کرناٹک قانون ساز کونسل کے ڈپٹی اسپیکر ایس ایل دھرمے گوڑا کی لاش دیر رات ریل کی پٹری کے نزدیک پائی گئی۔
چک منگلور: کرناٹک میں ایک غیر متوقع واقعہ میں جنتا دل (سیکولر) کے سینئر لیڈر اور قانون ساز کونسل کے ڈپٹی اسپیکر ایس ایل دھرمے گوڑا نے پیر کی رات خودکشی کرلی۔
وہ 65 برس کے تھے۔ ان کے کنبے میں اہلیہ اور دو بچے ہیں۔
پولیس ذرائع کے مطابق مسٹر گوڑا کل شام اپنی ذاتی کار سے سکھاریا پتنا واقع فارم ہاؤس سے گھر کے لئے نکلے تھے۔
راستے میں انہوں نے اپنے ڈرائیور سے کہا کہ وہ کسی سے بات کرنے جا رہے ہیں اور ان سے کچھ دیر رک جانے کے لئے کہا تھا۔ گھر نہ پہنچنے پر کنبے کے افراد اور اسٹاف نے ان کی تلاش شروع کی۔ دیر رات ان کی لاش ریل کی پٹری کے نزدیک پائی گئی۔ موقع سے ’سوسائڈ نوٹ‘ بھی برآمد ہوا ہے۔
