کانگریس نے لکھیم پور واقعہ کے خلاف احتجاج میں مرکزی وزیر مملکت برائے داخلہ اجے مشرا کو برخاست کرنے کی مانگ پر آج پورے ملک میں احتجاجی مظاہرہ کیا
نئی دہلی: کانگریس نے لکھیم پور واقعہ کے خلاف احتجاج میں اور اس واقعہ کے لئے مبینہ طور پر ذمہ دار مرکزی وزیر مملکت برائے داخلہ اجے مشرا کو برخاست کرنے کی مانگ پر آج پورے ملک میں احتجاجی مظاہرہ کیا اور حکومت مخالف نعرے لگائے۔
کانگریس کی اترپردیش کی انچارج اور جنرل سکریٹری پرینکا گاندھی واڈرا نے اترپردیش کی راجدھانی لکھنو میں بابائے قوم مہاتما گاندھی کے سامنے بیٹھ کر مون ورت رکھا۔ محترمہ واڈرا نے لکھیم پور کھیری کے واقعہ کے لئے مبینہ طور پر قصوروار مسٹر مشرا کو برخاست کرنے کی مانگ کی اور کہا کہ کانگریس ناانصافی کے خلاف لڑائی لڑتی رہے گی۔ اس دوران وہاں بڑی تعداد میں پارٹی کارکن موجود رہے۔
مرکزی وزیر مملکت برائے داخلہ اجے مشرا کو فوری طور پر عہدہ سے ہٹانے کی مانگ
جموں میں کانگریسی کارکنوں نے راجو بھون کے سامنے مون ورت کا اہتمام کیا اور مسٹر مشرا کو فوری طور پر عہدہ سے ہٹانے کی مانگ کی۔ اس پروگرام میں کانگریس کی ریاستی انچارج رجنی پاٹل کے ساتھ ہی کانگریس کے کئی اہم لیڈروں نے حصہ لیا۔ پارٹی کارکنوں نے مغربی بنگال میں لوک سبھا میں کانگریس کے لیڈر ادھیر رنجن چودھری کی قیادت میں مون ورت میں حصہ لیا۔
مہاراشٹر میں کانگریسی کارکنوں نے ریاستی صدر نانا پٹولے کی قیادت میں مون ورت رکھا جس میں کانگریس قانون ساز پارٹی کے لیڈر بالا صاحب تھروٹ، ممبئی کانگریس کے ایگزیکٹو صدر بھائی جگتاپ، چرن سنگھ سپرہ، سابق وزیر اعلی اشوک چوان کئی دیگر اہم لیڈروں نے حصہ لیا۔
تریپورہ میں ریاستی صدر براجیت سنہا اور دیگر سینئر لیڈروں نے مون ورت میں حصہ لیا۔ دہلی میں ریاستی صدر چودھری انل کمار کی قیادت میں مون ورت رکھ کر گاندھیائی پالیسیوں پر عمل کرتے ہوئے احتجاج کیا۔ ریاستی صدر ریونت ریڈی کی قیادت میں بڑی تعداد میں کارکنوں نے مون ورت رکھا۔ ہماچل پردیش کے شملہ میں ریاستی صدر کلدیپ سنگھ راٹھوڑ کی قیادت میں مون ورت رکھ کر مسٹر مشرا کو مرکزی کابینہ سے ہٹانے کی مانگ کی۔
