئی کی آرتھر جیل میں بند ہیں۔ اوئیکے نے مہاراشٹر کے ڈپٹی سی ایم دیویندر فڑنویس کے خلاف الیکشن کمیشن سے شکایت کی تھی۔ انہوں نے مقامی عدالت میں عرضی داخل کرتے ہوئے کہا تھا کہ 2014 کے انتخابی حلف نامہ میں فڑنویس نے فوجداری مقدمات کی معلومات چھپائی تھیں۔

اس کے علاوہ اوئیکے نے جسٹس بی ایچ لویا کی پراسرار موت پر شکوک و شبہات پیدا کرتے ہوئے ایس آئی ٹی جانچ کا مطالبہ کیا تھا۔ سابق جسٹس لویا سہراب الدین شیخ کے فرضی انکاؤنٹر کیس کی سماعت کر رہے تھے۔ موجودہ مرکزی وزیر داخلہ امت شاہ بھی اس کیس میں ملزم تھے۔ لویا کی موت 2014 میں شادی کی تقریب میں شرکت کے دوران ہوئی تھی۔

ہندوستان کا پروقار مشن چندریان-3 چاند کی طرف اپنے آخری مدار میں پہنچ گیا ہے۔ یہ وہ لمحہ ہے جہاں سے چندریان کے سفر میں اہم لیکن فیصلہ کن تبدیلیاں رونما ہونے والی ہیں۔ اسرو کے مطابق اس مدار میں پہنچنے کے بعد وہ لینڈر کو الگ کرنے کا عمل شروع کریں گے۔

ٹوئٹ میں کہا گیا ہے کہ آج انجن کو کامیابی سے آن کرنے کے بعد اس نے چاند کی طرف جانے والا مدار مکمل کر لیا ہے۔ اب اس کا فاصلہ 153 کلومیٹر رہ گیا ہے۔ یہاں سے لینڈر کو الگ کیا جائے گا اور 17 اگست سے ایک اور چکر مکمل کرنے کے بعد اس مشن کا کیریئر اپنا الگ سفر شروع کرے گا۔ اگر سب کچھ ٹھیک رہا تو لینڈر اپنے شیڈول کے مطابق 23 اگست کو چاند پر سافٹ لینڈنگ کرے گا۔

مرکزی سائنس اور ٹیکنالوجی کے وزیر جتیندر پرساد نے کہا ہے کہ ہم چاند کے بہت قریب پہنچ گئے ہیں۔ اسرو کے سائنسدانوں کا کہنا ہے کہ اگر سب کچھ ٹھیک رہا تو آنے والے دنوں میں ان کا لینڈر چاند پر ہوگا۔ اس کامیابی سے چاند کے سفر کے لیے مزید دروازے کھل جائیں گے۔

اگر یہ مشن کامیابی سے مکمل ہوجاتا ہے تو ہندوستان یہ کارنامہ انجام دینے والا دنیا کا چوتھا ملک بن جائے گا۔ یہی نہیں، ہندوستان دنیا کا پہلا ملک ہوگا جس نے بغیر کسی بھاری راکٹ کے اس مشن کو پورا کیا ہے۔ اس کے علاوہ ایک اور کارنامہ بھارت کے کھاتے میں آئے گا جس کے مطابق بھارت سب سے کم لاگت پر اس مشن کو انجام دینے والا ملک ہوگا۔

نئی دہلی: بھارت رتن سابق وزیر اعظم اٹل بہاری واجپئی کی 5ویں برسی کے موقع پر ملک نے انہیں زبردست خراج عقیدت پیش کیا۔ صدر دروپدی مرمو، نائب صدر جگدیپ دھنکھڑ، وزیر اعظم نریندر مودی، لوک سبھا اسپیکر اوم برلا، وزیر دفاع راج ناتھ سنگھ، وزیر داخلہ امت شاہ اور قومی جمہوری اتحاد (این ڈی اے) کے دیگر رہنماؤں نے اپنے پیارے لیڈر کوراج گھاٹ کے قریب ان کی سمادھیسدیو اٹل پر خراج عقیدت پیش کیا۔ اس موقع پر سابق وزیراعظم کے اہل خانہ بھی موجود تھے۔

قبل ازیں وزیر اعظم مودی نے ٹوئٹ کرکے آنجہانی واجپئی کو ان کی برسی پر خراج عقیدت پیش کیا۔ وزیر اعظم مودی نے کہا- واجپئی کی قیادت سے ہندوستان کو بہت فائدہ ہوا ہے۔ انہوں نے کئی شعبوں میں ہندوستان کی ترقی کو فروغ دینے اور اسے 21ویں صدی تک لے جانے میں اہم کردار ادا کیا۔ وزیر اعظم نے کہا، ’’ہندوستان کے 140 کروڑ عوام کی طرف سے، میں اٹل جی کو ان کی برسی پر خراج عقیدت پیش کرتا ہوں۔‘‘

اپنے ٹوئٹ میں، برلا نے سابق وزیر اعظم کی ایک نظم کی چند سطریں پڑھیں اور انہیں خراج عقیدت پیش کیا ’’ سابق وزیر اعظم اٹل بہاری واجپائی کو ان کی برسی پر خراج عقیدت۔ ان کی مقدس یادیں ہمارے لیے مشعل راہ ہیں۔‘‘ وزیر دفاع راج ناتھ سنگھ نے کہا، ’’میں اٹل جی کو ان کی برسی پر یاد کرتا ہوں اور سلام کرتا ہوں۔ انہوں نے ملک کو ترقی اور گڈ گورننس کی راہ پر گامزن کیا۔ ان کو میرا دلی خراج عقیدت۔

چنڈی گڑھ: ہریانہ حکومت میں وزیر سندیپ سنگھ کے خلاف جنسی ہراسانی کا مقدمہ درج کرنے والی جونیئر خاتون کوچ کو معطل کر دیا گیا ہے۔ محکمہ کھیل کے ڈائریکٹر یاشندر سنگھ نے معطلی کا حکم جاری کیا ہے۔ خاتون کوچ کا دعویٰ ہے کہ حکام اس پر مسلسل دباؤ ڈال رہے تھے کہ وہ اس معاملے میں وزیر اعلیٰ منوہر لال کھٹر کا نام نہ گھسیٹے۔ اپنا موقف پیش کرتے ہوئے خاتون کوچ نے کہا کہ محکمہ کھیل نے یہ حکم 11 اگست 2023 کو جاری کیا تھا لیکن محکمہ کے ملازمین تک اسے پیر کی رات تک پہنچایا گیا۔ کوچ نے مزید کہا کہ انہیں بغیر کسی وارننگ کے معطل کر دیا گیا ہے اور حکام نے بھی معطلی کے حکم کی کوئی تسلی بخش وجہ نہیں بتائی۔

جونیئر خاتون کوچ نے بتایا کہ محکمہ کھیل کے حکام نے گزشتہ 4 ماہ سے ان کی اسٹیڈیم میں کوچنگ پر پابندی عائد کر رکھی ہے جس کی وجہ سے ان کا اسپورٹس کیریئر مکمل طور پر تباہ ہو کر رہ گیا ہے۔

خیال رہے کہ گزشتہ سال 26 دسمبر کو جونیئر خاتون کوچ نے اس وقت کے وزیر کھیل سردار سندیپ سنگھ پر چھیڑ چھاڑ کا الزام لگایا تھا۔ اس کے تین دن بعد انہوں نے اس معاملے کی شکایت چنڈی گڑھ پولیس سے کی تھی۔ وہیں، 31 دسمبر کو پولیس نے وزیر کے خلاف مقدمہ درج کیا تھا۔ ایف آئی آر درج ہونے کے بعد وزیر کھیل سندیپ سنگھ سے کھیل کا محکمہ چھین لیا گیا۔ چنڈی گڑھ پولیس کیس درج ہونے کے سات ماہ بعد بھی اس معاملے میں چارج شیٹ داخل نہیں کر پائی ہے۔

ہریانہ حکومت کے وزیر سندیپ سنگھ اب تک اپنے اوپر لگائے گئے جنسی استحصال کے الزامات کو ‘جھوٹا اور بے بنیاد’ قرار دیتے رہے ہیں۔ تاہم، جب چنڈی گڑھ پولیس نے اس معاملے میں سندیپ کا پولی گراف ٹیسٹ کرانے کی اجازت مانگی تو انہوں نے رضامندی دینے سے انکار کر دیا۔ جب سندیپ کے وکیل سے پوچھا گیا کہ انہوں نے ٹیسٹ سے انکار کیوں کیا؟ تو جواب میں انہوں نے کہا کہ پولی گرافی ٹیسٹ سے ثبوت حاصل نہیں ہوتے بلکہ اس سے صرف تناؤ کا پتہ لگایا جاتا ہے، جواب کی تصدیق نہیں ہوتی۔ اس کے علاوہ اس کا مقصد صرف تحقیقات میں تاخیر اور سندیپ سنگھ کو ہراساں کرنا ہے۔

شملہ: ہماچل پردیش میں شدید بارش اور لینڈ سلائڈنگ نے چہار سو تباہی مچائی ہوئی ہے۔ شملہ کے حالات سب سے زیادہ خراب نظر آ رہے ہیں۔ شملہ میں تباہ شدہ شیو مندر کے ملبے سے ایک اور لاش برآمد ہوئی ہے۔ اس کے علاوہ شام کے وقت کرشنا نگر علاقہ میں لینڈ سلائیڈنگ کی وجہ سے دو لوگوں کی جان چلی گئی۔ اس کے ساتھ ہی ریاست میں بارش سے متعلقہ واقعات میں مرنے والوں کی تعداد بڑھ کر 56 ہو گئی ہے۔ کرشنا نگر علاقہ میں تقریباً آٹھ مکانات منہدم ہو گئے اور ایک سلاٹر ہاؤس ملبے تلے دب گیا۔

شملہ کے سپرنٹنڈنٹ آف پولیس سنجیو کمار گاندھی کے مطابق تازہ لینڈ سلائڈنگ کے بعد دو لاشیں نکالی گئی ہیں۔ انہوں نے کہا کہ پیر سے اب تک کل 19 لاشیں برآمد کی گئی ہیں۔ ان میں سے 12 سمر ہل میں شیو مندر کے مقام سے 5 پھاگلی میں اور دو کرشنا نگر سے برآمد ہوئے ہیں۔ شیو مندر کے مقام پر اب بھی 10 سے زائد افراد کے پھنسے ہونے کا خدشہ ہے۔ موسم کی خرابی کے پیش نظر آج ریاست کے تمام اسکول اور کالج بند ہیں۔

ریاست میں مانسون کے دوران بادل پھٹنے اور لینڈ سلائیڈنگ کے کل 170 واقعات پیش آئے ہیں۔ اس دوران تقریباً 9600 مکانات کو جزوی یا مکمل نقصان پہنچا۔ چیف منسٹر سکھوندر سنگھ سکھو نے منگل کو ایک جائزہ میٹنگ طلب کی۔ جس میں انہوں نے بجلی، واٹر سپلائی سکیموں کو بحال کرنے کا حکم دیا۔ وزیر اعلیٰ نے کہا کہ گزشتہ چند دنوں میں ہونے والی بارشوں میں تقریباً 157 فیصد اضافے کی وجہ سے پوری ریاست میں بھاری نقصان ہوا ہے۔

سی ایم سکھو نے حکام کو ہدایت دی کہ طوفانی بارشوں سے متاثر ہونے والی بجلی اور پانی کی سپلائی اسکیموں کو تیزی سے بحال کیا جائے۔ وزیر اعلیٰ نے شملہ میں نکاسی آب کے نظام کو مضبوط بنانے اور پرانے نالوں کی تزئین و آرائش پر زور دیا۔ انہوں نے اس حوالے سے تفصیلی پراجیکٹ رپورٹ تیار کرنے کا بھی حکم دیا۔

اسٹیشن ماسٹر جوگندر سنگھ کے مطابق شملہ سے تقریباً 6 کلومیٹر پہلے سمر ہل کے قریب کنکریٹ کا پل مکمل طور پر تباہ ہو چکا ہے۔ اس ہیریٹیج ریل روٹ کو 5 یا 6 مقامات پر نقصان پہنچا اور سب سے زیادہ نقصان شملہ اور شوگھی کے درمیان ہوا ہے۔ ریاست کے 12 میں سے 11 اضلاع میں 857 سڑکوں پر ٹریفک بند ہے اور 4,285 ٹرانسفارمر اور 889 واٹر سپلائی اسکیموں میں خلل پڑا ہے۔ ریاستی ایمرجنسی آپریشن سینٹر کے مطابق، 22 جون سے 14 اگست تک مانسون کے موسم میں ریاست کو 7,171 کروڑ روپے کا نقصان ہوا ہے۔

نئی دہلی: دہلی میں پچھلے دو دنوں سے مسلسل موسلادھار بارش کی وجہ سے منگل کو جمنا ندی کی آبی سطح میں اضافہ درج کیا گیا۔ لگی ہے۔ جمنا کے پانی کی سطح 205.35 میٹر کے خطرے کے نشان پر پہنچ گئی تھی۔ حالانکہ صبح 7 بجے پانی کی سطح خطرے کے نشان سے نیچے پہنچ گئی تھی۔ جمنا کے پانی کی سطح کل دیر رات خطرے کے نشان سے تجاوز کر گئی تھی۔ اس بار جمنا کی سب سے زیادہ پانی کی سطح 205.56 میٹر تک چلی گئی۔ جبکہ خطرے کا نشان 205.33 میٹر ہے۔ اس وقت جمنا اس کے نیچے بہہ رہی ہے۔

سنٹرل واٹر کمیشن کے ایک اہلکار کے مطابق پرانے ریلوے پل کے قریب جمنا کی آبی سطح منگل کی سہ پہر 3 بجے 204.50 میٹر کے انتباہی نشان کو عبور کر گئی اور رات 10 بجے تیزی سے بڑھ کر 205.39 میٹر تک پہنچ گئی۔ انہوں نے بتایا کہ صبح 5 بجے تک پانی کی سطح 205.50 میٹر تک پہنچنے کی توقع ہے اور دن کے وقت اس میں مزید اضافہ متوقع ہے۔ اہلکار نے کہا، "تاہم، دہلی میں دریا کے پانی کی سطح 206.00 میٹر سے اوپر نہیں بڑھے گی تاکہ انخلا کا کام شروع کیا جا سکے، بشرطیکہ پہاڑی علاقوں میں شدید بارش نہ ہو۔”

ہریانہ کے جمنا نگر ضلع میں ہتھینی کنڈ بیراج پر رات 9 بجے تقریباً 27000 کیوسک کا بہاؤ ریکارڈ کیا گیا، جسے مانسون کے موسم میں معتدل سمجھا جاتا ہے۔ دہلی حکومت کے محکمہ آبپاشی اور فلڈ کنٹرول کے ایک اہلکار نے بتایا کہ دریا کے کنارے کچھ مقامات پر نچلے درجے کا سیلاب آسکتا ہے، لیکن سنگین صورتحال کا کوئی امکان نہیں ہے۔ ہماچل پردیش میں اتوار سے موسلادھار بارش جاری ہے۔ اس کی وجہ سے کم از کم 56 افراد ہلاک ہو چکے ہیں۔

دہلی کو جولائی کے وسط میں پانی کے جماؤ اور سیلاب سے نمٹنا پڑا۔ جمنا کا پانی 13 جولائی کو 208.66 میٹر کی ریکارڈ سطح پر پہنچ گیا تھا۔ دہلی میں سیلاب کی وجہ سے 27 ہزار سے زائد لوگوں کو محفوظ مقامات پر منتقل کیا گیا۔ سیلاب سے کروڑوں روپے کا نقصان ہوا ہے۔ دریا 10 جولائی سے لگاتار آٹھ دن تک 205.33 میٹر کے خطرے کے نشان سے اوپر بہہ رہا ہے۔ دہلی میں جمنا کے قریب نشیبی علاقوں میں تقریباً 41000 لوگ رہتے ہیں۔ ان علاقوں کو حساس سمجھا جاتا ہے۔

دہلی کے وزیر اعلی اروند کیجریوال نے مرکزی حکومت پر دہلی کے لوگوں کے حقوق چھیننے کا الزام لگاتے ہوئے ان کے جمہوری حقوق واپس دلانے کا یقین دلایا۔

مسٹر کیجریوال نے منگل کو چھترسال اسٹیڈیم میں قومی پرچم لہرایا اور مرکزی حکومت کی طرف سے چھینے گئے دہلی کے لوگوں کے جمہوری حقوق کو بحال کرنے کا یقین دلایا۔ انہوں نے کہا کہ پہلے آرڈیننس لا کر اور پھر قانون بنا کر دہلی کے لوگوں کے حقوق چھین لیے گئے۔ سپریم کورٹ میں یہ لڑائی لڑیں گے اور حقوق واپس دلاکر رہیں گے۔ دہلی کے لوگ فکر نہ کریں، آپ کا مفت بجلی-پانی، مفت اور اچھی تعلیم-صحت اور خواتین کے لیے مفت بس سفر جاری رہے گا۔ انہوں نے یہ بھی کہا کہ ہندوستان صرف تقریر کرنے سے وشو گرو نہیں بنے گا۔ اگر ہندوستان کو عالمی گرو بنانا ہے تو ملک کے ہر طبقے کو مفت تعلیم، صحت، بجلی اور پانی کا انتظام کرنا ہوگا۔

انہوں نے کہا کہ کچھ دن پہلے دہلی میں شدید سیلاب آیا تھا۔ دہلی کی تاریخ میں پہلی بار جمنا کے پانی کی سطح بہت بڑھ گئی تھی۔ دہلی کے تمام لوگوں نے دہلی حکومت کے ساتھ مرکزی حکومت کی مدد سے اس آفت کا سامنا کیا اور ہم سب کامیاب رہے۔ کچھ لوگوں کے گھروں کو نقصان پہنچا، ان کا سامان تباہ ہو گیا۔ حکومت کی جانب سے ہم نے ہر ممکن مدد فراہم کرنے کی کوشش کی۔

وزیراعلیٰ نے کہا کہ آج یوم آزادی ہے، خوشی کا موقع ہے، لیکن ذہن کے ایک کونے میں ایک چھوٹی سی اداسی ہے اور ذہن بہت پریشان ہے۔ آج ملک کے کچھ حصوں میں ایک بھائی دوسرے بھائی سے لڑ رہا ہے۔ منی پور جل رہا ہے۔ منی پور میں ایک برادری کے لوگ دوسری برادری کے لوگوں سے لڑ رہے ہیں اور ایک دوسرے کو مار رہے ہیں، گھروں اور دکانوں کو جلا رہے ہیں، خواتین کے ساتھ بدتمیزی کر رہے ہیں۔ دونوں برادریوں کے لوگ پریشان ہیں۔ اب تک جو لوگ مل جل کر امن سے رہتے تھے وہ آپس میں لڑ رہے ہیں۔ یہاں ہریانہ میں بھی دو برادریاں آپس میں لڑ رہی ہیں۔ اس لڑائی میں کسی کمیونٹی کو فائدہ نہیں ہو رہا ہے۔ ہم اکیسویں صدی میں جی رہے ہیں۔ یہ سائنس اور ٹیکنالوجی کا دور ہے۔ دنیا کہاں سے کہاں پہنچ گئی اور ہم آپس میں لڑتے رہ گئے۔ اگر ہم آپس میں لڑتے رہیں گے تو ہندوستان وشو گرو کیسے بنے گا؟

انہوں نے کہا کہ ملک کے کئی حصوں میں کئی کئی گھنٹے بجلی نہیں آتی ہے۔ دنیا کا کوئی ایسا ترقی یافتہ ملک نہیں جہاں عوام کو 24 گھنٹے بجلی نہ ملتی ہو۔ جب تک ملک میں سات آٹھ گھنٹے بجلی کی کٹوتی رہے گی، ہمارا ملک کبھی وشو گرو نہیں بن سکتا۔ بڑی تقریریں ہو سکتی ہیں۔ 24 گھنٹے بجلی نہیں ہوگی تو صنعت کیسے ترقی کرے گی، کسان کیسے بوائی کرے گا۔ اگر ہمیں وشو گرو بننا ہے ملک بھر میں 24 گھنٹے بجلی کا انتظام کرنا ہوگا۔

چیف جسٹس آف انڈیا ڈی وائی چندرچوڑ نے 15 اگست کو اپنی ایک تقریر کے دوران کہا کہ لائن میں کھڑے ہر ایک شخص تک انصاف پہنچنا ضروری ہے۔ ساتھ ہی ملک میں عدالت کے بنیادی ڈھانچے میں وسیع تبدیلی کی بھی ضرورت ہے۔ چیف جسٹس آف انڈیا نے اپنے خطاب میں منمانے ڈھنگ سے ہو رہی گرفتاریوں اور ملکیتوں کو منہدم کیے جانے کا تذکرہ بھی کیا۔

دراصل چیف جسٹس ڈی وائی چندرچوڑ نے نئی دہلی میں وکلا کی ایک یومِ آزادی تقریب میں اپنی باتیں رکھ رہے تھے۔ اس دوران انھوں نے کہا کہ "نظام انصاف کی طاقت انصاف فراہم کرنا ہے۔ کسی شخص کی منمانے ڈھنگ سے گرفتاری، انہدامی کارروائی کی دھمکی، ملکیتوں کو غیر قانونی طور سے قرق کیا گیا ہے تو انھیں سپریم کورٹ کے ججوں سے ہمدردی ملنی چاہیے۔” انھوں نے مزید کہا کہ "ہمارا آئین یہ یقینی کرنے کے لیے عدلیہ کے اہم کردار کا تصور کرتا ہے کہ حکومتی ادارے تشریح آئینی حدود کے اندر کام کریں۔ عدلیہ کے سامنے سب سے بڑا چیلنج انصاف تک پہنچنے میں رخنات کو ختم کرنا ہے۔ اس کے لیے عدالتی بنیادی ڈھانچے کو درست کرنے کی ضرورت ہے۔”

چیف جسٹس آف انڈیا ڈی وائی چندرچوڑ نے اپنے خطاب کے دوران واضح لفظوں میں کہا کہ ہمیں انصاف دینے کی عدالت کی صلاحیت میں اعتماد پیدا کرنا ہوگا۔ ہمیں یہ یقینی بنانا ہوگا کہ ہر ایک شخص کو انصاف ملے۔ ہمیں عدالت کے بنیادی ڈھانچے میں اصلاح کرنے کی ضرورت ہے۔ سبھی تین اعضا، یعنی عدلیہ، مقننہ اور ایگزیکٹیو تعمیر قوم کے لیے عام امر میں جڑے ہوئے ہیں۔

ہریانہ کے نوح تشدد کا ملزم بٹو بجرنگی منگل کے روز پولیس کی گرفت میں آ گیا۔ میوات سی آئی اے پولیس نے اسے 15 اگست کو فرید آباد سے گرفتار کیا۔ پہلے خبر آئی تھی کہ اسے پوچھ تاچھ کے لیے حراست میں لیا گیا ہے، لیکن تازہ ترین خبروں میں بتایا جا رہا ہے کہ بٹو بجرنگی کو نوح تشدد سے پہلے اشتعال انگیز ویڈیو جاری کرنے کے الزام میں گرفتار کیا گیا ہے۔

قابل ذکر ہے کہ بٹو بجرنگی کو اوشا ایڈیشنل پولیس سپرنٹنڈنٹ نوح کی شکایت پر درج ہوئے مقدمہ نمبر 413 مورخہ 15 اگست 2023 دفعہ 148، 149، 332، 353، 186، 395، 397، 506 تعزیرات ہند اور آرمس ایکٹ کے تحت گرفتار کیا گیا ہے۔ اب بٹو بجرنگی کو بدھ کے روز عدالت میں پیش کیا جائے گا۔

اس سے قبل بٹو بجرنگی نے ایک میڈیا چینل سے بات چیت میں دعویٰ کیا تھا کہ نوح میں شوبھا یاترا ک ے شورش پسندوں نے سازش کے تحت فساد کیا۔ بٹو نے بتایا کہ اسے کئی دنوں سے سوشل میڈیا پر جان سے مارنے کی دھمکی مل رہی تھی۔ اسے میوات آنے کو لے کر دھمکایا جا رہا تھا۔ اس لیے اس نے ویڈیو پوسٹ کر آنے کی بات کہی تھی۔ اسے نہیں پتہ تھا کہ شورش پسندوں نے اس طرح کی تیاری کر رکھی تھی۔

بٹو بجرنگی نے یہ بھی بتایا تھا کہ ہم نے وہاں امن کے ساتھ جلابھشیک کیا، ہمارے ساتھ بزرگ، خواتین اور بچے تھے۔ میرے ہاتھ میں کوئی اسلحہ نہیں تھا۔ جس کے ہاتھ میں اسلحہ ہوگا وہ لائسنس والا ہی ہوگا۔ جب پہاڑیوں سے فائرنگ ہونے لگی تب ہمارے لوگوں نے اسلحے نکالے۔ بہن بیٹیوں کی حفاظت کے لیے ہوائی فائرنگ کی گئی تھی، نہ کہ کسی کو مارا تھا۔ بٹو نے کئی لوگوں کے نام کا انکشاف کرتے ہوئے الزام لگایا کہ انھوں نے اسے جان سے مارنے کی دھمکی دی تھی۔

بٹو بجرنگی فرید آباد کا رہنے والا ہے۔ بٹو کا اصل نام راج کمار ہے۔ بٹو بجرنگی خود کو گئو رکشک بتاتا ہے۔ بٹو گئو رکشا بجرنگ فورس نامی تنظیم کا سربراہ ہے۔ اس تنظیم نے برج منڈل یاترا میں آنے کی اپیل والے پوسٹر تقسیم کیے تھے۔ بٹو بجرنگی کے خلاف نامزد ایف آئی آر درج ہے۔

’’میری فیملی کو پیسہ نہیں چاہیے۔ وہ صرف یہی چاہتے ہیں کہ میں گاؤں واپس لوٹ جاؤں۔‘‘ یہ بیان ہے بہار کے ایک مہاجر مزدور عمران علی کا جو 31 جولائی کو پیش آئے تشدد کے بعد خوف کے مارے گروگرام سے ہجرت کر گیا۔ 25 سالہ عمران علی تشدد کے دو ہفتے بعد اپنا سامان لینے کے لیے گروگرام لوٹا تھا۔ علی نے خبر رساں ایجنسی آئی اے این ایس کو بتایا کہ ’’میری فیملی نے مجھے کہا ہے کہ میں گروگرام میں کام نہ کروں اور فوراً لوٹ آؤں۔ کافی سمجھانے کے بعد بھی وہ نہیں مانے اور مجھ سے فوراً واپس لوٹنے کو کہا۔‘‘

31 جولائی کو نوح میں فرقہ وارانہ فساد بھڑک اٹھے تھے جس میں چھ لوگ مارے گئے، جبکہ 88 سنگین طور سے زخمی ہو گئے تھے۔ نوح ضلع میں وی ایچ پی کے ذریعہ منعقد ایک مذہبی جلوس کے دوران مبینہ پتھراؤ کے بعد مذہبی فساد بھڑک اٹھا تھا۔ نوح کے ایک مسلم باشندہ، جس کے گھر پر بلڈوزر چلا تھا، نے آئی اے این ایس کو بتایا کہ انھیں طویل مدت سے احساس تھا کہ بی جے پی کی مذہبی بیان بازی سے فسادات ہوں گے اور مسلمانوں کو نشانہ بنایا جائے گا۔ انھوں نے نام نہ شائع کرنے کی شرط پر کہا کہ ’’بیشتر ہندو یہ مانتے ہیں کہ نوح کے لوگ فسادات میں شامل تھے، جو کہ سچ نہیں ہے۔ ہندوؤں کی طرح ہم مسلمان بھی یکساں طور سے ہندوستانی ہیں۔‘‘ انھوں نے یاد دلایا کہ کیسے یاترا کے دوران ہندوؤں نے مسلمانوں کے خلاف نازیبا کلمات کا استعمال کیا تھا۔

واضح رہے کہ فرقہ وارانہ فسادات کے معاملے میں نوح پولیس نے اب تک 230 لوگوں کو حراست میں لیا ہے جبکہ گروگرام پولیس نے 79 لوگوں کو گرفتار کیا ہے۔ دونوں ہی مقامات پر حالات اب بھی معمول پر نہیں آئے ہیں۔ گروگرام میں رہنے والے ایک مسلم شخص کا کہنا ہے کہ ’’ہندو گروپ کھلے عام ہمارے خلاف نفرت پھیلا رہے ہیں۔ سینکڑوں لوگوں کے درمیان ہندو گروپ مسلمانوں کا بائیکاٹ کرنے، ہماری دکانوں سے کچھ بھی نہیں خریدنے اور مکان کرایہ پر نہیں دینے کا اعلان کر رہے ہیں۔ انھوں نے ہمارے کاروبار کو برباد کر دیا ہے اور سینکڑوں مسلمانوں نے گروگرام چھوڑ دیا ہے۔‘‘

ایک احمد خان نامی شخص نے گروگرام شہر چھوڑتے وقت کہا کہ ’’حالانکہ حالات معمول پر ہونے کے بعد ان میں سے کچھ واپس آ جائیں گے، لیکن فی الحال حالات خراب ہیں۔ پولیس اور انتظامیہ اپنے ہی ملک میں مسلمانوں کی حفاظت کرنے میں پوری طرح سے ناکام رہی۔‘‘ وہ مزید کہتے ہیں کہ ’’ہندو سوچتے ہیں کہ اس ملک میں سب کچھ ان کا ہے، یعنی پولیس، انتظامیہ اور اب سڑکیں بھی۔‘‘ احمد خان کا کہنا ہے کہ ’’ایسا لگتا ہے جیسے ہم مسلمانوں کو اس ملک میں کوئی حق ہی نہیں ہے۔‘‘