بڈگام ضلع کے موچھو علاقے میں ایک شبانہ مسلح تصادم کے دوران سیکیورٹی فورسز نے ایک عدم شناخت دہشت گرد کو ہلاک کیا ہے۔
سری نگر: وسطی ضلع بڈگام کے موچھو علاقے میں ایک شبانہ مسلح تصادم کے دوران سیکیورٹی فورسز نے ایک دہشت گرد کو ہلاک کیا ہے۔
جموں و کشمیر پولیس کے ایک ترجمان نے بتایا کہ ضلع بڈگام کے موچھو میں ہفتہ کی علی الصبح ہونے والے ایک مسلح تصادم کے دوران ایک دہشت گرد کو ہلاک کیا گیا ہے۔
ان کا مزید کہنا تھا: ‘موچھو بڈگام میں ایک عدم شناخت دہشت گرد مارا گیا۔ ایک اے کے 47 اور ایک پستول برآمد ہوئی ہے۔ تلاشی آپریشن جاری ہے’۔
سرکاری ذرائع نے بتایا کہ ضلع بڈگام کے موچھو علاقے میں دہشت گردوں کی موجودگی سے متعلق خفیہ اطلاع ملنے پر جموں و کشمیر پولیس، فوج کی راشٹریہ رائفلز اور سی آر پی ایف نے جمعہ کی رات دیر گئے مذکورہ علاقے کو محاصرے میں لے کر تلاشی آپریشن شروع کیا۔
انہوں نے بتایا کہ ایک مشتبہ جگہ کی جانب پیش قدمی کے دوران وہاں موجود دہشت گردوں نے سیکیورٹی فورسز پر فائرنگ کی جس کے بعد طرفین کے درمیان باضابطہ طور تصادم شروع ہوا۔
سرکاری ذرائع نے بتایا کہ محاصرے میں پھنسنے والے دہشت گردوں کو خودسپردگی اختیار کرنے کی پیشکش کی گئی جو انہوں نے مسترد کی۔
انہوں نے مزید بتایا کہ آخری اطلاعات ملنے تک مسلح تصادم میں ایک دہشت گرد کو مارا جا چکا تھا جس کی لاش برآمد کی گئی ہے۔
