پولیس ذرائع نے بتایا کہ عتیق اور اشرف قتل معاملے میں شاہ گنج تھانہ ایس ایچ او اشونی کمار سنگھ، دو سب انسپکٹر اور تین کانسٹیبل کو بدھ کو معطل کردیا گیا
پریاگ راج: شہ زور لیڈر و سابق ایم پی عتیق احمد اور ان کے بھائی خالد عظیم عرف اشرف علی کی پولیس حراست میں قتل کے معاملے میں شاہ گنج تھانے کے ایس ایچ او اشونی کمار سنگھ سمیت پانچ پولیس اہلکار کو بدھ کو معطل کردیا گیا۔
پولیس ذرائع نے بتایا کہ عتیق اور اشرف قتل معاملے میں شاہ گنج تھانہ ایس ایچ او اشونی کمار سنگھ، دو سب انسپکٹر اور تین کانسٹیبل کو بدھ کو معطل کردیا گیا۔ ایس آئی ٹی کی جانچ میں ڈیوٹی کی ادائیگی میں لاپرواہی پائ جانے پر یہ قدم اٹھایا گیا ہے۔
قابل ذکر ہے کہ ہفتہ کو سابق ایم پی عتیق احمد اور ان کے بھائی اشرف کی پولیس حراست میں اس وقت گولی مار کر قتل کردیا گیا تھا جب پولیس انہیں میڈیکل جانچ کے لئے اسپتال لے جارہی تھی۔ شاہ گنج تھانہ کالون اسپتال سے چند قدم کی دوری پر واقع ہے۔
پولیس کمشنر روی شرما نے اس واقعہ کی جانچ کے لئے اڈیشنل پولیس کمشنر (کرائم) ستیش چندر کی قیادت میں تین رکنی خصوصی جانچ ٹیم (ایس آئی ٹی) تشکیل دی ہے۔ دو دیگر اراکین میں اے سی پی کوتوالی ستیندر پرساد تیواری اور انسپکٹر اوم پرکاش شامل ہیں۔
