مسلم کانسٹیبل ارشد نے لارڈ وینکٹیشورا سوامی کے درشن کے لئے انامایامارگم کی سمت پیدل چل رہی 58 سالہ شردھالو ناگیشور ماں کو پیٹھ پر بٹھا کر 6 کلومیٹر پیدل چل کر اسپتال پہنچایا۔
حیدرآباد: ایک انسانی اخوت کے مظاہرہ میں ایک مسلم کانسٹیبل نے اے پی کے تروملا ہلز کی مشہور مندر جانے کے دوران بیمار ہوئی ضعیف خاتون کو اپنی پیٹھ پر بٹھا کر تقریبا 6 کلومیٹر تک پیدل چلتے ہوئے اس کو چتور ضلع کے راجم پیٹ کے قریب واقع اسپتال میں داخل کروایا۔
اطلاعات کے مطابق 58 سالہ شردھالو ناگیشور ماں، لارڈ وینکٹیشورا سوامی کے درشن کے لئے انامایامارگم کی سمت پیدل چل رہی تھی تاہم راستہ میں ہی وہ بی پی کے زیادہ ہونے کی وجہ سے بے ہوش ہوکر گر گئی۔ یہ خاتون مدد کی منتظر تھی کہ اسپیشل پولیس پارٹی سے تعلق رکھنے والا مسلم کانسٹیبل جس کی شناخت شیخ ارشد کے طور پر کی گئی ہے، وہاں پہنچا۔ ارشد اس پہاڑی پر ڈیوٹی کررہا تھا۔ اس ضعیف خاتون کو اونچائی پر پہنچانے کیلئے کسی بھی قسم کے دوسرے ٹرانسپورٹ ذرائع نہ ہونے پر ارشد نے اس ضعیف بیمار خاتون کو اپنی پیٹھ پر بٹھالیا اور 6 کیلومیٹر پیدل چلتے ہوئے اس کو راجم پیٹ کے پرائیویٹ اسپتال میں داخل کروایا۔
اس خاتون کو اپنی پیٹھ پر بٹھا کر لے جانے والے کانسٹیبل کی تصاویر اس راستہ سے گذرنے والوں نے لیتے ہوئے اس کو سوشل میڈیا کے مختلف پلیٹ فارمس پر پوسٹ کردیا۔ ان تصاویر میں دکھایا گیا ہے کہ یہ کانسٹیبل ضعیف خاتون کو پہاڑی راستوں سے کافی احتیاط کے ساتھ اپنی پیٹھ پر سوار کرتے ہوئے لے جارہا ہے۔ کانسٹیبل کے اس قدم کی ڈی جی پی گوتم سوانگ نے ستائش کی ہے۔ انہوں نے کہا کہ کانسٹیبل کا یہ قدم اپنے فرض کے تئیں جذبہ پیدا کرنے والا ہے۔
