آل انڈیا مسلم مجلس کے صدر پروفیسر ڈاکٹر بصیر احمد خاں نے اسدالدین اویسی صاحب پر ہوئے قاتلانہ حملے کی شدید مذمت کی
نئی دہلی: آل انڈیا مسلم مجلس کے صدر پروفیسر ڈاکٹر بصیر احمد خاں نے اسدالدین اویسی صاحب پر ہوئے قاتلانہ حملے کی شدید مذمت کرتے ہوئے اسے ایک منصوبہ سازش کا حصہ قرار دیا ہے۔ یہ بات انہوں نے آج یہاں جاری ایک ریلیز میں کہی ہے۔
انہوں نے ایک بیان میں الزام لگایا کہ بی جے پی کی یوگی حکومت ہر محاذ پر ناکام ثابت ہوئی ہے۔ بڑھتی ہوئی بیروزگاری، کمرتوڑ مہنگائی، کمزوروں پر ظلم، لاقانونیت، بدانتظامی اور کسان مخالف پالیسیوں کے باعث بی جے پی کو الیکشن میں ہار کا خوف ستارہا ہے۔ اسی لئے وہ انگریزوں کی لڑاؤ اور حکومت کردکی پالیسی اپنا رہی ہے اور الیکشن کو ہندومسلم بناکر شکست سے بچنے کی کوشش کررہی ہے۔
انہوں نے دعوی کیا کہ وزیر داخلہ امیت شاہ اور وزیر اعلیٰ یوگی آدتیہ ناتھ مسلسل فرقہ وارانہ تقریریں کرکے ماحول بگاڑنے کا کام کرہے ہیں اور بار بار کیرانہ اور مظفر نگر کی تکرار کررہے ہیں۔ اویسی صاحب پر حملہ بھی اسی نفرت انگیز مہم کا حصہ ہے۔
یہ حملہ صرف دونوں جوانوں کے شیطانی دماغوں کی کارستانی نہیں ہے بلکہ اس کے تار ہری دوار اور پریاگ راج کی دھرم سنسند سے جڑے ہوئے ہیں۔ لہذا سپریم کورٹ کی نگرانی میں ایس آئی ٹی تشکیل دے کر اسکی تحقیقات کرائی جائے اور قصورواروں کو سخت سزادی جائے۔
