تامل ناڈو کے وزیر اعلی ایم کے اسٹالن نے اضافی مہلت کے ساتھ ریاست کے لاک ڈاؤن میں ایک ہفتے کی توسیع کا اعلان کیا ہے۔
چنئی: تمل ناڈو کے وزیر اعلیٰ ایم کے اسٹالن نے ریاست میں نافذ لاک ڈاؤن میں اضافی مہلتوں کے ساتھ مزید ایک ہفتہ کی توسیع کا ہفتہ کے روز اعلان کیا۔
مسٹر اسٹالن نے یہاں ایک بیان میں کہا کہ ریاست میں گزشتہ 10 مئی سے لاک ڈاؤن لگایا گیا تھا جس میں ہر ایک ہفتہ مرحلہ وار طریقے سے توسیع کی جاتی رہی ہے۔ موجودہ لاک ڈاؤن کی مدت پیر کو ختم ہونے جارہی ہے، جسے اب 19 جولائی تک بڑھادیا گیا ہے۔ حالانکہ پہلے سے اعلان کردہ رعایتیں جاری رہیں گی۔
اس کے ساتھ ہی پڈوچیری کے علاوہ دیگر بین ریاستی عوامی اور پرائیویٹ ٹرانسپورٹ چلتے رہیں گے۔ انہوں نے کہا کہ مرکزی حکومت کی جانب سے اجازت یافتہ بین الاقوامی ہوائی خدمات کے علاوہ تھیٹر، بار، سوئمنگ پول، زولوجیکل پارکس، اسکول اور کالج بند رہیں گے اور سماجی و سیاسی سرگرمیوں کی اجازت نہیں ہوگی۔
وہیں شادی کی تقریب میں صرف 50 اور آخری رسومات کے موقع پر 20 افراد کو ہی شامل ہونے کی اجازت دی گئی ہے۔ ممنوعہ علاقوں کے علاوہ دیگر مقامات پر چائے کی دکانیں، ہوٹل، ریستوراں، بیکری، سڑک کے کنارے کھانے، مٹھائیاں اور نمکین کی دکانیں رات 9 بجے تک کھلی رہیں گی۔
