یوپی حکومت کے وزیر مملکت ستیش شرما کا ایک ویڈیو سوشل میڈیا پر وائرل ہو رہا ہے، جس کی وجہ سے وہ تنازع میں آ گئے ہیں۔ اس ویڈیو میں وزیر شیولنگ کے پاس ہاتھ دھوتے ہوئے نظر آ رہے ہیں اور ضلع انچارج وزیر جتن پرساد بھی قریب ہی موجود ہیں۔ اس ویڈیو کو لے کر لوگوں میں شدید ردعمل سامنے آ رہا ہے۔ ساتھ ہی کانگریس نے بھی اس پر سوال اٹھائے ہیں۔

قومی آواز اس ویڈیو کی تصدیق نہیں کرتا لیکن یہ ویڈیو کچھ دن پہلے کا بتایا جاتا ہے جب وزیر ستیش شرما اور جتن پرساد رام نگر تحصیل کے ہیتما پور گاؤں میں سیلاب سے متاثرہ علاقوں کا دورہ کرنے گئے تھے۔ اس دوران انہوں نے سیلاب کی صورتحال کا جائزہ لیا اور پشتوں اور امدادی کاموں کا بھی معائنہ کیا۔ اس کے بعد انہوں نے سیلاب متاثرین میں امدادی سامان تقسیم کیا۔ اس کے بعد وہ یہاں کے افسانوی لودھیشور مہادیو مندر پہنچے جہاں انہوں نے پوجا کی۔ جس کی ویڈیو سوشل میڈیا پر وائرل ہو رہی ہے۔

وزیر ستیش شرما کا جو ویڈیو وائرل ہو رہا ہے وہ 27 اگست کا بتایا جا رہا ہے، اس ویڈیو میں وزیر شیولنگ کے پاس ہاتھ دھوتے نظر آ رہے ہیں۔ وزیر جتن پرساد بھی ان کے ساتھ ہی کھڑے ہیں۔ ویڈیو میں دیکھا جا سکتا ہے کہ ستیش شرما اپنے ہاتھ سے پجاری کو اشارہ کرتے ہیں، جس کے بعد مندر کا پجاری انہیں پانی سے بھرا ہوا برتن دیتا ہے اور پھر وزیر شیولنگ کے پاس ہاتھ دھونے لگتے ہیں۔

یوپی کے وزیر کا ویڈیو وائرل ہونے کے بعد کانگریس نے اس پر سوال اٹھائے ہیں۔ یوپی کانگریس پارٹی نے اپنے سوشل میڈیا اکاؤنٹ پر لکھا، ‘اتر پردیش حکومت کے وزیر ستیش شرما شیوالیا میں شیو لنگ کے پاس ہاتھ دھو رہے ہیں۔ ایک اور وزیر جتن پرساد قریب ہی کھڑے ہیں اور قریب سے دیکھ رہے ہیں۔ مذہب کے نام پر، دیوی دیوتاؤں کے نام پر سیاست کرنے والے اور تخت پر بیٹھنے والے ان لوگوں کو شیولنگ کے پاس ہاتھ دھونے کی عقل بھی نہیں ہے۔ ان لوگوں کے لیے ہمارا عقیدہ ، ہمارے دیوی دیویاں صرف سیاسی مقاصد کے حصول کا ذریعہ ہیں۔ اس سے آگے انہیں نہ خدا پر یقین ہے اور نہ ہی عوام کے ایمان پر۔

چھتیس گڑھ حکومت نے وظیفہ یعنی اسٹائپنڈ  کی فراہمی کو منسوخ کر دیا ہے، جس کے تحت براہ راست بھرتی کے عمل کے ذریعے تعینات سرکاری ملازمین کو تقرری کے چوتھے سال سے پوری تنخواہ ملتی تھی۔ ایک افسر نے اتوار کو یہ جانکاری دی۔

محکمہ تعلقات عامہ کے اہلکار نے بتایا کہ اس قدم سے تقریباً 38000 سرکاری افسران اور ملازمین مستفید ہوں گے۔چھتیس گڑھ کی کانگریس حکومت کا یہ قدم اس سال کے آخر میں ہونے والے اسمبلی انتخابات سے پہلے سامنے آیا ہے۔

عہدیدار نے بتایا کہ ہفتہ کو راجیو یووا متان کانفرنس کے دوران وزیر اعلی بھوپیش بگھیل نے وظیفہ کی فراہمی کو ختم کرنے کا اعلان کیا اور اس سلسلے میں ایک فیصلے کو ریاستی کابینہ نے بعد میں شام کو منظوری دے دی۔

سال 2020 میں نافذ کردہ وظیفہ کے اصول کے تحت، براہ راست بھرتی کے عمل کے ذریعے تعینات ہونے والے سرکاری افسران اور ملازمین کو پروبیشن مدت کے پہلے، دوسرے اور تیسرے سال میں بالترتیب 70 فیصد، 80 فیصد اور بنیادی پے سکیل کا 90 فیصد وظیفہ ملے گا۔

افسر نے کہا کہ قواعد کے مطابق تقرری کے چوتھے سال سے پوری تنخواہ دی جاتی ہے۔ انہوں نے کہا کہ پہلے پروبیشن کا دورانیہ دو سال کا تھا لیکن ملازمین کو تقرری کے پہلے مہینے سے پوری تنخواہ ملتی تھی۔

اہلکار نے مطلع کیا کہ ریاستی حکومت نے جولائی 2020 میں بھرتی کے قوانین میں وبا کووڈ  کی مدت کے دوران ترمیم کی تاکہ وبائی مرض پر قابو پانے کی کوششوں میں مزید مالی وسائل مختص کیے جا سکیں اور موثر مالیاتی انتظام اور انتظامی نقطہ نظر کے ذریعے مستقبل کی تقرریوں میں تنخواہ کی لاگت کو کم کیا جا سکے۔

اس کے بعد حکومت نے ملازمین کا پروبیشن پیریڈ دو سال سے بڑھا کر تین سال کر دیا اور انہیں چوتھے سال سے پوری تنخواہ دینے کا فیصلہ کیا۔براہ راست بھرتی کے عمل کے ذریعے تعینات ہونے والے افسران اور ملازمین کو پہلے سال بنیادی پے سکیل کا 70 فیصد وظیفہ ملتا تھا جو دوسرے سال بڑھ کر 80 فیصد اور تیسرے سال 90 فیصد ہو گیا۔

اس وقت راجدھانی دہلی سمیت ملک کے کچھ حصوں میں لوگوں کو شدید گرمی کا سامنا ہے لیکن محکمہ موسمیات نے اب ملک کے مختلف حصوں میں بارش کا امکان ظاہر کیا ہے۔ آئی ایم ڈی نے اڈیشہ، تلنگانہ اور کیرالہ میں مختلف مقامات پر بھاری بارش کی پیش گوئی کی ہے۔

اگر دہلی کی بات کی جائے  تو یہاں گرمی اور نمی سے کوئی مہلت نہیں ملتی۔ اس کے ساتھ ہی دارالحکومت میں آنے والے چند دنوں میں تیز دھوپ اور چلچلاتی گرمی عوام کے لیے پریشانی کا باعث بنے گی۔ آج یعنی 4 ستمبر کو زیادہ سے زیادہ اور کم سے کم درجہ حرارت بالترتیب 37 اور 27 ڈگری سیلسیس کے آس پاس رہنے کا امکان ہے۔

آئی ایم ڈی نے مغربی یوپی میں 4 ستمبر تک خشک موسم کی پیش گوئی کی ہے۔ اگر ہم مشرقی یوپی کی بات کریں تو ایک یا دو مقامات پر ہلکی بارش سے درجہ حرارت میں کمی آسکتی ہے، حالانکہ مانسون 5 ستمبر کے بعد زور پکڑنے کا امکان ہے۔ 5 اور 6 ستمبر کو مغربی یوپی میں ایک یا دو مقامات پر بارش ہوسکتی ہے۔ اس کے ساتھ ہی مشرقی یوپی میں کچھ مقامات پر گرج چمک کے ساتھ ہلکی بارش کا امکان ہے۔

اس کے ساتھ ہی اتراکھنڈ کے میدانی علاقوں میں اگلے چند دنوں تک موسم صاف رہے گا اور کچھ علاقوں میں ہلکی بارش ہو سکتی ہے۔ آئی ایم ڈی نے باگیشور، پتھورا گڑھ، الموڑہ اور چمپاوت اضلاع میں 6 ستمبر تک بھاری بارش کا زرد الرٹ جاری کیا ہے۔ دوسری جانب محکمہ موسمیات نے مانسون کے اگلے پانچ دن تک اڈیشہ اور چھتیس گڑھ میں سرگرم رہنے کی پیش گوئی کی ہے۔ اس کے ساتھ ہی شمال مشرقی ہندوستان، مدھیہ پردیش اور مہاراشٹر میں بھی 5 ستمبر سے موسلادھار بارش دیکھنے کو ملے گی۔

ہماچل میں ضلع شملہ کے جبل کوٹکھائی اسمبلی حلقہ کی ٹکر تحصیل کے تحت داروتی گاؤں کے نو مکان اتوار کے روز آتشزدگی جل کر خاکستر ہوگئے، جس میں 21 خاندانوں کے لوگ بے گھر ہوگئے۔

اتوار کی دوپہر آتشزدگی کے بعد وزیر تعلیم روہت ٹھاکر اور شملہ کے ڈپٹی کمشنر آدتیہ نیگی نے بھی موقع پر پہنچ کر متاثرہ لوگوں کے تئيں ہمدردی کا اظہار کیا۔ آگ ہفتہ اور اتوار کی درمیانی رات تقریبا 0030 بجے لگی تھی اور اسے مکمل طور پر بجھانے میں سات سے آٹھ گھنٹے لگے۔

گاؤں والوں نے بھی اپنی سطح پر آگ بجھانے کی کوشش کی۔ فائر ڈپارٹمنٹ اور پولس کو بھی اطلاع دی گئی۔ فائر بریگیڈ کی ٹیم نے موقع پر پہنچ کر آگ کو دوسرے گھروں تک پہنچنے سے روک دیا۔

ان نو گھروں میں کل 21 خاندان آباد تھے۔ آگ اتنی شدید تھی کہ کچھ ہی دیر میں تمام گھر جل کر خاکستر ہو گئے۔ ابتدائی تحقیقات میں آگ لگنے کی وجہ شارٹ سرکٹ بتائی جا رہی ہے۔ دو کروڑ مالیت کے اثاثے راکھ ہو گئے ہيں۔ متاثرہ خاندانوں کو فی کس 10 ہزار روپے کی فوری امداد فراہم کی گئی ہے۔

ایس ڈی ایم روہرو سنی شرما نے بتایا کہ پولیس اور انتظامیہ کی ٹیمیں موقع پر پہنچی ہوئی ہیں اور امدادی کاموں کا جائزہ لیا جارہا ہے۔محکمہ محصولات نقصان کا اندازہ لگائے گا اور رپورٹ تیار کرے گا۔ پہاڑیوں میں زیادہ تر مکانات زلزلہ مزاحم ڈھانچے کاٹھ کنی سے بنے ہوئے ہیں، لیکن دیودار کی لکڑی کی آرائشیں انتہائی آتش گیر ہیں، اور اس میں آسانی سے آگ پکڑتی ہے۔

’ایک ملک ، ایک انتخاب‘ کی تجویز سے ہی ہندوستانی سیاست میں بھوچال آ گیا ہے۔ آل انڈیا مجلس اتحاد المسلمین (اے آئی ایم آئی ایم) کے صدر اسد الدین اویسی نے اپنی تشویش کا اظہار کیا ہے کہ ’ایک ملک، ایک انتخاب‘ پہل کثیر الجماعتی پارلیمانی جمہوریت اور وفاقیت کے اصولوں کے لیے تباہ کن ثابت ہوسکتی ہے۔

مسٹر اویسی نے ایک انٹرویو میں، نوٹیفکیشن کا حوالہ دیتے ہوئے، تبصرہ کیا ’’یہ اس کمیٹی کا تقرر کرنے والا ایک نوٹیفکیشن ہے جو ’ایک ملک، ایک انتخاب‘ کو دیکھے گا۔ یہ واضح ہے کہ یہ صرف ایک خانہ پوری ہے اور حکومت پہلے ہی اس کے ساتھ آگے بڑھنے کا ارادہ کر چکی ہے۔ ’ایک ملک ایک انتخاب‘ کثیر الجماعتی پارلیمانی جمہوریت اور وفاقیت کو بری طرح متاثر کرنے کی صلاحیت رکھتا ہے۔‘‘

انہوں نے کہا “آئندہ ریاستی انتخابات کی وجہ سے مسٹر مودی کو گیس کی قیمتیں کم کرنی پڑیں۔ وہ ایک ایسے منظر نامے کا تصور کرتے ہیں جہاں، اگر وہ الیکشن جیت جاتے ہیں، تو وہ اگلے پانچ سال تک بغیر کسی جوابدہی کے عوام دشمن پالیسیاں چلا سکتے ہیں۔‘‘ واضح رہے زیادہ تر حزب اختلاف کی سیاسی پارٹیاں ’ایک ملک ، ایک انتخاب‘ کے خلاف ہیں۔

دہلی پولیس نے ایکس (ٹویٹر) پر ایک پیغام کے ذریعے کہا ہے کہ ملک کی راجدھانی میں G-20 سربراہی اجلاس کے دوران لاک ڈاؤن جیسی صورتحال نہیں ہوگی، لیکن دہلی پولیس کے یہ معلومات دینے کے انداز کو لے کر سوشل میڈیا پر کافی بحث ہو رہی ہے۔ دراصل، پولیس نے ساؤتھ انڈین فلم ڈان نمبر 1 کے ایک ڈائیلاگ کی تصویر کے ذریعے لوگوں کو بتانے کی کوشش کی ہے کہ G-20 کے دوران دہلی میں لاک ڈاؤن نہیں ہوگا۔

راجدھانی کی دہلی  پولیس نے ایکس پر  لکھا، ‘پیارے دہلی کے لوگو، بالکل بھی گھبرائیں نہیں۔ کوئی لاک ڈاؤن نہیں ہے۔ دہلی ٹریفک پولیس کے ورچوئل ہیلپ ڈیسک پر دستیاب ٹریفک کی معلومات سے خود کو اپ ڈیٹ رکھیں۔‘

اس پیغام  کے ساتھ ایک تصویر بھی شیئر کی گئی ہے، جس میں جنوبی ہند کی فلم ‘ڈان نمبر 1’ کے ڈائیلاگ کے انداز میں لکھا گیا ہے، ‘بوائز اینڈ گرلز ریلیکس، جی  20-کے وقت دہلی میں لاک ڈاؤن نہیں ہے۔‘

دہلی ٹریفک پولیس نے سمٹ کے دوران قومی دارالحکومت میں ٹریفک کی حقیقی معلومات کے لیے ایک ہیلپ ڈیسک قائم کیا ہے۔ سڑک کے  روٹ کی معلومات ورچوئل ہیلپ ڈیسک میں دی گئی ہیں۔ پولیس نے کہا ہے کہ لوگوں کو ان راستوں پر سفر کرنے سے گریز کرنا چاہیے جو طے شدہ علاقوں کی طرف جاتے ہیں لیکن اگر سفر ناگزیر ہے تو مسافروں کو مشورہ دیا جاتا ہے کہ وہ ان راستوں کو استعمال کریں۔

رنگ روڈ – آشرم چوک – سرائے کالے خان – دہلی – میرٹھ ایکسپریس وے – نوئیڈا لنک روڈ – پشتہ روڈ ، آئی ایس بی   ٹی کشمیری گیٹ ، رنگ روڈ ، مجنو کا ٹیلا۔ اس کے علاوہ ایمس چوک سے رنگ روڈ، دھولہ کواں، رنگ روڈ، برار اسکوائر، نارائنا فلائی اوور، راجوری گارڈن جنکشن، رنگ روڈ، پنجابی باغ جنکشن، رنگ روڈ، آزاد پور چوک۔

ملک میں ‘ون نیشن، ون الیکشن’ یعنی ’ایک ملک ایک انتخاب‘ کے حوالے سے بحث چھڑ گئی ہے۔ مرکزی حکومت نے ہفتہ کو ‘ایک قوم، ایک انتخاب’ کا مطالعہ کرنے کے لیے 8 رکنی کمیٹی تشکیل دی ہے۔ اتوار یعنی آج 3 ستمبر کو اس کمیٹی کے سربراہ سابق صدر رام ناتھ کووند ایکشن میں نظر آئے۔ انہوں نے وزارت قانون کے حکام سے ملاقات کی۔

کانگریس کے رکن پارلیمنٹ راہل گاندھی نے ‘ایک ملک، ایک انتخاب’ کے خیال کو ہندوستانی یونین اور اس کی تمام ریاستوں پر حملہ قرار دیا۔ انہوں نے اتوار (3 ستمبر) کو ایکس پر اپنی پوسٹ میں کہا کہ ہندوستان ہندوستان ہے اور یہ ریاستوں کا اتحاد ہے۔ ایک ملک، ایک الیکشن کا نظریہ انڈین یونین اور اس کی تمام ریاستوں پر حملہ ہے۔

کانگریس صدر ملکارجن کھڑگے نے اس کی مخالفت کی اور کہا کہ مودی حکومت چاہتی ہے کہ جمہوری ہندوستان آہستہ آہستہ آمریت میں بدل جائے۔ ایک قوم، ایک انتخاب پر کمیٹی بنانے کی یہ چال ہندوستان کے وفاقی ڈھانچے کو تباہ کرنے کی چال ہے۔

جنتا دل یونائیٹڈ (جے ڈی یو) نے الزام لگایا کہ ایک ملک، ایک الیکشن مہنگائی اور بےروزگار پر سے لوگوں کی توجہ ہٹانے کی بی جے پی کی چال ہے۔ بہار کے وزیر اشوک چودھری نے کہا کہ لوک سبھا اور قانون ساز اسمبلیوں کے بیک وقت انتخابات ایک قابل بحث مسئلہ ہے اور تمام جماعتوں سے مشاورت کے بغیر کوئی فیصلہ نہیں کیا جانا چاہئے۔

بی جے پی لیڈر اور اتر پردیش کے وزیر اعلی یوگی آدتیہ ناتھ نے ‘ایک ملک ایک انتخاب’ کی حمایت کی اور کہا کہ اس سے جمہوریت کی خوشحالی اور استحکام یقینی ہوگا۔ انہوں نے اسے آج کی ضرورت قرار دیا اور اس کے لئے وزیر اعظم مودی کا شکریہ ادا کیا۔ وزیراعلیٰ نے کہا کہ ملک میں استحکام ضروری ہے۔

آر جے ڈی لیڈر اور بہار کے نائب وزیر اعلی تیجسوی یادو نے کہا کہ’ ایک ملک، ایک الیکشن‘کرنے سے پہلے سب کے لیے ایک آمدنی ہونی چاہیے اور پھر ایک ملک میں ایک الیکشن کی بات ہونی چاہیے۔ ملک میں اتنی مہنگائی اور بے روزگاری ہے، وزیر اعظم مودی پہلے سب کی آمدنی برابر کریں۔ انہوں نے دعویٰ کیا کہ آج وہ ایک ملک، ایک الیکشن کی بات کر رہے ہیں، بعد میں کہیں گے کہ اب سے صرف لوک سبھا انتخابات ہوں گے اور ریاستی انتخابات کو ختم کر دیں گے۔ پھر وہ ایک زبان، ایک مذہب، ایک پارٹی، ایک لیڈر کی بات کریں گے۔

سماج وادی پارٹی کے سربراہ اور یوپی کے سابق سی ایم اکھلیش یادو نے کہا کہ ہر بڑا کام کرنے سے پہلے ایک تجربہ کیا جاتا ہے، اسی کی بنیاد پر ہم مشورہ دے رہے ہیں کہ ایک ملک، ایک الیکشن کرانے سے پہلے بی جے پی حکومت، اس بار لوک کے ساتھ ساتھاتر پردیش میں انتخابات کرا لیں۔ اتر پردیش  وہ ریاست جس میں ملک میں سب سے زیادہ لوک سبھا اور اسمبلی سیٹیں ہیں، کو ایک ساتھ لوک سبھا اور اسمبلی کے انتخابات کو دیکھنا چاہیے۔

مارکسی کمیونسٹ پارٹی نے کمیٹی کی تشکیل کو مکمل طور پر غیر جمہوری قرار دیا۔ پارٹی کی مرکزی کمیٹی کے رکن سوجن سنگھ چکرورتی نے کہا کہ اس طرح کے قدم سے تنوع میں اتحاد کے تصور سے سمجھوتہ کیا جا رہا ہے۔ ایسی کمیٹی بنانا بالکل بھی جمہوری نہیں ہے۔ بی جے پی شاید کانگریس اور بائیں بازو کی جماعتوں سمیت ہندوستان سے خوفزدہ ہے۔ بی جے پی بھارت سے لوگوں کی توجہ ہٹانے کی کوشش کر رہی ہے۔

اوڈیشہ کی حکمراں بی جے ڈی نے مرکز کی حمایت کرتے ہوئے کہا کہ اگر لوک سبھا اور ریاستی اسمبلی کے انتخابات ایک ساتھ کرانے کا قانون بنایا جاتا ہے تو وہ اس فیصلے پر ملک کے ساتھ ہے۔ سابق وزیر اور بی جے ڈی ایم ایل اے بدری نارائن پاترا نے کہا کہ جب بھی انتخابات ایک ساتھ ہوں گے، پارٹی کو اس کی کوئی فکر نہیں ہے۔ ہمارے وزیر اعلیٰ نوین پٹنائک نے ہمیشہ کہا ہے کہ بی جے ڈی ریاست کی کسی بھی دوسری سیاسی جماعت کے مقابلے انتخابات کا سامنا کرنے کے لیے بہتر طور پر تیار ہے۔

عام آدمی پارٹی کے قومی کنوینر اور دہلی کے  وزیر اعلی  اروند کیجریوال نے کہا کہ ملک کے لیے کیا اہم ہے، ایک ملک ایک انتخاب یا ایک قوم ایک تعلیم (امیر یا غریب، سب کے لیے یکساں اچھی تعلیم)، ایک قوم ایک سلوک (غریب ہو یا امیر ، سب کو یکساں سلوک ملے گا) ون نیشن ون الیکشن سے عام آدمی کو کیا ملے گا؟

آندھرا پردیش کی حکمراں وائی ایس آر کانگریس پارٹی (وائی ایس آر سی پی) کے جنرل سکریٹری وی وجے سائی ریڈی نے ایک ملک، ایک انتخاب کی حمایت کی ہے۔ انہوں نے کہا کہ ایک ملک، ایک الیکشن کے تصور کے بہت سے مثبت پہلو ہیں، سب سے بڑی بات یہ ہے کہ اس سے ہزاروں کروڑ روپے بچ سکتے ہیں۔ اس کا آندھرا پردیش پر کوئی اثر نہیں پڑے گا، کیونکہ ریاست میں لوک سبھا اور اسمبلی کے انتخابات ایک ساتھ ہوتے ہیں۔

تمل ناڈو کی حکمراں جماعت ڈی ایم کے نے ایک ملک، ایک انتخاب کی مخالفت کی ہے۔ ڈی ایم کے سربراہ اور ریاست کے وزیر اعلی ایم کے اسٹالن نے کہا کہ مرکزی حکومت کا ‘ایک ملک ایک انتخاب’ پر زور ہمارے وفاقی ڈھانچے کو کمزور کرنے کی کوشش ہے۔ اچانک اعلان اور اس کے بعد اعلیٰ سطحی کمیٹی کی تشکیل نے شکوک و شبہات کو ہوا دی۔ ‘ایک ملک ایک الیکشن’ جمہوریت کا نہیں آمریت کا نسخہ ہے۔

اے آئی اے ڈی ایم کے، تمل ناڈو کی اہم اپوزیشن پارٹی اور بی جے پی کی حلیف ہے جس  نے اس تجویز کی حمایت کی۔ سابق چیف منسٹر اور اے آئی اے ڈی ایم کے چیف ایڈاپڈی کے پلانی سوامی نے کہا کہ ان کی پارٹی اس تجویز کی پرزور وکالت کرتی ہے کیونکہ اس سے ہمارے ملک کی ترقی کی رفتار بڑھے گی اور سیاسی عدم استحکام سے بچ جائے گا۔ بیک وقت انتخابات کے انعقاد سے وقت اور بھاری اخراجات کی بچت ہوگی۔

شرومنی اکالی دل نے بھی اس کی حمایت کی ہے۔ پارٹی سربراہ سکھبیر بادل نے کہا کہ وہ  اور ان کی پارٹی اس کے حق میں ہیں۔ ہر دوسرے دن کوئی نہ کوئی الیکشن ہوتا ہے۔ لوک سبھا اور اسمبلی کے انتخابات ایک ساتھ ہونے چاہئیں تاکہ پانچ سال تک انتخابات نہ ہوں۔ ورنہ انتخابات کسی نہ کسی ریاست میں ہوتے رہتے ہیں۔

ہریانہ کی جننائک جنتا پارٹی نے بھی اس کی حمایت کی۔ پارٹی کے رہنما اور ہریانہ کے نائب وزیر اعلی دشینت چوٹالہ نے کہا کہ ان کی جنائک جنتا پارٹی (جے جے پی) ایک ملک، ایک انتخاب کے نظریے کی حمایت کرتی ہے کیونکہ اس سے الگ الگ انتخابات کرانے کی لاگت میں کمی آئے گی۔

اے آئی ایم آئی ایم کے سربراہ اسد الدین اویسی نے کہا کہ یہ واضح ہے کہ حکومت پہلے ہی اسے آگے بڑھانے کا فیصلہ کر چکی ہے۔ ایک قوم، ایک انتخاب کثیر الجماعتی پارلیمانی جمہوریت اور وفاقیت کے لیے تباہ کن ثابت ہوگا۔ آئندہ ریاستی انتخابات کی وجہ سے مودی کو گیس کی قیمتوں میں کمی کرنا پڑی۔ وہ ایک ایسا منظر نامہ چاہتا ہے جہاں، اگر وہ الیکشن جیت جاتا ہے، تو وہ اگلے پانچ سال بغیر کسی احتساب کے عوام دشمن پالیسیوں پر چلنے میں گزارے۔ یہ تجویز بذات خود آئین کی بنیادی روح اور وفاقیت کی بنیادی فطرت کے خلاف ہے۔

شیو سینا (اُدھو ٹھاکرے) کے رہنما پرینکا چترویدی نے کہا کہ مرکزی حکومت کا ایک ملک، ایک انتخاب کے امکان کو تلاش کرنے کے لیے ایک کمیٹی قائم کرنے کا اقدام بے روزگاری اور مہنگائی جیسے مسائل سے توجہ ہٹانے کی کوشش ہے۔ اس معاملے پر نظر رکھنے والی تین رپورٹوں میں کہا گیا ہے کہ پانچ آئینی ترامیم، ریاستی اسمبلیوں اور پارلیمنٹ میں تین چوتھائی اکثریت اور ای وی ایم اور وی وی پی اے ٹی کے لیے 15,000 کروڑ روپے کے اخراجات کی ضرورت ہے۔ تو کیا نئی کمیٹی کی ضرورت ہے؟ تم کس کو بیوقوف بنانے کی کوشش کر رہے ہو؟

مہاراشٹر وادی گومانتک پارٹی (ایم جی پی) نے مرکزی حکومت کے ایک ملک، ایک انتخاب پر کمیٹی قائم کرنے کے فیصلے کا خیر مقدم کیا ہے۔ ایم جی پی کے صدر دیپک دھاولیکر نے خبر رساں ایجنسی پی ٹی آئی کو بتایا کہ ایک ملک، ایک انتخاب کا فیصلہ تمام سیاسی جماعتوں کو یکساں مواقع فراہم کرنے میں دور رس ثابت ہوگا۔

اس کی حمایت کرتے ہوئے راشٹریہ لوک جن شکتی پارٹی(آر ایل جے پی) کے صدر اور مرکزی وزیر پشوپتی کمار پارس نے کہا کہ وزیر اعظم نے ایک اچھا فیصلہ لیا ہے اور مجھے یقین ہے کہ اس سے مستقبل میں پورے ملک کو فائدہ ہوگا۔

جموں و کشمیر کی نیشنل کانفرنس (این سی) نے کہا کہ پارٹی کو ‘ون نیشن، ون الیکشن’ تجویز کے بارے میں کچھ تحفظات ہیں لیکن وہ سابق صدر رام ناتھ کووند کی سربراہی میں نئی ​​تشکیل شدہ کمیٹی اپنی رپورٹ پیش کرنے کے بعد ہی تفصیلات پر بات کرے گی۔ این سی کے ترجمان عمران نبی ڈار نے کہا کہ اس میں بہت سی چیزیں ہیں جن پر ہم جواب دینا چاہتے ہیں، لیکن اب تک اس بارے میں رپورٹ دینے کا اختیار کووند کمیٹی کو دیا گیا ہے، اس لیے کچھ وقت انتظار کرنا ہی بہتر ہے۔

بی جے پی کو نشانہ بناتے ہوئے جے ڈی یو کے قومی جنرل سکریٹری اور ترجمان مسٹرراجیو رنجن نے کہا ہے کہ بی جے پی انڈیا اتحاد کی مسلسل مضبوطی اور اس میں شامل جماعتوں کی بڑھتی ہوئی شمولیت سے بری طرح خوفزدہ ہے۔ اس گھبراہٹ کے باعث انہوں نے پارلیمنٹ کا خصوصی اجلاس بلایا ہے۔ اسی خوف کے باعث انہوں نے ایک ملک، ایک الیکشن کا شگوفہ چھوڑ کر جلد بازی میں ایک کمیٹی بنا لی ہے۔ بی جے پی کو جان لینا چاہیے کہ اب اس کا کوئی بھی حربہ کام نہیں آئے گا۔ان کے نئے شگوفے ، کمیٹی اور خود ان کا مستقبل کیا ہے ، یہ ملک کا بچہ ۔ بچہ جانتاہے ۔

انہوں نے کہا کہ درحقیقت اپوزیشن کے مضبوط ہوتے اتحاد اور ملک میں حکومت مخالف لہر کو دیکھ کر بی جے پی گھبرا گئی ہے۔ وہ جانتے ہیں کہ جس طرح انہوں نے عوامی مفاد کو نظر انداز کرتے ہوئے گزشتہ 9 سالوں میں چند سرمایہ داروں کی غلامی کی ہے اس سے عوام میں شدید غصہ پیدا ہو رہا ہے۔ دوسری طرف، ذات کی گنتی جیسے مسائل کی مخالفت کرتے کے انہوں نے اپنے پاؤ ں پر کلہاڑی مار لی ہے۔ ان کے کارکن بھی اپنے لیڈروں سے نالاں ہیں۔ اسی لیے لوگوں کو گمراہ کرنے کے لیے یہ لوگ ایک ملک، ایک الیکشن جیسے ایشوز اٹھانے لگے ہیں۔ بی جے پی کو بتانا چاہئے کہ عین لوک سبھا انتخابات سے پہلے اس مسئلہ کو اٹھانے کا کیا فائدہ ہے؟ اگر اس موضوع پر ان کی نیت صاف ہے تو انہوں نے پچھلے 9 سالوں میں اسے کیوں نہیں اٹھایا؟

جے ڈی یو جنرل سکریٹری نے کہا کہ بی جے پی اب تمام حربے آزما کر تھک چکی ہے۔ اب انہوں نے اپنے آخری ہتھیار کے طور پر جھوٹے پروپیگنڈے کا سہارا لینا شروع کر دیا ہے۔ یہاں تک کہ انہوں نے لفظ انڈیا پر حملہ کرنا شروع کر دیا ہے۔ لیکن عوام جانتی ہے کہ ملک اور اس کے آئین پر یقین نہ رکھنے والوں کو ہی انڈیا نام سے الرجی ہو سکتی ہے۔

انہوں نے کہا کہ ہندوستان کے عوام بی جے پی کی گھبراہٹ سے سب سے زیادہ خوش ہیں۔ درحقیقت آج ملک کے غریب، مزدور، کسان، متوسط طبقہ، پسماندہ اور انتہائی پسماندہ سبھی بی جے پی کے تکبر اور جاگیردارانہ رویہ سے ناخوش ہیں۔ لوگ جان چکے ہیں کہ بی جے پی خوابوں کی سوداگر ہے، جو وعدے تو کرتی ہے لیکن انہیں پورا کرنے میں کوئی دلچسپی نہیں دکھاتی ہے۔ ان کے دور حکومت میں نہ تو لوگوں کو روزگار ملا، نہ پیٹرول اور ڈیزل کی قیمتیں کم ہوئیں، نہ کسانوں کی آمدنی دوگنی ہوئی اور نہ ہی خواتین کو بااختیار بنانے پر کوئی کام ہوا۔ حقیقت میں عوام اب ان سے تنگ آچکی ہے۔ وہ جانتے ہیں کہ صرف انڈیا ہی ملک کو بی جے پی کی غلط حکمرانی سے آزاد کرا سکتا ہے۔

فسادات سے وہ لوگ زیادہ متاثرہوتے ہیں جن کاتعلق متوسط یاغریب طبقوں سے ہوتاہے ، نوح فساد میں بھی یہی ہواہے ، ان لوگوں کا زیادہ نقصان ہواہے جو چھوٹے موٹے کاروبار کرنے والے ، ریہڑی پٹری لگانے والے یاٹھیلوں پر سامان فروخت کرنے والے لوگ ہیں ، فسادمیں ان لوگوں کا سب کچھ تباہ ہوچکاہے ، چنانچہ فساد کے بعدسے ان کی آمدنی کا ذریعہ بھی بند ہے، جب اس حقائق کا علم جمعیۃعلماء ہند کے صدرمولانا ارشد مدنی کو ہوا تو انہوں نے جمعیۃعلماء ہند کی ایک نمائندہ وفد متاثرہ علاقوں کے دورہ پر بھیجا اور ایسے تمام لوگوں کی باقاعدہ طور پر ایک فہرست تیار کرنے کی ہدایت کی۔ چنانچہ اس ہدایت پر عمل کرتے ہوئے مذکورہ نمائندہ وفد نے جو فہرست تیار کی اس میںتقریباً دو سو سے زائد لوگوں کے نام ہیں یہ وہ لوگ ہیں جو فسادات کے بعد سے بیکار ہیں، ان کے پاس اتنی بھی رقم نہیں ہیں کہ وہ اپنا کاروبار دوبارہ شروع کرسکیں۔ اس صورتحال سے جب مولانا مدنی کو مطلع کیا گیا تو انہوں نے فوراً یہ اعلان کیا کہ جمعیۃعلماء ہند ان تمام لوگوں کو فی الفورمالی امداد فراہم کرے گی تاکہ یہ غریب لوگ اپنے پیروں پر کھڑے ہوکر اپنے بال بچوں کا پیٹ پال سکیں، چنانچہ مولانا مدنی کی ہدایت پر جنرل سکریٹری مفتی سیدمعصوم ثاقب قاسمی اور مولانا اظہر مدنی کی سربراہی میں آج ایک وفد نے نوح کے متاثرہ علاقے میں امدادی کیمپ لگاکر ان دوسوضرورت مند لوگوںمیں بذریعہ چیک بیس ہزاروپے فی کس امدادی رقم تقسیم کی ۔

اس موقع پر متاثرین میں سے بیشترکو یہ کہتے ہوئے بھی سناگیا کہ فسادکے بعد بہت سے لوگ آئے اور بہت سی تنظیموں کے لوگوں نے یہاں کا دورہ کیا لیکن جس طرح کا امدادی اقدام جمعیۃعلماء ہند نے کیا ہے کسی اور نے نہیں کیا۔دلاسہ سب نے دیا مگر کام جمعیۃعلماء ہند نے کیا،ریہڑی پٹری والوں اورٹھیلا لگانے والوں کو اس طرح کی مالی امدادکی اشدضرورت تھی جس کو جمعیۃعلماء ہند اورمولانا مدنی نے محسوس کیا ، متاثرین میں چالیس لاکھ رروپے کی یہ مجموعی امدادکی رقم جمعیۃعلماء ہند (ارشدمدنی پبلک ٹرسٹ )کی جانب سے تقسیم کی گئی ، مولانا مدنی نے یہ اعلان بھی کردیاہے کہ جلدہی متاثرہ علاقوںمیں بازآبادکاری کا کام بھی شروع ہوجائے گا، غربت کا شکارایسے لوگ جس کے پاس آمدنی کا کوئی مستقل ذریعہ نہیں ہے اورجس کے گھروں کو غیر قانونی قراردیکر توڑدیا گیاہے جمعیۃعلماء ہند انہیں نئے گھر مہیاکرکے کسی دوسری جگہ پر آبادکرے گی ، واضح رہے کہ نوح اوراس کے اطراف میں بہت سے لوگ اب بھی کھلے آسمان کے نیچے یا پھر عارضی جھوپڑیاں ڈال کر رہ رہے ہیں ، ریاستی سرکارکی جانب سے بھی ان کی بازآبادکاری کے تعلق سے کسی طرح کی یقین دہانی نہیں کرائی گئی ہے۔

جمعیۃعلماء ہندکے صدرمولانا ارشدمدنی نے کہاہے کہ ضرورت مند افرادکی فہرست سازی کے بعد ہمیں یہ بتایاگیا کہ ریہڑی ٹھیلا سات ہزارروپے میں تیارہوجاتاہے اور فروخت کے لئے سامان پر چارسے پانچ ہزارروپے صرف ہوتے ہیں گویا ان چھوٹے موٹے کاروبار کرنے والے لوگوں کو دوبارہ اپنے پیروں پر کھڑے ہونے کے لئے تقریباً بارہ ہزارروپے کی ضروت تھی لیکن ہم نے بیس ہزارروپے فی کس امداد مہیا کرانے کا فیصلہ کیا تاکہ ان کے پاس ہمہ وقت کچھ اضافی رقم بھی موجود رہے ، ہم اللہ کا شکر ادا کرتے ہیں کہ انتہائی ضرورت مند افرادتک ہم یہ مدد پہنچا سکے۔

 انہوں نے یہ بھی کہا کہ جمعیۃعلماء ہند روزاول سے امدادی اورفلاحی کاموں میں پیش پیش رہی ہے ، یہ کام اس نے کبھی مذہب کی بنیاد پرنہیں کیا بلکہ انسانیت کی بنیادپر کیاہے اوریہ سلسلہ ہنوزجاری ہے ،قدرتی آفات ہویاسماجی شکلات ، ملی مسائل ہویاملکی معاملات ہر قدم پر جمعیۃعلماء ہند نے انسانیت کی بنیادپر اپنی خدمات انجام دی ہیں،زلزلہ اورسیلاب جیسے قدرتی آفات کا معاملہ یافرقہ ورانہ فسادکے متاثرین ہو،بے گناہوں کی قانونی لڑائی ہویا آسام شہریت کا مسئلہ ہوسب کے لئے اپنے ہاتھ آگے بڑھائے اورسب کو بروقت مددپہنچاناان کی بازآبادکاری کرنا،ان کے ذخموں پر مرہم رکھنا ہم نے اپنا فرض تصورکیا ہے، نوح میں بھی اس روایت کو برقرار رکھا جارہا ہے اورمتاثرین کی بلالحاظ مذہب وملت مددکی جارہی ہے ، انہوں نے ایک بار پھر کہاکہ اگرفرقہ پرست یہ سمجھتے ہیں کہ فسادسے مسلمانوں کاہی نقصان ہوتاہے تووہ ناسمجھ ہیں فسادسے کسی خاص فرد یاقوم کانہیں ملک کا نقصان ہوتاہے، اس کی ترقی ،معیشت اورنیک نامی بھی متاثرہوتی ہے ۔

 مولانا مدنی نے کہا کہ نوح میں 28 اگست کو بھاری پولس بندوبست کے ساتھ دوبارہ جل ابھیشک یاترانکلی کہیں کوئی ناخوشگوار واقعہ رونمانہیں ہواہم اسے ایک اچھاقدم سمجھتے ہیں ، لیکن اس واقعہ سے ایک بارپھر ثابت ہوگیا کہ اگرانتظامیہ اور پولس کا عملہ ایمانداری سے اپنا فرض انجام دے توکبھی فسادنہیں ہوسکتا۔ انہوں نے یہ بھی کہا کہ ہم بارباریہ کہتے آئے ہیں کہ اگر ضلعی سطح پرملک بھرمیں پولس اورانتظامیہ کو جوابدہ بنا دیا جائے توملک کو فسادکی لعنت سے پاک کیا جاسکتاہے ، انہوں نے کہا کہ سچ تو یہ ہے کہ ہماری سیاسی قیادتوںنے ملک کو فسادکی لعنت سے پاک کرنے کے لئے کبھی کوئی موثراقدام نہیں کیا انتظامیہ اورپولس نے ہمیشہ جانبداری کا مظاہرہ کیاجس کی وجہ سے فرقہ پرست طاقتوںکو تقویت ملتی رہی ہے اوراب توایسالگتاہے کہ انہیں قانون اورعدلیہ کابھی کوئی ڈرنہیں رہ گیا ہے ۔

مولانا مدنی نے کہا کہ ہندوستان میں کہیں بھی فساد ہووہ فسادنہیں بلکہ پولس ایکشن ہوتاہے نوح میوات میں بھی پولس کا یہی کرداررہاہے اورتمام حکومتوں میں ایک چیزمشترک نظرآتی ہے کہ حملہ بھی مسلمانوں پر ہوتاہے اورانہی کے مکانوں اوردوکانوں کو جلایا جاتا ہے اورانہی پر سنگین دفعات لگاکر گرفتاربھی کیا جاتاہے ، مسلمانوں کے خلاف متعصب میڈیاٹرائل چلاکر ماحول بناتاہے ، مولانامدنی نے کہا کہ متاثرین میں ایسے لوگوں کی ایک بڑی تعدادہے جو فسادات میں اپنا سب کچھ کھوچکے ہیںمگر اب دوسراظلم یہ ہورہاہے کہ ان میں سے بیشترلوگوں کو فساد کا ملزم بنادیا گیا ہے ، اس میں زیادہ تر ایسے لوگ ہیں جن کی مالی حالت اس لائق نہیں ہے جواپنے خلاف مقدمات کی پیروی کرسکے، ایسے میں جمعیۃعلماء ہند نے اعلان کیا ہے کہ وہ ایسے تمام بے گناہ لوگوں کو قانونی امداد مہیا کرائے گی اپنے اس اعلان کو حتمی شکل دینے کے لئے جمعیۃعلماء ہند نے باضابطہ طورپرایک قانونی پینل تشکیل دیاہے یہ پینل متاثرین کی ہر سطح پر مددکرے گا۔ اخیرمیں مولانا مدنی نے کہا کہ ماضی کے فسادات کے برعکس حالیہ فسادات میں یہ چیز دیکھنے میں آئی ہے کہ شرپسند عناصرمنصوبہ بند طریقہ سے عبادت گاہوں کو ٹارگیٹ کرتے ہیں ان کو نقصان پہنچاتے ہیں جو کہ فرقہ پرستی کی انتہاہے ، جبکہ ہمارایہ مانناہے کہ ہر عبادت گاہ چاہے مسجد ہو یا مندر یا دوسری عبادت گاہیں سب کو عزت کی نظرسے دیکھاجانا چاہئے اوراس کا احترام کرنا چاہئے کیونکہ دنیا کاہر مذہب انسانیت، رواداری ، محبت اوریکجہتی کاپیغام دیتاہے اس لئے جو لوگ مذہب کا استعمال نفرت اور تشدد برپا کرنے کے لئے کرتے ہیں وہ اپنے مذہب کے سچے پیروکارنہیں ہوسکتے ہیں ۔

مولانا مدنی نے کہا کہ اس حساس مسئلہ پر ارباب اقتدارکو سوچنا چاہئے لیکن افسوس سیاست داں اقتدارکی خاطر ملک کی اورعوامی مسائل کی جگہ صرف اورصرف مذہب کی بنیادپر نفرت کی سیاست کررہے ہیںجو ملک کے لئے انتہائی خطرناک ہے۔واضح ہو کہ اس وفد میں مولانا محمد ہارون صدر جمعیۃ علما ہریانہ پنجاب، مولانا محمد خالد قاسمی نوح، مولانا راشد میل کھیڑلا، راجستھان، مولوی حکیم الدین اشرف، مفتی عبد الرازق دہلی، قاری محمد ساجدفیضی، مولوی عبد القدیر، مولانا شوکت، حاجی میاں رمضان، مفتی عبد القیوم احمدآبادوغیرہ شامل تھے۔

کانگریس کے صدر ملکارجن کھڑگے اور سابق صدر راہل گاندھی نے کہا ہے کہ مودی حکومت کا ‘ون نیشن ون الیکشن’ کا نظریہ ملک میں جمہوریت اور وفاقی ڈھانچے کے نظام کو ختم کرنا اور آمریت لانا ہے۔

مسٹر کھڑگے نے ‘ون نیشن ون الیکشن’ کے خیال کو ملک میں جمہوریت کو ختم کرنے اور وفاقی نظام کو آمریت میں بدلنے کی کوشش قرار دیا، جب کہ مسٹر گاندھی نے اس خیال کو مسترد کرتے ہوئے اسے ریاستوں پر حملہ قرار دیا اور کہاکہ حکومت کا یہ اقدام مکمل طور پر وفاقی نظام کے خلاف ہے۔

مسٹر گاندھی نے کہاکہ ’’ایک ملک ایک انتخاب کا نظریہ یونین اور اس کی تمام ریاستوں پر حملہ ہے۔‘‘ مسٹر کھڑگے نے کہاکہ ”مودی حکومت کا مقصد جمہوریت کو آہستہ آہستہ آمریت میں بدلنا ہے۔ ان کی ‘ایک ملک ، ایک انتخاب’ پر ایک کمیٹی کی تشکیل ہندوستان کے وفاقی ڈھانچے کو تباہ کرنے کا ایک چال اور بہانہ ہے۔

انہوں نے کہا کہ ‘ایک ملک ایک انتخاب’ کے اصول کا عمل بہت پیچیدہ ہے۔ انہوں نے کہا کہ منتخب لوک سبھا اور قانون ساز اسمبلیوں کی میعاد کو کم کرنے کے لیے آئینی ترامیم کی ضرورت ہوگی۔ اس کے لیے آئین میں کم از کم پانچ ترامیم کر کے عوامی نمائندگی ایکٹ 1951 کو بڑے پیمانے پر تبدیل کرنا ہو گا۔
‘ون نیشن ون الیکشن’ کے معاملے پر حکومت سے سوال کرتے ہوئے کانگریس لیڈر نے پوچھاکہ”کیا مجوزہ کمیٹی ہندوستانی انتخابی عمل میں سب سے بڑی تبدیلی کے بارے میں سوچ سمجھ کر فیصلہ کرنے کے لیے موزوں ہے؟ کیا اتنی بڑی مشق قومی اور ریاستی سطح پر سیاسی جماعتوں سے مشاورت کے بغیر من مانی کی جانی چاہیے؟ کیا ریاستوں اور ان کی منتخب حکومتوں کو شامل کیے بغیر اتنا بڑا قدم اٹھانا چاہیے؟

کانگریس لیڈر نے کہا کہ اس طرح کے خیال کو ماضی میں تین کمیٹیوں نے مسترد کیا ہے اور اب دیکھنا یہ ہے کہ کیا اس معاملے میں چوتھی کمیٹی ماضی کے تجربے کو ذہن میں رکھتے ہوئے تشکیل دی گئی ہے۔ حیرت انگیز بات یہ ہے کہ جو کمیٹی بنائی گئی ہے اس میں ہندوستان کے باوقار الیکشن کمیشن کے نمائندے کو کمیٹی سے باہر رکھا گیا ہے۔

آزادی کے بعد ملک میں ون نیشن ون الیکشن سسٹم کے بارے میں انہوں نے کہا کہ 1967 تک نہ تو ہمارے پاس اتنی ریاستیں تھیں اور نہ ہی ہماری پنچایتوں میں 30.45 لاکھ منتخب نمائندے تھے۔ ہندوستان دنیا کی سب سے بڑی جمہوریت ہے۔ ہمارے پاس لاکھوں منتخب نمائندے ہیں اور ان کے مستقبل کا تعین اب ایک ہی بار میں نہیں کیا جا سکتا۔ اب ہندوستان کے لوگوں کے لیے 2024 کے لیے واحد آپشن یہ ہے کہ وہ ‘ایک قوم، ایک حل’ کے لیے بی جے پی کی غلط حکمرانی سے چھٹکارا حاصل کریں۔