سورت: چندریان 3 کا لینڈر موڈیول ڈیزائن کرنے کا دعویٰ کرنے والا فرضی سائنسدان متول تریویدی پولیس کے ہاتھوں پکڑا گیا۔ متول تریویدی نے خود کو اسرو کا سائنسدان قرار دیا تھا اور چندریان 3 کی کامیاب لینڈنگ کے بعد پریس کانفرنس بھی کی تھی۔ اب گجرات کی سورت پولیس نے کہا ہے کہ "ہم نے ایک شخص کو گرفتار کیا ہے، جس کی شناخت متول ترویدی کے نام سے ہوئی ہے، جس نے اسرو میں سائنسدان ہونے کا فرضی دعویٰ کیا تھا اور اس کے لیے جعلی دستاویزات بھی تیار کی تھیں۔ پولیس کا کہنا ہے کہ اس نے جرم کا اعتراف کر لیا ہے۔‘‘
پولیس کے مطابق اس شخص نے لوگوں کو اسرو کا ایک خط بھی دکھایا تھا جس کے بعد کچھ لوگوں کو شک ہوا۔ پولس نے وہ خط اسرو کو بھیجا اور متل ترویدی کے خلاف ایف آئی آر درج کی گئی۔
سورت کے اے سی پی شرد سنگھل نے ایک بیان میں کہا ’’کرائم برانچ نے اسرو سے رابطہ کیا تھا، جس پر اسرو نے واضح طور پر کہا ہے کہ یہ خط فرضی ہے اور ان کی طرف سے ایسا کوئی خط جاری نہیں کیا گیا ہے۔ کل کرائم برانچ نے متول ترویدی نامی شخس کو چوک بازار سے گرفتار کیا۔ اس سے تفصیلی پوچھ گچھ کی گئی، جس کے بعد ثابت ہو گیا کہ وہ جھوٹ بول رہا ہے اور اس نے اس کا اعتراف بھی کر لیا۔
اے سی پی شنگھل نے بتایا کہ متول ترویدی کی عمر تقریباً 30 سال ہے اور وہ پرائیویٹ ٹیوشن دیتا ہے۔ اس نے خط تیار کیا تاکہ وہ یہ خط دکھا کر طلبا اور ان کے والدین کو مائل کر سکے۔ پولیس نے اس کے خلاف آئی پی سی کی دفعہ 465، 468، 471 اور 419 کے تحت ایف آئی آر درج کی ہے۔
خیال رہے کہ چندریان 3 نے 23 اگست کو چاند پر لینڈنگ کی تھی۔ اگلے ہی دن یعنی 24 اگست کو سورت کے متول ترویدی نے دعویٰ کیا کہ وہ چندریان 3 ڈیزائن ٹیم کا حصہ ہے اور اس نے لینڈر کو ڈیزائن کیا ہے۔ اس دعوے کے بعد اس کے گھر پر میڈیا کا تانتا لگ گیا۔ لیکن بہت سے لوگوں نے اس کے دعوے پر شک بھی کیا، کیونکہ وہ اسے ٹیوشن ٹیچر کے طور پر جانتے تھے۔ جب معاملہ پولیس تک پہنچا تو پولیس نے سرسری انداز میں کہا کہ معاملے کی جانچ کی جائے گی لیکن اس دوران بھی متول ترویدی میڈیا میں چھایا رہا۔
پولیس کے بیان کے بعد متل ترویدی گھبرا گیا اور اپنے گھر کو تالا لگا کر غائب ہو گیا۔ جب پولیس کو اس بات کا علم ہوا تو اسے بھی لگا کہ معاملہ سنگین ہے۔ پولیس نے معاملے کی جانچ سورت کرائم برانچ کو سونپ دی۔
کرائم برانچ کے ڈی سی پی ہیتل پٹیل نے تفتیش شروع کی اور آخر کار اسے ایک جگہ سے حراست میں لے لیا گیا لیکن پولیس نے نہ تو اسے گرفتار کیا اور نہ ہی اس حوالے سے کوئی اطلاع جاری کی، کیونکہ متول ترویدی چندریان 3 کی کامیابی سے مشہور ہو گیا تھا۔ پولیس کے مطابق پوچھ گچھ کے دوران جب متول ترویدی سے اس بات کا ثبوت مانگا گیا کہ وہ اسرو سے کیسے وابستہ ہے تو وہ ایسا کوئی دستاویز فراہم نہیں کر سکا۔ تاہم، اس نے ایک خط دیا جو لیٹر ہیڈ پر تھا۔ کرائم برانچ نے وہ خط اسرو کو بھیج کر معلومات طلب کیں، تو اسے اسرو نے فرضی قرار دے دیا۔
