بی جے پی کے قومی صدر جے پی نڈا نے اپنے ایک ٹویٹ میں کہا کہ جی ایچ ایم سی کے نتائج خاندانی، رشوت خوری اور خوشامد کی سیاست کو مسترد کرتے ہیں۔ یقین اور بھروسہ کے لئے میں حیدرآباد کے شہریوں کا مشکور ہوں۔
حیدرآباد: بی جے پی کے قومی صدر جے پی نڈا نے کہا ہے کہ جی ایچ ایم سی انتخابات کے نتائج خاندانی اور رشوت خوری کی سیاست کو مسترد کرنے کا اظہار کرتے ہیں۔
انہوں نے ٹوئٹر پر اپنے ایک ٹویٹ میں کہا ”جی ایچ ایم سی کے نتائج خاندانی، رشوت خوری اور خوشامد کی سیاست کو مسترد کرتے ہیں، میں ریاستی صدر بنڈی سنجے اور سخت محنت کرنے والے بی جے پی کے کارکنوں کو اس کامیابی کے لئے جذبہ کے ساتھ کی گئی مساعی پر مبارکباد پیش کرتا ہوں۔ یقین اور بھروسہ کے لئے میں حیدرآباد کے شہریوں کا مشکور بھی ہوں“۔
نڈا نے کہا ”حیدرآباد کے جی ایچ ایم سی انتخابات میں بی جے پی کے لئے تاریخی نتائج رہے جنہوں نے یہ بتادیا ہے کہ ملک کے عوام صرف اور صرف ترقی کے ایجنڈہ کی ہی حمایت کرتے ہیں۔ یہ نتائج عوام کی واضح طور پر وزیراعظم نریندر مودی کے ترقی اور حکمرانی کے ماڈل کو حمایت کا اظہار ہے“۔
