نتیش کمار نے آج قومی جمہوری اتحاد سے تعلق توڑتے ہوئے راشٹریہ جنتا دل سمیت سات جماعتوں کی حمایت سے نئی حکومت بنانے کا دعویٰ پیش کیا
پٹنہ: بہار میں مسٹر نتیش کمار نے آج قومی جمہوری اتحاد (این ڈی اے) سے تعلق توڑتے ہوئے راشٹریہ جنتا دل (آر جے ڈی) سمیت سات جماعتوں کی حمایت سے نئی حکومت بنانے کا دعویٰ پیش کیا۔
مسٹر کمار نے منگل کو اپنی پارٹی جنتا دل یونائیٹڈ (جے ڈی یو) کے ممبران پارلیمنٹ اور ایم ایل ایز کی میٹنگ کے بعد این ڈی اے سے علیحدگی کا اعلان کیا۔ اس کے بعد انہوں نے مقررہ وقت پر گورنر پھاگو چوہان سے ملاقات کی اور وزیر اعلیٰ کے عہدے سے استعفیٰ کا خط انہیں سونپا۔
اس کے بعد انہوں نے جے ڈی یو کے 45، آر جے ڈی کے 79، کانگریس کے 19، بائیں بازو کی جماعتوں کے 16، ہندوستانی عوام مورچہ (ایچ اے ایم) کے چار اور ایک دیگر ایم ایل اے یعنی کل 164 ایم ایل اے کی حمایت کا خط پیش کیا اور نئی حکومت بنانے کا دعویٰ پیش کیا۔ اس دوران ان کے ساتھ آر جے ڈی کے سینئر لیڈر تیجسوی پرساد یادو اور بہار میں کانگریس کے انچارج بھکت چرن داس بھی موجود تھے۔
اس کے ساتھ ہی گورنر مسٹر چوہان نے مسٹر کمار کو فی الحال نئی حکومت بنانے کی دعوت نہیں دی ہے۔ حکومت سازی کی دعوت ملنے کے بعد حلف برداری کی تاریخ کا فیصلہ کیا جائے گا۔ ایسے میں گورنر نے مسٹر کمار سے ریاست کے نگراں وزیر اعلیٰ کے طور پر کام کرنے کو کہا ہے۔
