اس میں کوئی اختلاف نہیں کہ اجیت پووار ہمارے لیڈر ہیں: شرد پوار

ممبئی: نیشنلسٹ کانگریس پارٹی کے سربراہ شرد پوار نے اجیت پوار کو پارٹی لیڈر قرار دیا ہے۔ بارامتی میں انہوں نے کہا ’’اس میں کوئی اختلاف نہیں ہے کہ وہ (اجیت پوار) ہمارے لیڈر ہیں، این سی پی میں کوئی تقسیم نہیں ہے۔‘‘

خبر رساں ایجنسی اے این آئی کے مطابق شرد پوار نے مزید کہا کہ پارٹی میں پھوٹ کیسے ہوتی ہے؟ ایسا اس وقت ہوتا ہے جب قومی سطح پر ایک بڑا گروپ پارٹی سے الگ ہو جاتا ہے۔ لیکن آج این سی پی میں ایسی کوئی صورتحال نہیں ہے۔ ہاں، کچھ لیڈروں نے مختلف موقف اختیار کیا لیکن اسے تقسیم نہیں کہا جا سکتا۔ وہ جمہوریت میں ایسا کر سکتے ہیں۔

گزشتہ جولائی میں، اجیت پوار کی قیادت میں این سی پی میں ایک بڑی بغاوت ہوئی تھی، جب پارٹی کے ایک حصے نے مہاراشٹر میں ایکناتھ شندے کی قیادت والی حکومت میں شمولیت اختیار کی تھی۔ اجیت پوار سمیت پارٹی کے 9 ایم ایل اے شنڈے کی کابینہ کا حصہ بنے۔ اجیت پوار کو نائب وزیر اعلیٰ کا عہدہ ملا۔

اجیت پوار کے ساتھ حکومت میں شامل ہونے والوں میں چھگن بھجبل، دھننجے منڈے، انل پاٹل، دلیپ والسے پاٹل، دھرماراؤ اترم، سنجے بنسوڑے، ادیتی تٹکرے اور حسن مشرف شامل تھے۔ ان میں بھجبل، دھننجے منڈے، حسن مشرف جیسے لوگ شرد پوار کے بہت قریب مانے جاتے تھے۔

اس کے ساتھ ہی این سی پی کے ورکنگ صدر پرفل پٹیل بھی اجیت پوار کے دھڑے کے ساتھ گئے۔ پٹیل کو جون میں ہی پارٹی کے یوم تاسیس پر شرد پوار کے ساتھ سپریا سولے نے ورکنگ صدر بنایا تھا۔