آئی فون 17 کا بے نظیر جنون: دہلی اور ممبئی کی سڑکوں پر خریداروں کی بے پناہ قطاریں
ایپل نے ایک بار پھر نیا آئی فون لانچ کیا اور بھارت میں ایسا ہنگامہ مچا دیا جیسے کوئی قومی تہوار ہو۔ آئی فون 17 سیریز کی فروخت کے آغاز نے دہلی، ممبئی اور بنگلورو کے نوجوانوں کو ایسی دوڑ میں لگا دیا کہ جیسے مفت میں بانٹ رہے ہوں۔ رات بھر قطار میں لگنا اب بس ایک شوق نہیں، ایک اسٹیٹس اپ ڈیٹ ہے – تاکہ انسٹاگرام پر لکھ سکیں: "فرسٹ ان لائن!”
بھارتی صارفین کا نیا جنون
ساکیت کے سلیکٹ سٹی واک اور ممبئی کے بی کے سی ایپل اسٹور کے باہر ایسے رش لگے جیسے کوئی فلمی اسٹار آ گیا ہو۔ لوگ صبح پانچ بجے سے لائن میں، کچھ نے تو رات ہی سے کمبل ڈال دیا تھا۔ اور پھر جب فون ہاتھ آتا ہے تو سیدھا اسٹوری لگتی ہے: “Finally got it ❤️ #iPhone17 #Blessed”
سچ پوچھیے تو آدھے لوگ فون کے فیچرز کے لیے نہیں بلکہ اپنی سیلفی کے لیے آتے ہیں تاکہ دفتر میں فخر سے کہہ سکیں: "بھائی یہ آئی فون 17 پرو میکس ہے!” اور باقی سال قسطوں کی ادائیگی میں گزاریں۔
آئی فون 17 کے کمالات یا کمال کی قیمت؟
ایپل نے A19 پرو چپ، 6.9 انچ ڈسپلے اور 48MP کے تین کیمرے دیے ہیں، جو کاغذ پر تو بڑے دھماکے لگتے ہیں لیکن آخر میں زیادہ تر لوگ وہی کرتے ہیں جو ہر فون پر کرتے ہیں: واٹس ایپ، انسٹاگرام اور یوٹیوب۔
قیمت کا حال یہ ہے کہ آئی فون 17 کی شروعات 82,900 روپے سے، پرو 1,34,900 اور پرو میکس 1,49,900 تک پہنچ گیا ہے۔ مطلب ایک فون خریدیں اور پھر اگلے بارہ مہینے "مہینے کے آخر میں پیسے کم کیوں ہیں” کی کہانی سنائیں۔
سوشل میڈیا کا کھیل
اصل مزہ تو تب آتا ہے جب لوگ فون لے کر ہر جگہ لوگو چمکاتے پھرتے ہیں۔ جیسے فون سے زیادہ اہم وہ چھوٹا سا کٹا ہوا سیب ہے۔ آپ نے نوٹ کیا ہوگا کہ نیا آئی فون لینے کے بعد لوگ فون کا بیک کور شفاف رکھتے ہیں تاکہ لوگو صاف دکھائی دے۔ ارے بھائی، فون مہنگا ہو یا سستا، فون تو فون ہی ہے، لیکن شو آف الگ ہی سطح پر ہونا چاہیے۔
بھارتی مارکیٹ میں ایپل کا جادو
ایپل جانتا ہے کہ بھارت میں لوگ برانڈ کے لیے جذباتی ہیں۔ یہی وجہ ہے کہ وہ ہر سال ذرا سا نیا فیچر دے کر قیمت بڑھا دیتا ہے اور پھر بھی اسٹور کے باہر لوگ قطار میں کھڑے رہتے ہیں۔ یہ صرف ٹیکنالوجی نہیں، ایک کلچرل فینامینا ہے۔
جو لوگ آئی فون نہ خرید پائیں وہ اگلے دن میمز بناتے ہیں:
-
"گردہ برائے فروخت، آئی فون لینا ہے”
-
"بائیک چھوڑ، آئی فون لے لے”
-
"مہینے بھر میگی کھا کر بھی فون لینا ضروری تھا”
یہ سب ہنسنے کی بات لگتی ہیں لیکن حقیقت یہی ہے کہ بہت سے لوگ بچت توڑ کر فون خریدتے ہیں اور پھر پورا سال دوستوں کو EMI کی کہانی سناتے ہیں۔
آئی فون 17 نے ایک بار پھر یہ بات ثابت کر دی کہ ایپل صرف فون نہیں بیچتا، وہ خواب بیچتا ہے، اسٹیٹس بیچتا ہے۔ اور بھارت میں یہ خواب ہر سال اور مہنگا ہو رہا ہے۔ اب دیکھنا یہ ہے کہ اگلے سال آئی فون 18 آنے پر پھر کتنے لوگ قطار میں لگیں گے اور کتنے انسٹاگرام پر لکھیں گے: “My precious!”
