حیدرآباد: کانگریس لیڈر راہل گاندھی کی تصویر کے ساتھ چھیڑ چھاڑ کر کے اسے سوشل میڈیا پر پوسٹ کرنے کے معاملہ میں کانگریس لگاتار سراپا احتجاج بنی ہوئی ہے۔ اسی سلسلہ میں تلنگانہ کے ضلع کھمم میں کانگریس کے کارکنوں اور لیڈروں نے احتجاج کیا۔
خیال رہے کہ بی جے پی کی جانب سے راہل گاندھی کی قابل اعتراض تصویر تیار کر کے اسے پارٹی کے آفیشل ایکس ہینڈل پر پوسٹ کیا گیا تھا۔ کانگریس کے لیڈروں نے اس تصویر پر شدید برہمی کا اظہار کیا ہے۔
کھمم ضلع کے پرانے بس اسٹینڈ سنٹر کے قریب کانگریس کے مقامی لیڈروں اور کارکنوں کی بڑی تعداد نے جمع ہو کر احتجاج کیا اور وزیراعظم مودی کا پتلا نذرآتش کیا۔ ان احتجاجیوں نے اپنے ہاتھوں میں کانگریس کا پرچم تھام کر بی جے پی اور حکومت کے خلاف نعرے بازی کی۔
انہوں نے اس موقع پر مطالبہ کیا کہ راہل گاندھی کی قابل اعتراض تصویر کو ایکس سے فوری طور پر حذف کیا جائے اور بی جے پی اس پر معذرت طلب کرے۔ اس احتجاج کے سبب کچھ دیر کے لئے علاقہ میں کشیدگی پھیل گئی۔
